ನವಜಾತ ಶಿಶುವೊಂದು ನರ್ಸ್ ಕೈಯಿಂದ ಜಾರಿ ನೆಲಕ್ಕೆ ಬಿದ್ದು ಸಾವು…
ನವಜಾತ ಶಿಶುವೊಂದು ಸ್ಟಾಫ್ ನರ್ಸ್ ಕೈಯಿಂದ ಜಾರಿ ನೆಲಕ್ಕೆ ಬಿದ್ದು ಸಾವನ್ನಪ್ಪಿರುವ ದುರಂತ ಘಟನೆ ಉತ್ತರ ಪ್ರದೇಶ ರಾಜ್ಯದ ಲಕ್ನೋದ ಚಿನ್ಹಾಟ್‌ನ ಮಲ್ಹೌರ್ ಪ್ರದೇಶದ ಖಾಸಗಿ ಆಸ್ಪತ್ರೆಯಲ್ಲಿ ನಡೆದಿದೆ.
ಮಗುವಿನ ಸಾವಿಗೆ ತಲೆಗೆ ಬಲವಾದ ಪೆಟ್ಟು ಬಿದ್ದಿರುವುದು ಕಾರಣ ಎಂದು ಮರಣೋತ್ತರ ಪರೀಕ್ಷೆಯ ದೃಢಪಟ್ಟಿದೆ. ಪೊಲೀಸರು ನರ್ಸ್ ಹಾಗೂ ಆಸ್ಪತ್ರೆ ಸಿಬ್ಬಂದಿ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಘಟನೆ ಏಪ್ರಿಲ್ 19 ರಂದು ನಡೆದಿದ್ದು, ಮಂಗಳವಾರ ತಡರಾತ್ರಿ ಕೆಲ ಮಾಧ್ಯಮದವರಿಗೆ ವಿಷಯ ತಿಳಿದ ಬಳಿಕ ಬೆಳಕಿಗೆ ಬಂದಿದೆ.
ಆಸ್ಪತ್ರೆಯ ಶಿಫಾರಸಿನ ಮೇರೆಗೆ ಘಟನೆ ನಡೆದ ದಿನವೇ ಮಗುವಿನ ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ ಎಂದು ತನಿಖಾಧಿಕಾರಿ ಅಭಿಷೇಕ್ ಪಾಂಡೆ ಬುಧವಾರ ತಿಳಿಸಿದ್ದಾರೆ. “ಏಪ್ರಿಲ್ 20 ರಂದು ಬಂದ ಮರಣೋತ್ತರ ಪರೀಕ್ಷೆಯ ವರದಿಯು ತಲೆಗೆ ಆದ ಗಾಯದಿಂದ ಸಾವು ಸಂಭವಿಸಿದೆ” ಎಂದು ಅವರು ಹೇಳಿದರು.
ಮೃತ ಮಗುವಿನ ತಂದೆ ಜೀವನ್ ರಜಪೂತ್ ಅವರು ಚಿನ್ಹತ್ ಪೊಲೀಸ್ ಠಾಣೆಯಲ್ಲಿ ಔಪಚಾರಿಕವಾಗಿ ದೂರು ನೀಡಿದ ನಂತರ ಪ್ರಕರಣ ದಾಖಲಿಸಲಾಗಿದೆ. ಘಟನೆಯ ನಂತರ ಅವರ ಪತ್ನಿ ಪೂನಂ ತೀವ್ರ ಆಘಾತಕ್ಕೆ ಒಳಗಾಗಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ರಜಪೂತ್ ಹೇಳಿದ್ದಾರೆ.
ಏಪ್ರಿಲ್ 19 ರಂದು ಹೆಂಡತಿಗೆ ಹೆರಿಗೆ ನೋವು ಕಾಣಿಸಿಕೊಂಡಿದ್ದು ಹಾಸ್ಪಿಟಲ್ ಗೆ ಕರೆದೊಯ್ದಾಗ ರಾತ್ರಿ ವೇಳೆ ಮಗು ಜನಿಸಿದೆ. ನಾನು ನನ್ನ ಹೆಂಡತಿ ಜೊತೆ ಮಾತನಾಡಿದಾಗ ಸಾಮಾನ್ಯ ಹರಿಗೆಯಾಗಿದ್ದು, ಅವಳು ಮಗುವನ್ನು ಜೀವಂತವಾಗಿ ನೋಡಿದ್ದಾಳೆ. ನರ್ಸ್ ಯಾವುದೇ ಟವೆಲ್ ಇಲ್ಲದೆ ಕೈಯಲ್ಲಿ ಮಗುವನ್ನ ಹಿಡಿದುಕೊಂಡು ಹೋಗುವುದನ್ನ ನೋಡಿದ್ದಾಳೆ. ನರ್ಸ್ ಕೈಯಿಂದ ಮಗು ಜಾರಿದಾಗ ನನ್ನ ಹೆಂಡತಿ ಗಾಬರಿಗೊಂಡು ಕಿರುಚಲು ಪ್ರಾರಂಭಿಸಿದಳು, ನರ್ಸ್ ಮತ್ತು ಇತರ ಸಿಬ್ಬಂದಿಗಳು ಅವಳ ಬಾಯಿಯನ್ನು ಒತ್ತಿ ಬಾಯಿಯನ್ನು ಮುಚ್ಚಿಕೊಳ್ಳುವಂತೆ ಬೆದರಿಕೆ ಹಾಕಿದರು, ”ಎಂದು ರಜಪೂತ್ ಆರೋಪಿಸಿದ್ದಾರೆ.
ಆದರೆ, ಈ ಆರೋಪವನ್ನು ತಳ್ಳಿಹಾಕಿರುವ ಆಸ್ಪತ್ರೆ, ಅಂತಹ ಯಾವುದೇ ಘಟನೆ ನಡೆದಿಲ್ಲ ಎಂದು ಹೇಳಿದೆ.
