ಬೆಂಗಳೂರು: ಹೈಫೈ ಶಾಲೆಗಳು, ಶ್ರೀಮಂತರ ಮಕ್ಕಳು ಹೋಗುವ ದುಬಾರಿ ಹಾಗೂ ಪಾಶ್ ಶಾಲೆಗಳಲ್ಲಿ ಐಸ್‍ಕ್ರೀಂ ಮತ್ತು ಹಣ್ಣುಗಳಲ್ಲಿ ಡ್ರಗ್ಸ್ ಸವರಿ ಕೊಡ್ತಾರೆ ಎಂದಿದ್ದ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಸುರೇಶ್ ಕುಮಾರ್ ಪೇಚಿಗೆ ಸಿಲುಕಿದ್ದಾರೆ.
ಸಚಿವ ಸುರೇಶ್ ಕುಮಾರ್ ಹೇಳಿಕೆಗೆ ಖಾಸಗಿ ಶಾಲೆಗಳ ಆಡಳಿತ ಮಂಡಳಿ ಕ್ಯಾಮ್ಸ್ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಂತೆ ವರಸೆಯನ್ನೇ ಬದಲಿಸಿದ್ದಾರೆ. ಖಾಸಗಿ ಶಾಲೆಗಳ ಒಂದೇ ಗುಟುರಿಗೆ ಬೆದರಿದಂತೆ ಕಾಣುತ್ತಿರುವ ಸಚಿವ ಸುರೇಶ್ ಕುಮಾರ್ ನಾನು ಹಾಗೇ ಹೇಳಿಯೇ ಇಲ್ಲ ಎಂದಿದ್ದಾರೆ.
ನಾನು ಯಾವುದೇ ಶಾಲೆಗಳ ಬಗ್ಗೆ ದೂರು ಹೇಳಿಲ್ಲ. ಈ ವಿಚಾರ ಅನೇಕ ವರ್ಷಗಳಿಂದ ಚರ್ಚೆಯಲ್ಲಿದೆ. ಶ್ರೀಮಂತರ ಮಕ್ಕಳು ಓದುವ ಶಾಲೆಗಳಲ್ಲಿ ಮಕ್ಕಳು ಮಾದಕ ವಸ್ತುಗಳಿಗೆ ದಾಸರಾಗುತ್ತಿದ್ದಾರೆ. ಡ್ರಗ್ಸ್ ಪೆಡ್ಲರ್‍ಗಳು ಈ ರೀತಿಯ ಶಾಲೆಗಳನ್ನೇ ಆವರಿಸಿಕೊಳ್ಳುತ್ತಾರೆ ಎಂದಿದ್ದೇನೆ.
ನಾನು ಕ್ಯಾಮ್ಸ್ ಶಾಲೆಗಳಿಗೆ ಸಂಬಂಧಿಸಿದ ವಿಷಯ ಅಲ್ಲ, ಬೇಕಿದ್ದರೆ ಶಾಸಗಿ ಶಾಲೆಗಳ ಆಡಳಿತ ಮಂಡಳಿ ಪ್ರಧಾನ ಕಾರ್ಯದರ್ಶಿ ಶಶಿಕುಮಾರ್ ಜತೆ ಮತನಾಡುತ್ತೇನೆ ಎಂದಿದ್ದಾರೆ.
ಸರ್ಕಾರದ ಯಾವುದೇ ಆದೇಶಗಳಿಗೂ ಖಾಸಗಿ ಶಿಕ್ಷಣ ಸಂಸ್ಥೆಗಳು ಕವಡೆ ಕಾಸಿನ ಕಿಮ್ಮತ್ತನ್ನೂ ನೀಡುತ್ತಿಲ್ಲ. ಇತ್ತೀಚೆಗೆ ಆನ್‍ಲೈನ್ ಶಿಕ್ಷಣ ನೀಡುವ ವಿಚಾರದಲ್ಲಿ ಸರ್ಕಾರ ನಡೆದಕೊಂಡ ರೀತಿಯೂ ಇದಕ್ಕೆ ತಾಜಾ ಉದಾಹರಣೆಯಾಗಿದೆ. ಲಾಕ್‍ಡೌನ್ ಹಿನ್ನೆಲೆಯಲ್ಲಿ ಮಕ್ಕಳ ಅಡ್ಮಿಶನ್ ಹಾಗೂ ಫೀ ವಸೂಲಿ ವಿಚಾರದಲ್ಲಿ ಸಚಿವ ಸುರೇಶ್‍ಕುಮಾರ್ ಅವರದ್ದು ಹೇಳಿಕೆಗಳಿಗೆ ಸೀಮಿತವಾಯಿತೇ ಹೊರತು ಯಾವುದೇ ಕ್ರಮ ಆಗಲಿಲ್ಲ. ಖಾಸಗಿ ಶಾಲೆಗಳು ಪೋಷಕರ ಮೇಲೆ ಒತ್ತಡ ಹಾಕಿ ಫೀ ವಸೂಲಿಗೆ ಇಂದಿಗೂ ಬ್ರೇಕ್ ಬಿದ್ದಿಲ್ಲ.
ಇದರ ನಡುವೆಯೇ ಇರುವ ಸತ್ಯವನ್ನು ಹೇಳಿದ ಸುರೇಶ್ ಕುಮಾರ್, ಖಾಸಗಿ ಶಾಲೆಗಳ ಒಂದೇ ಒಂದು ಆವಾಜ್‍ಗೆ ಬೆದರಿರುವುದನ್ನು ನೋಡಿದರೆ ಯಾರೇ ಶಿಕ್ಷಣ ಸಚಿವರಾದರೂ ಖಾಸಗಿ ಶಾಲೆಗಳ ದರ್ಬಾರ್ ಮುಂದೆ ಅವರ ಆಟ ನಡೆಯಲ್ಲ ಎನ್ನುವುದು ಈ ಘಟನೆಯಿಂದ ಸಾಕ್ಷಿಯಾದಂತಿದೆ.
