ಐಪಿಎಲ್ 2020- ರಾಯಲ್ಸ್ ವಿರುದ್ಧ ರೈಡರ್ಸ್ ಸವಾರಿ..ಕೆಕೆಆರ್ ದಾಳಿಗೆ ಕಂಗೆಟ್ಟ ಸ್ಟೀವನ್ ಸ್ಮಿತ್ ಬಳಗ
2020ರ ಐಪಿಎಲ್ ಟೂರ್ನಿಯ 12ನೇ ಪಂದ್ಯದಲ್ಲಿ ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡ 37 ರನ್ ಗಳಿಂದ ರಾಜಸ್ತಾನ ರಾಯಲ್ಸ್ ತಂಡವನ್ನು ಸೋಲಿಸಿದೆ. ಈ ಮೂಲಕ ರಾಜಸ್ತಾನ ತಂಡದ ಹ್ಯಾಟ್ರಿಕ್ ಗೆಲುವಿಗೆ ಅಡ್ಡಿಯನ್ನುಂಟು ಮಾಡಿರುವ ಕೆಕೆಆರ್ ಟೂರ್ನಿಯಲ್ಲಿ ಎರಡನೇ ಪಂದ್ಯವನ್ನು ಗೆದ್ದುಕೊಂಡಿದೆ.
ಟಾಸ್ ಸೋತ್ರೂ ಮೊದಲು ಬ್ಯಾಟಿಂಗ್ ಮಾಡಿದ್ದ ಕೆಕೆಆರ್ ತಂಡಕ್ಕೆ ಆರಂಭಿಕ ಶುಬ್ಮನ್ ಗಿಲ್ ಉತ್ತಮ ಅಡಿಪಾಯ ಹಾಕಿಕೊಟ್ರು. ಸುನೀಲ್ ನರೇನ್ (15) ರನ್ಗೆ ಸೀಮಿತವಾದ್ರೆ, ನಿತೇಶ್ ರಾಣಾ (22ರನ್) ಮತ್ತು ಆಂಡ್ರ್ಯೂ ರಸೇಲ್ (24 ರನ್) ಮಿಂಚಿನ ಆಟವಾಡಿದ್ರು. ಆದ್ರೆ ನಾಯಕ ದಿನೇಶ್ ಕಾರ್ತೀಕ್ (1 ರನ್) ಮತ್ತೊಮ್ಮೆ ನಿರಾಸೆ ಮೂಡಿಸಿದ್ರು.
ಸಾಕಷ್ಟು ಭರವಸೆ ಮೂಡಿಸಿರುವ ಶುಬ್ಮನ್ ಗಿಲ್ ಅವರು 34 ಎಸೆತಗಳಲ್ಲಿ ಐದು ಬೌಂಡರಿ ಮತ್ತು ಒಂದು ಸಿಕ್ಸರ್ ನ ಸಹಾಯದಿಂದ 47 ರನ್ ಗಳಿಸಿದ್ರು. ಕೆಳ ಕ್ರಮಾಂಕದಲ್ಲಿ ಇಯಾನ್ ಮೊರ್ಗಾನ್ 23 ಎಸೆತಗಳಲ್ಲಿ ಒಂದು ಬೌಂಡರಿ ಮತ್ತು ಎರಡು ಸಿಕ್ಸರ್ ನ ನೆರವಿನಿಂದ ಅಜೇಯ 34 ರನ್ ದಾಖಲಿಸಿದ್ರು. ಅಂತಿಮವಾಗಿ ಕೆಕೆಆರ್ ತಂಡ 20 ಓವರ್ ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ 174 ರನ್ ದಾಖಲಿಸಿತು.
ಗೆಲ್ಲಲು 175 ರನ್ ಗಳ ಸವಾಲನ್ನು ಸ್ವೀಕರಿಸಿದ ರಾಜಸ್ತಾನ ರಾಯಲ್ಸ್ ತಂಡಕ್ಕೆ ಕೆಕೆಆರ್ ಯುವ ವೇಗಿಗಳು ಆಘಾತ ನೀಡಿದ್ರು. ಶಿಸ್ತು ಬದ್ಧ ಬೌಲಿಂಗ್ ದಾಳಿ ನಡೆಸಿದ್ದ ಕೆಕೆಆರ್ ಬೌಲರ್ ಗಳು ರಾಜಸ್ತಾನ ರಾಯಲ್ಸ್ ತಂಡದ ಬ್ಯಾಟ್ಸ್ ಮೆನ್ ಗಳ ಆತ್ಮವಿಶ್ವಾಸವನ್ನು ಕುಗ್ಗುವಂತೆ ಮಾಡಿದ್ದರು.
ರಾಜಸ್ತಾನ ತಂಡದ ಪ್ರಮುಖ ಬ್ಯಾಟ್ಸ್ ಮೆನ್ ಗಳಾದ ಸ್ಟೀವನ್ ಸ್ಮಿತ್ 3 ರನ್, ಸಂಜು ಸಾಮ್ಸನ್ 8 ರನ್, ರಾಬಿನ್ ಉತ್ತಪ್ಪ 2 ರನ್, ರ್ಯಾನ್ ಪರಾಗ್ 1 ರನ್, ರಾಹುಲ್ ಟೆವಾಟಿಯಾ 14 ರನ್ ಗಳಿಸಿ ನಿರಾಸೆ ಮೂಡಿಸಿದ್ರು.
ಈ ನಡುವೆ ಆರಂಭಿಕ ಜೋಸ್ ಬಟ್ಲರ್ 21 ರನ್ ಗಳಿಸಿದ್ರೆ, ಕೆಳ ಕ್ರಮಾಂಕದಲ್ಲಿ ಟಾಮ್ ಕುರನ್ ಮಿಂಚಿನ ಆಟವನ್ನಾಡಿದ್ರು. ಅಲ್ಲದೆ ಅಜೇಯ 54 ರನ್ ದಾಖಲಿಸಿ ಗಮನ ಸೆಳೆದ್ರು. ಅಂತಿಮವಾಗಿ ರಾಜಸ್ತಾನ ರಾಯಲ್ಸ್ ತಂಡ 20 ಓವರ್ ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 137 ರನ್ ಗಳಿಸಿತು. ಕೆಕೆಆರ್ ತಂಡದ ಶಿವಮ್ ಮಾವಿ, ಕಮಲೇಶ್ ನಾಗರ್ಕೊಟಿ ಮತ್ತು ವರುಣ್ ಚಕ್ರವರ್ತಿ ತಲಾ ಎರಡು ವಿಕೆಟ್ ಉರುಳಿಸಿದ್ರು. ಶಿವಮ್ ಮಾವಿ ಅವರು ಪಂದ್ಯ ಶ್ರೇಷ್ಠರಾಗಿ ಹೊರಹೊಮ್ಮಿದ್ರು.
