Rakesh Jhunjhunwala – 46 ಸಾವಿರ ಕೋಟಿ ಸಾಮ್ರಾಜ್ಯದ ಉಸ್ತುವಾರಿ ಯಾರ ಹೊಣೆ ?
ಶೇರು ಮಾರುಕಟ್ಟೆಯ ಬಿಗ್ ಬುಲ್ ರಾಕೇಶ್ ಜುಂಜುನ್ವಾಲಾ ಇಂದು 62 ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಮುಂಬೈನ ಬ್ರೀಚ್ ಕ್ಯಾಂಡಿ ಆಸ್ಪತ್ರೆ ಬೆಳಗ್ಗೆ 6.45ಕ್ಕೆ ಜುಂಜುನ್ವಾಲಾ ಅವರು ನಿಧನರಾಗಿದ್ದಾರೆ ಎಂಬುದನ್ನ ಧೃಡಪಡಿಸಿದೆ. ಆಗಸ್ಟ್ 7 ರಂದು ಮುಂಬೈ ವಿಮಾನ ನಿಲ್ದಾಣದಲ್ಲಿ ‘ಆಕಾಸ ಏರ್’ ವಿಮಾನಯಾನ ಸಂಸ್ಥೆ ಲೋಕಾರ್ಪಣೆ ವೇಳೆಯೇ ವೀಲ್ ಚೇರ್ ನಲ್ಲಿ ಕಾಣಿಸಿಕೊಂಡಿದ್ದರು.
ರಾಕೆಶ್ ಜುಂಜುನ್ವಾಲಾ ಹಲವು ಕಂಪನಿಗಳಲ್ಲಿ ಹೂಡಿಕೆ ಮಾಡಿದ್ದಾರೆ. ವಿಶ್ವದ ಶ್ರೀಮಂತರ ಫೋರ್ಬ್ಸ್ ಪಟ್ಟಿಯಲ್ಲಿ440 ನೇ ಸ್ಥಾನದಲ್ಲಿದ್ದಾರೆ. ಅವರ ನಿವ್ವಳ ಮೌಲ್ಯ 5.8 ಬಿಲಿಯನ್ ಡಾಲರ್ ಅಂದರೆ ಸುಮಾರು 46 ಸಾವಿರ ಕೋಟಿ ರೂ.
ಇದೀಗ ರಾಕೇಶ್ ಜುಂಜುನ್ವಾಲಾ ನಿರ್ಗಮನದಿಂದಾಗಿ ವಿಮಾನಯಾನ ಸಂಸ್ಥೆಗೆ ತೊಂದರೆಯಾಗಬಹುದಾ ? ಮುಂದೆ ಆತನ ಸಾಮ್ರಾಜ್ಯವನ್ನು ಯಾರು ತೆಗೆದುಕೊಳ್ಳುತ್ತಾರೆ ? ಎಂಬ ಪ್ರಶ್ನೆಗಳಿಗೆ ಉತ್ತರ ತಿಳಿದುಕೊಳ್ಳೋಣ..
ರಾಕೇಶ್ ಜುಂಜುನ್ವಾಲಾ ಅವರನ್ನು ಭಾರತದ ವಾರೆನ್ ಬಫೆಟ್ ಎಂದು ಕರೆಯಲಾಗುತ್ತದೆ. ದೇಶದ ಅತ್ಯಂತ ಯಶಸ್ವಿ ಹೂಡಿಕೆದಾರರಲ್ಲಿ ಒಬ್ಬರು. ರಾಕೇಶ್ 1985 ರಲ್ಲಿ 5000 ರೂ.ನೊಂದಿಗೆ ಹೂಡಿಕೆ ಮಾಡಲು ಪ್ರಾರಂಭಿಸಿದ ವ್ಯಕ್ತಿ. ಆಗ ಬಿಎಸ್ಇ ಸೂಚ್ಯಂಕ 150 ರಲ್ಲಿತ್ತು. ಪತ್ನಿ ರೇಖಾ ಅವರ ಇಚ್ಛೆಯ ಮೇರೆಗೆ 2003 ರಲ್ಲಿ ಅವರು ತಮ್ಮದೇ ಆದ ಸ್ಟಾಕ್ ಟ್ರೇಡಿಂಗ್ ಸಂಸ್ಥೆ ರೇರ್ ಎಂಟರ್ಪ್ರೈಸಸ್ ಸ್ಥಾಪಿಸಿದರು. ಇದಕ್ಕೆ ತಮ್ಮ ಹಾಗು ಅವರ ಪತ್ನಿ ಹೆಸರಿನ ಮೊದಲಿನ ಅಕ್ಷರವನ್ನ ಕಂಪನಿಗೆ ಇಟ್ಟಿದ್ದಾರೆ. .
ಮಲ್ಟಿಬ್ಯಾಗರ್ಗಳಲ್ಲಿ ಹೂಡಿಕೆ ಮಾಡಿ ಅಗತ್ಯಕ್ಕೆ ತಕ್ಕಂತೆ ಬಂಡವಾಳವನ್ನ ಬದಲಾಯಿಸಿದರು, ಅದು ಅವರನ್ನು ಷೇರು ಮಾರುಕಟ್ಟೆಯ ಬಿಗ್ ಬುಲ್ ಮಾಡಿತು. ವಿನಿಮಯ ಕೇಂದ್ರಗಳಲ್ಲಿ ಲಭ್ಯವಿರುವ ಮಾಹಿತಿಯ ಪ್ರಕಾರ, ಜೂನ್ ತ್ರೈಮಾಸಿಕದಲ್ಲಿ ರಾಕೇಶ್ ಜುಂಜುನ್ವಾಲಾ 32 ಕಂಪನಿಗಳಲ್ಲಿ ಹೂಡಿಕೆ ಮಾಡಿದ್ದಾರೆ. ಈ 32 ಕಂಪನಿಗಳು ಅನಂತ್ ರಾಜ್, ಟಾಟಾ ಮೋಟಾರ್ಸ್, ಟೈಟಾನ್, ಫೆಡರಲ್ ಬ್ಯಾಂಕ್, ನಜಾರಾ, ಸ್ಟಾರ್ ಹೆಲ್ತ್ ಮುಂತಾದ ಪ್ರಮುಖ ಕಂಪನಿಗಳು ಒಳಗೊಂಡಿವೆ.
ವಿಮಾನಯಾನ ವ್ಯವಹಾರ
ರಾಕೇಶ್ ಜುಂಜುನ್ವಾಲಾ ನೂತನವಾಗಿ ಬಿಡುಗಡೆಗೊಂಡ ಆಕಾಶ ಏರ್ಲೈನ್ನಲ್ಲಿ $ 35 ಮಿಲಿಯನ್ ಅಥವಾ ಸುಮಾರು 278 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿದ್ದಾರೆ. ಅವರು ಈ ಏರ್ಲೈನ್ನಲ್ಲಿ ಸುಮಾರು 40% ಪಾಲನ್ನು ಹೊಂದಿದ್ದಾರೆ. ಇಂಧನ ಬೆಲೆಗಳು ತುಂಬಾ ಹೆಚ್ಚಿರುವ ಮತ್ತು ಅನೇಕ ಕಂಪನಿಗಳು ತೊಂದರೆಗಳನ್ನು ಎದುರಿಸುತ್ತಿರುವ ಸಮಯದಲ್ಲಿ ಅವರು ವಿಮಾನಯಾನ ವ್ಯವಹಾರವನ್ನು ಪ್ರವೇಶಿಸಿದರು.
ಆತನ ಸಾಮ್ರಾಜ್ಯದ ಉಸ್ತುವಾರಿ ಯಾರು ?
ರಾಕೇಶ್ ಜುಂಜುನ್ವಾಲಾ ದೊಡ್ಡ ಸಾಮ್ರಾಜ್ಯವನ್ನೇ ತೊರೆದಿದ್ದಾರೆ. ಪತ್ನಿ ರೇಖಾ ಜುಂಜುನ್ವಾಲಾ, ಪುತ್ರಿ ನಿಷ್ಠಾ ಜುಂಜುನ್ವಾಲಾ, ಪುತ್ರರಾದ ಆರ್ಯಮಾನ್ ಮತ್ತು ಆರ್ಯವೀರ್ ಜುಂಜುನ್ವಾಲಾ ಅವರನ್ನು ಅಗಲಿದ್ದಾರೆ. ರಾಕೇಶ್ ಜುಂಜುನ್ವಾಲಾ ಅವರ ಒಟ್ಟು ನಿವ್ವಳ ಮೌಲ್ಯ ಸುಮಾರು 46 ಸಾವಿರ ಕೋಟಿ ರೂ. ಇಂತಹ ಪರಿಸ್ಥಿತಿಯಲ್ಲಿ ಈ ಸಾಮ್ರಾಜ್ಯವನ್ನು ನಿಭಾಯಿಸುವ ಸಂಪೂರ್ಣ ಹೊಣೆ ಅವರ ಪತ್ನಿ ಮೇಲಿದೆ. ಈಗವರು ತನ್ನ ಮಕ್ಕಳೊಂದಿಗೆ ನಿಭಾಯಿಸಲಿದ್ದಾರೆ. ಜುಂಜುನ್ವಾಲಾ ಅವರ ನಿರ್ಗಮನದೊಂದಿಗೆ, ಅವರ ವಿಮಾನಯಾನ ಮತ್ತು ಇತರ ವ್ಯವಹಾರಗಳು ಸವಾಲಾಗುವ ಸಾಧ್ಯತೆ ಇದೆ.
