ಒಲಿಂಪಿಕ್ಸ್ನ 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಭಾರತದ ಸ್ಟಾರ್ ಶೂಟರ್ ಮನು ಭಾಕರ್ ಕಂಚಿನ ಪದಕ ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ. ಈ ಮೂಲಕ ಶೂಟಿಂಗ್ ನಲ್ಲಿ ಪದಕ ಗೆದ್ದ ಮೊದಲ ಭಾರತೀಯ ಮಹಿಳೆ ಎಂಬ ದಾಖಲೆಯನ್ನೂ ನಿರ್ಮಿಸಿದ್ದಾರೆ. ಅವರ ಸಾಧನೆಗೆ ಇಡೀ ಭಾರತವೇ ಅಭಿನಂದನೆ ಸಲ್ಲಿಸುತ್ತಿದ್ದು, ಪ್ರಧಾನಿ ನರೇಂದ್ರ ಮೋದಿ ಅವರು ದೂರವಾಣಿ ಕರೆ ಮಾಡಿ ಅಭಿನಂದನೆ ಸಲ್ಲಿಸಿದ್ದಾರೆ.
ಫೋನ್ ಕರೆ ಮಾಡಿ ಅಭಿನಂದನೆ ಸಲ್ಲಿಸಿದ ಪ್ರಧಾನಿ ಮೋದಿ, ಕೂದಲೆಳೆ ಅಂತರದಲ್ಲಿ ಬೆಳ್ಳಿ ಪದಕದಿಂದ ವಂಚಿತರಾಗಿದ್ದೀರಿ. ಆದರೂ ನೀವು ದೇಶಕ್ಕೆ ಕೀರ್ತಿ ತಂದಿದ್ದೀರಿ. ನೀವು ಎರಡು ರೀತಿಯ ಕ್ರೆಡಿಟ್ ಪಡೆಯುತ್ತಿದ್ದೀರಿ. ಮೊದಲನೆಯದಾಗಿ, ನೀವು ಒಲಿಂಪಿಕ್ಸ್ನಲ್ಲಿ ಕಂಚಿನ ಪದಕ ಗೆದ್ದಿದ್ದೀರಿ. ಎರಡನೆಯದಾಗಿ, ನೀವು ಶೂಟಿಂಗ್ನಲ್ಲಿ ಪದಕ ತಂದ ಮೊದಲ ಮಹಿಳೆಯಾಗಿದ್ದೀರಿ. ಈ ಸಾಧನೆ ಮಾಡಿದ ನಿಮಗೆ ನನ್ನ ಕಡೆಯಿಂದ ಅನೇಕ ಅಭಿನಂದನೆಗಳು ಎಂದು ಮೋದಿ ಹೇಳಿದ್ದಾರೆ.
ಟೋಕಿಯೊ ಒಲಿಂಪಿಕ್ಸ್ ನಲ್ಲಿ ರೈಫಲ್ ಕೈಕೊಟ್ಟಿತ್ತು. ಆದರೆ ಈ ಬಾರಿ ನೀವು ಎಲ್ಲಾ ನ್ಯೂನತೆಗಳನ್ನು ಸರಿದೂಗಿಸಿದ್ದೀರಿ ಎಂದು ಪ್ರಧಾನಿ ಹಾಡಿ ಹೊಗಳಿದ್ದಾರೆ. ನೀವು ಉತ್ತಮವಾಗಿ ಆಡುತ್ತೀರಿ ಎಂಬ ಸಂಪೂರ್ಣ ವಿಶ್ವಾಸವಿದೆ ಎಂದು ಹೇಳಿದ್ದಾರೆ.
ಇತರ ಸಹೋದ್ಯೋಗಿಗಳನ್ನು ನೆನೆದ ಮೋದಿ, ಇತರ ಎಲ್ಲ ಸಹೋದ್ಯೋಗಿಗಳು ಸಂತೋಷವಾಗಿದ್ದಾರೆಯೇ ಎಂದು ಪ್ರಶ್ನಿಸಿದ್ದಾರೆ. ಅಲ್ಲದೇ, ಫೋನ್ ನಲ್ಲಿ ನಿಮ್ಮ ಮನೆಯವರ ಬಳಿ ಮಾತನಾಡಿದ್ರಾ ಎಂದು ಕೇಳಿದರು. ಇದಕ್ಕೆ ಮನು, ಇಲ್ಲ. ನಾನು ಸಂಜೆ ರೂಮ್ಗೆ ಹೋದಾಗ ಮಾತನಾಡುತ್ತೇನೆ ಎಂದು ಭಾಕರ್ ಹೇಳಿದ್ದಾರೆ. ನಿಮ್ಮ ತಂದೆ ತುಂಬಾ ಖುಷಿಯಾಗುತ್ತಾರೆ, ಏಕೆಂದರೆ ಅವರು ನಿಮ್ಮನ್ನು ತುಂಬಾ ಪ್ರೋತ್ಸಾಹಿಸಿದ್ದಾರೆ ಎಂದು ಪ್ರಧಾನಿ ಹೇಳಿದ್ದಾರೆ.
ಮನು ಭಾಕರ್ ಪದಕ ಗೆದ್ದಿದ್ದಕ್ಕೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಸೇರಿದಂತೆ ಕ್ರಿಕೆಟ್ ನ ಮಾಜಿ ಆಟಗಾರರು, ಕೇಂದ್ರ ಸಚಿವರು ಸೇರಿದಂತೆ ಹಲವರು ಅಭಿನಂದನೆ ಸಲ್ಲಿಸಿದ್ದಾರೆ.
