ಪಾಕ್ನ ಗಲ್ಲಿ ಗಲ್ಲಿಗಳಲ್ಲಿ ಅವನಂತಹ ಬೌಲರ್ಗಳಿದ್ದಾರೆ… ಮಿಯಾಂದಾದ್ ಹೇಳಿಕೆಗೆ ಪಠಾಣ್ ಉತ್ತರ ನೀಡಿದ್ದು ಹೇಗೆ ?
ಇರ್ಫಾನ್ ಪಠಾಣ್.. ಟೀಮ್ ಇಂಡಿಯಾದ ಎಡಗೈ ವೇಗಿ. ತನ್ನ 19ನೇ ಹರೆಯದಲ್ಲೇ ಟೀಮ್ ಇಂಡಿಯಾವನ್ನು ಸೇರಿಕೊಂಡಿದ್ದರು. 2002ರ ಆಸ್ಟ್ರೇಲಿಯಾ ಸರಣಿಗೆ ಆಯ್ಕೆಯಾಗಿದ್ದ ಇರ್ಫಾನ್ ಟೀಮ್ ಇಂಡಿಯಾದ ಭರವಸೆಯ ವೇಗಿಯಾಗಿ ರೂಪುಗೊಂಡ್ರು. ಸೌರವ್ ಗಂಗೂಲಿ ಪ್ರೋತ್ಸಾಹದಿಂದ ಇರ್ಫಾನ್ ಬೌಲಿಂಗ್ ಜೊತೆ ಬ್ಯಾಟಿಂಗ್ ನಲ್ಲೂ ಕಮಾಲ್ ಮಾಡುತ್ತಿದ್ದರು. ಆಗ ಇರ್ಫಾನ್ ಪಠಾಣ್ ಅವರನ್ನು ಆಲ್ ರೌಂಡರ್ ಕಪಿಲ್ದೇವ್ಗೆ ಹೋಲಿಕೆ ಮಾಡಲಾಗುತ್ತಿತ್ತು.
ಆದ್ರೆ ಇರ್ಫಾನ್ ಪಠಾಣ್ ಹೆಚ್ಚು ಚಾಲ್ತಿಗೆ ಬಂದಿದ್ದು ತನ್ನ ಅಮೋಘ ಬೌಲಿಂಗ್ ಮೂಲಕ. ವಿಕೆಟ್ ಕಬಳಿಸುವ ಕಲೆಯನ್ನು ಚೆನ್ನಾಗಿಯೇ ಅರಿತುಕೊಂಡಿದ್ದ ಇರ್ಫಾನ್ ಪಠಾಣ್ ಅವರನ್ನು ಪಾಕ್ ವೇಗಿ ವಾಸೀಮ್ ಅಕ್ರಮ್ ಅವರಿಗೂ ಹೋಲಿಕೆ ಮಾಡಲಾಗುತ್ತಿತ್ತು.
ಇರ್ಫಾನ್ ಪಠಾಣ್ ಬಗ್ಗೆ ಟೀಮ್ ಇಂಡಿಯಾದ ಎಡಗೈ ಬ್ಯಾಟ್ಸ್ ಮೆನ್ ಹಾಗೂ ಅದ್ಭುತ ಫೀಲ್ಡರ್ ಆಗಿದ್ದ ಸುರೇಶ್ ರೈನಾ ಬಣ್ಣನೆ ಮಾಡುವುದು ಹೀಗೆ. ಇರ್ಫಾನ್ 
ಪಠಾಣ್ ಕ್ರಿಕೆಟ್ ಬದುಕಿನ ಆರಂಭದ ದಿನಗಳಲ್ಲಿ ಟೀಮ್ ಇಂಡಿಯಾದ ಪೋಸ್ಟರ್ ಬಾಯ್ ಆಗಿದ್ದರು. ಪ್ರತಿಯೊಬ್ಬರು ಇರ್ಫಾನ್ ಅವರನ್ನು ವಾಸೀಮ್ ಅಕ್ರಮ್ ಜೊತೆ ಹೋಲಿಕೆ ಮಾಡುತ್ತಿದ್ದರು. ಉದ್ದನೆಯ ಗುಂಗುರು ಕೂದಲಿನ ಯುವ ಆಟಗಾರ ಇರ್ಫಾನ್ ಪಠಾಣ್ ಹೆಡ್ ಆಂಡ್ ಶೋಲ್ಡರ್ ನ ರಾಯಭಾರಿಯಂತೆ ಕಾಣುತ್ತಿದ್ದರು. ನಾನು 2005ರಲ್ಲಿ ಟೀಮ್ ಇಂಡಿಯಾಗೆ ಎಂಟ್ರಿಕೊಟ್ಟಾಗ ಇರ್ಫಾನ್ ಪಠಾಣ್ ಯಶಸ್ಸಿನ ಉತ್ತುಂಗದಲ್ಲಿದ್ದರು ಎಂದು ಹೇಳಿದ್ದಾರೆ. ಇರ್ಫಾನ್ ಜೊತೆಗಿನ ಇನ್ಸ್ಟಾಗ್ರಾಂ ಲೈವ್ ಕಾರ್ಯಕ್ರಮದಲ್ಲಿ ಸುರೇಶ್ ರೈನಾ ಈ ರೀತಿ ಹೇಳಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿದ ಇರ್ಫಾನ್ ಪಠಾಣ್, ರೈನಾ ಜೊತೆ ಒಂದು ಸ್ವಾರಸ್ಯಕರವಾದ ವಿಷ್ಯವನ್ನು ಹೇಳಿಕೊಂಡ್ರು. ಪಾಕ್ನ ಆಗಿನ ಕೋಚ್ ಜಾವೇದ್ ಮಿಯಾಂದಾದ್ ಹೇಳಿಕೆಗೆ ತಾನು ಹೇಗೆ ತಿರುಗೇಟು ನೀಡಿದ್ದೇನೆ ಎಂಬುದನ್ನು ಹೇಳಿಕೊಂಡ್ರು.
ಅದು 2004ರಲ್ಲಿ. ಪಾಕ್ ವಿರುದ್ಧದ ಟೆಸ್ಟ್. ಆಗ ಪಾಕ್ನ ಕೋಚ್ ಆಗಿದ್ದವರು ಜಾವೇದ್ ಮಿಯಾಂದಾದ್. ಇರ್ಫಾನ್ ಪಠಾಣ್ ಬಗ್ಗೆ ಲಘುವಾದ ಹೇಳಿಕೆಯನ್ನು ನೀಡಿದ್ದರು. ಇರ್ಫಾನ್ ಪಠಾಣ್ ನಂತಹ ಬೌಲರ್ಗಳು ಪಾಕಿಸ್ತಾನದ ಗಲ್ಲಿ ಗಲ್ಲಿಗಳಲ್ಲಿ ಸಿಗುತ್ತಾರೆ ಅಂತ ಹೇಳಿದ್ದರು. ಆದ್ರೆ ಈ ಸುದ್ದಿ ನನ್ನ ತಂದೆಯ ಕಿವಿಗೆ ಬಿತ್ತು. ಯಾಕೋ ಮಿಯಾಂದಾದ್ ಹೇಳಿಕೆ ಅವರಿಗೆ ಸರಿ ಅಂತ ಅನ್ನಿಸಿಲ್ಲ. ಸ್ವಲ್ಪ ಸಿಟ್ಟು ಮಾಡಿಕೊಂಡಿದ್ದರು. ಆದ್ರೆ ಇದಕ್ಕೆ ನಾನು ಅವರದ್ದೇ ನೆಲದಲ್ಲಿ ಪ್ರತಿಕಾರ ತೀರಿಸಿಕೊಂಡೆ ಅಂತ ಪಠಾಣ್ ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ.
2006ರಲ್ಲಿ ಟೀಮ್ ಇಂಡಿಯಾ ಪಾಕ್ ಪ್ರವಾಸ ಕೈಗೊಂಡಿತ್ತು. ಆ ಪಂದ್ಯದಲ್ಲಿ ಇರ್ಫಾನ್ ಕ್ರಿಕೆಟ್ ಇತಿಹಾಸ ಪುಟದಲ್ಲಿ ದಾಖಲಾದ್ರು. ಕರಾಚಿ ಟೆಸ್ಟ್ ಪಂದ್ಯದಲ್ಲಿ ನಾನು ಹ್ಯಾಟ್ರಿಕ್ ವಿಕೆಟ್ ಪಡೆದ್ರು. ಸಲ್ಮಾನ್ ಬಟ್, ಯೂನಿಸ್ ಖಾನ್, ಮಹಮ್ಮದ್ ಯೂಸುಫ್ ಅವರಿಗೆ ಸತತ ಮೂರು ಎಸೆತಗಳಲ್ಲಿ ಪೆವಿಲಿಯನ್ ದಾರಿ ತೋರಿಸಿದ್ರು. ಈ ಮೂಲಕ ಮಿಯಾಂದಾದ್ ಹೇಳಿಕೆಗೆ ಇರ್ಫಾನ್ ಪಠಾಣ್ ಸರಿಯಾಗಿಯೇ ಉತ್ತರ ಕೊಟ್ಟಿದ್ದರು. ಆದ್ರೆ ಆ ಪಂದ್ಯದಲ್ಲಿ 
ಭಾರತ ಗೆಲ್ಲಲಿಲ್ಲ. ಸರಣಿಯನ್ನು ಭಾರತ ಸೋತಿತ್ತು. ಆದ್ರೆ ಇರ್ಫಾನ್ ಪಠಾಣ್ ಅವರ ಪ್ರದರ್ಶನ ಮಾತ್ರ ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ಮನದಲ್ಲಿ ಸದಾ ಉಳಿಯುವಂತೆ ಮಾಡಿತ್ತು.
ಸದ್ಯ ಇರ್ಫಾನ್ ಪಠಾಣ್ ಎಲ್ಲಾ ಮಾದರಿಯ ಕ್ರಿಕೆಟ್ಗೂ ವಿದಾಯ ಹೇಳಿದ್ದಾರೆ. 29 ಟೆಸ್ಟ್ ಪಂದ್ಯಗಳಲ್ಲಿ ಇರ್ಫಾನ್ 100 ವಿಕೆಟ್, 120 ಏಕದಿನ ಪಂದ್ಯಗಳಲ್ಲಿ 173 ಹಾಗೂ 24 ಟಿ-ಟ್ವೆಂಟಿ ಪಂದ್ಯಗಳಲ್ಲಿ 28 ವಿಕೆಟ್ ಕಬಳಿಸಿದ್ದಾರೆ. ಹಾಗೇ ಟೆಸ್ಟ್ ನಲ್ಲಿ 1105 ರನ್, ಏಕದಿನ ಪಂದ್ಯಗಳಲ್ಲಿ 1544 ರನ್ಗಳನ್ನು ಸಹ ದಾಖಲಿಸಿದ್ದಾರೆ. ಏಕೋ ಏನೋ ಗೊತ್ತಿಲ್ಲ, ಧೋನಿ ನಾಯಕತ್ವದ ಬಳಿಕ ಇರ್ಫಾನ್ ಪಠಾಣ್ಗೆ ಟೀಮ್ ಇಂಡಿಯಾದಲ್ಲಿ ಸರಿಯಾದ ಅವಕಾಶಗಳು ಸಿಗಲಿಲ್ಲ. ಇದಕ್ಕೆ ಉತ್ತರ ಕಂಡುಕೊಳ್ಳಲು ಸಾಕಷ್ಟು ಬಾರಿ ಇರ್ಫಾನ್ ಪ್ರಯತ್ನ ಪಟ್ಟರೂ ಅವರಿಗೆ ಇನ್ನೂ ಉತ್ತರ ಮಾತ್ರ ಸಿಕ್ಕಿಲ್ಲ.
