ಪ್ರಧಾನಿ ನರೇಂದ್ರ ಮೋದಿ ಅವರ ವಿದೇಶಿ ಪ್ರವಾಸಗಳು ಕೇವಲ ರಾಜತಾಂತ್ರಿಕ ಭೇಟಿಗಳಾಗಿ ಉಳಿಯದೆ, ಭಾರತದ ಸಂಸ್ಕೃತಿ ಮತ್ತು ಸ್ವದೇಶಿ ಉತ್ಪನ್ನಗಳ ಪ್ರಚಾರದ ವೇದಿಕೆಗಳಾಗುತ್ತಿವೆ. ಇಟಲಿಯಲ್ಲಿ ನಡೆದ ಜಿ7 ಶೃಂಗಸಭೆಯ ವೇಳೆ ಪ್ರಧಾನಿ ಮೋದಿ ಅವರು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರಿಗೆ ಭಾರತದ ಹೆಮ್ಮೆಯ ಪಾರ್ಲೆ ಮೆಲೋಡಿ ಚಾಕಲೇಟ್ ಉಡುಗೊರೆಯಾಗಿ ನೀಡುವ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದ್ದಾರೆ.
ಇಟಲಿ ಕಾಂಗ್ರೆಸ್ ಅಧಿನಾಯಕಿ ಸೋನಿಯಾ ಗಾಂಧಿ ಅವರ ತವರೂರು ಎಂಬ ಕಾರಣಕ್ಕೆ ಈ ಭೇಟಿ ರಾಜಕೀಯವಾಗಿಯೂ ಹೆಚ್ಚು ಕುತೂಹಲ ಮೂಡಿಸಿತ್ತು. ಅಲ್ಲಿ ಮೋದಿ ಮತ್ತು ಮೆಲೋನಿ ಅವರ ಆ ಒಂದು ವಿಡಿಯೋ ಅಥವಾ ರೀಲ್ಸ್ ಸಾಮಾಜಿಕ ಜಾಲತಾಣದಲ್ಲಿ ಹಳೆಯ ಎಲ್ಲಾ ದಾಖಲೆಗಳನ್ನು ಪುಡಿಪುಡಿ ಮಾಡಿದೆ. ಇಟಲಿಯ ಒಟ್ಟು ಜನಸಂಖ್ಯೆ ಸುಮಾರು 5 ಕೋಟಿಗೂ ಅಧಿಕವಿದ್ದರೆ, ಮೋದಿ ಮತ್ತು ಮೆಲೋನಿ ಅವರ ಈ ಒಂದು ರೀಲ್ಸ್ ಅನ್ನು ಕೇವಲ ಕೆಲವು ಗಂಟೆಗಳಲ್ಲಿ 13 ಕೋಟಿಗೂ ಹೆಚ್ಚು ಜನ ವೀಕ್ಷಿಸಿದ್ದಾರೆ. ಅಂದರೆ ಇಟಲಿಯ ಜನಸಂಖ್ಯೆಯ ಎರಡೂವರೆ ಪಟ್ಟು ಹೆಚ್ಚು ಮಂದಿ ಮೋದಿ ಅವರ ಈ ನಡೆಯನ್ನು ಡಿಜಿಟಲ್ ಲೋಕದಲ್ಲಿ ಸಂಭ್ರಮಿಸಿದ್ದಾರೆ.
ಕೇವಲ ಪ್ರಚಾರಕ್ಕಾಗಿ ಮೋದಿ ಈ ರೀತಿ ಮಾಡಿಲ್ಲ, ಇದರ ಹಿಂದೆ ಮೇಕ್ ಇನ್ ಇಂಡಿಯಾ ಎಂಬ ಬಲಿಷ್ಠ ಮಂತ್ರ ಅಡಗಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ವಿದೇಶಿ ಚಾಕಲೇಟ್ ಕಂಪನಿಗಳ ದರ್ಬಾರು ಇರುವಾಗ, ಭಾರತದ ಮೂಲದ ಪಾರ್ಲೆ ಕಂಪನಿಯ ಮೆಲೋಡಿ ಚಾಕಲೇಟ್ ಅನ್ನು ಜಾಗತಿಕ ವೇದಿಕೆಯಲ್ಲಿ ಪ್ರದರ್ಶಿಸುವ ಮೂಲಕ ಭಾರತೀಯ ಬ್ರ್ಯಾಂಡ್ ಗೆ ಅಂತರಾಷ್ಟ್ರೀಯ ಮನ್ನಣೆ ಒದಗಿಸಿಕೊಟ್ಟಿದ್ದಾರೆ. ಇದರ ನೇರ ಪರಿಣಾಮ ಎಂಬಂತೆ ಮಾರುಕಟ್ಟೆಯಲ್ಲಿ ಪಾರ್ಲೆ ಕಂಪನಿಯ ಶೇರು ಮೌಲ್ಯದಲ್ಲಿ ದಿಢೀರನೆ ಶೇಕಡಾ 5 ರಷ್ಟು ಏರಿಕೆ ಕಂಡುಬಂದಿದೆ. ಇದು ಮೋದಿಯವರ ಬ್ರ್ಯಾಂಡ್ ಪವರ್ ಗೆ ಸಾಕ್ಷಿಯಾಗಿದೆ.
ಈ ಹಿಂದೆ ಲಕ್ಷದ್ವೀಪಕ್ಕೆ ಭೇಟಿ ನೀಡಿ ಅಲ್ಲಿನ ಸಮುದ್ರ ತೀರದಲ್ಲಿ ಕುಳಿತು ಮೋದಿ ತೆಗೆಸಿಕೊಂಡ ಒಂದೇ ಒಂದು ಫೋಟೋ ಮಾಲ್ಡೀವ್ಸ್ ದೇಶದ ಪ್ರವಾಸೋದ್ಯಮವನ್ನೇ ನಡುಗಿಸಿತ್ತು. ಈಗ ಇಟಲಿಯಲ್ಲಿ ಚಾಕಲೇಟ್ ರಾಜತಾಂತ್ರಿಕತೆ ನಡೆಸುವ ಮೂಲಕ ಸ್ವದೇಶಿ ಮಾರುಕಟ್ಟೆಗೆ ಜಾಗತಿಕ ಶಕ್ತಿ ತುಂಬಿದ್ದಾರೆ. ವಿರೋಧ ಪಕ್ಷಗಳು ಈ ರೀಲ್ಸ್ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಎಷ್ಟೇ ಟ್ರೋಲ್ ಮಾಡಿದರೂ, ಮೋದಿ ಅವರ ಈ ತಂತ್ರಗಾರಿಕೆಯಿಂದ ಭಾರತೀಯ ಉತ್ಪನ್ನಗಳಿಗೆ ವಿಶ್ವದಾದ್ಯಂತ ಬೇಡಿಕೆ ಹೆಚ್ಚುತ್ತಿದೆ. ವಿದೇಶಿ ವಸ್ತುಗಳ ವ್ಯಾಮೋಹ ಬಿಟ್ಟು ಭಾರತೀಯ ಉತ್ಪನ್ನಗಳನ್ನು ಬಳಸಿ ಎಂಬ ಪ್ರಬಲ ಸಂದೇಶವನ್ನು ಮೋದಿ ಅತ್ಯಂತ ಚಾಣಾಕ್ಷತನದಿಂದ ಜಗತ್ತಿಗೆ ಸಾರಿದ್ದಾರೆ.
