ಬೆಂಗಳೂರು: ತನ್ನ ವಿಶಿಷ್ಟ ಪಬ್ ಹಾಗೂ ಲೈಫ್‌ಸ್ಟೈಲ್ ಸಂಸ್ಕೃತಿಗೆ ಹೆಸರುವಾಸಿಯಾಗಿರುವ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಜಾಗತಿಕ ಮಟ್ಟದ ‘ಅಕ್ಟೋಬರ್ಫೆಸ್ಟ್’ ಸಂಭ್ರಮ ಇತ್ತೀಚೆಗೆ ನಡೆಯಿತು. ‘ಬಜ್ಜಿನ್‌ಆನ್’ ಸಹಯೋಗದೊಂದಿಗೆ ನಗರದ ಪ್ರಸಿದ್ಧ ಎಕೋವರ್ಲ್ಡ್‌ನ ‘ದಿ ಬೇ’ ಆವರಣದಲ್ಲಿ ನಡೆದ ಈ ‘ದಿ ಗ್ರೇಟ್ ಇಂಡಿಯನ್ ಬ್ರೂ ಫೆಸ್ಟಿವಲ್ – 2026’ (ಜಿಐಬಿಎಫ್‌)ನಲ್ಲಿ ಸಾವಿರಾರು ಬಿಯರ್ ಪ್ರಿಯರು, ಆಹಾರ ಪ್ರೇಮಿಗಳು ಮತ್ತು ಸಂಗೀತಾಸಕ್ತರು ಭಾಗವಹಿಸಿ ದಿನವಿಡೀ ಎಂಜಾಯ್ ಮಾಡಿದರು.
50ಕ್ಕೂ ಹೆಚ್ಚು ತಳಿಯ ಬಿಯರ್‌ಗಳ ರಸದೌತಣ!
ಬೆಂಗಳೂರು ಹಾಗೂ ದೇಶದ ವಿವಿಧ ಭಾಗಗಳ ಪ್ರಮುಖ ಬ್ರ್ಯಾಂಡ್‌ಗಳು, ಕ್ರಾಫ್ಟ್ ಬ್ರೂವರೀಸ್‌ಗಳು ಮತ್ತು ಸ್ಪೆಷಾಲಿಟಿ ಬ್ರ್ಯಾಂಡ್‌ಗಳು ಈ ಉತ್ಸವದಲ್ಲಿ ಒಂದೇ ಸೂರಿನಡಿ ಮೇಳೈಸಿದ್ದವು. ಬರೋಬ್ಬರಿ 50ಕ್ಕೂ ಹೆಚ್ಚು ಬಗೆಯ ವೈವಿಧ್ಯಮಯ ಬಿಯರ್‌ಗಳು ಈ ಉತ್ಸವದ ಪ್ರಮುಖ ಆಕರ್ಷಣೆಯಾಗಿದ್ದವು. ಜನರು ತಮ್ಮಿಷ್ಟದ ಬಿಯರ್ ಸವಿಯುವುದರ ಜೊತೆಗೆ, ಮಾರುಕಟ್ಟೆಗೆ ಹೊಸದಾಗಿ ಬಂದಿರುವ ವಿವಿಧ ರುಚಿಯ ಹೊಸ ಹೊಸ ಬ್ರೂಗಳನ್ನು ಟೇಸ್ಟ್ ಮಾಡಿ ಖುಷಿಪಟ್ಟರು.
ಬಾಯಲ್ಲಿ ನೀರೂರಿಸುವ ಆಹಾರ ಮತ್ತು ಲೈವ್ ಮ್ಯೂಸಿಕ್!
ಕೇವಲ ಬಿಯರ್ ಮಾತ್ರವಲ್ಲದೆ, ಆಹಾರ ಪ್ರಿಯರಿಗಾಗಿ ‘ಕಂಪೋಟ್’, ‘ನಾಸಿ & ಮೀ’ ಮತ್ತು ‘ದಿ ಸ್ಪೈಸ್ ಕಾರಿಡಾರ್’ನಂತಹ ಖ್ಯಾತ ಬ್ರ್ಯಾಂಡ್‌ಗಳು ಬಗೆಬಗೆಯ ಖಾದ್ಯಗಳನ್ನು ಸಿದ್ಧಪಡಿಸಿದ್ದವು. ಇದರ ಜೊತೆಗೆ ಇಡೀ ದಿನ ನಡೆದ ಲೈವ್ ಮ್ಯೂಸಿಕ್, ವಿನೋದಮಯ ಆಟಗಳು ಮತ್ತು ಸಂವಾದಾತ್ಮಕ ಚಟುವಟಿಕೆಗಳು ಯುವಜನತೆಯ ಮನಸೆಳೆದವು. ‘ದಿ ಬೇ’ಯ ವಿಶಾಲವಾದ ಹೊರಾಂಗಣದಲ್ಲಿ ಸಿದ್ಧಪಡಿಸಲಾಗಿದ್ದ ವಿಶೇಷ ವಲಯಗಳು ಮಧ್ಯಾಹ್ನದ ಆಹ್ಲಾದಕರ ವಾತಾವರಣವನ್ನು ಸಂಜೆಯಾಗುತ್ತಿದ್ದಂತೆ ಅತ್ಯಂತ ರೋಮಾಂಚಕ ಪಾರ್ಟಿ ಮೂಡ್‌ಗೆ ಬದಲಾಯಿಸಿದವು.
ಈ ಯಶಸ್ವಿ ಉತ್ಸವದ ಬಗ್ಗೆ ಸಂತಸ ಹಂಚಿಕೊಂಡಿರುವ ಬಿಜಿಆರ್‌ಇ ಇಂಡಿಯಾದ ಉಪಾಧ್ಯಕ್ಷ ಮತ್ತು ರಿಟೇಲ್ ಮುಖ್ಯಸ್ಥ ನಿತಿನ್ ಬೀರ್, “ಎಕೋವರ್ಲ್ಡ್‌ನ ‘ದಿ ಬೇ’ ಕೇವಲ ಕಚೇರಿ ಕೆಲಸಕ್ಕಷ್ಟೇ ಸೀಮಿತವಾಗದೆ, ಜನರು ಕೆಲಸದ ಒತ್ತಡದಿಂದ ಹೊರಬಂದು ಹೊಸ ಅನುಭವಗಳನ್ನು ಆನಂದಿಸುವ ತಾಣವಾಗಬೇಕು ಎಂಬುದು ನಮ್ಮ ಕನಸಾಗಿತ್ತು. ಬೆಂಗಳೂರಿನ ಜನರ ಬಿಯರ್, ಉತ್ತಮ ಆಹಾರ, ಸಂಗೀತ ಮತ್ತು ಸಮುದಾಯ ಪ್ರೀತಿಯನ್ನು ಈ ಉತ್ಸವ ಒಂದೇ ವೇದಿಕೆಯಲ್ಲಿ ಅದ್ಭುತವಾಗಿ ಸಾಕಾರಗೊಳಿಸಿದೆ,” ಎಂದರು.
ಬಜ್ಜಿನ್‌ಆನ್‌ನ ಸಂಸ್ಥಾಪಕಿ ಸ್ಮೃತಿ ಮೆನನ್ ಪ್ರತಿಕ್ರಿಯಿಸಿ, “ಉತ್ತಮ ಬಿಯರ್, ರುಚಿಕರ ಆಹಾರ ಮತ್ತು ಮರೆಯಲಾಗದ ಅನುಭವಗಳ ಮೂಲಕ ಬೆಂಗಳೂರಿನ ಜನರನ್ನು ಒಟ್ಟಿಗೆ ಸೇರಿಸುವುದೇ ನಮ್ಮ ಮುಖ್ಯ ಉದ್ದೇಶ. ಈ ಬಾರಿಯ ಅಕ್ಟೋಬರ್ಫೆಸ್ಟ್ ಆವೃತ್ತಿಗೆ ಸಿಕ್ಕ ಅಭೂತಪೂರ್ವ ಸ್ಪಂದನೆ ನಮಗೆ ಅಪಾರ ಸಂತಸ ತಂದಿದೆ,” ಎಂದು ಹೇಳಿದರು.
ಒಟ್ಟಿನಲ್ಲಿ, ಜಾಗತಿಕ ರಿಯಲ್ ಎಸ್ಟೇಟ್ ದಿಗ್ಗಜ ಸಂಸ್ಥೆಯಾದ ಬಿಜಿಆರ್‌ಇ ನಿರ್ವಹಿಸುವ ‘ದಿ ಬೇ ಅಟ್ ಎಕೋವರ್ಲ್ಡ್’ನಲ್ಲಿ ನಡೆದ ಈ ಬ್ರೂ ಫೆಸ್ಟಿವಲ್, ಬೆಂಗಳೂರಿನ ಬದಲಾಗುತ್ತಿರುವ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಜೀವನಶೈಲಿಗೆ ಮತ್ತೊಂದು ಗರಿ ತಂದುಕೊಟ್ಟಿದೆ.
