ಸಿಂಗಾಪುರ: ಬಾಲಿವುಡ್ ಅಂಗಳದ ಮಿಸ್ಟರ್ ಪರ್ಫೆಕ್ಷನಿಸ್ಟ್ ಎಂದು ಕರೆಸಿಕೊಳ್ಳುವ ಆಮಿರ್ ಖಾನ್ ಇಂದು ಅಂತರಾಷ್ಟ್ರೀಯ ಮಟ್ಟದ ವೇದಿಕೆಯೊಂದರಲ್ಲಿ ಅಕ್ಷರಶಃ ಭಾವುಕರಾಗಿ ಕುಸಿದು ಬಿದ್ದಿದ್ದಾರೆ. ಸಿಂಗಾಪುರದಲ್ಲಿ ನಡೆದ ಭವ್ಯ ಚಲನಚಿತ್ರೋತ್ಸವದ ವೇದಿಕೆ ಆಮಿರ್ ಖಾನ್ ಅವರ ಭಾವೋದ್ವೇಗದ ಅಲೆಗಳಿಗೆ ಸಾಕ್ಷಿಯಾಯಿತು. ಮೂರು ದಶಕಗಳ ಕಾಲ ಚಿತ್ರರಂಗದ ಅಧಿಪತಿಯಾಗಿ ಮೆರೆದಿದ್ದರೂ, ವೈಯಕ್ತಿಕ ಬದುಕಿನಲ್ಲಿ ತಾನೊಬ್ಬ ವಿಫಲ ತಂದೆ ಮತ್ತು ವಿಫಲ ಕೌಟುಂಬಿಕ ವ್ಯಕ್ತಿ ಎಂಬ ಸತ್ಯವನ್ನು ಅವರು ಇಡೀ ಜಗತ್ತಿನ ಎದುರು ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ.
ಕೊರೊನಾ ಮಹಾಮಾರಿಯ ಲಾಕ್‌ಡೌನ್ ಸಮಯದಲ್ಲಿ ತಮಗೆ ಬದುಕಿನ ಅಸಲಿ ಮೌಲ್ಯದ ಅರಿವಾಯಿತು ಎಂದಿರುವ ಆಮಿರ್, ಕಳೆದ 30 ವರ್ಷಗಳಿಂದ ನಾನು ಕೇವಲ ಹಣ, ಹೆಸರು ಮತ್ತು ಯಶಸ್ಸಿನ ಬೆನ್ನತ್ತಿ ಹುಚ್ಚನಂತೆ ಓಡಿದ್ದೆ. ಆ ಓಟದಲ್ಲಿ ನನ್ನ ಮಕ್ಕಳ ಶೈಶವಾವಸ್ಥೆ, ಕುಟುಂಬದ ಸಂಭ್ರಮ ಮತ್ತು ಸಂಬಂಧಗಳ ಮಧುರ ಕ್ಷಣಗಳನ್ನು ನಾನು ನಿರ್ಲಕ್ಷಿಸಿದೆ. ಕೆಲಸವೇ ಸರ್ವಸ್ವ ಎಂದು ನಂಬಿದ್ದ ನನಗೆ ಈಗ 60ರ ಹರೆಯದಲ್ಲಿ ಸತ್ಯದ ಜ್ಞಾನೋದಯವಾಗಿದೆ. ಬದುಕಿನ ಅತ್ಯಂತ ಅಮೂಲ್ಯವಾದ ಸಮಯವನ್ನು ನಾನು ಕಳೆದುಕೊಂಡಿದ್ದೇನೆ ಎಂದು ಅವರು ವೇದಿಕೆಯ ಮೇಲೆ ಕಣ್ಣೀರಿಟ್ಟಿದ್ದಾರೆ.
Related posts
ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳಲ್ಲಿ ಎದುರಿಸಿದ ಭೀಕರ ಅವಮಾನಗಳನ್ನು ನೆನೆದ ಆಮಿರ್, ಮೊದಲ ಚಿತ್ರದ ಭರ್ಜರಿ ಯಶಸ್ಸಿನ ಅಮಲಿನಲ್ಲಿ ಸಾಲು ಸಾಲಾಗಿ ಒಂಬತ್ತು ಸಿನಿಮಾಗಳಿಗೆ ಸಹಿ ಹಾಕಿ ಸೋತ ಕಹಿ ಘಟನೆಗಳನ್ನು ಮೆಲುಕು ಹಾಕಿದರು. ಇಡೀ ಜಗತ್ತು ನನ್ನನ್ನು ಹೀಯಾಳಿಸಿದಾಗ ಅನುಭವಿಸಿದ ಆ ನೋವಿನ ರಾತ್ರಿಗಳು ಮತ್ತು ಭಾವನಾತ್ಮಕ ಕುಸಿತವನ್ನು ಅವರು ನೆನೆದು ಬಿಕ್ಕಳಿಸಿದರು. ಕಳೆದ ನಾಲ್ಕು ವರ್ಷಗಳಿಂದ ನಾನು ಸಿನಿಮಾದ ಬಣ್ಣದ ಲೋಕದಿಂದ ಸ್ವಲ್ಪ ದೂರ ಸರಿದು ಕುಟುಂಬದ ಜೊತೆ ಸಮಯ ಕಳೆಯುತ್ತಿದ್ದೇನೆ. ಈ ಪ್ರಬುದ್ಧತೆ ನನಗೆ 80ರ ಹರೆಯದಲ್ಲಿ ಬರುವ ಬದಲು ಈಗ ಬಂದಿರುವುದು ಸಮಾಧಾನಕರ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಇದೇ ಸಮಾರಂಭದಲ್ಲಿ ಲಗಾನ್ ಚಿತ್ರದ 25ನೇ ವರ್ಷಾಚರಣೆಯ ಅದ್ದೂರಿ ಪ್ರದರ್ಶನವೂ ನಡೆಯಿತು ಮತ್ತು ಆಮಿರ್ ಅವರಿಗೆ ಸ್ಕ್ರೀನ್ ಐಕಾನ್ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.
