ಮನೆಯಲ್ಲಿರುವ ಹಳೆಯ ಚಿನ್ನವನ್ನು ಲಾಕರ್ ನಲ್ಲಿಟ್ಟು ಸುಮ್ಮನೆ ಕೂರುವ ಬದಲು ಅದರಿಂದಲೇ ಲಾಭ ಗಳಿಸುವ ಸುವರ್ಣಾವಕಾಶವನ್ನು ಕೇಂದ್ರ ಸರ್ಕಾರ ನೀಡುತ್ತಿದೆ. ದೇಶದ ಚಿನ್ನದ ಆಮದು ಪ್ರಮಾಣವನ್ನು ತಗ್ಗಿಸುವ ಮತ್ತು ಭಾರತೀಯ ಮನೆಗಳಲ್ಲಿ ಹೂತು ಹೋಗಿರುವ ಸಾವಿರಾರು ಟನ್ ಬಂಗಾರವನ್ನು ಮಾರುಕಟ್ಟೆಗೆ ತರುವ ಉದ್ದೇಶದಿಂದ ಶೀಘ್ರದಲ್ಲೇ ಚಿನ್ನ ನಗದೀಕರಣ ಯೋಜನೆ ಜಾರಿಗೆ ಬರಲಿದೆ.
ಈ ಯೋಜನೆಯ ಅಡಿಯಲ್ಲಿ ಗ್ರಾಹಕರು ತಮ್ಮ ಬಳಿ ಇರುವ ಹಳೆಯ ಆಭರಣಗಳನ್ನು ಅಧಿಕೃತ ಚಿನ್ನದ ವರ್ತಕರ ಬಳಿ ಠೇವಣಿ ಇಡಬಹುದು. ಇದುವರೆಗೆ ಬ್ಯಾಂಕುಗಳಿಗೆ ಮಾತ್ರ ಸೀಮಿತವಾಗಿದ್ದ ಈ ಸೌಲಭ್ಯ ಇನ್ನು ಮುಂದೆ ನಿಮ್ಮ ಹತ್ತಿರದ ವಿಶ್ವಾಸಾರ್ಹ ಜುವೆಲ್ಲರಿ ಅಂಗಡಿಗಳಲ್ಲೂ ಸಿಗಲಿದೆ. ಠೇವಣಿ ಇಟ್ಟ ಚಿನ್ನಕ್ಕೆ ವಾರ್ಷಿಕವಾಗಿ ಶೇಕಡಾ 2.25 ರಿಂದ ಶೇಕಡಾ 2.50 ರಷ್ಟು ಬಡ್ಡಿ ಸಿಗಲಿದ್ದು, ನಿಮ್ಮ ಬಂಗಾರ ಸುರಕ್ಷಿತವಾಗಿರುವ ಜೊತೆಗೆ ನಿರಂತರ ಆದಾಯವನ್ನೂ ತಂದುಕೊಡಲಿದೆ.
ಇಲ್ಲಿನ ಪ್ರಮುಖ ಅಂಶವೆಂದರೆ ನೀವು ನೀಡಿದ ಒಡವೆಗಳನ್ನು ಕರಗಿಸಿ ಅದರಲ್ಲಿರುವ ಶುದ್ಧ ಚಿನ್ನವನ್ನು ಮಾತ್ರ ಲೆಕ್ಕಕ್ಕೆ ತೆಗೆದುಕೊಳ್ಳಲಾಗುತ್ತದೆ. ಉದಾಹರಣೆಗೆ ನೀವು 100 ಗ್ರಾಂ ಒಡವೆ ನೀಡಿದಾಗ ಅದರಲ್ಲಿ 90 ಗ್ರಾಂ ಶುದ್ಧ ಚಿನ್ನವಿದ್ದರೆ ಅದನ್ನು ಬಾಂಡ್ ನಲ್ಲಿ ನಮೂದಿಸಲಾಗುತ್ತದೆ. ಠೇವಣಿ ಅವಧಿ ಮುಗಿದ ನಂತರ ನೀವು ನೀಡಿದ ಒಡವೆಯ ರೂಪದಲ್ಲಲ್ಲದೆ, ಬದಲಾಗಿ ಶುದ್ಧ ಚಿನ್ನದ ಗಟ್ಟಿ ಅಥವಾ ಬಿಸ್ಕತ್ ರೂಪದಲ್ಲಿ ಅಥವಾ ಅಂದಿನ ಮಾರುಕಟ್ಟೆ ಬೆಲೆಯ ನಗದನ್ನು ಪಡೆಯುವ ಆಯ್ಕೆ ಗ್ರಾಹಕರಿಗಿರುತ್ತದೆ.
ಹಳೆಯ ಚಿನ್ನಕ್ಕೆ ಬಿಲ್ ಇಲ್ಲ ಎನ್ನುವವರಿಗೆ ಮತ್ತು ಕಳ್ಳತನದ ಭಯವಿರುವವರಿಗೆ ಇದು ವರದಾನವಾಗಲಿದೆ. ಯಾವುದೇ ಕಠಿಣ ದಾಖಲೆಗಳ ಕಿರಿಕಿರಿ ಇಲ್ಲದೆ ಜನರು ಈ ಯೋಜನೆಯ ಲಾಭ ಪಡೆಯಬಹುದು. ಮನೆಯಲ್ಲಿ ಬಂಗಾರ ಇಟ್ಟುಕೊಂಡು ಕಳ್ಳರ ಭಯ ಪಡುವ ಬದಲು ಅಥವಾ ಬ್ಯಾಂಕ್ ಲಾಕರ್ ಬಾಡಿಗೆ ಕಟ್ಟುವ ಬದಲು ಸರ್ಕಾರದ ಈ ಯೋಜನೆಯಲ್ಲಿ ಹೂಡಿಕೆ ಮಾಡುವುದು ಹೆಚ್ಚು ಲಾಭದಾಯಕವಾಗಿದೆ.
ಈ ಯೋಜನೆಯಿಂದ ಸರ್ಕಾರಕ್ಕೆ ವಿದೇಶಿ ವಿನಿಮಯ ಉಳಿತಾಯವಾದರೆ, ಆಭರಣ ಉದ್ಯಮದಲ್ಲಿ ತೊಡಗಿರುವ ಲಕ್ಷಾಂತರ ಕಾರ್ಮಿಕರಿಗೆ ಕೆಲಸ ಸಿಗಲಿದೆ. ಸುಮಾರು 1000 ಟನ್ ಗಳಷ್ಟು ಮನೆಯಲ್ಲಿರುವ ಚಿನ್ನ ಮಾರುಕಟ್ಟೆಗೆ ಬರುವ ನಿರೀಕ್ಷೆಯನ್ನು ಕೇಂದ್ರ ಸರ್ಕಾರ ಹೊಂದಿದ್ದು, ಮುಂದಿನ ಎರಡು ವಾರಗಳಲ್ಲಿ ಇದರ ಅಧಿಕೃತ ಮಾರ್ಗಸೂಚಿಗಳು ಪ್ರಕಟವಾಗುವ ಸಾಧ್ಯತೆ ಇದೆ. ಇದು ಗ್ರಾಹಕರು, ವರ್ತಕರು ಮತ್ತು ಸರ್ಕಾರ ಮೂವರಿಗೂ ಲಾಭ ತರುವ ವಿನ್ ವಿನ್ ಸೂತ್ರವಾಗಿದೆ.
