ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರ ವಾಹನ ಪ್ರೇಮ ಇಡೀ ದೇಶಕ್ಕೇ ಗೊತ್ತು. ಅವರ ಬಳಿ ಇರುವ ಐಷಾರಾಮಿ ಕಾರುಗಳ ಸಾಲಿಗೆ ಈಗ ವಿಮಾನದಂತಹ ಸೌಲಭ್ಯವಿರುವ ಅತ್ಯಾಧುನಿಕ ಕ್ಯಾರವನ್ ಒಂದು ಸೇರ್ಪಡೆಯಾಗಿದೆ. ಇದು ಕೇವಲ ವಾಹನವಲ್ಲ, ರಸ್ತೆಯಲ್ಲಿ ಸಾಗುವ ಸುಸಜ್ಜಿತ ಅರಮನೆ ಎಂದರೆ ತಪ್ಪಾಗಲಾರದು. ಸದ್ಯ ಈ ಕ್ಯಾರವನ್ ಸ್ಯಾಂಡಲ್ವುಡ್ ಇತಿಹಾಸದಲ್ಲೇ ಅತ್ಯಂತ ದುಬಾರಿ ಮತ್ತು ಹೈಟೆಕ್ ವಾಹನ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಡಿಸಿ ಡಿಸೈನ್ಸ್ನಿಂದ ಸಿದ್ಧವಾದ ರಾಯಲ್ ವಾಹನ
ಮಹಾರಾಷ್ಟ್ರದ ಪುಣೆಯಲ್ಲಿರುವ ಭಾರತದ ಖ್ಯಾತ ಕಾರ್ ಡಿಸೈನರ್ ದಿಲೀಪ್ ಛಾಬ್ರಿಯಾ ಅವರ ಮಾಲೀಕತ್ವದ ಡಿಸಿ2 ಸಂಸ್ಥೆಯು ಈ ಕ್ಯಾರವನ್ ಅನ್ನು ಸಿದ್ಧಪಡಿಸಿದೆ. ಸುಮಾರು 6.5 ಕೋಟಿ ರೂಪಾಯಿ ವೆಚ್ಚದಲ್ಲಿ ಸುದೀಪ್ ಅವರ ಅಭಿರುಚಿಗೆ ತಕ್ಕಂತೆ ಪ್ರತಿಯೊಂದು ಮೂಲೆಯನ್ನೂ ಅತಿ ಎಚ್ಚರಿಕೆಯಿಂದ ವಿನ್ಯಾಸಗೊಳಿಸಲಾಗಿದೆ. ಈ ಕ್ಯಾರವನ್ನ ಅತ್ಯಂತ ದೊಡ್ಡ ವಿಶೇಷತೆ ಎಂದರೆ ಇದು ಜಿಮ್ ಮಾಡ್ಯುಲರ್ ಸೌಲಭ್ಯವನ್ನು ಹೊಂದಿದೆ. ಶೂಟಿಂಗ್ ಬಿಡುವಿನ ವೇಳೆಯಲ್ಲಿ ಸುದೀಪ್ ಅವರು ವರ್ಕೌಟ್ ಮಾಡಲು ಬೇಕಾದ ಅತ್ಯಾಧುನಿಕ ಜಿಮ್ ಉಪಕರಣಗಳನ್ನು ಇದರ ಒಳಗೇ ಅಳವಡಿಸಲಾಗಿದೆ.
ರಾರಾಜಿಸುತ್ತಿದೆ ಕಿಚ್ಚ ಬ್ರ್ಯಾಂಡ್ ಕೆ ಸಿಂಬಲ್
ಈ ಐಷಾರಾಮಿ ವಾಹನದ ಮುಂಭಾಗದಲ್ಲಿ ಕಿಚ್ಚ ಸುದೀಪ್ ಅವರ ಸಿಗ್ನೇಚರ್ ಆದ ಕೆ ಅಕ್ಷರದ ಲೋಗೋವನ್ನು ವಿಶಿಷ್ಟವಾಗಿ ವಿನ್ಯಾಸಗೊಳಿಸಲಾಗಿದೆ. ಸುದೀಪ್ ಅವರು ಬಳಸುವ ಪ್ರತಿಯೊಂದು ಕಾರಿನ ಮೇಲೂ ಈ ಕೆ ಮಾರ್ಕ್ ಇರುವುದು ಅವರ ಅಭಿಮಾನಿಗಳಿಗೆ ಹೆಮ್ಮೆಯ ವಿಷಯ. ಈಗ ಅದೇ ರಾಜಗಾಂಭೀರ್ಯದ ಚಿಹ್ನೆ ಈ ಬೃಹತ್ ಕ್ಯಾರವನ್ ಮೇಲೂ ಕಂಗೊಳಿಸುತ್ತಿದ್ದು, ವಾಹನದ ಅಂದವನ್ನು ದುಪ್ಪಟ್ಟು ಮಾಡಿದೆ.
ಬಿಲ್ಲ ರಂಗ ಬಾಷಾ ಶೂಟಿಂಗ್ ಸೆಟ್ಗೆ ರಾಜವೈಭೋಗದ ಎಂಟ್ರಿ
ಅಭಿಮಾನಿಗಳು ತುದಿಗಾಲಿನಲ್ಲಿ ಕಾಯುತ್ತಿರುವ ಕಿಚ್ಚ ಸುದೀಪ್ ಅವರ ಪ್ಯಾನ್ ಇಂಡಿಯಾ ಚಿತ್ರ ಬಿಲ್ಲ ರಂಗ ಬಾಷಾ ಚಿತ್ರದ ಶೂಟಿಂಗ್ ಬೆಂಗಳೂರು ಜಿಲ್ಲೆಯ ಕನಕಪುರದ ಬಳಿ ಭರ್ಜರಿಯಾಗಿ ನಡೆಯುತ್ತಿದೆ. ಸತತ ಒಂದು ವರ್ಷದ ವಿರಾಮದ ನಂತರ ಸುದೀಪ್ ಅವರು ಮತ್ತೆ ಬಣ್ಣ ಹಚ್ಚಿದ್ದು, ಈ ಎರಡನೇ ಹಂತದ ಚಿತ್ರೀಕರಣದ ಅಡ್ಡಾಗೆ ಹೊಸ ಕ್ಯಾರವನ್ ಎಂಟ್ರಿ ಕೊಟ್ಟಿದೆ. ಕನಕಪುರದ ಬೃಹತ್ ಸೆಟ್ನಲ್ಲಿ ನಿಂತಿರುವ ಈ ವಾಹನದ ಫೋಟೋಗಳು ಮತ್ತು ವೀಡಿಯೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ.
ವಿಮಾನದ ಬಿಜಿನೆಸ್ ಕ್ಲಾಸ್ ಸೌಕರ್ಯವನ್ನೂ ಮೀರಿಸುವಂತಿರುವ ಈ ಚಲಿಸುವ ಅರಮನೆಯ ಒಳಾಂಗಣ ವಿನ್ಯಾಸ ನೋಡುಗರ ಕಣ್ಣು ಕುಕ್ಕುವಂತಿದೆ. ಅತ್ಯಾಧುನಿಕ ತಂತ್ರಜ್ಞಾನ, ಮನರಂಜನಾ ವ್ಯವಸ್ಥೆ ಮತ್ತು ಸುಖಕರವಾದ ವಿಶ್ರಾಂತಿ ಕೊಠಡಿಗಳನ್ನು ಹೊಂದಿರುವ ಈ ವಾಹನ ಈಗ ಗಾಂಧಿನಗರದ ಅಂಗಳದಲ್ಲಿ ಭಾರಿ ಸೌಂಡ್ ಮಾಡುತ್ತಿದೆ. ಸುದೀಪ್ ಅವರ ಈ ಹೊಸ ಆಸ್ತಿ ಅವರ ಸ್ಟೈಲ್ ಮತ್ತು ರಾಯಲ್ ವ್ಯಕ್ತಿತ್ವಕ್ಕೆ ಹಿಡಿದ ಕೈಗನ್ನಡಿಯಂತಿದೆ.
