ಕಪ್ಪು ಕತ್ತಲಿನ ಕಡು ವಿಷಾದ ನಿಷಾದ ರಾತ್ರಿಗಳು
ನನ್ನ ಸೋಕಲಾರವು
ಕನಿಷ್ಟ ನನ್ನ ಭಾವಗಳಿಗೆ ಭೀತಿಯನೂ ಹುಟ್ಟಿಸಲಾರವು
ಕಾರಣ ನಾನು ಶ್ವೇತವರ್ಣದ ಸುಕೋಮಲೆಯಲ್ಲ
ನಾನು ಕರಿಯಳು
ಆದರೆ ಈ ತೊಗಲಿನ ಮೇಲಿನ ನನ್ನ ಅಗಾಧ ಪ್ರೇಮ ಕೊನೆಯಾಗುವುದಿಲ್ಲ
ಈ ಸಾಲುಗಳನ್ನು ತನ್ನಷ್ಟಕ್ಕೆ ತಾನೇ ಆಕೆ ಅದೆಷ್ಟು ಬಾರಿ ಹೇಳಿಕೊಂಡಿದ್ದಳೋ. ಅವಳು ಹುಟ್ಟಿದ್ದ ಇಥಿಯೊಪಿಯಾ, ಬೆಳೆದ ದಕ್ಷಿಣ ಸೂಡಾನ್ ಪ್ರಾಂತ್ಯ, ವಲಸೆ ಬಂದ ಯುನೈಟೆಡ್ ಸ್ಟೇಟ್ಸ್ ಎಲ್ಲಾ ಕಡೆಯೂ ನಿರಂತರ ಅದೆಷ್ಟೋ ಬಾರಿ ಅವಮಾನ ಹೀಗಳಿಕೆ ಅನುಭವಿಸಿದಾಗ ಸಾವಿರ ಸಲ ಹೀಗೆಂದುಕೊಂಡಿದ್ದಾಳೆ. ಅವಳ ಚರ್ಮದ ಕಟ್ಟ ಕಪ್ಪು ಬಣ್ಣ ಅವಳನ್ನು ಯಾವತ್ತೂ ಬೇಸರಕ್ಕೆ ದೂಡಿಲ್ಲ. ತನ್ನ ವಿಶಿಷ್ಟ ವಿಚಿತ್ರ ಮೆಲನಿನ್ ವರ್ಣದ್ರವ್ಯ ವಿಶೇಷತೆಗೆ ಅವಳಿಗೆ ಹೆಮ್ಮೆ ಇದೆ. ಒಂದಾನೊಂದು ಕಾಲದಲ್ಲಿ ತನ್ನ 14ನೆಯ ವಯಸ್ಸಿನಲ್ಲಿ ಮೊದಲ ಬಾರಿಗೆ ಮಾಡಲಿಂಗ್ ಎಂಬ ಶಬ್ಧ ಕಿವಿಗೆ ಬಿದ್ದಾಗ, ಅದೊಂದು ಕೆಲಸವೇನೋ ಅದನ್ನು ಮಾಡಿದರೆ ತನ್ನ ಜೀವನ ನಿರ್ವಹಣೆಯಾಗುತ್ತದೆ ಎಂದುಕೊಂಡಿದ್ದ ಅಮಾಯಕಿ ಆಕೆ. ಅಮೇರಿಕನ್ ಇಂಗ್ಲೀಷ್ ಭಾಷೆ ಅರ್ಥವಾಗದೆ ಪಿಳಿ ಪಿಳಿ ಕಣ್ಣು ಬಿಟ್ಟ ಕೃಷ್ಣ ಸುಂದರಿ ಅವಳು. ಆದ್ರೆ ಅವಳ ಅದಮ್ಯ ಆತ್ಮವಿಶ್ವಾಸ ಮತ್ತು ಆತ್ಮಗೌರವದ ಕಾರಣ ಇಂದು ಆಕೆ ವಿಶ್ವದ ಅತ್ಯಂತ ಸೆಲೆಬ್ರಿಟಿ ಮಾಡೆಲ್. ಕ್ವೀನ್ ಆಫ್ ಡಾರ್ಕ್ ಎಂದು ಕರೆಸಿಕೊಳ್ಳುವ ಅವಳಿಗೆ ಸಾಮಾಜಿಕ ಜಾಲತಾಣ ಇನ್ ಸ್ಟಾಗ್ರಾಂ ನಲ್ಲಿ ಬರೋಬ್ಬರಿ 8 ಲಕ್ಷ ಫಾಲೋವರ್ಸ್ ಇದ್ದಾರೆ. ಬ್ಲಾಕ್ ಈಸ್ ಬೋಲ್ಡ್, ಬ್ಲಾಕ್ ಈಸ್ ಬ್ಯೂಟಿಫುಲ್, ಬ್ಲಾಕ್ ಈಸ್ ಗೋಲ್ಡ್ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುವ ಆಕೆಯ ಹೆಸರು ನ್ಯಾಕಿಮ್ ಗ್ಯಾಟ್ ವೆಚ್. 27 ವರ್ಷದ ಮಾಡೆಲ್ ನ್ಯಾಕಿಮ್ ಈಗ ವಿಶ್ವದ ಎಲ್ಲಾ ಕಪ್ಪು ವರ್ಣೀಯರ ಪಾಲಿನ ಹೆಮ್ಮೆ. ಅವಳ ಕಡು ಕಪ್ಪು ಬಣ್ಣವೇ ಅವಳನ್ನು ಮಾಡೆಲಿಂಗ್ ಎನ್ನುವ ರಂಗೀನ್ ಲೋಕದ ಉತ್ತುಂಗಕ್ಕೆ ಕರೆದೊಯ್ದಿದೆ; ಬಣ್ಣಕ್ಕಿಂತ ಮಿಗಿಲಾದ ಅವಳ ಆತ್ಮವಿಶ್ವಾಸ.
ನ್ಯಾಕಿಮ್ ಗ್ಯಾಟ್ ವೆಚ್ ಜನಿಸಿದ್ದು 27 ಜನವರಿ 1993ರಲ್ಲಿ ಇಥಿಯೋಪಿಯಾದ ಗಂಬೇಲಾದಲ್ಲಿ. ದಕ್ಷಿಣ ಸುಡಾನ್ ನಲ್ಲಿ ಸಂಭವಿಸಿದ ನಾಗರೀಕ ಜನಾಂಗೀಯ ಕಲಹಕ್ಕೂ ಮೊದಲು ಅವಳು ತನ್ನ ಪೋಷಕರೊಂದಿಗೆ ದಕ್ಷಿಣ ಸುಡಾನ್ ಪ್ರಾಂತ್ಯದ ಮೈವುತ್ ನಲ್ಲಿ ವಾಸಿಸುತ್ತಿದ್ದಳು. ನಂತರ ಉಳಿದ ವಲಸಿಗರಂತೆ ನೆಮ್ಮದಿಯ ಬದುಕನ್ನು ಅರೆಸಿಕೊಂಡು ಅವಳ ಫ್ಯಾಮಿಲಿ ಮೊದಲು ಕೀನ್ಯಾದ ರೆಫ್ಯೂಜಿ ಕ್ಯಾಂಪ್ ನಲ್ಲಿ ಕೆಲಕಾಲವಿತ್ತು. ನಂತರ ಯುನೈಟೆಡ್ ಸ್ಟೇಟ್ಸ್ ಆಫ್ ಅಮೇರಿಕಾಗೆ ಬಂದಾಗ ನ್ಯಾಕಿಮ್ ವಯಸ್ಸು 14 ವರ್ಷವಷ್ಟೆ. ಮೊದಲು ಅಮೇರಿಕಾದ ನ್ಯೂಯಾರ್ಕ್ ನ ಬಫೆಲೋ ಪಟ್ಟಣದಲ್ಲಿ ಆನಂತರ ಮಿನ್ನೇಸೊಟಾದ ಮಿನ್ನೇಪೋಲೀಸ್ ತಲುಪಿದರು. ದಕ್ಷಿಣ ಸೂಡಾನ್ ಜೊತೆಗಿನ ಭಾವನಾತ್ಮಕ ನಂಟಿನ ಕಾರಣ ಈಗಲೂ ನ್ಯಾಕಿಮ್ ತಾನು ಸೌತ್ ಸೂಡಾನ್ ಬೇಸ್ಡ್ ಮಾಡೆಲ್ ಎಂದೇ ಗುರುತಿಸಿಕೊಳ್ಳಲು ಇಷ್ಟಪಡುತ್ತಾಳೆ. ಸೆಂಟ್ ಕ್ಲೌಡ್ ಸ್ಟೇಟ್ ಯೂನಿವರ್ಸಿಟಿಯ ಫ್ಯಾಶನ್ ಶೋ ನ್ಯಾಕಿಮ್ ಳ ಮೊದಲ ಮಾಡೆಲಿಂಗ್ ವೇದಿಕೆ. ಕೆಲ ಕಾಲ ಬಫೆಲೋ ದ ಗ್ರಾಸರಿ ಸೂಪರ್ ಮಾರ್ಕೆಟ್ ನಲ್ಲಿ ಕೆಲಸ ಮಾಡಿದ ನ್ಯಾಕಿಮ್, ಅಲ್ಲಿ ತನ್ನ ಕಪ್ಪು ಬಣ್ಣದ ತೊಗಲಿನ ಕಾರಣ ಅರೆಕಾಲಿಕ ರೂಪದರ್ಶಿಯಾಗಿ ಕೆಲಸ ಮಾಡಿದ್ದಳು. ಶ್ವೇತ ವರ್ಣದ ತಳುಕುಬಳುಕಿನ ಮಾಡೆಲ್ ಗಳ ಬದಲಿಗೆ ವಿಭಿನ್ನವಾಗಿ ಈ ಕೃಷ್ಣಸುಂದರಿಯನ್ನು ಶೋಕೇಸ್ ಮಾಡಿತ್ತು ಆ ಸೂಪರ್ ಮಾರ್ಕೆಟ್. ಆನಂತರ ನ್ಯಾಕಿಮ್ ಹಿಂತಿರುಗಿ ನೋಡಲಿಲ್ಲ. ಆಕೆಯ ಅಗಾಧ ಆತ್ಮವಿಶ್ವಾಸವನ್ನು ಗುರುತಿಸಿದ ಮಾಡೆಲಿಂಗ್ ಮ್ಯಾಗ್ಜಿನ್ ಜಗತ್ತು ಅವಳಿಗೆ ರೆಡ್ ಕಾರ್ಪೆಟ್ ಸ್ವಾಗತ ಕೋರಿದವು. 2017ರಲ್ಲಿ ತೆರೆಕಂಡ ಹಾಲಿವುಡ್ ಸಿನಿಮಾ ಜಿಗ್ ಸಾನಲ್ಲಿ ನ್ಯಾಕಿಮ್ ಪ್ರಮೋಷನಲ್ ಪೋಸ್ಟರ್ ನಲ್ಲಿ ಕಾಣಿಸಿಕೊಂಡಳು. ರೂಪದರ್ಶಿಗಳಿಗೆ ಬಿಳಿತೊಗಲೆ ಮುಖ್ಯ ಎನ್ನುವ ಸಿದ್ಧ ಮಾದರಿಯನ್ನು ಮುರಿದು ಕಡುಕಪ್ಪು ವರ್ಣೀಯಳೂ ಮಾಡೆಲಿಂಗ್ ಜಗತ್ತಿನ ಔನ್ನತ್ಯ ತಲುಪಬಹುದು ಎಂದು ಸಾಬೀತು ಮಾಡಿದಾಕೆ ನ್ಯಾಕಿಮ್. ಅವಳಿಗೆ ಜಗತ್ತಿನ ಮಾಡೆಲಿಂಗ್ ಕ್ಷೇತ್ರ ಕ್ವೀನ್ ಆಫ್ ಡಾರ್ಕ್ ಎಂದು ಕರೆದಾಗಲೂ ಸಂತೋಷದಿಂದ ಒಪ್ಪಿಕೊಂಡಳು. ಜೀವನದಲ್ಲಿ ಆತ್ಮವಿಶ್ವಾಸವೊಂದಿದ್ದರೆ ಏನು ಬೇಕಾದರೂ ಸಾಧಿಸಬಹುದು ಎನ್ನುವದಕ್ಕೆ ಜೀವಂತ ನಿದರ್ಶನವಾದಳು.
“My chocolate is elegant. So is what I represent… A nation of warriors,” ಇದು ನ್ಯಾಕಿಮ್ ತನ್ನ ಇನ್ ಸ್ಟಾಗ್ರಾಂ ಫೋಟೋ ಒಂದಕ್ಕೆ ಹಾಕಿದ್ದ ಅಡಿಬರಹ. ನ್ಯಾಕಿಮ್ ಎನ್ನುವ ಆಫ್ರಿಕನ್ ಅಮೇರಿಕನ್ ಮಾಡೆಲ್ ಅನ್ನು ಏಕಾಏಕಿ ಜನಪ್ರಿಯಗೊಳಿಸಿದ್ದೇ ಈ ಪೋಸ್ಟ್. ಅವಳ ಚರ್ಮವನ್ನು ಬ್ಲೀಚ್ ಮಾಡಿಸಲು ಒಬ್ಬ ಉಬರ್ ಡ್ರೈವರ್ ಸಲಹೆ ಕೊಟ್ಟಾಗ ಆಕೆ ಜೋರಾಗಿ ನಕ್ಕುಬಿಟ್ಟಿದ್ದಳಂತೆ. ನ್ಯಾಕಿಮ್ ಅಭಿಮತ ಇಷ್ಟೇ, ನೀವು ನಿಮ್ಮ ತೊಗಲನ್ನು ಪ್ರೀತಿಸದೇ ಇದ್ದರೇ ನಿಮ್ಮ ವ್ಯಕ್ತಿತ್ವವನ್ನು ಪ್ರೀತಿಸಲಾರಿರಿ.
“You are beyond beautiful and the love I have for you is unconditional because you are me,” ಇದು ನ್ಯಾಕಿಮ್ ಗಳ ಮತ್ತೊಂದು ಪ್ರಸಿದ್ಧ ಪೋಸ್ಟ್. ಇಷ್ಟೇ ಅಲ್ಲ ವಿಶ್ವದಾದ್ಯಂತ ಇರುವ ಎಲ್ಲಾ ಕರಿ ಜನರ ಪ್ರತಿನಿಧಿಯಾಗಿರುವ ಆಕೆ ತನ್ನ ಚರ್ಮದ ಬಣ್ಣವನ್ನು ಪ್ರಕೃತಿಯ ಬಣ್ಣವೆಂದಾಗಿ ಭಾವಿಸುತ್ತಾಳೆ. ಅದಕ್ಕೆ ಉದಾಹರಣೆ ಅವಳ ಈ ಮಾತು “My skin absorbs the suns rays and my hair defies gravity. Now you can’t tell me I’m not magical!”
“Let’s show the world how beautiful and intelligent we are apart from just being dark skinned” ಎನ್ನುವ ನ್ಯಾಕಿಮ್ ತನ್ನೊಳಗಿರುವ ಆತ್ಮವಿಶ್ವಾಸ ಮತ್ತು ಆತ್ಮ ಗೌರವದ ಮುಂದೆ ಪ್ರಪಂಚದ ಉಳಿದೆಲ್ಲಾ ವಸ್ತು, ವ್ಯಕ್ತಿ, ವಿಚಾರಗಳೂ ನಗಣ್ಯ ಎಂದು ಬಗೆಯುತ್ತಾಳೆ. ಇದೇ ನ್ಯಾಕಿಮ್ ಳ ಯಶೋಗಾಥೆಯ ಹಿಂದಿರುವ ರಹಸ್ಯ.
-ವಿಭಾ (ವಿಶ್ವಾಸ್ ಭಾರದ್ವಾಜ್)
