ಆಸ್ಟ್ರೇಲಿಯಾ ಬೌಲರ್ಗಳು ಲಯ ತಪ್ಪಲಿಲ್ಲ. ಬ್ಯಾಟ್ಸ್ಮನ್ಗಳು ಕಳೆದುಕೊಂಡಿದ್ದ ಫಾರ್ಮ್ ಅನ್ನು ಮತ್ತೆ ಕಂಡುಕೊಂಡರು. ಇನ್ನೊಂದೆಡೆ ಶ್ರೀಲಂಕಾ ತಂಡ ಸ್ಥಿರ ಪ್ರದರ್ಶನ ನೀಡಲು ಪರದಾಡಿತು. ಇದೆಲ್ಲದರ ಪರಿಣಾಮವಾಗಿ ಶ್ರೀಲಂಕಾ ಆಸ್ಟ್ರೇ;ಲಿಯಾ ವಿರುದ್ಧದ ಪಂದ್ಯವನ್ನು 7 ವಿಕೆಟ್ಗಳಿಂದ ಕಳೆದುಕೊಂಡಿತು
ದುಬೈನಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ಮೊದಲು ಫೀಲ್ಡಿಂಗ್ ಆರಿಸಿಕೊಂಡಿತು. ಶ್ರೀಲಂಕಾ ಇನ್ನಿಂಗ್ಸ್ ಆರಂಭಿಸಿದ ಪತುನ್ ನಿಸ್ಸಂಕಾ ಮತ್ತು ಕುಸಾಲ್ ಪೆರಾರ ದೊಡ್ಡ ಮೊತ್ತ ಗಳಿಸಿಕೊಡಲಿಲ್ಲ. ನಿಸ್ಸಂಕಾ 7 ರನ್ಗಳಿಸಿ ಔಟಾದರು. ಪೆರಾರ ಮತ್ತು ಚರಿತ್ ಅಸಲಂಕಾ ವೇಗವಾಗಿ ರನ್ಗಳಿಸಿದರು. ಅಸಲಂಕಾ 27 ಎಸೆತಗಳಲ್ಲಿ 35 ರನ್ಗಳೀಸಿ ಔಟಾದರೆ, ಪೆರಾರ 25 ಎಸೆತಗಳಲ್ಲಿ 35 ರನ್ಗಳಿಸಿದರು. ಆವಿಷ್ಕಾ ಫೆರ್ನಾಂಡೋ, ಹಸರಂಗ ಮತ್ತು ಶನಕ ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲಲಿಲ್ಲ. ಆದರೆ ಭಾನುಕಾ ರಾಜಪಕ್ಸೆ 33 ರನ್ಗಳಿಸಿದರು. 20 ಓವರುಗಳಲ್ಲಿ ಶ್ರೀಲಂಕಾ 6 ವಿಕೆಟ್ ಕಳೆದುಕೊಂಡು 154ರನ್ಗಳಿಸಿತು. ಸ್ಟಾರ್ಕ್, ಝಂಪಾ ಮತ್ತು ಕಮಿನ್ಸ್ ತಲಾ ಎರಡೆರಡು ವಿಕೆಟ್ ಪಡೆದರು.
ಚೇಸಿಂಗ್ ಆರಂಭಿಸಿದ ಆಸ್ಟ್ರೇಲಿಯಾಕ್ಕೆ ಸ್ಪೋಟಕ ಆರಂಭ ಸಿಕ್ಕಿತು. ಡೇವಿಡ್ ವಾರ್ನರ್ ಮತ್ತು ಆ್ಯರೋನ್ ಫಿಂಚ್ ಪವರ್ ಪ್ಲೇನಲ್ಲಿ ಪವರ್ ಆಟ ಆಡಿದರು. 7 ಓವರುಗಳಲ್ಲಿ ಈ ಜೋಡಿ 70 ರನ್ ಚಚ್ಚಿತ್ತು. ಫಿಂಚ್ 37 ರನ್ಗಳಿಸಿ ಹಸರಂಗಗೆ ವಿಕೆಟ್ ಒಪ್ಪಿಸಿದರು. ಗ್ಲೆನ್ ಮ್ಯಾಕ್ಸ್ವೆಲ್ ಆಟ 5 ರನ್ಗಳಿಗೆ ಅಂತ್ಯ ಕಂಡಿತು. ಈ ಮಧ್ಯೆ ಫಾರ್ಮ್ ಕಂಡುಕೊಂಡ ವಾರ್ನರ್ ಅರ್ಧಶತಕದ ಗಡಿ ಕೂಡ ದಾಟಿದರು. ವಾರ್ನರ್ 42 ಎಸೆತಗಳಲ್ಲಿ 65 ರನ್ಗಳಿಸಿ ಶನಕಗೆ ವಿಕೆಟ್ ಒಪ್ಪಿಸಿದರು.
ಕೊನೆಯಲ್ಲಿ ಸ್ಟೀವ್ ಸ್ಮಿತ್ (ಅಜೇಯ 28 ರನ್) ಮತ್ತು ಮಾರ್ಕಸ್ ಸ್ಟೋಯ್ನಿಸ್ (ಅಜೇಯ 16 ರನ್) ಗೆಲುವಿಗೆ ಬೇಕಾದ ಔಪಚಾರಿಕತೆ ಮುಗಿಸಿದರು. ಆಸ್ಟ್ರೇಲಿಯಾ 17 ಓವರುಗಳಲ್ಲಿ ಗುರಿ ತಲುಪಿ 7 ವಿಕೆಟ್ಗಳ ಭರ್ಜರಿ ಜಯ ದಾಖಲಿಸಿತು.