ನವದೆಹಲಿ: ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ನಾಲ್ಕು ದಿನಗಳ ವಿಯೆಟ್ನಾಂ ಪ್ರವಾಸವು ಈಗ ಭಾರತೀಯ ರಾಜಕಾರಣದ ಬಿಸಿಬಿಸಿ ಚರ್ಚೆಯ ವಸ್ತುವಾಗಿದೆ. ದೆಹಲಿಯಲ್ಲಿ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ವಿರುದ್ಧ ವಿರೋಧ ಪಕ್ಷಗಳು ಬೀದಿಗಿಳಿದು ಹೋರಾಟ ಮಾಡುತ್ತಿರುವ ಹೊತ್ತಿನಲ್ಲೇ ರಾಹುಲ್ ಗಾಂಧಿ ವಿದೇಶಕ್ಕೆ ಹಾರಿರುವುದು ಬಿಜೆಪಿಯ ವ್ಯಂಗ್ಯದ ಬಾಣಗಳಿಗೆ ಗುರಿಯಾಗಿದೆ. ಈ ಕುರಿತು ಕೇಳಲಾದ ಪ್ರಶ್ನೆಗೆ ಕಾಂಗ್ರೆಸ್ ಸಂಸದ ಶಶಿ ತರೂರ್ ನೀಡಿರುವ ಖಡಕ್ ಪ್ರತಿಕ್ರಿಯೆಯು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಮೂಡಿಸಿದೆ.
ನಾನೇನು ಟ್ರಾವೆಲ್ ಏಜೆಂಟ್ ಅಲ್ಲ: ಶಶಿ ತರೂರ್ ಗುಡುಗು
ಕೇರಳದಲ್ಲಿ ಮಾಧ್ಯಮಗಳ ಪ್ರಶ್ನೆಗೆ ಉತ್ತರಿಸಿದ ಶಶಿ ತರೂರ್, ರಾಹುಲ್ ಗಾಂಧಿ ಅವರ ಪ್ರವಾಸದ ಲೆಕ್ಕ ಕೇಳುವವರ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದರು. ನಾನೇನು ಅವರ ಟ್ರಾವೆಲ್ ಏಜೆಂಟ್ ಅಲ್ಲ, ಅವರು ಎಲ್ಲಿಗೆ ಹೋಗುತ್ತಾರೆ ಮತ್ತು ಏನು ಮಾಡುತ್ತಾರೆ ಎಂಬ ಪ್ರತಿ ವಿಷಯಕ್ಕೂ ನಾನು ಪ್ರತಿಕ್ರಿಯೆ ನೀಡಲು ಸಾಧ್ಯವಿಲ್ಲ. ನನಗೂ ನನ್ನದೇ ಆದ ಜವಾಬ್ದಾರಿಗಳಿವೆ, ನಾನು ದೆಹಲಿ ಬಿಟ್ಟು ಇಲ್ಲಿಗೆ ಬಂದಿದ್ದೇನೆ ಎಂದರೆ ಅದಕ್ಕೂ ಕಾರಣವಿರುತ್ತದೆ. ಪ್ರತಿಯೊಬ್ಬ ನಾಯಕನಿಗೂ ಅವರದ್ದೇ ಆದ ಕಾರ್ಯಸೂಚಿ ಇರುತ್ತದೆ ಎಂದು ಹೇಳುವ ಮೂಲಕ ಬಿಜೆಪಿಯ ಟೀಕೆಗಳ ಅಬ್ಬರಕ್ಕೆ ತಣ್ಣೀರೆರಚಿದ್ದಾರೆ.
ಬಿಜೆಪಿ ಮಾತ್ರ ಈ ಪ್ರವಾಸವನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ್ದು, ಇದೊಂದು ದೇಶವಿರೋಧಿ ಸಂಚು ಎಂದು ಬಣ್ಣಿಸಿದೆ. ಬಿಜೆಪಿ ನಾಯಕ ಸಂಬಿತ್ ಪಾತ್ರಾ ಅವರು ರಾಹುಲ್ ಗಾಂಧಿ ವಿರುದ್ಧ ಗಂಭೀರ ಆರೋಪ ಮಾಡಿದ್ದು, ಭಾರತದಲ್ಲಿ ಪ್ರಜಾಪ್ರಭುತ್ವ ವಿರೋಧಿ ರೀತಿಯಲ್ಲಿ ಆಡಳಿತ ಬದಲಾವಣೆ ಅಂದರೆ ರಿಜೀಮ್ ಚೇಂಜ್ ಮಾಡಲು ರಾಹುಲ್ ವಿದೇಶಕ್ಕೆ ತೆರಳಿದ್ದಾರೆ ಎಂದಿದ್ದಾರೆ. ಜಾರ್ಜ್ ಸೊರೊಸ್ ಅಂತಹ ವಿದೇಶಿ ಶಕ್ತಿಗಳ ತಂಡದಿಂದ ತರಬೇತಿ ಪಡೆಯಲು ಅವರು ವಿಯೆಟ್ನಾಂಗೆ ಹೋಗಿದ್ದಾರೆ, ದೇಶವನ್ನು ನಾಶಮಾಡುವುದೇ ಇವರ ಅಸಲಿ ಅಜೆಂಡಾ ಎಂದು ಪಾತ್ರಾ ಕಿಡಿಕಾರಿದ್ದಾರೆ. ರಾಹುಲ್ ವಿಮಾನದಲ್ಲಿ ಕುಳಿತಿರುವ ವಿಡಿಯೋ ಹಂಚಿಕೊಂಡಿರುವ ಬಿಜೆಪಿ, ಸುಳ್ಳುಗಳನ್ನು ಹೇಳಿ ಸುಸ್ತಾದ ಮೇಲೆ ರಾಹುಲ್ ಗಾಂಧಿ ರಜೆಗೆ ಹೋಗಿದ್ದಾರೆ ಎಂದು ಲೇವಡಿ ಮಾಡಿದೆ.
ಬಿಜೆಪಿಯ ಈ ಸರಣಿ ವಾಗ್ದಾಳಿಗೆ ಕಾಂಗ್ರೆಸ್ ನಾಯಕ ಸಂದೀಪ್ ದೀಕ್ಷಿತ್ ಅತ್ಯಂತ ತಾರ್ಕಿಕವಾಗಿ ಉತ್ತರಿಸಿದ್ದಾರೆ. ರಾಹುಲ್ ಗಾಂಧಿ ಅವರು ಲೋಕಸಭೆಯ ವಿಪಕ್ಷ ನಾಯಕರಾಗಿದ್ದು, ವಿದೇಶಿ ನೆಲದಲ್ಲಿ ಯೇಲ್ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಮತ್ತು ಜಾಗತಿಕ ಬುದ್ಧಿಜೀವಿಗಳೊಂದಿಗೆ ಸಂವಾದ ನಡೆಸುವುದು ಅವರ ಜವಾಬ್ದಾರಿಯ ಭಾಗವಾಗಿದೆ. ಪ್ರಧಾನಿ ಮೋದಿಯವರು ಎಂದೂ ಮಾಡದ ಮಾಧ್ಯಮ ಸಂದರ್ಶನಗಳನ್ನು ರಾಹುಲ್ ಗಾಂಧಿ ವಿದೇಶಗಳಲ್ಲಿ ನೀಡುತ್ತಾರೆ. ರಾಹುಲ್ ಅವರ ಶೈಕ್ಷಣಿಕ ಮತ್ತು ರಾಜತಾಂತ್ರಿಕ ಸಂವಾದಗಳನ್ನು ರಜೆ ಎಂದು ಕರೆಯುವುದು ಬಿಜೆಪಿಯ ಅಜ್ಞಾನವನ್ನು ತೋರಿಸುತ್ತದೆ ಎಂದು ದೀಕ್ಷಿತ್ ತಿರುಗೇಟು ನೀಡಿದ್ದಾರೆ. ಒಟ್ಟಾರೆಯಾಗಿ ರಾಹುಲ್ ಅವರ ವಿಯೆಟ್ನಾಂ ಪ್ರವಾಸ ಈಗ ದೇಶದ ಎರಡು ಪ್ರಮುಖ ಪಕ್ಷಗಳ ನಡುವೆ ಇಮೇಜ್ ಯುದ್ಧಕ್ಕೆ ನಾಂದಿ ಹಾಡಿದೆ.
