ಬೆಂಗಳೂರು : ಮಲ್ಲೇಶ್ವರದ ಪ್ರಸಿದ್ಧ ಸಂಪಿಗೆ ರಸ್ತೆಯಲ್ಲಿ ನಡೆದ ಪಾದಚಾರಿ ಮಾರ್ಗ ತೆರವು ಕಾರ್ಯಾಚರಣೆ ಈಗ ಹೊಸ ತಿರುವು ಪಡೆದುಕೊಂಡಿದೆ. ಬಿಬಿಎಂಪಿ ಅಧಿಕಾರಿಗಳ ಕ್ರಮದ ವಿರುದ್ಧ ಕೋರ್ಟ್ ಮೆಟ್ಟಿಲೇರಲು ಸಿದ್ಧತೆ ನಡೆಸಿರುವ ಬೀದಿ ಬದಿ ವ್ಯಾಪಾರಿಗಳ ಸಂಘಟನೆಗಳು, ಸಂತ್ರಸ್ತ ವ್ಯಾಪಾರಿಗಳಿಂದ ತಲಾ 5,000 ರೂಪಾಯಿ ಹಣ ವಸೂಲಿ ಮಾಡುತ್ತಿರುವುದು ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.
ಕಾನೂನು ಹೋರಾಟದ ನೆಪದಲ್ಲಿ ವಸೂಲಿ
ಇತ್ತೀಚೆಗಷ್ಟೇ ಮಲ್ಲೇಶ್ವರದ ಫುಟ್ಪಾತ್ಗಳಲ್ಲಿದ್ದ ಸುಮಾರು 600ಕ್ಕೂ ಹೆಚ್ಚು ವ್ಯಾಪಾರಿಗಳನ್ನು ಅಧಿಕಾರಿಗಳು ತೆರವುಗೊಳಿಸಿದ್ದರು. ಈ ಕಾರ್ಯಾಚರಣೆಯ ವಿರುದ್ಧ ನ್ಯಾಯಾಲಯದಲ್ಲಿ ರಿಟ್ ಅರ್ಜಿ ಸಲ್ಲಿಸಿ ತಡೆಯಾಜ್ಞೆ ತರಲು ಕೆಲವು ಸ್ವತಂತ್ರ ವ್ಯಾಪಾರಿ ಒಕ್ಕೂಟಗಳು ಮುಂದಾಗಿವೆ. ಈ ಹೋರಾಟದ ವೆಚ್ಚ ಮತ್ತು ವಕೀಲರ ಶುಲ್ಕಕ್ಕಾಗಿ ಪ್ರತಿ ವ್ಯಾಪಾರಿಯಿಂದ ಕಡ್ಡಾಯವಾಗಿ 5,000 ರೂಪಾಯಿ ಸಂಗ್ರಹಿಸಲಾಗುತ್ತಿದೆ. ಈಗಾಗಲೇ ಸುಮಾರು 260 ಮಂದಿ ವ್ಯಾಪಾರಿಗಳು ಈ ಹಣವನ್ನು ಪಾವತಿಸಿದ್ದಾರೆ ಎಂದು ತಿಳಿದುಬಂದಿದೆ.
ವ್ಯಾಪಾರಿಗಳಲ್ಲೇ ಮೂಡಿದ ಭಿನ್ನಮತ
ಹಣ ಸಂಗ್ರಹದ ವಿಚಾರದಲ್ಲಿ ವ್ಯಾಪಾರಿಗಳಲ್ಲೇ ಈಗ ಭಿನ್ನಾಭಿಪ್ರಾಯ ಮೂಡಿದೆ. ಒಂದು ಗುಂಪು ಕೋರ್ಟ್ ಮೂಲಕ ಹಕ್ಕು ಪಡೆಯಲು ಹಣ ನೀಡುವುದು ಅನಿವಾರ್ಯ ಎನ್ನುತ್ತಿದ್ದರೆ, ಮತ್ತೊಂದು ಗುಂಪು ಇದು ಬಡ ವ್ಯಾಪಾರಿಗಳ ಶೋಷಣೆ ಎಂದು ಆಕ್ರೋಶ ವ್ಯಕ್ತಪಡಿಸಿದೆ. ವ್ಯಾಪಾರವಿಲ್ಲದೆ ಸಂಕಷ್ಟದಲ್ಲಿರುವಾಗ ಇಷ್ಟು ದೊಡ್ಡ ಮೊತ್ತವನ್ನು ಪಾವತಿಸಲು ಸಾಧ್ಯವಿಲ್ಲ ಎಂದು ಅನೇಕ ಬಡ ವ್ಯಾಪಾರಿಗಳು ಅಸಹಾಯಕತೆ ವ್ಯಕ್ತಪಡಿಸಿದ್ದಾರೆ.
ಪರ್ಯಾಯ ಜಾಗ ಬಿಟ್ಟು ಹಳೆ ಜಾಗಕ್ಕೇ ಲಗ್ಗೆ
ಅಧಿಕಾರಿಗಳು ವ್ಯಾಪಾರಿಗಳಿಗೆ ಪರ್ಯಾಯವಾಗಿ ಪಕ್ಕದ ಕಿರಿದಾದ ರಸ್ತೆಗಳಲ್ಲಿ ವ್ಯಾಪಾರ ಮಾಡಲು ಸೂಚಿಸಿದ್ದರೂ, ಅಲ್ಲಿ ವ್ಯಾಪಾರವಾಗುತ್ತಿಲ್ಲ ಎಂಬ ಕಾರಣಕ್ಕೆ ಕೆಲವು ವ್ಯಾಪಾರಿಗಳು ಮತ್ತೆ ಸಂಪಿಗೆ ರಸ್ತೆಯ ಫುಟ್ಪಾತ್ಗೇ ಮರಳುತ್ತಿದ್ದಾರೆ. ತೆರವುಗೊಳಿಸಿದ ಜಾಗದಲ್ಲಿ ಮತ್ತೆ ಬುಟ್ಟಿ, ಅಂಗಡಿಗಳನ್ನು ಇಡಲು ಆರಂಭಿಸಿದ್ದು, ಇದು ಸ್ಥಳೀಯ ನಿವಾಸಿಗಳು ಮತ್ತು ಪಾದಚಾರಿಗಳ ಆತಂಕಕ್ಕೆ ಕಾರಣವಾಗಿದೆ. ಒತ್ತುವರಿ ತೆರವುಗೊಳಿಸಿದರೂ ಪರಿಸ್ಥಿತಿ ಮತ್ತೆ ಮೊದಲಿನ ಸ್ಥಿತಿಗೆ ಮರಳುತ್ತಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಒಟ್ಟಿನಲ್ಲಿ ಮಲ್ಲೇಶ್ವರಂ ಫುಟ್ಪಾತ್ ಕಿತ್ತಾಟ ಈಗ ನ್ಯಾಯಾಲಯದ ಅಂಗಳದತ್ತ ಮುಖ ಮಾಡಿದ್ದು, ಸಂಘಟನೆಗಳ ಈ ಹಣ ಸಂಗ್ರಹ ಎತ್ತ ಸಾಗಲಿದೆ ಎಂಬ ಕುತೂಹಲ ಮೂಡಿಸಿದೆ.
