ಅಮೆರಿಕದ ಟೆಕ್ಸಾಸ್ ನಲ್ಲಿ ದರೋಡೆಯೊಂದು ನಡೆದಿದ್ದು, ಸಿಸಿಟಿವಿ ದೃಶ್ಯಾವಳಿ ಕಂಡು ಪೊಲೀಸರೇ ದಂಗಾಗಿದ್ದಾರೆ.
ಈ ಘಟನೆ ಮಾರ್ಚ್ 14ರಂದು ನಾರ್ತ್ ಹೂಸ್ಟನ್ ನ ಗ್ರೀನ್ಸ್ ಪಾಯಿಂಟ್ ಪ್ರದೇಶದ ವೆಲ್ಸ್ ಫಾರ್ಗೋ ಬ್ಯಾಂಕ್ ನಲ್ಲಿ ನಡೆದಿದೆ. 11, 12 ಮತ್ತು 16 ವರ್ಷದ ಮೂರು ಮಕ್ಕಳು ಕ್ಯಾಷಿಯರ್ ಗೆ ಬೆದರಿಕೆ ಪತ್ರ ನೀಡಿ ಬ್ಯಾಂಕ್ ನಲ್ಲಿದ್ದ ಹಣ ದೋಚಿ ಕಾಲ್ನಡಿಗೆಯಲ್ಲಿಯೇ ಪರಾರಿಯಾಗಿದ್ದಾರೆ. ಬಾಲಕರು ಬ್ಯಾಂಕ್ ಗೆ ಹೋಗಿ ಕ್ಯಾಷಿಯರ್ ಗೆ ಬೆದರಿಕೆ ಪತ್ರ ನೀಡಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.
ಸಿಸಿಟಿವಿ ಪರಿಶೀಲಿಸಿದಾಗ ಈ ಘಟನೆ ಬೆಳಕಿಗೆ ಬಂದಿದೆ. ಬ್ಯಾಂಕ್ ದರೋಡೆಕೋರರು ಅಪ್ರಾಪ್ತ ವಯಸ್ಸಿನವರು ಎಂದು ತಿಳಿದು ಬಂದಿದೆ. ಹೀಗಾಗಿ ಸದ್ಯ ಪೊಲೀಸರು ಫೋಟೋಗಳನ್ನು ಬಿಡುಗಡೆ ಮಾಡಿದ್ದಾರೆ. ಈ ಫೋಟೋ ಬಿಡುಗಡೆಯಾಗುತ್ತಿದ್ದಂತೆ ಇಬ್ಬರು ಕಿರಿಯ ಹುಡುಗರ ಪೋಷಕರು ಮುಂದೆ ಬಂದು ಬಾಲಕರನ್ನು ಪೊಲೀಸರಿಗೆ ಒಪ್ಪಿಸಿದ್ದಾರೆ. ಅಲ್ಲದೇ, ಮೂರನೇ ಬಾಲಕನನ್ನು ಕೂಡ ಅರೆಸ್ಟ್ ಮಾಡಿದ್ದಾರೆ.