ಬೆಂಗಳೂರು, ಮೇ 20 : ಕೊರೊನಾ ಸೋಂಕಿನ ಭೀತಿಯಿಂದ ಲಾಕ್ ಡೌನ್ ಜಾರಿಯಲ್ಲಿದ್ದ ಕಾರಣ ಎಲ್ಲಾ ಕಾರು ತಯಾರಿಕಾ ಕಂಪೆನಿಗಳು ಮುಚ್ಚಿದ್ದವು. ಇದೀಗ ಸುಮಾರು ಮೂರು ತಿಂಗಳ ನಂತರ ನಿಧಾನವಾಗಿ ತಮ್ಮ ಶೋರೂಂ ತೆರೆಯುತ್ತಿವೆ. ಲಾಕ್ ಡೌನ್ ಸಡಿಲಿಕೆಯಾಗಿದ್ದರೂ ಕೊರೊನಾ ಪ್ರಕರಣಗಳು ಕಡಿಮೆಯಾಗಿರದ ಹಿನ್ನೆಲೆಯಲ್ಲಿ ಜನರು ಮನೆಯಿಂದ ಹೊರಗೆ ಬರಲು ಭಯ ಪಡುತ್ತಿದ್ದಾರೆ. ಲಾಕ್ ಡೌನ್ ಕಾರಣದಿಂದ ಈಗಾಗಲೇ ಸಾಕಷ್ಟು ನಷ್ಟ ಹೊಂದಿರುವ ಕಾರು ತಯಾರಿಕ ಕಂಪೆನಿಗಳು ಗ್ರಾಹಕರನ್ನು ಸೆಳೆಯಲು ಪ್ರಯತ್ನಿಸುತ್ತಿದೆ. ಅದಕ್ಕಾಗಿ ಕಾರನ್ನು ಕೊಳ್ಳ ಬಯಸುವ ಗ್ರಾಹಕರಿಗೆ ಮನೆಯಲ್ಲಿಯೇ ಕುಳಿತು ಎಲ್ಲಾ ಖರೀದಿ ಪ್ರಕ್ರಿಯೆಗಳನ್ನು ನಡೆಸುವ ಆನ್ ಲೈನ್ ಖರೀದಿ ಸೌಲಭ್ಯ ವ್ಯವಸ್ಥೆಯನ್ನು ಪರಿಚಯಿಸಿದೆ.
ಹೌದು, ಪ್ರತಿಷ್ಠಿತ ಕಾರು ತಯಾರಿಕಾ ಕಂಪೆನಿಗಳಾದ ಮಾರುತಿ ಸುಜುಕಿ, ಮರ್ಸಿಡಿಸ್ ಬೆಂಜ್, ಟೊಯೋಟ ಕಿರ್ಲೋಸ್ಕರ್, ಹೋಂಡಾ, ಹುಂಡೈ, ಮಹೀಂದ್ರಾ ಆ್ಯಂಡ್ ಮಹಿಂದ್ರಾ, ಬಿಎಂಡಬ್ಲ್ಯು ಮತ್ತು ಟಾಟಾ ಮೋಟರ್ಸ್, ಮನೆಯಲ್ಲಿಯೇ ಕುಳಿತು ಖರೀದಿ ಪ್ರಕ್ರಿಯೆ ನಡೆಸುವ ವಿನೂತನ ವ್ಯವಸ್ಥೆಯನ್ನು ಪರಿಚಯಿಸಿವೆ.
ಆನ್ ಲೈನ್ ಖರೀದಿ ಸೌಲಭ್ಯದಲ್ಲಿ ಖರೀದಿಸಲು ಬಯಸುವ ಕಾರಿನ ಎಲ್ಲಾ ದಿಕ್ಕುಗಳನ್ನು ಹತ್ತಿರದಿಂದ ಹಾಗೂ ದೂರದಿಂದಲೂ ನೋಡಬಹುದಾಗಿದ್ದು, ಒಳಾಂಗಣವನ್ನು ನೋಡುವ ವ್ಯವಸ್ಥೆ ಇದೆ. ಕಾರು ಖರೀದಿ ಪ್ರಕ್ರಿಯೆಗಳನ್ನು ಸಂಪರ್ಕರಹಿತವಾಗಿ ಕೆಲವೇ ಸುಲಭದ ಹಂತಗಳಲ್ಲಿ ಮನೆಯಲ್ಲಿಯೇ ಕುಳಿತು ಮುಗಿಸಬಹುದಾಗಿದೆ. ಕಾರು ಖರೀದಿದಾರರು ಟೆಸ್ಟ್ ಡ್ರೈವ್ ಒಂದನ್ನು ಹೊರತು ಪಡಿಸಿ ಉಳಿದ ಎಲ್ಲಾ ಪ್ರಕ್ರಿಯೆಗಳನ್ನು ಕೆಲವೇ ನಿಮಿಷಗಳಲ್ಲಿ ಪೂರ್ಣಗೊಳಿಸಿ ಕಾರನ್ನು ಮನೆ ಬಾಗಿಲಿಗೆ ತರಿಸಬಹುದು.
ಇತ್ತೀಚೆಗೆ ಡೆಲಾಯ್ಟ್ ಸಂಸ್ಥೆಯು ಈ ಬಗ್ಗೆ ಸಮೀಕ್ಷೆ ನಡೆಸಿದ್ದು, ಅದರ ಸಮೀಕ್ಷಾ ವರದಿಯು ಆನ್ಲೈನ್ ಖರೀದಿಗೆ ಗ್ರಾಹಕರು ಹೆಚ್ಚಿನ ಆಸಕ್ತಿ ತೋರಿಸಿದ್ದಾರೆ ಎಂದು ಹೇಳಿದೆ. ಹೆಚ್ಚಿನ ಗ್ರಾಹಕರು ಇಂತಹ ಸಮಯದಲ್ಲಿ ಷೋರೂಂಗೆ ಹೋಗಲು ಬಯಸುವುದಿಲ್ಲ, ವಾಹನವನ್ನು ಆನ್ ಲೈನ್ ನಲ್ಲಿ ಖರೀದಿಸಲು ಇಷ್ಟ ಪಡುತ್ತೇವೆ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಟೊಯೋಟ ಕಿರ್ಲೋಸ್ಕರ್ ಈಗಾಗಲೇ ತನ್ನ ಖರೀದಿ ಪ್ರಕ್ರಿಯೆಗಳನ್ನು ಸಂಪೂರ್ಣವಾಗಿ ಡಿಜಿಟಲೀಕರಣಗೊಳಿಸಿದೆ. ಗ್ರಾಹಕರು ತಮ್ಮ ಆಯ್ಕೆಯ ಕಾರನ್ನು ಅಂತಿಮಗೊಳಿಸಿ ಹಣ ಸಂದಾಯ ಮಾಡಿ ಖರೀದಿ ಪ್ರಕ್ರಿಯೆಗಳನ್ನು ಮುಗಿಸುತ್ತಿದ್ದಂತೆ, ಅವರು ಆಯ್ಕೆ ಮಾಡಿದ ಕಾರು ಅವರ ಮನೆ ಮುಂದೆ ಬಂದು ನಿಲ್ಲುತ್ತದೆ . ಆನ್ ಲೈನ್ ಖರೀದಿಯಲ್ಲಿ ಗ್ರಾಹಕರಿಗೆ ಯಾವುದೇ ತೊಂದರೆ ಆಗದಂತೆ ನಾವು ನಿಗಾ ವಹಿಸುತ್ತೇವೆ ಎಂದಿರುವ ಟೊಯೋಟಾ ಕಾರ್ಖಾನೆಯಿಂದ ಪ್ರಾರಂಭವಾಗಿ ಡೀಲರ್ ಶಿಪ್, ಷೋರೂಂಗಳ ವರೆಗೆ ನಾವು ಶುಚಿತ್ವ ಹಾಗೂ ಸುರಕ್ಷೆಗೆ ಆದ್ಯತೆ ನೀಡಿದ್ದೇವೆ. ಕೊರೋನಾ ಈ ಸಮಯದಲ್ಲಿ ಗ್ರಾಹಕರ ಸುರಕ್ಷತೆ ನಮ್ಮ ಆದ್ಯ ಕರ್ತವ್ಯ ಎಂದು ಹೇಳಿದೆ.
ಹೋಂಡಾ ಕಾರ್ಸ್ ಇಂಡಿಯಾ ಲಿಮಿಟೆಡ್ ತನ್ನ ಕಾರ್ಪೊರೇಟ್ ವೆಬ್ ಸೈಟ್ ಮೂಲಕ ‘ಹೋಂಡಾ ಫ್ರಮ್ ಹೋಮ್’ ಆನ್ ಲೈನ್ ಬುಕಿಂಗ್ ಸೌಲಭ್ಯ ಪರಿಚಯಿಸಿದ್ದು, ಇದರ ಮೂಲಕ ಗ್ರಾಹಕರು ಕಾರ್ ಬುಕ್ ಮಾಡಬಹುದು. ನಮ್ಮ ವೆಬ್ ಸೈಟ್ ಗೆ ಭೇಟಿ ನೀಡಿ ಬುಕ್ ನೌ ಅನ್ನು ಕ್ಲಿಕ್ ಮಾಡಿ, ಹಣ ಪಾವತಿ ಮಾಡಿದರೆ ಉಳಿದೆಲ್ಲ ಜವಾಬ್ದಾರಿ ನಮ್ಮದು. ಗ್ರಾಹಕರ ಮೊಬೈಲ್ ಸಂಖ್ಯೆಗೆ ಕಾರು ಬುಕ್ ಆಗುತ್ತಿದ್ದಂತೆ ಒಂದು ಸಂದೇಶ ಬರುತ್ತದೆ. ನಂತರ ಹೋಂಡಾದ ಪ್ರತಿನಿಧಿಯೊಬ್ಬರು ಕರೆ ಮಾಡಿ ಅಗತ್ಯ ದಾಖಲೆಗಳನ್ನು ಪಡೆದುಕೊಳ್ಳುತ್ತಾರೆ. ದಾಖಲೆ ಹಾಗೂ ಹಣ ಪಾವತಿ ಹಂತಗಳು ಮುಗಿಯುತ್ತಿದ್ದಂತೆ ಕಾರು ಗ್ರಾಹಕರಿಗೆ ರವಾನೆಯಾಗುತ್ತದೆ ಎಂದು ಹೇಳಿದೆ.
www.bmw-contactless.in ಎಂಬ ವೆಬ್ ಸೈಟ್ ಮೂಲಕ ಐಷಾರಾಮಿ ಕಾರುಗಳನ್ನು ತಯಾರಿಸುವ ಬಿಎಂಡಬ್ಲ್ಯೂ ಆನ್ ಲೈನ್ ಖರೀದಿಗಾಗಿ ಮುಂದಾಗಿದೆ. ಕ್ಲಿಕ್ ಟು ಡ್ರೈವ್ ಎಂಬ ಆನ್ ಲೈನ್ ಯೋಜನೆಯನ್ನು ಟಾಟಾ ಮೋಟರ್ಸ್ ಶುರುಮಾಡಿದೆ. ಮಹಿಂದ್ರಾ ಮತ್ತು ಮಹಿಂದ್ರಾ ಔನ್ ಆನ್ ಲೈನ್ ಎಂಬ ಸೇವೆ ಆರಂಭಿಸಿದೆ.
ಬಹುತೇಕ ಎಲ್ಲಾ ಪ್ರತಿಷ್ಠಿತ ಕಾರು ಕಂಪನಿಗಳು ಮನೆಯಿಂದಲೇ ಖರೀದಿಸುವ ಅವಕಾಶವನ್ನು ಗ್ರಾಹಕರಿಗೆ ನೀಡಿದೆ.
