ಅಮೇರಿಕನ್ ಯಾತ್ರೆ; ನ್ಯೂಯಾರ್ಕ್ ರಾಜ್ಯದ ಪ್ರವಾಸೋದ್ಯಮದ ಆಕರ್ಷಣೆ ಸ್ಟ್ಯಾಚು ಆಫ್ ಲಿಬರ್ಟಿ, ನಯಾಗಾರ ಮಾತ್ರವಲ್ಲ ಚಾಂಪ್ಲೈನ್ ಸರೋವರೂ ಹೌದು: Saakshatv yatrika episode 10
ನಾನು ನನ್ನ ಮೂರು ವರ್ಷಗಳ ಅಮೆರಿಕಾ ಜೀವನದಲ್ಲಿ ವಾಸವಾಗಿದ್ದುದು 3 ರಾಜ್ಯಗಳಲ್ಲಿ. ಉಳಿದೆಲ್ಲಾ ರಾಜ್ಯಗಳ ಸುತ್ತಿದ್ದು ಒಬ್ಬ ಪ್ರವಾಸಿಯಾಗಿ. ಅದಕ್ಕೇ ಒಬ್ಬ ಪ್ರವಾಸಿಯ ಕಣ್ಣಿಂದ ಮಾತ್ರ ಉಳಿದ ರಾಜ್ಯಗಳ ಬಗ್ಗೆ ಹೇಳಬಹದು. ನಾನು ವಾಸವಾಗಿದ್ದ ರಾಜ್ಯಗಳ ಬಗ್ಗೆ ಮಾತ್ರ ಅಲ್ಲಿನ ಜನಜೀವನ ಕಷ್ಟ ಸುಖಗಳ ಬಗ್ಗೆ ಸ್ವಲ್ಪ ಗಟ್ಟಿಯಾಗಿ ಹೇಳಬಹುದು. ಈಗ ಹೇಳ್ತಾ ಇರೋ ನ್ಯೂಯಾರ್ಕ್ ರಾಜ್ಯವಾಗಲೀ ಉಳಿದ ರಾಜ್ಯಗಳೇ ಆಗಲಿ ಹೆಚ್ಚಾಗಿ ಒಬ್ಬ ಪ್ರವಾಸಿಯ ಕಣ್ಣಿಗೆ ಕಂಡಿದ್ದು ಮಾತ್ರ. ಒಂದು ವಿಷಯ ಹೇಳಿದಾಗ ಅಲ್ಲಿ ಎಲ್ಲವೂ ಚನ್ನಾಗಿದೆ ಅಥವಾ ಬರೀ ಬಡರಾಜ್ಯ ಅಂತಲ್ಲ. ನನ್ನ ಬಹಳ ಸೀಮಿತವಾದ ಓದು ಮತ್ತು ತಿರುಗಾಟದ ಅನುಭವಗಳಷ್ಟೇ. Saakshatv yatrika episode 10
ಕರ್ನಾಟಕದ ಮುಕ್ಕಾಲರಷ್ಟಿರುವ ನ್ಯೂಯಾರ್ಕ್ ರಾಜ್ಯ ಅಮೆರಿಕಾದ ಶಕ್ತಿಶಾಲಿ ರಾಜ್ಯಗಳಲ್ಲಿ ಒಂದು. ಈ ರಾಜ್ಯ ಅಂದ ಕೂಡಲೆ ಕಣ್ಣಮುಂದೆ ಬರುವುದು ಎರಡು ವಿಷಯಗಳು. ಒಂದು ನ್ಯೂಯಾರ್ಕ್ ನಗರ ಅದರಲ್ಲೂ ಸ್ವಾತಂತ್ರ್ಯದೇವಿಯ (ಸ್ಟ್ಯಾಚು ಆಫ್ ಲಿಬರ್ಟಿ) ಪ್ರತಿಮೆ. ಎರಡನೆಯದು ನಯಾಗರಾ ಜಲಪಾತ. ಇವೆರಡೂ ನ್ಯೂಯಾರ್ಕ್ ರಾಜ್ಯದ ಹೆಗ್ಗಳಿಕೆಗಳು. ಈ ರಾಜ್ಯದ ಒಂದು ವಿಶೇಷವೇನೆಂದರೆ ಮಹಾಸರೋವರ ಮತ್ತು ಮಹಾಸಾಗರ ಎರಡನ್ನೂ ಪಡೆದಿರುವ ಏಕೈಕ ರಾಜ್ಯ. ದಕ್ಷಿಣದಲ್ಲಿ ಅಟ್ಲಾಂಟಿಕ್ ಮಹಾಸಾಗರವಿದ್ದರೆ ವಾಯುವ್ಯ ದಿಕ್ಕಿನಲ್ಲಿ ಈರಿ ಮತ್ತು ಓಂಟಾರಿಯೋ ಮಹಾ ಸರೋವರಗಳಿವೆ.
ಕೈಗಾರಿಕೆ ,ಕೃಷಿ, ಹಣಕಾಸು ಸೇವೆಗಳು ಮುಂತಾದವುಗಳಿಂದ ಅತ್ಯಂತ ಸುಭಿಕ್ಷವಾದ ಈ ರಾಜ್ಯಕ್ಕೆ ಎಂಪೈರ್ ಸ್ಟೇಟ್ ಅಥವಾ ಸಾಮ್ರಾಜ್ಯ ರಾಜ್ಯ ಅನ್ನುತ್ತಾರೆ. ಹಾಗೇ ನ್ಯೂಯಾರ್ಕ್ ನಗರದಲ್ಲಿ ಎಂಫೈರ್ ಸ್ಟೇಟ್ ಬಿಲ್ಡಿಂಗ್ ಎಂಬ ಬೃಹತ್ ಕಟ್ಟಡವಿರುವುದನ್ನ ಗಮನಿಸಿ. ಈಗಾಗಲೇ ಹೇಳಿದಂತೆ ಅಮೇರಿಕಾದ ಅತ್ಯಂತ ಶ್ರೀಮಂತ ರಾಜ್ಯಗಳಲ್ಲಿ ಈ ರಾಜ್ಯ ಒಂದು. ಈ ರಾಜ್ಯದ ಜಿಡಿಪಿ ಅನೇಕ ದೊಡ್ಡ ದೇಶಗಳ ಜಿಡಿಪಿಗಿಂತ ಜಾಸ್ತಿ. ಹೆಚ್ಚಿನ ಅಭಿವೃದ್ಧಿ ಸೂಚ್ಯಂಕಗಳಲ್ಲಿ ಈ ರಾಜ್ಯ ಮೇಲಿನ ಸ್ಥಾನಗಳಲ್ಲಿ ಬರುತ್ತವೆ. ಆದರೆ ಬಡವ ಶ್ರೀಮಂತರ ನಡುವಿನ ಅತ್ಯಂತ ಅಂತರವಿರುವುದು ಕೂಡಾ ಈ ರಾಜ್ಯದಲ್ಲೇ.
ಈ ರಾಜ್ಯದ ಇನ್ನೊಂದು ವಿಶಿಷ್ಟವಾದ ಭೌಗೋಳಿಕ ರಚನೆ ನ್ಯೂಯಾರ್ಕಿನ ದಕ್ಷಿಣ ಭಾಗದಲ್ಲಿರುವ ಲಾಂಗ್ ದ್ವೀಪ. ಹೆಸರಿಗೆ ತಕ್ಕಂತೆ ಉದ್ದಕ್ಕಿರುವ ಈ ದ್ವೀಪ ಪ್ರಪಂಚದ ಅತ್ಯಂತ ಜನನಿಬಿಡ ದ್ವೀಪಗಳಲ್ಲಿ ಒಂದು. ಅದರಲ್ಲೂ ಪಶ್ಚಿಮಭಾಗ ನ್ಯೂಯಾರ್ಕ್ ನಗರ ಪರಿಧಿಯಲ್ಲಿ ಬರುವುದರಿಂದ ಅಲ್ಲಿ ಜನಸಂಖ್ಯೆ ಇನ್ನೂ ಜಾಸ್ತಿ. ನಾನು ಬಾಲ್ಟಿಮೋರಿಂದ ಹಾರ್ಟ್ಫರ್ಡಿಗೆ ಬರಬೇಕಾದರೆ ಈ ದ್ವೀಪದ ಅತ್ಯಂತ ಸುಂದರವಾದ ದೃಷ್ಯಗಳು ಕಂಡಿದ್ದವು.
ಅದಿರಲಿ, ಈಗ ಅವೆಲ್ಲಾ ಬಿಟ್ಟು ಸ್ವಲ್ಪ ಸ್ವಲ್ಪ ಉತ್ತರಕ್ಕೆ ಬರೋಣ. ಇಲ್ಲೊಂದು ದೊಡ್ಡ ಸರೋವರವಿದೆ, ಚಾಂಪ್ಲೈನ್ ಎಂದು ಹೆಸರು. 170+ ಕಿಲೋಮೀಟರ್ ಉದ್ದದ ಮತ್ತು ಅತೀ ಅಗಲವಾದೆಡೆ 23 ಕಿಲೋಮೀಟರ್ ಇರುವ ಸರೋವರ. ನ್ಯೂಯಾರ್ಕ್ ಮತ್ತು ವರ್ಮೌಂಟ್ ರಾಜ್ಯದ ಗಡಿಯಲ್ಲಿ ಬರುತ್ತದೆ. ಸುತ್ತಮುತ್ತ ಗುಡ್ಡ ಬೆಟ್ಟಗಳಿಂದ, ಮಧ್ಯೆ ಮಧ್ಯೆ ದ್ವೀಪಗಳಿಂದ ಕೂಡಿದ ಕೂಡಿದ ಬೃಹತ್ ಸರೋವರ. ಇಲ್ಲಿ ಹೋಗಿದ್ದು ಸ್ವಲ್ಪ ಅನಿರೀಕ್ಷಿತವಾಗಿಯೇ. ನಾವು ವರ್ಮೌಂಟ್ ಮತ್ತು ನ್ಯೂಹ್ಯಾಂಪ್ಶೈರ್ ತಿರುಗಲು ಹೋದಾಗ ನ್ಯೂಯಾರ್ಕಿನ ಬಾರ್ಟ್ಲೆಟ್ ಎಂಬಲ್ಲಿ ಕಮ್ಮಿಗೆ ಹೋಟೆಲು ಸಿಕ್ಕಿತ್ತು. ಆಗ ನಾವು ಈ ಸರೋವರ ನೋಡಿದ್ದು, ಇಲ್ಲವಾದರೆ ನಾವು ನೋಡುವ ಸ್ಥಳಗಳ ಪಟ್ಟಿಯಲ್ಲಿ ಈ ಜಾಗ ಇರಲಿಲ್ಲ.
ನಮ್ಮ ಹೋಟೆಲಿದ್ದ ಬಾರ್ಟ್ಲೆಟ್ಟಿಗೆ ಬರ್ತಾ ಇರಬೇಕಾದರೆ ಗೂಗಲ್ ಮ್ಯಾಪಿನಲ್ಲಿ ದೂರ ಕೇವಲ 10-20 ಮೈಲಿ ಇದ್ದರೂ ತಲುಪಬೇಕಾದ ಸಮಯವನ್ನ ಸಮಯ ಸರಿಸುಮಾರು ಮುಕ್ಕಾಲು ಗಂಟೆ ತೋರಿಸ್ತಿತ್ತು. ಯಾಕೇ ಅಂತ ತಲೆಕೆರೆದು ಕೊಳ್ತಾ ಇರಬೇಕಾದರೆ ಚಾಂಪ್ಲೈನ್ ಸರೋವರದ ಅರ್ಧ ಭಾಗ ಸೇತುವೆ ಮೂಲಕ ದಾಟಿ ಮಧ್ಯದ ಗ್ರಾಂಡ್ ಐಲ್ ಅನ್ನುವ ದ್ವೀಪವೊಂದಕ್ಕೆ ಬಂದಿದ್ದೆವು. ಅಲ್ಲಿಂದ ಮುಂದೆ ಸೇತುವೆಯಿಲ್ಲ. ಫೆರಿಯಲ್ಲಿ ಸಾಗಬೇಕು. ನಮ್ಮ ಸಿಗಂಧೂರಿನದ್ದಕ್ಕಿಂತ ಸ್ವಲ್ಪ ದೊಡ್ಡದಾದ ಫೆರಿ ಅದು. ಅದನ್ನ ದಾಟಿದ ನಂತರ ಕೇವಲ 5 ನಿಮಿಷಕ್ಕೆ ಹೋಟೆಲ್ ಬಂತು. ಆದರೆ ನಾವು ದಾಟಿದ ಸಮಯ ರಾತ್ರಿಯಾಗಿದ್ದರಿಂದ ಅಲ್ಲಿನ ಸುಂದರ ದೃಶ್ಯಗಳು ಕಾಣಸಿಗಲಿಲ್ಲ.
ಆದರೆ ಆ ನಿರಾಸೆ ತುಂಬಾ ಸಮಯ ಉಳಿಯಲಿಲ್ಲ. ಮರುದಿನ ಈ ಸರೋವರದ ಅನೇಕ ಸುಂದರ ದೃಶ್ಯಗಳು ಸಿಕ್ಕವು. ಅದರಲ್ಲೂ ವಿಶೇಷವಾಗಿ ನ್ಯೂಯಾರ್ಕ್ ಮತ್ತು ವರ್ಮೌಂಟ್ ರಾಜ್ಯಗಳ ಗಡಿಯಲ್ಲಿ (ಚಾಂಪ್ಲೈನ್ ಸರೋವರದ ಪಶ್ಚಿಮ ತೀರಗಳು ನ್ಯೂಯಾರ್ಕ್ ರಾಜ್ಯದಲ್ಲಿಧದರೆ ಪೂರ್ವ ತೀರ ವರ್ಮೌಂಟ್ ರಾಜ್ಯದಲ್ಲಿದೆ) ಹಳೆಯ ವಸಾಹತೊಂದರ ಅವಶೇಷಗಳುಳ್ಳ ಸ್ಥಳವೊಂದು ಕಂಡಿತು. ಸರೋವರದ ಹಿನ್ನೀರಿನಲ್ಲಿರುವ ಬಹಳ ಚಂದದ ಸ್ಥಳ. ಅಲ್ಲಿ ಕೆಲವೆಡೆ ನಿಧಿಯನ್ನ ಹೂತಿಡಲಾಗಿದೆ ಎಂದು ನಂಬಿದ್ದಾರೆ. ಅದಕ್ಕೆ ಕೆಲ ನಿರ್ಬಂಧಿತ ವಲಯಗಳಿವೆ. ಹಾಗೂ ನಿಧಿ ಶೋಧನೆ ಮಾಡಬಾರದೆಂಬ ಎಚ್ಚರಿಕೆಯಿರುವ ಫಲಕಗಳಿವೆ. ನನಗೆ ತೇಜಸ್ವಿಯವರು ಅಲೆಮಾರಿಯ ಅಂಡಮಾನಿನಲ್ಲಿ ಬರೆದ ರಾಸ್ ದ್ವೀಪದ ನೆನಪಾಯಿತು.
ಕುತೂಹಲಿಗಳಿಗೆ ಇನ್ನೊಂದು ವಿಷಯ. ಬಹಳ ಹಿಂದೆ ಚಾಂಪ್ಲೈನ್ ಸರೋವರದಲ್ಲಿರಬಹುದಾದ ಭೂತವೋ ಇನ್ನೇನೋ ವಿಚಿತ್ರ ಪ್ರಾಣಿಯ ಬಗ್ಗೆ ಗುಲ್ಲೆದ್ದಿತ್ತು. ಸ್ವಲ್ಪ ಹುಡುಕಿ ನೋಡಿ ಆಸಕ್ತಿಕರವಾದ ವಿಷಯಗಳು ಸಿಗತ್ವೆ. ಚಾಂಪ್ಲೈನ್ ಸರೋವರದ ಒಂದು ದೃಷ್ಯ. ಎದುರಿಗೆ ಕಾಣುವ ಪ್ರದೇಶಗಳೆಲ್ಲಾ ವರ್ಮೌಂಟ್ ರಾಜ್ಯಕ್ಕೆ ಸೇರಿವೆ. ಮುಂದಿನ ಭಾಗದಲ್ಲಿ ನಯಾಗರಾ ಬಗ್ಗೆ ಹೇಳಿ ಮುಗಿಸ್ತೀನಿ.
Saakshatv yatrika episode 10
ಯಾತ್ರಿಕ – ಅಂಕಣಕಾರ ಗಿರಿಧರ್ ಭಟ್ ಗುಂಜಗೋಡು ಅವರ ಕಿರು ಪರಿಚಯ
-ಗಿರಿಧರ್ ಭಟ್ ಗುಂಜಗೋಡು
ಸಾಫ್ಟ್ ವೇರ್ ಉದ್ಯೋಗಿ ಹಾಗೂ ಹವ್ಯಾಸಿ ಬರಹಗಾರ
ಸಿದ್ಧಾಪುರ
ಅಮೇರಿಕನ್ ಯಾತ್ರೆ; ನಾನು ಕಂಡ ನ್ಯೂಯಾರ್ಕ್ ಮತ್ತದರ ಸೂಕ್ಷ್ಮ ಪಕ್ಷಿ ನೋಟ:
Our Website : https://saakshatv.com/
Subscribe Now on YouTube
Like us on Facebook
Follow us on Twitter
Follow us on Instagram
Subscribe to our Telegram Channel
ಟ್ವಿಟರ್ ಮೂಲಕ ನಮ್ಮ ಸುದ್ದಿಗಳ ಅಪ್ ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ
https://twitter.com/SaakshaTv/status/1329830459920957440?s=19
https://twitter.com/SaakshaTv/status/1329830879460352001?s=19
