ತುಮಕೂರು: ಆನ್ಲೈನ್ ಟ್ರೇಡಿಂಗ್ (Online Trading Scam) ಹೆಸರಿನಲ್ಲಿ ಲಕ್ಷಾಂತರ ರೂ. ವಂಚಿಸಿರುವ ಘಟನೆ ನಡೆದಿದೆ.
ಆನ್ ಲೈನ್ ವಂಚನೆಗೆ ಒಳಗಾದ ನಗರದ (Tumakuru) ವ್ಯಕ್ತಿಯೊಬ್ಬರು 11.56 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ವಿದ್ಯಾನಗರದ ವಿ.ಪುರುಷೋತ್ತಮ್ ಎಂಬುವವರು ಹಣ ಕಳೆದುಕೊಂಡವರು. ಅವರಿಗೆ ಟೆಲಿಗ್ರಾಮ್ನಲ್ಲಿ ಪ್ರಿಯಾ ಮೆಹತಾ ಎಂಬ ಹೆಸರಿನಿಂದ ವಂಚಕರು ಪರಿಚಯಿಸಿಕೊಂಡಿದ್ದಾರೆ. ನಂತರ ಆನ್ಲೈನ್ ಟ್ರೇಡಿಂಗ್ ಬಗ್ಗೆ ಮಾಹಿತಿ ನೀಡಿದ್ದಾರೆ. ವೆಬ್ಸೈಟ್ ಒಂದರಲ್ಲಿ ನೋಂದಾಯಿಸಿಕೊಳ್ಳುವಂತೆ ವಂಚಕರು ಹೇಳಿದ್ದಾರೆ. ಅದರಂತೆ ವ್ಯಕ್ತಿ ತಮ್ಮ ನೋಂದಣಿ ಮಾಡಿಕೊಂಡಿದ್ದಾರೆ.
ಮೊದಲಿಗೆ 10 ಸಾವಿರ ರೂ. ಹೂಡಿಕೆ ಮಾಡಿದಾಗ ಅವರ ಖಾತೆಗೆ ಮರಳಿ 13 ಸಾವಿರ ರೂ. ಕಳುಹಿಸಿದ್ದಾರೆ. ಮತ್ತಷ್ಟು ಹಣ ಹೂಡಿಕೆ ಮಾಡಿದರೆ ಹೆಚ್ಚಿನ ಲಾಭ ಪಡೆಯಬಹುದು ಎಂದು ಹೇಳಿದ್ದಾರೆ. ಇದನ್ನು ನಂಬಿದ ಪುರುಷೋತ್ತಮ್ 2024ರ ನ.24ರಿಂದ ಡಿ.31ರ ವರೆಗೆ ಹಂತ ಹಂತವಾಗಿ 11,56,560 ರೂ. ವರ್ಗಾಯಿಸಿದ್ದಾರೆ. ಮತ್ತೆ 30 ಲಕ್ಷ ರೂ. ಹೂಡಿಕೆ ಮಾಡಿದರೆ ಇನ್ನೂ ಹೆಚ್ಚು ಲಾಭ ಸಿಗಲಿದೆ ಎಂದು ಹೇಳಿದ್ದಾರೆ. ಆನಂತರ ಖಾತೆಯಿಂದ ಹಣ ಮರಳಿ ಪಡೆಯಲು ಯತ್ನಿಸಿದಾಗ ಖಾತೆ ಬ್ಲಾಕ್ ಆಗಿದೆ ಎಂದು ತೋರಿಸಿದೆ. ಕೊನೆಗೆ ವಂಚನೆಗೊಳಗಾಗಿರುವುದು ಗೊತ್ತಾಗುತ್ತಿದ್ದಂತೆ ಸೈಬರ್ ಠಾಣೆಗೆ ದೂರು ನೀಡಿದ್ದಾರೆ.
