ಪ್ಯಾರಿಸ್: ನೇಪಾಳದಲ್ಲಿ ಯುವಜನರ ಹೋರಾಟಕ್ಕೆ ಪ್ರಧಾನಿ ಪೀಠವೇ ಅಲುಗಾಡಿದ ಬೆನ್ನಲ್ಲೇ, ಇದೀಗ ಯುರೋಪಿನ ಪ್ರಮುಖ ರಾಷ್ಟ್ರ ಫ್ರಾನ್ಸ್ ಕೂಡ ತೀವ್ರ ರಾಜಕೀಯ ಅಸ್ಥಿರತೆ ಮತ್ತು ಹಿಂಸಾಚಾರಕ್ಕೆ ಸಾಕ್ಷಿಯಾಗಿದೆ. ನೂತನ ಬಜೆಟ್ನಲ್ಲಿನ ಕಠಿಣ ಮಿತವ್ಯಯ ಕ್ರಮಗಳನ್ನು ವಿರೋಧಿಸಿ ವಿಶ್ವಾಸಮತ ಕಳೆದುಕೊಂಡು ಪ್ರಧಾನಿ ಫ್ರಾಂಕೋಯಿಸ್ ಬೇರೂ ಅಧಿಕಾರದಿಂದ ಕೆಳಗಿಳಿದ ಬೆನ್ನಲ್ಲೇ, ದೇಶಾದ್ಯಂತ “ಎಲ್ಲವನ್ನೂ ತಡೆಯಿರಿ” (Block Everything) ಎಂಬ ಹೆಸರಿನಲ್ಲಿ ಬೃಹತ್ ಪ್ರತಿಭಟನೆಗಳು ಭುಗಿಲೆದ್ದಿವೆ. ಹಿಂಸಾಚಾರಕ್ಕೆ ತಿರುಗಿದ ಈ ಪ್ರತಿಭಟನೆಗಳಲ್ಲಿ ಸುಮಾರು 200 ಜನರನ್ನು ಬಂಧಿಸಲಾಗಿದೆ ಎಂದು ಗೃಹ ಸಚಿವಾಲಯ ತಿಳಿಸಿದೆ.
ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಅವರ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದ ಪ್ರಧಾನಿ ಫ್ರಾಂಕೋಯಿಸ್ ಬೇರೂ ಅವರು, ದೇಶದ ಆರ್ಥಿಕ ಹೊರೆಯನ್ನು ಕಡಿಮೆ ಮಾಡುವ ಉದ್ದೇಶದಿಂದ ಸುಮಾರು €40 ಶತಕೋಟಿ ಮೌಲ್ಯದ ಉಳಿತಾಯ ಕ್ರಮಗಳನ್ನು ಘೋಷಿಸಿದ್ದರು. ಈ ಪ್ರಸ್ತಾವನೆಯಲ್ಲಿ ಸರ್ಕಾರಿ ನೌಕರರ ನೇಮಕಾತಿ ಕಡಿತ, ಸಾರ್ವಜನಿಕ ರಜೆಗಳ ರದ್ದತಿ, ಮತ್ತು ಕಲ್ಯಾಣ ಯೋಜನೆಗಳಿಗೆ ನೀಡುತ್ತಿದ್ದ ಅನುದಾನವನ್ನು ಸ್ಥಗಿತಗೊಳಿಸುವಂತಹ ಕಠಿಣ ನಿರ್ಧಾರಗಳು ಸೇರಿದ್ದವು.ಈ ಪ್ರಸ್ತಾವನೆಗೆ ವಿರೋಧ ಪಕ್ಷಗಳಿಂದ ತೀವ್ರ ಆಕ್ರೋಶ ವ್ಯಕ್ತವಾಯಿತು. ಸಂಸತ್ತಿನಲ್ಲಿ ಬಹುಮತವಿಲ್ಲದಿದ್ದರೂ, ಬೇರೂ ಅವರು ವಿಶ್ವಾಸಮತ ಯಾಚಿಸುವ ಧೈರ್ಯ ತೋರಿದರು. ಆದರೆ, ಸೋಮವಾರ ನಡೆದ ಮತದಾನದಲ್ಲಿ, ಅವರ ಸರ್ಕಾರದ ವಿರುದ್ಧ 364 ಮತಗಳು ಚಲಾವಣೆಯಾಗುವುದರೊಂದಿಗೆ, ಸರ್ಕಾರ ಪತನಗೊಂಡಿತು. ಕೇವಲ 9 ತಿಂಗಳ ಹಿಂದೆಯಷ್ಟೇ ಅಧಿಕಾರ ವಹಿಸಿಕೊಂಡಿದ್ದ ಬೇರೂ, ಮಂಗಳವಾರ ತಮ್ಮ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದರು. ಅವರ ಪತನದೊಂದಿಗೆ, ಕಳೆದೊಂದು ವರ್ಷದಲ್ಲಿ ಫ್ರಾನ್ಸ್ ನಾಲ್ವರು ಪ್ರಧಾನಿಗಳನ್ನು ಕಂಡಂತಾಗಿದೆ.
ಬೇರೂ ಅವರ ರಾಜೀನಾಮೆಯ ಬೆನ್ನಲ್ಲೇ, ಅಧ್ಯಕ್ಷ ಮ್ಯಾಕ್ರನ್ ಅವರು ರಕ್ಷಣಾ ಸಚಿವ ಸೆಬಾಸ್ಟಿಯನ್ ಲೆಕೋರ್ನು ಅವರನ್ನು ನೂತನ ಪ್ರಧಾನಿಯಾಗಿ ನೇಮಿಸಿದ್ದಾರೆ. ಆದರೆ, ಈ ರಾಜಕೀಯ ಬೆಳವಣಿಗೆಯು ಜನರ ಆಕ್ರೋಶವನ್ನು ತಣಿಸುವಲ್ಲಿ ವಿಫಲವಾಗಿದೆ. “Bloquons Tout” (ಎಲ್ಲವನ್ನೂ ತಡೆಯಿರಿ) ಎಂಬ ಹೆಸರಿನಲ್ಲಿ ಸಾಮಾಜಿಕ ಜಾಲತಾಣಗಳ ಮೂಲಕ ಸಂಘಟಿತವಾದ ಚಳವಳಿಯು ಬುಧವಾರ ಇಡೀ ದೇಶವನ್ನು ಸ್ತಬ್ಧಗೊಳಿಸುವ ಪ್ರಯತ್ನ ನಡೆಸಿತು.
ಪ್ಯಾರಿಸ್, ರೆನ್ನೆಸ್, ಲಿಯಾನ್ ಸೇರಿದಂತೆ ಪ್ರಮುಖ ನಗರಗಳಲ್ಲಿ ಪ್ರತಿಭಟನಾಕಾರರು ಬೀದಿಗಿಳಿದು, ಹೆದ್ದಾರಿಗಳನ್ನು ತಡೆದರು, ಟೈರ್ಗಳಿಗೆ ಬೆಂಕಿ ಹಚ್ಚಿ ಆಕ್ರೋಶ ವ್ಯಕ್ತಪಡಿಸಿದರು. ರಾಜಧಾನಿ ಪ್ಯಾರಿಸ್ನ ಪ್ರಮುಖ ವರ್ತುಲ ರಸ್ತೆಯನ್ನು ತಡೆಯಲು ಹಲವು ಬಾರಿ ಪ್ರಯತ್ನಿಸಿದರು. ರೆನ್ನೆಸ್ ನಗರದಲ್ಲಿ ಒಂದು ಬಸ್ಗೆ ಬೆಂಕಿ ಹಚ್ಚಲಾಗಿದ್ದು, ವಿದ್ಯುತ್ ಮಾರ್ಗಗಳಿಗೆ ಹಾನಿ ಮಾಡಿದ್ದರಿಂದ ರೈಲು ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿದೆ.
ಪರಿಸ್ಥಿತಿಯನ್ನು ನಿಯಂತ್ರಿಸಲು ದೇಶಾದ್ಯಂತ ಸುಮಾರು 80,000 ಪೊಲೀಸ್ ಸಿಬ್ಬಂದಿಯನ್ನು ನಿಯೋಜಿಸಲಾಗಿದ್ದು, ಹಲವೆಡೆ ಪೊಲೀಸರು ಮತ್ತು ಪ್ರತಿಭಟನಾಕಾರರ ನಡುವೆ ಘರ್ಷಣೆ ನಡೆದಿದೆ. ಪೊಲೀಸರು ಅಶ್ರುವಾಯು ಪ್ರಯೋಗಿಸಿ ಗುಂಪನ್ನು ಚದುರಿಸಿದರು. ಮುಂಜಾಗ್ರತಾ ಕ್ರಮವಾಗಿ, ಬೆಳಗ್ಗಿನ ಅವಧಿಯಲ್ಲೇ ಸುಮಾರು 200 ಜನರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಗೃಹ ಸಚಿವ ಬ್ರೂನೋ ರಿಟೈಲೊ ದೃಢಪಡಿಸಿದ್ದಾರೆ.
ಈ ಹಿಂಸಾಚಾರವು ದೇಶದಲ್ಲಿ “ಬಂಡಾಯದ ವಾತಾವರಣವನ್ನು” ಸೃಷ್ಟಿಸುವ ಪ್ರಯತ್ನವಾಗಿದೆ ಎಂದು ಅವರು ಆರೋಪಿಸಿದ್ದಾರೆ. ನೂತನ ಪ್ರಧಾನಿ ಲೆಕೋರ್ನು ಅವರಿಗೆ ಈ ಪ್ರತಿಭಟನೆಗಳು ಮೊದಲ ಸವಾಲಾಗಿ ಪರಿಣಮಿಸಿದ್ದು, ಫ್ರಾನ್ಸ್ನ ರಾಜಕೀಯ ಮತ್ತು ಸಾಮಾಜಿಕ ಬಿಕ್ಕಟ್ಟು ಮತ್ತಷ್ಟು ಆಳವಾಗುವ ಲಕ್ಷಣಗಳು ಗೋಚರಿಸುತ್ತಿವೆ.
