ನವದೆಹಲಿ: ಬಾಲಿವುಡ್ ನಟಿ ಹಾಗೂ ಹಿಮಾಚಲ ಪ್ರದೇಶದ ಮಂಡಿ ಲೋಕಸಭಾ ಕ್ಷೇತ್ರದ ಸಂಸದೆ ಕಂಗನಾ ರಣಾವತ್ ಮತ್ತು ಯುವ ಹೋರಾಟಗಾರ ಸೌರವ್ ದಾಸ್ ನಡುವಿನ ವಾಕ್ಸಮರ ಇದೀಗ ತಾರಕಕ್ಕೇರಿದೆ. ನೀಟ್ ಪ್ರಶ್ನೆ ಪತ್ರಿಕೆ ಸೋರಿಕೆ ಖಂಡಿಸಿ ನಡೆಯುತ್ತಿರುವ ಪ್ರತಿಭಟನೆಗೆ ಸಂಬಂಧಿಸಿದಂತೆ ಶುರುವಾದ ಈ ವಾಗ್ವಾದ ಇದೀಗ ತೀವ್ರ ಸ್ವರೂಪ ಪಡೆದುಕೊಂಡಿದ್ದು, ಪರಸ್ಪರ ವೈಯಕ್ತಿಕ ಟೀಕೆಗಳ ಹಂತಕ್ಕೆ ತಲುಪಿದೆ.
ನೀಟ್ ಪರೀಕ್ಷಾ ಅಕ್ರಮವನ್ನು ಖಂಡಿಸಿ ಬೀದಿಗಿಳಿದು ಪ್ರತಿಭಟನೆ ನಡೆಸುತ್ತಿರುವವರ ಭಾಷೆ ಮತ್ತು ಅವರು ನಡೆದುಕೊಳ್ಳುತ್ತಿರುವ ರೀತಿ ಅತ್ಯಂತ ಅಸಹ್ಯಕರವಾಗಿದೆ ಎಂದು ಸಂಸದೆ ಕಂಗನಾ ಇತ್ತೀಚೆಗೆ ವಿವಾದಾತ್ಮಕ ಹೇಳಿಕೆ ನೀಡಿದ್ದರು. ಕಂಗನಾ ಅವರ ಈ ಹೇಳಿಕೆಗೆ ದೇಶಾದ್ಯಂತ ವಿದ್ಯಾರ್ಥಿ ವಲಯದಿಂದ ಭಾರಿ ವಿರೋಧ ವ್ಯಕ್ತವಾಗಿತ್ತು. ಇದೇ ವಿಚಾರವಾಗಿ ತಮ್ಮನ್ನು ಕಟುವಾಗಿ ಟೀಕಿಸಿದ್ದ ಜಿರಳೆ ಜನತಾ ಪಕ್ಷದ ವಕ್ತಾರ ಸೌರವ್ ದಾಸ್ ವಿರುದ್ಧ ಕಂಗನಾ ಇದೀಗ ನೇರ ವಾಗ್ದಾಳಿ ನಡೆಸಿದ್ದಾರೆ.
ಸೌರವ್ ವಯಸ್ಸು ಮತ್ತು ವೃತ್ತಿಯನ್ನು ಕೆದಕಿರುವ ಕಂಗನಾ, ಆತನೋರ್ವ ನಿಷ್ಪ್ರಯೋಜಕ ಎಂದು ಜರಿದಿದ್ದಾರೆ. ಸೌರವ್ ದಾಸ್ ಯಾರು ಎಂದು ನಾನು ಗೂಗಲ್ ನಲ್ಲಿ ಹುಡುಕಿದಾಗ ಆತನಿಗೆ ಇಪ್ಪತ್ತೆಂಟು ವರ್ಷ ವಯಸ್ಸಾಗಿದೆ ಎಂಬುದು ತಿಳಿಯಿತು. ಅಷ್ಟು ವಯಸ್ಸಾಗಿದ್ದರೂ ಆತ ಇನ್ನೂ ತನ್ನನ್ನು ತಾನು ವಿದ್ಯಾರ್ಥಿ ಎಂದು ಕರೆದುಕೊಳ್ಳುತ್ತಿರುವುದು ನಿಜಕ್ಕೂ ವಿಪರ್ಯಾಸ ಎಂದು ಕಂಗನಾ ವ್ಯಂಗ್ಯವಾಡಿದ್ದಾರೆ.
ನನ್ನ ಸಾಧನೆ ನಿನಗೆ ಗೊತ್ತಿಲ್ಲ
ತಮ್ಮ ಸಾಧನೆಗಳನ್ನು ಸೌರವ್ ದಾಸ್ ಎದುರು ತೆರೆದಿಟ್ಟಿರುವ ಕಂಗನಾ, ನಾನು ಕಳೆದ ಎರಡು ವರ್ಷಗಳಿಂದ ಮಾತ್ರ ರಾಜಕೀಯದಲ್ಲಿರಬಹುದು, ಆದರೆ ಕಳೆದ ಇಪ್ಪತ್ತು ವರ್ಷಗಳಿಂದ ಸಾರ್ವಜನಿಕ ಜೀವನದಲ್ಲಿದ್ದೇನೆ. ನಿನಗೆ ಈಗಿರುವ ವಯಸ್ಸಿನಲ್ಲಿ ಅಂದರೆ ನನ್ನ ಇಪ್ಪತ್ತೆಂಟನೇ ವಯಸ್ಸಿಗೆ ನಾನು ಚಿತ್ರರಂಗದ ಅತ್ಯುನ್ನತವಾದ ಎರಡು ರಾಷ್ಟ್ರ ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದ್ದೆ. ಇಂದು ನಾನು ಕೇವಲ ಓರ್ವ ನೂತನ ಸಂಸದೆಯಾಗಿ ಮಾತ್ರವಲ್ಲದೆ ನಟಿಯಾಗಿ, ಚಲನಚಿತ್ರ ನಿರ್ಮಾಪಕಿಯಾಗಿ, ಚಿತ್ರಕಥೆಗಾರ್ತಿಯಾಗಿ ಹಾಗೂ ಯಶಸ್ವಿ ಉದ್ಯಮಿಯಾಗಿ ಹತ್ತು ಹಲವು ಕೆಲಸಗಳಲ್ಲಿ ಸದಾ ನನ್ನನ್ನು ನಾನು ತೊಡಗಿಸಿಕೊಂಡಿದ್ದೇನೆ ಎಂದು ತಮ್ಮ ಬೆನ್ನು ತಾವೇ ತಟ್ಟಿಕೊಂಡಿದ್ದಾರೆ.
ಬೇರೆ ಕೆಲಸ ಕಲಿತುಕೋ ಎಂದು ಸಲಹೆ
ಮಾತು ಮುಂದುವರೆಸಿದ ಕಂಗನಾ, ಸೌರವ್ ನಂತಹ ನಿರುದ್ಯೋಗಿ ಮತ್ತು ನಿಷ್ಪ್ರಯೋಜಕ ವ್ಯಕ್ತಿಗೆ ಎಲ್ಲಾ ಸಮಯದಲ್ಲೂ ಭಾರಿ ಬೇಡಿಕೆಯಲ್ಲಿರುವುದು ಮತ್ತು ಸದಾ ಕಾರ್ಯನಿರತವಾಗಿರುವುದು ಎಂದರೆ ಏನೆಂದು ಎಂದಿಗೂ ಅರ್ಥವಾಗುವುದಿಲ್ಲ. ಪ್ರಿಯ ಸೌರವ್, ನಿನ್ನ ಸಮಸ್ಯೆಗಳು ಸಂಪೂರ್ಣ ವೈಯಕ್ತಿಕವಾದದ್ದು. ನೀನು ಖಂಡಿತವಾಗಿಯೂ ವಿದ್ಯಾರ್ಥಿಯಲ್ಲ, ಕೇವಲ ಒಬ್ಬ ನಿಷ್ಪ್ರಯೋಜಕ. ಹೀಗೆ ಸುಮ್ಮನೆ ಸಮಯ ವ್ಯರ್ಥ ಮಾಡುವ ಬದಲು ಯಾವುದಾದರೂ ಹೊಸ ಕೌಶಲ್ಯಗಳನ್ನು ಕಲಿತು ಹೊಸ ಜೀವನವನ್ನು ಪ್ರಾರಂಭಿಸು ಎಂದು ಕಟುವಾಗಿ ಸಲಹೆ ನೀಡಿದ್ದಾರೆ.
ಹಿಮಾಚಲ ಜನತೆಗೆ ನಿಮ್ಮ ಯೋಗ್ಯತೆ ಗೊತ್ತಿದೆ ಎಂದ ಸೌರವ್
ಕಂಗನಾ ಅವರ ಈ ಅಹಂಕಾರದ ಮಾತುಗಳಿಗೆ ಸೌರವ್ ದಾಸ್ ಕೂಡ ಅಷ್ಟೇ ತೀಕ್ಷ್ಣವಾಗಿ ತಿರುಗೇಟು ನೀಡಿದ್ದಾರೆ. ನಿಮಗಿಂತ ಇಂದಿನ ಯುವ ಪೀಳಿಗೆ ಅಂದರೆ ಜೆನ್ ಜಿ ಜನಾಂಗ ಈ ದೇಶಕ್ಕೆ ಹೆಚ್ಚು ಕೊಡುಗೆಯನ್ನು ನೀಡುತ್ತಿದೆ. ಒಬ್ಬ ಜನಪ್ರತಿನಿಧಿಯಾಗಿ, ಸಂಸದೆಯಾಗಿ ನೀವು ನಿಮ್ಮ ಹಿಮಾಚಲ ಪ್ರದೇಶದ ಜನತೆಗೆ ಏನು ಮಹತ್ಕಾರ್ಯ ಮಾಡಿದ್ದೀರಿ ಮತ್ತು ನಿಮ್ಮ ಯೋಗ್ಯತೆ ಏನು ಎಂಬುದು ಅಲ್ಲಿನ ಜನರಿಗೆ ಚೆನ್ನಾಗಿ ಗೊತ್ತಿದೆ ಎಂದು ಸೌರವ್ ಚಾಟಿ ಬೀಸಿದ್ದಾರೆ.
ಒಟ್ಟಿನಲ್ಲಿ ನೀಟ್ ಪ್ರತಿಭಟನೆಯ ಕಿಚ್ಚು ಇದೀಗ ನಟಿ ಕಂಗನಾ ರಣಾವತ್ ಮತ್ತು ಯುವ ಸಮೂಹದ ನಡುವಿನ ಪ್ರತಿಷ್ಠೆಯ ಕದನವಾಗಿ ಮಾರ್ಪಟ್ಟಿದ್ದು, ರಾಜಕೀಯ ಹಾಗೂ ಸಾಮಾಜಿಕ ವಲಯದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
