ಲೈಟ್ನಿಂಗ್ ಸ್ಟಾರ್ ಉಸೇನ್ ಬೋಲ್ಟ್ಗೆ 35ನೇ ಹುಟ್ಟು ಹಬ್ಬದ ಶುಭಾಶಯಗಳು..!
ವಿಶ್ವ ಅಥ್ಲೆಟಿಕ್ ರಂಗದ ಸುನಾಮಿ… ಚಿರತೆಯನ್ನ ನಾಚಿಸುವಂತಹ ಓಟ… ಗಂಟೆಗೆ 37 ಕಿಲೋ ಮೀಟರ್ ವೇಗದಲ್ಲಿ ಓಡುವ ಮಾನವ… ಅಭಿಮಾನಿಗಳ ಪಾಲಿನ ನೆಚ್ಚಿನ ಲೈಟ್ನಿಂಗ್ ಸ್ಟಾರ್.. ಶರವೇಗದ ಸರದಾರ… ಉಸೇನ್ ಸೇಂಟ್ ಲಿಯೋ ಬೋಲ್ಟ್… ಹೌದು, ಉಸೇನ್ ಬೋಲ್ಟ್ ಓಟವೇ ಅಂತಹುದ್ದು. ಒಂದು ಕ್ಷಣ ಇಡೀ ಜಗತ್ತನ್ನೇ ತನ್ನತ್ತ ಸೆಳೆಯುವ ಮಾಂತ್ರಿಕತೆ ಇತ್ತು. ಅಷ್ಟೇ ಅಲ್ಲ, ಉಸೇನ್ ಓಡ್ತಾರೆ ಅಂದ್ರೆ ಕ್ರೀಡಾಂಗಣವೇ ಭರ್ತಿಯಾಗುತ್ತಿತ್ತು. ಜತೆಗೆ ಉಸೇನ್… ಉಸೇನ್… ಉಸೇನ್ ಅನ್ನೋ ಕೂಗು ಪ್ರತಿಧ್ವನಿಯಾಗಿ ಕೇಳಿ ಬರುತ್ತಿತ್ತು. ಯಾಕಂದ್ರೆ, ಬೋಲ್ಟ್, ಕಣ್ಣು ಮುಚ್ಚಿ ಬಿಡುವಷ್ಟರಲ್ಲಿ ಗುರಿ ತಲುಪುವ ಮಾನವ ರಾಕೆಟ್. ಈ ರಾಕೆಟ್ ಮಾನವನ ಓಟವನ್ನ ಕಣ್ಣು ತುಂಬಿಕೊಳ್ಳಬೇಕು ಅನ್ನೋ ತುಡಿತ ಕ್ರೀಡಾಭಿಮಾನಿಗಳಲ್ಲಿರುತ್ತಿತ್ತು. ಹಾಗೇ, ಉಸೇನ್ ಬೋಲ್ಟ್ ಕೂಡ ಅಭಿಮಾನಿಗಳ ನಿರೀಕ್ಷೆಗೆ ತಕ್ಕಂತೆ ಸ್ಪಂದಿಸುತ್ತಿದ್ದರು. ಇನ್ನು, ಅಭಿಮಾನಿಗಳತ್ತ ಬಿಲ್ಲು ಬಿಡುವ ಶೈಲಿಯಲ್ಲಿ ಗೆಲುವಿನ ಸಂಭ್ರಮವನ್ನ ಹಂಚಿಕೊಳ್ಳುವ ಬೋಲ್ಟ್ ಸ್ಟೈಲ್ಲೇ ಒಂಥರಾ ಡಿಫರೆಂಟ್. ಅಂದ ಹಾಗೇ ಉಸೇನ್ ಬೋಲ್ಟ್ ಜಗತ್ತಿನ ವೇಗದೂತನಾಗುತ್ತಾರೆ ಅಂತ ಯಾರು ಕೂಡ ಅಂದುಕೊಂಡಿರಲಿಲ್ಲ. ಜಮೈಕಾದ ಟ್ರೆಲ್ವಾನಾ ಪಟ್ಟಣದ ಹುಡುಗ ಉಸೇನ್ ಬೋಲ್ಟ್. ಅಪ್ಪ ವೆಲ್ಲೆಸ್ಲಿ ಬೋಲ್ಟ್, ಅಮ್ಮ ಜೆನ್ನಿಫರ್ ಬೋಲ್ಟ್.. ದಿನಸಿ ಅಂಗಡಿಯನ್ನಿಟ್ಟು ಕೊಂಡು ಸಂಸಾರ ಸಾಗಿಸುತ್ತಿದ್ರು. ಅಣ್ಣ ತಂಗಿಯ ಜತೆ ಬೆಳೆದ ಹುಡುಗ ಉಸೇನ್ ಬೋಲ್ಟ್ ಗೆ ಕ್ರಿಕೆಟ್ ಅಂದ್ರೆ ಪಂಚ ಪ್ರಾಣ. ಅದ್ರಲ್ಲೂ ಪಾಕಿಸ್ಥಾನ ತಂಡದ ಅಭಿಮಾನಿಯಾಗಿದ್ದ ಉಸೇನ್ಗೆ ವಕಾರ್ ಯೂನಸ್ ಅವ್ರ ಪಕ್ಕಾ ಅಭಿಮಾನಿ. . ಹೀಗೆ ಶಾಲಾ ದಿನಗಳಲ್ಲಿ ಕ್ರಿಕೆಟ್ ಆಡುತ್ತಿದ್ದ ಬೋಲ್ಟ್ ಅಂಗಣದಲ್ಲಿ ಮಿಂಚಿನಂತೆ ಓಡುತ್ತಿದ್ರು. ಇದನ್ನ ಗಮನಿಸಿದ ಕ್ರಿಕೆಟ್ ಕೋಚ್ ಟ್ರ್ಯಾಕ್ ಆಂಡ್ ಫಿಲ್ಡ್ ನತ್ತ ಗಮನಹರಿಸುವಂತೆ ಸಲಹೆ ನೀಡಿದ್ರು. ಇದ್ರಿಂದ ಶಾಲಾ ಕ್ರೀಡಾಕೂಟಗಳಲ್ಲಿ ಬೋಲ್ಟ್ ವೇಗದ ಓಟಗಾರ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ರು. ಆದ್ರೆ ಬೋಲ್ಟ್ ಗೆ ಇದು ಇಷ್ಟವಿರಲಿಲ್ಲ. ಅಪ್ಪ- ಅಮ್ಮನ ಒತ್ತಾಯಕ್ಕಾಗಿ ಓಡುತ್ತಿದ್ರು. ಆದ್ರೂ ಜಮೈಕಾದಲ್ಲಿ 200 ಮೀಟರ್ಮತ್ತು 400 ಮೀಟರ್ ಓಟಗಳಲ್ಲಿ ಮಿಂಚು ಹರಿಸಿದ ಬೋಲ್ಟ್ 2001ರಲ್ಲಿ ವಿಶ್ವ ಯೂತ್ ಅಥ್ಲೆಟಿಕ್ ಚಾಂಪಿಯನ್ಷಿಪ್ನಲ್ಲಿ ಭಾಗವಹಿಸಿದ್ರು. ಆದ್ರೆ ಸೆಮಿಫೈನಲ್ನಲ್ಲಿ ನಿರಾಸೆ ಅನುಭವಿಸಿದ್ದ ಬೋಲ್ಟ್, 2002ರ ವಿಶ್ವ ಯೂತ್ ಅಥ್ಲೆಟಿಕ್ ಚಾಂಪಿಯನ್ಷಿಪ್ನಲ್ಲಿ ಚಿನ್ನ ಗೆದ್ದು ಬೀಗಿದ್ರು. ನಂತ್ರ ಹಿಂತಿರುಗಿ ನೋಡಲೇ ಇಲ್ಲ. ಉಸೇನ್ ಓಟಕ್ಕೆ ಮನಸೋತ ಪ್ರತಿಷ್ಠಿತ ಪ್ಯೂಮಾ ಕಂಪೆನಿ ಪ್ರಾಯೋಜಕತ್ವ ಕೂಡ ನೀಡಿತ್ತು. 17ರ ಹರೆಯದಲ್ಲೇ ಅಂತಾರಾಷ್ಟ್ರೀಯ ಮಟ್ಟದಲ್ಲೇ ಸುದ್ದಿ ಮಾಡಿದ ಉಸೇನ್, ಅಥೆನ್ಸ್ ಒಲಿಂಪಿಕ್ಸ್ನ ವೇಗದೂತನಾಗುತ್ತಾರೆ ಅಂತಲೇ ಭವಿಷ್ಯ ನುಡಿಯಲಾಗಿತ್ತು. ಆದ್ರೆ ಯಶಸ್ಸಿನ ಆಮಲು ಬೋಲ್ಟ್ ಅವ್ರನ್ನ ಅಡ್ಡ ದಾರಿ ಹಿಡಿಯುವಂತೆ ಮಾಡಿತ್ತು. ಪಾರ್ಟಿ, ಡಾನ್ಸ್, ಶೋಕಿ ಜೀವನ ಸಾಗಿಸುತ್ತಿದ್ದ ಬೋಲ್ಟ್ ಗಾಯದ ಸಮಸ್ಯೆಗೂ ತುತ್ತಾದ್ರು. ಇದ್ರಿಂದ ಅಥೆನ್ಸ್ ಒಲಿಂಪಿಕ್ಸ್ ನಲ್ಲಿ ಗಾಯದಿಂದ ಚೇತರಿಸಿಕೊಳ್ಳದೇ ಕಣಕ್ಕಿಳಿದ್ರು. ಪರಿಣಾಮ ಮೊದಲ ಸುತ್ತಿನಲ್ಲೇ ನಿರಾಸೆ ಅನುಭವಿಸಿದ್ರು. ಇದು ಬೋಲ್ಟ್ ಅವ್ರನ್ನ 
ಘಾಸಿಗೊಳಿಸುವಂತೆ ಮಾಡಿತ್ತು. ಸೋಲು ಒಪ್ಪಿಕೊಳ್ಳಲು ರೆಡಿ ಇಲ್ಲದ ಉಸೇನ್ ಬದುಕಿನಲ್ಲಿ ಸಾಕಷ್ಟು ಬದಲಾದ್ರು. ಅಥ್ಲೆಟಿಕ್ಸ್ ತನ್ನ ಉಸಿರು ಅಂತ ನಂಬಿಕೊಂಡ್ರು. ನೂರು ಮತ್ತು 200 ಮೀಟರ್ ಓಟಗಳಲ್ಲಿ ತ್ರಿವಿಕ್ರಮನಾಗಬೇಕು ಅಂತ ಪಣತೊಟ್ರು. ಅದಕ್ಕಾಗಿ ಫಿಟ್ಜ್ ಕೊಲೆಮನ್ ಗರಡಿಯಲ್ಲಿ ಪಳಗಿದ್ರು. ಸುಸ್ತಾಗುವಷ್ಟು ಅಭ್ಯಾಸ ನಡೆಸುತ್ತಿದ್ದ ಬೋಲ್ಟ್ ತನ್ನ ವೇಗವನ್ನ ಹೆಚ್ಚಿಸಿಕೊಂಡ್ರು. ಸ್ವಿಮ್ಮಿಂಗ್ ಫೂಲ್ನಲ್ಲಿ ಓಡ್ಕೊಂಡು, .ಸೊಂಟಕ್ಕೆ ಟಯರ್ ಕಟ್ಕೊಂಡು ಅಭ್ಯಾಸ ನಡೆಸುತ್ತಿದ್ದ ಬೋಲ್ಟ್ ಜಿಮ್ನಲ್ಲೂ ಬೆವರಿಳಿಸಿದ್ರು. ಹೀಗೆ ಕಠಿಣ ಅಭ್ಯಾಸ ಮಾಡ್ಕೊಂಡು ಮಹತ್ವದ ಕ್ರೀಡಾಕೂಟಗಳಲ್ಲಿ ಸ್ಪರ್ಧಿಸಿ ಬೀಜಿಂಗ್ ಒಲಿಂಪಿಕ್ಸ್ ಗೆ ರೆಡಿಯಾದ್ರು. ನಂತ್ರ ನಡೆದದ್ದು ಬರೀ ಇತಿಹಾಸ.. ಬೀಜಿಂಗ್ ಒಲಿಂಪಿಕ್ಸ್ ನ ನೂರು ಮತ್ತು 200 ಮೀಟರ್ ಓಟಗಗಳಲ್ಲಿ ಕೂಟ ದಾಖಲೆಯೊಂದಿಗೆ ಚಿನ್ನ ಗೆದ್ದು ಇತಿಹಾಸ ಬರೆದ್ರು. ಬಳಿಕ, ಬೋಲ್ಟ್ ಅವ್ರ ಜವಾಬ್ದಾರಿ ಹೆಚ್ಚಾಯ್ತು. ಪ್ರತಿಯೊಂದು ಕ್ರೀಡಾಕೂಟದ ಕೂಡ ಪ್ರತಿಷ್ಠೆಯ ಕಣವಾಗಿತ್ತು. ಅದ್ರಲ್ಲೂ 2009ರ ಬರ್ಲಿನ್ ಕ್ರೀಡಾಕೂಟದಲ್ಲಿ ಉಸೇನ್ ಬೋಲ್ಟ್ ನೂರು ಮೀಟರ್ ಓಟವನ್ನ9.58 ಸೆಕೆಂಡ್ಹಾಗೂ 200 ಮೀಟರ್ ಓಟವನ್ನ 19.19 ಸೆಕೆಂಡ್ಗಳಲ್ಲಿ ಕ್ರಮಿಸಿ ವಿಶ್ವ ದಾಖಲೆ ನಿರ್ಮಿಸಿದ್ರು. ಹೀಗೆ 2011ರ ತನಕ ಉಸೇನ್ ಬೋಲ್ಟ್ ಸೋಲಿಲ್ಲದ ಸರದಾರನಂತೆ ಮೆರೆದಾಡಿದ್ರು. ಮತ್ತೊಂದೆಡೆ, ಉಸೇನ್ ಬೋಲ್ಟ್ ಲಂಡನ್ ಒಲಿಂಪಿಕ್ಸ್ ಮೇಲೂ ಚಿತ್ತವನ್ನಿಟ್ಟಿದ್ರು. ಒಡನಾಡಿ ಯೊಹಾನ್ ಬ್ಲೇಕ್ ಜತೆ ಅಭ್ಯಾಸ ಕೂಡ ನಡೆಸುತ್ತಿದ್ರು. ಇನ್ನೇನೂ ಲಂಡನ್ ಒಲಿಂಪಿಕ್ ಸನೀಹವಾಗುತ್ತಿದ್ದಂತೆ ಬೋಲ್ಟ್ ಆಘಾತ ಅನುಭವಿಸಿದ್ರು. ಡಿಯಾಗೊದಲ್ಲಿ ನಡೆದ ವಿಶ್ವ ಚಾಂಪಿಯನ್ಷಿಪ್ನ ನೂರು ಮೀಟರ್ ಓಟದಲ್ಲಿ ಬೋಲ್ಟ್ ಫೌಲ್ ಸ್ಟಾರ್ಟ್ ಮಾಡಿದ್ರು. ಪರಿಣಾಮ ಸ್ಪರ್ಧೆಯಿಂದಲೇ ಬೋಲ್ಟ್ ಹೊರಬಿದ್ರು. ಇದ್ರಿಂದ ಹತಾಶನಾದ ಉಸೇನ್ ಬೋಲ್ಟ್ 15 ನಿಮಿಷಗಳ ಕಾಲ ಎಲ್ಲಿದ್ರೂ ಎಂಬುದು ಯಾರಿಗೂ ಗೊತ್ತೇ ಆಗಲಿಲ್ಲ. ಅಷ್ಟೇ ಅಲ್ಲ, ತನ್ನ ಒಡನಾಡಿ, ಗೆಳೆಯ ಯೋಹಾನ್ ಬ್ಲೇಕ್ ಚಿನ್ನ ಗೆದ್ರೂ ಅದನ್ನ ಬೋಲ್ಟ್ ಒಪ್ಪಿಕೊಳ್ಳಲು ರೆಡಿ ಇರಲಿಲ್ಲ. ಯೋಹಾನ್ ಅವ್ರನ್ನ ಚುಡಾಯಿಸಿಕೊಂಡು ತನ್ನ ನೋವನ್ನ ಮರೆಯುವಂತೆ ಮಾಡ್ತಾ ಇದ್ರು. ಮತ್ತೊಂದೆಡೆ, 200 ಮೀಟರ್ ಓಟದಲ್ಲಿ ಚಿನ್ನ ಗೆದ್ದು ಸಂಭ್ರಮಿಸಿದ್ರೂ ನೂರು ಮೀಟರ್ ಓಟದ ಸೋಲು ಮಾತ್ರ ಅವ್ರನ್ನ ಕಾಡುತ್ತಲೇ ಇತ್ತು. ಇನ್ನು ಲಂಡನ್ ಒಲಿಂಪಿಕ್ಸ್ ನಲ್ಲಿ ಉಸೇನ್ ಬೋಲ್ಟ್ ಸುಲಭವಾಗಿ ಚಿನ್ನ ಗೆಲ್ಲುವುದಿಲ್ಲ ಅಂತ ಅಂದುಕೊಂಡವರಿಗೆಲ್ಲಾ ತಕ್ಕ ಉತ್ತರವನ್ನೂ ನೀಡಿದ್ದರು.. 100 ಮೀಟರ್ ಓಟದಲ್ಲಿ ಜಿದ್ದಾಜಿದ್ದಿನ ಪೈಪೆÇೀಟಿಯ ನಡುವೆ ಚಿನ್ನ ಗೆದ್ರೆ, 200 ಮೀಟರ್ ಓಟ ಹಾಗೂ 400 ಇಂಟ್ 100 ಮೀಟರ್ ರಿಲೆನಲ್ಲಿ ಸುಲಭವಾಗಿ ಮೊದಲ ಸ್ಥಾನ ಪಡೆದು ಒಲಿಂಪಿಕ್ಸ್ ನಲ್ಲಿ ದಾಖಲೆಯನ್ನೇ ಬರೆದ್ರು.
ಬಳಿಕ 2016ರ ರಿಯೋ ಒಲಿಂಪಿಕ್ಸ್ ನಲ್ಲೂ ಉಸೇನ್ ಬೋಲ್ಟ್ ಅವರು, 100 ಮೀಟರ್, 200 ಮೀಟರ್ ಮತ್ತು 4/100 ಮೀಟರ್ ರಿಲೆ ಸ್ಪರ್ಧೆಗಳಲ್ಲಿ ಚಿನ್ನದ ನಗೆ ಬೀರಿದ್ದರು.
ಸತತ ಮೂರು ಒಲಿಂಪಿಕ್ಸ್ ಕ್ರೀಡಾಕೂಟಗಳಲ್ಲಿ ಎಂಟು ಚಿನ್ನ ಗೆದ್ದ ಮೊದಲ ಅಥ್ಲೀಟ್ ಅನ್ನೋ ಹೆಗ್ಗಳಿಕೆ ಉಸೇನ್ ಬೋಲ್ಟ್ ಅವ್ರದ್ದು. ಬೀಜಿಂಗ್ ಒಲಿಂಪಿಕ್ಸ್ ನಲ್ಲಿ 4/100 ರಿಲೆ ತಂಡ ಅರ್ಹತೆ ಪಡೆಯಲಿಲ್ಲ. ಹೀಗಾಗಿ ಸತತ ಮೂರು ಒಲಿಂಪಿಕ್ಸ್ ನಲ್ಲಿ ತಲಾ ಮೂರು ಚಿನ್ನದ ಪದಕ ಗೆಲ್ಲುವ ಅವಕಾಶ ಕೈತಪ್ಪಿ ಹೋಯ್ತು.
ಅದೇನೇ ಇರಲಿ… ಉಸೇನ್ ಬೋಲ್ಟ್ ಮತ್ತು ಅವ್ರ ಸಾಧನೆಯನ್ನ ಯಾರಿಗೂ ಹೊಲಿಕೆ ಮಾಡಲು ಸಾಧ್ಯವಿಲ್ಲ. ಜಮೈಕಾದ ಬಡ ಕುಟುಂಬದ ಹುಡುಗನೊಬ್ಬ ಶರವೇಗದ ಸರದಾರನಾದ ರಿಯಲ್ ಸ್ಟೋರಿ ಯುವ ಅಥ್ಲೀಟ್ಗಳಿಗೆ ದಾರಿದೀಪ. ಯಶಸ್ಸಿನ ಆಮಲಿನಿಂದ ಅಡ್ಡದಾರಿ ಹಿಡಿದ್ರೂ ಅದ್ರಿಂದ ಬುದ್ದಿ ಕಲಿತುಕೊಂಡಿರುವ ಉಸೇನ್ ಬೋಲ್ಟ್ ಯಶಸ್ಸಿನ ಶಿಖರವೇರಿದ್ದಾರೆ. ಈಗ ಏನಿದ್ರೂ ಉಸೇನ್ ಬೋಲ್ಟ್ ಗೆ ಉಸೇನ್ ಬೋಲ್ಟೇ ಪ್ರತಿಸ್ಪರ್ಧಿ.
2017ರ ನಂತರ ಅಥ್ಲೆಟಿಕ್ಸ್ ನಿಂದ ದೂರ ಸರಿದ ಉಸೇನ್ ಬೋಲ್ಟ್ ಈಗ ಫುಟ್ ಬಾಲ್ ಆಟಗಾರನಾಗಿದ್ದಾರೆ. ಬಿಡುವಿನ ವೇಳೆಯಲ್ಲಿ ಹಾಯಾಗಿ ಕುಟುಂಬದ ಜೊತೆ ಜೀವನ ಸಾಗಿಸುತ್ತಿರುವ ಉಸೇನ್ ಬೋಲ್ಟ್ ಅವರಿಗೆ ಇಂದು 35ನೇ ಹುಟ್ಟು ಹಬ್ಬದ ಸಂಭ್ರಮ… ಹ್ಯಾಪಿ ಬರ್ತ್ ಡೇ ಉಸೇನ್ ಬೋಲ್ಟ್..!
