ತಂದೆಯ ವರ್ಷದ ಸಂಬಳದಿಂದ ಮೊದಲ ವಿಮಾನ ಯಾನದ ಟಿಕೆಟ್ ಬುಕ್ ಮಾಡಿದ್ದರು ಗೂಗಲ್ ಸಿಇಒ ಪಿಚೈ
ನವದೆಹಲಿ, ಜೂನ್ 10: ಮೂಲತಃ ಚೆನ್ನೈನವರಾದ ಗೂಗಲ್ ಸಿಇಒ ಸುಂದರ್ ಪಿಚೈ ಕಾರ್ಯಕ್ರಮವೊಂದರಲ್ಲಿ ಹಳೆಯ ನೆನಪುಗಳನ್ನು ನೆನಪಿಸಿಕೊಂಡಿದ್ದಾರೆ. ಇಂದು ಅತ್ಯುನ್ನತ ಸ್ಥಾನಕ್ಕೆ ಏರಿರುವ ಸುಂದರ್ ಪಿಚೈ ತಮ್ಮ ವಿದ್ಯಾರ್ಥಿ ಜೀವನ, ತಂದೆಯ ಗಳಿಕೆ, ಮೊದಲ ವಿಮಾನ ಯಾನದ ಅನುಭವಗಳನ್ನು ವಿದ್ಯಾರ್ಥಿಗಳೊಂದಿಗೆ ಹಂಚಿಕೊಂಡಿದ್ದಾರೆ.
ವಿದ್ಯಾರ್ಥಿಗಳಿಗಾಗಿ ಸುಂದರ್ ಪಿಚೈ ಯೂಟ್ಯೂಬ್ನಲ್ಲಿ ನಡೆಸಿಕೊಟ್ಟ ‘ಡಿಯರ್ ಕ್ಲಾಸ್ ಆಫ್ 2020’ ಕಾರ್ಯಕ್ರಮದಲ್ಲಿ ಉನ್ನತ ಶಿಕ್ಷಣಕ್ಕಾಗಿ ಅಮೆರಿಕಕ್ಕೆ ತೆರಳಬೇಕಾಗಿ ಬಂದಾಗ, ಅವರ ತಂದೆ ವರ್ಷದ ಗಳಿಕೆಯ ಹಣವನ್ನೆಲ್ಲಾ ಸೇರಿಸಿ ಅವರಿಗೆ ವಿಮಾನದ ಟಿಕೆಟ್ ಗೆ ಹಣ ಕೊಟ್ಟಿದ್ದರೆಂದು ಎಂಬ ವಿಷಯವನ್ನು ಹೇಳಿಕೊಂಡಿದ್ದಾರೆ.
‘ಡಿಯರ್ ಕ್ಲಾಸ್ ಆಫ್ 2020’ ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳ ಬಳಿ ಸುಂದರ್ ಪಿಚೈ ಕಾಲೇಜ್ ದಿನಗಳಲ್ಲಿ ಅಮೆರಿಕ ಎಂದರೆ ತುಂಬಾ ದುಬಾರಿ ದೇಶ ಎನಿಸುತ್ತಿತ್ತು. ಭಾರತಕ್ಕೆ ಒಂದು ಫೋನ್ ಕಾಲ್ ಮಾಡಲು 2 ಡಾಲರ್ ಬೇಕಾಗುತ್ತಿತ್ತು. ಅದು ಅಂದು ತನ್ನ ತಂದೆಯ ಒಂದು ತಿಂಗಳ ಸಂಬಳವಾಗಿತ್ತು ಎಂದು ಹಿಂದಿನ ದಿನಗಳ ನೆನಪಿನಾಳಕ್ಕೆ ಇಳಿದಿದ್ದಾರೆ. 47 ವರ್ಷದ ಸುಂದರ್ ಪಿಚೈ ಯುಎಸ್‌ ನ ಸ್ಟ್ಯಾನ್ಫೋರ್ಡ್ ವಿಶ್ವವಿದ್ಯಾಲಯದಲ್ಲಿ ತಮ್ಮ ಅಧ್ಯಯನವನ್ನು ಮುಂದುವರಿಸಲು ಭಾರತವನ್ನು ತೊರೆದಾಗ ಎದುರಿಸಿದ ಸವಾಲುಗಳನ್ನು ವಿವರಿಸಿದ್ದಾರೆ.
ಕೊರೋನಾದ ಈ ಸಂಕಷ್ಟದ ಸಮಯದಲ್ಲಿ ತಾಳ್ಮೆಯಿಂದ ಇರಿ ಹಾಗೂ ಎಂದಿಗೂ ನಂಬಿಕೆ ಕಳೆದುಕೊಳ್ಳಬೇಡಿ ಎಂದು ವಿದ್ಯಾರ್ಥಿಗಳಿಗೆ ವಿಶ್ವಾಸ ತುಂಬಿದ್ದಾರೆ.
ಸುಂದರ್ ಪಿಚೈ ಅವರ ಈ ವಿಶೇಷ ಕ್ಲಾಸ್ ಯೂಟ್ಯೂಬ್ನಲ್ಲಿ ಪ್ರಸಾರವಾಗಿದ್ದು, ವಿದ್ಯಾರ್ಥಿಗಳ ಜೊತೆಗೆ ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮ ಮತ್ತು ಮಾಜಿ ಪ್ರಥಮ ಮಹಿಳೆ ಮಿಚೆಲ್ ಒಬಾಮ, ಕೊರಿಯಾದ ಪಾಪ್ ಗುಂಪು ಬಿಟಿಎಸ್, ಗಾಯಕರು ಬೆಯಾನ್ಸ್ ಮತ್ತು ಲೇಡಿ ಗಾಗಾ, ಮಾಜಿ ರಕ್ಷಣಾ ಕಾರ್ಯದರ್ಶಿ ರಾಬರ್ಟ್ ಎಂ ಗೇಟ್ಸ್, ಮಾಜಿ ವಿದೇಶಾಂಗ ಕಾರ್ಯದರ್ಶಿ ಕೊಂಡೋಲೀಜಾ ರೈಸ್ ಸೇರಿದಂತೆ ಹಲವಾರು ಗಣ್ಯರು ವೀಕ್ಷಿಸಿದ್ದಾರೆ.
