* ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅವರಿಂದ ‘ಇವಿ ಮೊಬಿಲಿಟಿ ಕಾನ್‌ಕ್ಲೇವ್’ಗೆ ಚಾಲನೆ
* ಡೆಲಿವರಿ ಸಿಬ್ಬಂದಿಯ ಸಮಯ, ಶ್ರಮ ಉಳಿತಾಯದ ಜೊತೆಗೆ ಆದಾಯ ಹೆಚ್ಚಳಕ್ಕೆ ಒತ್ತು
* ಸ್ವಿಗ್ಗಿ ಆ್ಯಪ್‌ನಲ್ಲಿ ಕೇವಲ 4 ಟ್ಯಾಪ್‌ಗಳಲ್ಲಿ ಸುಲಭವಾಗಿ ಎಲೆಕ್ಟ್ರಿಕ್ ವಾಹನ ಬಾಡಿಗೆಗೆ ಲಭ್ಯ
* ಇವಿ ಬಳಕೆಯಿಂದ 17,791 ಟನ್ ಕಾರ್ಬನ್ ಡೈಆಕ್ಸೈಡ್ ಹೊರಸೂಸುವಿಕೆ ತಡೆಗಟ್ಟಿದ ಸ್ವಿಗ್ಗಿ
ಬೆಂಗಳೂರು: ಭಾರತದ ಪ್ರಮುಖ ಆನ್‌ಲೈನ್‌ ಡೆಲಿವರಿ ಪ್ಲಾಟ್‌ಫಾರ್ಮ್ ಸ್ವಿಗ್ಗಿ, ತನ್ನ ಡೆಲಿವರಿ ಪಾಲುದಾರರಿಗೆ ಅನುಕೂಲ ಮಾಡಿಕೊಡುವ ಹಾಗೂ ಪರಿಸರ ಸ್ನೇಹಿ ಸಾರಿಗೆಯನ್ನು ಉತ್ತೇಜಿಸುವ ಉದ್ದೇಶದಿಂದ ಮಹತ್ವದ ಹೆಜ್ಜೆಯೊಂದನ್ನು ಇಟ್ಟಿದೆ.
ʼಪವರಿಂಗ್ ದಿ ಲಾಸ್ಟ್ ಮೈಲ್ʼ ಎಂಬ ವಿಷಯದಡಿ ದೆಹಲಿಯಲ್ಲಿ ಆಯೋಜಿಸಿದ್ದ ‘ಇವಿ ಮೊಬಿಲಿಟಿ ಕಾನ್‌ಕ್ಲೇವ್’ ಕಾರ್ಯಕ್ರಮದಲ್ಲಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಸ್ವಿಗ್ಗಿಯ ಈ ಹೊಸ ಇವಿ (ಎಲೆಕ್ಟ್ರಿಕ್ ವಾಹನ) ಉಪಕ್ರಮಗಳಿಗೆ ಚಾಲನೆ ನೀಡಿದರು. ಇವಿ ತಯಾರಕರು, ಬ್ಯಾಟರಿ-ಸ್ವಾಪಿಂಗ್ ಪೂರೈಕೆದಾರರು, ಫೈನಾನ್ಶಿಯರ್‌ಗಳು ಮತ್ತು ಡೆಲಿವರಿ ಪಾಲುದಾರರನ್ನು ಒಂದೇ ವೇದಿಕೆಯಲ್ಲಿ ಸೇರಿಸುವ ವಿನೂತನ ಪ್ರಯತ್ನ ಇದಾಗಿತ್ತು.
ಏನಿದು ಹೊಸ ಸೌಲಭ್ಯ? ಸಿಬ್ಬಂದಿಗೆ ಏನು ಲಾಭ?
ಡೆಲಿವರಿ ಸಿಬ್ಬಂದಿಯ ಸಮಯ ಮತ್ತು ಶ್ರಮವನ್ನು ಉಳಿಸಲು ಸ್ವಿಗ್ಗಿ ಈ ಕೆಳಗಿನ ಹೊಸ ಸೌಲಭ್ಯಗಳನ್ನು ಪರಿಚಯಿಸಿದೆ:
* ಇನ್‌ಸ್ಟಾಮಾರ್ಟ್‌ನಲ್ಲೇ ಬ್ಯಾಟರಿ ಸ್ವಾಪಿಂಗ್: ಡೆಲಿವರಿ ಸಿಬ್ಬಂದಿ ದಿನಕ್ಕೆ ಸರಾಸರಿ 20 ಬಾರಿ ಇನ್‌ಸ್ಟಾಮಾರ್ಟ್ ಮಳಿಗೆಗಳಿಗೆ ಭೇಟಿ ನೀಡುತ್ತಾರೆ. ಹೀಗಾಗಿ ಸಮಯ ಉಳಿಸುವ ಉದ್ದೇಶದಿಂದ ಸ್ವಿಗ್ಗಿಯು 25 ಸ್ಥಳಗಳಲ್ಲಿರುವ ಇನ್‌ಸ್ಟಾಮಾರ್ಟ್ ಪಾಡ್‌ಗಳಲ್ಲೇ ಬ್ಯಾಟರಿ ಬದಲಿಸುವ ಕೇಂದ್ರ ಆರಂಭಿಸಿದೆ.
* ಇವಿ ಬಾಡಿಗೆ ಸೌಲಭ್ಯ: ಇನ್‌ಸ್ಟಾಮಾರ್ಟ್ ಮಳಿಗೆಗಳಲ್ಲೇ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳನ್ನು ಬಾಡಿಗೆಗೆ ಪಡೆಯುವ ಸೌಲಭ್ಯವನ್ನೂ ಪರಿಚಯಿಸಲಾಗಿದೆ. ಇದರಿಂದ ಸಿಬ್ಬಂದಿಯು ಆರ್ಡರ್ ಪಡೆಯುವ ಸ್ಥಳದಲ್ಲೇ ವಾಹನವನ್ನೂ ಪಡೆಯಬಹುದು.
* ಆ್ಯಪ್‌ನಲ್ಲಿ 4 ಟ್ಯಾಪ್‌ಗಳಲ್ಲಿ ವಾಹನ: ಸ್ವಂತ ವಾಹನ ಇಲ್ಲದವರು ಸ್ವಿಗ್ಗಿ ಆ್ಯಪ್ ಮೂಲಕ ಕೇವಲ ನಾಲ್ಕು ಟ್ಯಾಪ್‌ಗಳಲ್ಲಿ ಸುಲಭವಾಗಿ ಇವಿ ಬಾಡಿಗೆಗೆ ಪಡೆಯಬಹುದು. ದೈನಂದಿನ, ಸಾಪ್ತಾಹಿಕ ಅಥವಾ ಮಾಸಿಕ ಬಾಡಿಗೆ ಯೋಜನೆಗಳಿದ್ದು, ಬಾಡಿಗೆ ಹಣವನ್ನು ನೇರವಾಗಿ ಅವರ ಡೆಲಿವರಿ ಪೇ-ಔಟ್‌ನಿಂದಲೇ ಕಡಿತಗೊಳಿಸಲಾಗುತ್ತದೆ.
ಈ ವ್ಯವಸ್ಥೆಯಿಂದ ವಾಹನ ಚಾರ್ಜಿಂಗ್‌ಗಾಗಿ ಹುಡುಕಾಡುವ ಸಮಯ ಉಳಿಯಲಿದ್ದು, ಆ ಅಮೂಲ್ಯ ಸಮಯದಲ್ಲಿ ಹೆಚ್ಚಿನ ಆರ್ಡರ್‌ಗಳನ್ನು ತಲುಪಿಸಿ ಅಧಿಕ ಆದಾಯ ಗಳಿಸಲು ಸಿಬ್ಬಂದಿಗೆ ಸಾಧ್ಯವಾಗಲಿದೆ.
ಈ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿರುವ ಕೇಂದ್ರ ಸಚಿವ ನಿತಿನ್ ಗಡ್ಕರಿ, “ಸ್ವಚ್ಛ, ದಕ್ಷ ಹಾಗೂ ಕೈಗೆಟುಕುವ ಸಾರಿಗೆಯ ಮೇಲೆ ಭಾರತದ ಬೆಳವಣಿಗೆ ಅವಲಂಬಿತವಾಗಿದೆ. ಡೆಲಿವರಿ ಪಾರ್ಟ್ನರ್‌ಗಳು ಹೊಸ ಆರ್ಥಿಕತೆಯ ಬೆನ್ನೆಲುಬು. ಅವರು ಇವಿ ಬಳಸುವುದರಿಂದ ಅವರ ಆದಾಯ ಹೆಚ್ಚುವುದಲ್ಲದೆ, ನಮ್ಮ ನಗರಗಳು ಮತ್ತು ಪರಿಸರಕ್ಕೂ ಲಾಭವಾಗಲಿದೆ. ಇಂತಹ ಪ್ರಾಯೋಗಿಕ ಪರಿಹಾರಗಳನ್ನು ತಂದಿರುವ ಸ್ವಿಗ್ಗಿ ಹಾಗೂ ಅದರ ಪಾಲುದಾರ ಸಂಸ್ಥೆಗಳ ಕಾರ್ಯ ಶ್ಲಾಘನೀಯ,” ಎಂದರು.
ಸ್ವಿಗ್ಗಿ ಸಿಇಒ ಮತ್ತು ಸಹ-ಸಂಸ್ಥಾಪಕ ಶ್ರೀಹರ್ಷ ಮಜೇಟಿ ಪ್ರತಿಕ್ರಿಯಿಸಿ, “ಪ್ರತಿ ಆರ್ಡರ್ ಹಿಂದೆಯೂ ಒಬ್ಬ ವ್ಯಕ್ತಿ ಇರುತ್ತಾನೆ, ಅವರೇ ಡೆಲಿವರಿ ಪಾಲುದಾರರು. ತಂತ್ರಜ್ಞಾನಕ್ಕಿಂತ ಹೆಚ್ಚಾಗಿ ಅವರ ದಿನನಿತ್ಯದ ಕೆಲಸಕ್ಕೆ ಪೂರಕವಾಗಿರುವ ಸೌಲಭ್ಯಗಳನ್ನು ನೀಡಿದಾಗ, ಅವರು ಸಹಜವಾಗಿಯೇ ಇವಿಗಳತ್ತ ಆಕರ್ಷಿತರಾಗುತ್ತಾರೆ. ಅವರ ಕೆಲಸವನ್ನು ಸುಲಭ ಮತ್ತು ಲಾಭದಾಯಕವಾಗಿಸುವುದೇ ನಮ್ಮ ಪ್ರಮುಖ ಉದ್ದೇಶ,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಸ್ವಿಗ್ಗಿ ಪ್ಲಾಟ್‌ಫಾರ್ಮ್‌ನಲ್ಲಿನ ಇವಿ ಡೆಲಿವರಿಗಳ ಮೂಲಕ 2025 ಮತ್ತು 2026ನೇ ಆರ್ಥಿಕ ವರ್ಷದಲ್ಲಿ ಬರೋಬ್ಬರಿ 17,791 ಟನ್ ಕಾರ್ಬನ್ ಡೈಆಕ್ಸೈಡ್ ಹೊರಸೂಸುವಿಕೆಯನ್ನು ತಡೆಗಟ್ಟಲಾಗಿದೆ. ಹಾಗೆಯೇ, ‘ಇಕೋ ಸೇವರ್’ ಆಯ್ಕೆಯನ್ನು ಬಳಸುವ ಮೂಲಕ 2026ರ ಆರ್ಥಿಕ ವರ್ಷದಲ್ಲಿ 89 ಲಕ್ಷ ಕಿ.ಮೀ. ಪ್ರಯಾಣದ ದೂರವನ್ನು ಉಳಿಸಲಾಗಿದೆ.
ಇದರೊಂದಿಗೆ, ವಿಶ್ವಸಂಸ್ಥೆಯ ಪರಿಸರ ಕಾರ್ಯಕ್ರಮದೊಂದಿಗೆ (ಯುಎನ್‌ಇಪಿ) ಸೇರಿ ಆಹಾರ ಮತ್ತು ದಿನಸಿ ಡೆಲಿವರಿ ವೇದಿಕೆಗಳ ಮೈತ್ರಿಕೂಟವಾದ ‘ಡೆಲಿವರ್-ಇ ಕೋಯಲಿಷನ್’ನ ಸ್ಥಾಪಕ ಸದಸ್ಯನಾಗಿಯೂ ಸ್ವಿಗ್ಗಿ ಗುರುತಿಸಿಕೊಂಡಿದೆ.
ಇದೇ ವೇಳೆ ಕಾರ್ಯಕ್ರಮದಲ್ಲಿ ಇವಿ ಪರಿಸರ ವ್ಯವಸ್ಥೆ ನಿರ್ಮಿಸಲು ನೆರವಾದ ಇಂಡೋಫಾಸ್ಟ್ ಎನರ್ಜಿ, ಯುಲು, ಬೌನ್ಸ್ ಡೈಲಿ, ಹಾಲಾ ಮೊಬಿಲಿಟಿ ಸೇರಿದಂತೆ ಹಲವು ಪಾಲುದಾರ ಸಂಸ್ಥೆಗಳನ್ನು ಹಾಗೂ ಇವಿ ಬಳಸಿ ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಉಮೇಶ್, ಸಜನ್ ಲಾಲ್ ಮುಂತಾದ ಡೆಲಿವರಿ ಸಿಬ್ಬಂದಿಯನ್ನು ಸನ್ಮಾನಿಸಲಾಯಿತು.
