ಮಾಸ್ಕೋ : ಭಾರತದಲ್ಲಿ ಕೊರೊನಾ ಅಟ್ಟಹಾಸ ಮುಂದುವರಿದಿದೆ. ಪ್ರತಿದಿನ ದೇಶದಲ್ಲಿ ಕೊರೊನಾ ಸ್ಫೋಟವಾಗುತ್ತಿದ್ದು, ಹಲವಾರು ಮಂದಿ ಹೆಮ್ಮಾರಿಯಿಂದಾಗಿ ಕೊನೆಯುಸಿರೆಳೆಯುತ್ತಿದ್ದಾರೆ. ಈ ಮಹಾಮಾರಿಗೆ ಲಸಿಕೆ ಕಂಡು ಹಿಡಿಯುವ ಕಾರ್ಯವೂ ಭರದಿಂದ ಸಾಗುತ್ತಿದೆ. ಇದರ ಮಧ್ಯೆ ಭಾರತದ ಡಾ. ರೆಡ್ಡೀಸ್ ಪ್ರಯೋಗಾಲಯಕ್ಕೆ ರಷ್ಯಾದ ಸ್ಪುಟ್ನಿಕ್ ವಿ ಕೊರೊನಾ ವ್ಯಾಕ್ಸಿನ್‍ನ 100 ಮಿಲಿಯನ್ ಡೋಸ್‍ಗಳನ್ನು ಪೂರೈಸುವುದಾಗಿ ಆರ್‍ಡಿಐಎಫ್ ತಿಳಿಸಿದೆ.
ಸ್ಪಿಟ್ನಿಕ್ ವಿ ಲಸಿಕೆಯನ್ನು ಭಾರತದಲ್ಲಿ ವೈದ್ಯಕೀಯ ಪ್ರಯೋಗ ಮತ್ತು ಹಂಚಿಕೆ ಕುರಿತು ಆರ್‍ಡಿಎಫ್‍ಐ, ಡಾ.ರೆಡ್ಡೀಸ್ ಲ್ಯಾಬೋರೇಟರೀಸ್ ಲಿಮಿಟೆಡ್ ಸಂಸ್ಥೆಗಳು ಒಪ್ಪಂದ ಮಾಡಿಕೊಂಡಿವೆ. ಸರ್ಕಾರದಿಂದ ಅನುಮತಿ ದೊರೆತ ನಂತರ ಡಾ.ರೆಡ್ಡೀಸ್‍ಗೆ 100 ಮಿಲಿಯನ್ ಡೋಸ್‍ಗಳನ್ನು ಪೂರೈಕೆ ಮಾಡುವುದಾಗಿ ಆರ್‍ಡಿಐಎಫ್ ಹೇಳಿಕೆ ಬಿಡುಗಡೆ ಮಾಡಿದೆ.
ಈ ಬಗ್ಗೆ ಡಾ.ರೆಡ್ಡೀಸ್ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಜಿವಿ ಪ್ರಸಾದ್ ಪ್ರತಿಕ್ರಿಯಿಸಿ, ಸ್ಪುಟ್ನಿಕ್ ವಿ ಲಸಿಕೆಯ 1 ಮತ್ತು 2ನೇ ಹಂತದ ಫಲಿತಾಂಶ ಭರವಸೆ ಮೂಡಿಸಿದೆ. ದೇಶದ ನಿಯಮಗಳನ್ನು ಪಾಲಿಸುವ ಮೂಲಕ 3ನೇ ಹಂತವನ್ನು ನಮ್ಮ ಸಂಸ್ಥೆ ಕೈಗೊಳ್ಳಲಿದೆ. ಸ್ಪುಟ್ನಿಕ್ ವಿ ಲಸಿಕೆಯನ್ನು ಭಾರತಕ್ಕೆ ತರಲು ಆರ್‍ಡಿಐಎಫ್ ನೊಂದಿಗೆ ಸಹಭಾಗಿತ್ವ ವಹಿಸಿದ್ದೇವೆ. ಕೋವಿಡ್ ವಿರುದ್ಧದ ಹೋರಾಟಕ್ಕೆ ನಂಬಿಕೆಯ ಆಯ್ಕೆಯೇ ಈ ವ್ಯಾಕ್ಸಿನ್ ಎಂದು ವಿಮರ್ಶಿಸಿದ್ದಾರೆ.
