ಕೆರೆಬಿಯನ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿಯ ಪ್ರಶಸ್ತಿ ಅಂಕಿ ಅಂಶಗಳು ಏನು ಹೇಳ್ತಾವೆ..?
ಕೆರೆಬಿಯನ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿ. ವೆಸ್ಟ್ ಕ್ರಿಕೆಟ್‍ನ ಪ್ರತಿಷ್ಠಿತ ದೇಸಿ ಟೂರ್ನಿ. ಐಪಿಎಲ್ ಟೂರ್ನಿಯಂತೆ ನಡೆಯುವ ಸಿಪಿಎಲ್ ಕ್ರಿಕೆಟ್ ಟೂರ್ನಿ ವಿಶ್ವ ಕ್ರಿಕೆಟ್ ನಲ್ಲಿ ತನ್ನದೇ ಆದ ಸ್ಥಾನಮಾನ ಪಡೆದುಕೊಂಡಿದೆ. ಆದ್ರೆ ಈ ಸಿಪಿಎಲ್ ಟೂರ್ನಿಯಲ್ಲಿ ಭಾರತೀಯ ಆಟಗಾರರು ಭಾಗವಹಿಸುತ್ತಿಲ್ಲ.
2013ರಿಂದ ಆರಂಭವಾಗಿರುವ ಸಿಪಿಎಲ್ ಟೂರ್ನಿಯಲ್ಲಿ ಒಟ್ಟು ಏಳು ತಂಡಗಳಿದ್ದವು. ಆದ್ರೆ ಈಗ ಆರು ತಂಡಗಳು ಭಾಗವಹಿಸುತ್ತಿವೆ. ಆಂಟಿಗುವಾ ಹಾಕ್ವಾಸ್‍ಬಿಲ್ಸ್ ತಂಡ ಟೂರ್ನಿಯಲ್ಲಿ ಆಡುತ್ತಿಲ್ಲ. ಕೋವಿಡ್-19ನಿಂದಾಗಿ ಈ ಬಾರಿ ದಕ್ಷಿಣ ಆಫ್ರಿಕಾ ಸೇರಿದಂತೆ ವಿವಿಧ ದೇಶಗಳ ಆಟಗಾರರು ಭಾಗವಹಿಸುತ್ತಿಲ್ಲ. ಈ ಬಾರಿಯ ಟೂರ್ನಿ ಆಗಸ್ಟ್ 18ರಿಂದ ಸೆಪ್ಟಂಬರ್ 10ರವರೆಗೆ ನಡೆಯಲಿದೆ.
ಇದೀಗ ಎಂಟನೇ ಆವೃತ್ತಿಯ ಟೂರ್ನಿ ನಡೆಯುತ್ತಿದೆ. ಈ ಹಿಂದಿನ ಏಳು ಆವೃತ್ತಿಗಳಲ್ಲಿ ಮೂರು ತಂಡಗಳು ತಲಾ ಎರಡು ಬಾರಿ ಚಾಂಪಿಯನ್‍ಪಟ್ಟಕ್ಕೇರಿವೆ. ಒಂದು ತಂಡ ಒಂದು ಬಾರಿ ಪ್ರಶಸ್ತಿ ಗೆದ್ದುಕೊಂಡಿದೆ.
2013ರ ಸಿಪಿಎಲ್ ನಲ್ಲಿ ಜಮೈಕಾ ತಲ್ಲಾವಾಹ್ಸ್ ತಂಡ ಪ್ರಶಸ್ತಿ ಗೆದ್ದುಕೊಂಡಿದೆ. ಫೈನಲ್ ನಲ್ಲಿ ಗಯಾನಾ ಅಮೇಜಾನ್ ವಾರಿಯರ್ಸ್ ತಂಡವನ್ನು ಸೋಲು ವಿಕೆಟ್‍ಗಳಿಂದ ಪರಾಭವಗೊಳಿಸಿತ್ತು.
2014ರ ಸಿಪಿಎಲ್ ನಲ್ಲಿ ಬಾರ್ಬಡೋಸ್ ಟ್ರಿಡೆಂಟ್ಸ್ ತಂಡ ಪ್ರಶಸ್ತಿ ಗೆದ್ದುಕೊಂಡಿತ್ತು. ಫೈನಲ್ ನಲ್ಲಿ ಟ್ರಿಡೆಂಟ್ಸ್ ತಂಡ ಎಂಟು ರನ್ ಗಳಿಂದ ಗಯಾನ ಅಮೇಜಾನ್ ವಾರಿಯರ್ಸ್ ತಂಡವನ್ನು ಸೋಲಿಸಿತ್ತು.
2015ರ ಸಿಪಿಎಲ್ ನಲ್ಲಿ ಟ್ರಿನಿಡಾಡ್ ಟೊಬಾಗೊ ರೆಡ್ ಸ್ಟೀಲ್ಸ್ ತಂಡ ಚಾಂಪಿಯನ್ ಪಟ್ಟಕ್ಕೇರಿತ್ತು. ಫೈನಲ್ ನಲ್ಲಿ ಟ್ರಿನಿಡಾಡ್ ತಂಡ 9 ವಿಕೆಟ್‍ಗಳಿಂದ ಸೇಂಟ್ ಕಿಟ್ಸ್ ನೇವಿಸ್ ಪೆಟ್ರಿಯೋಟ್ಸ್ ತಂಡವನ್ನು ಮಣಿಸಿತ್ತು.
2016ರ ಸಿಪಿಎಲ್ ನಲ್ಲಿ ಜಮೈಕಾ ತಲ್ಲಾವಾಹ್ಸ್ ತಂಡ ಎರಡನೇ ಬಾರಿ ಪ್ರಶಸ್ತಿ ಗೆದ್ದುಕೊಂಡಿತ್ತು. ಫೈನಲ್ ನಲ್ಲಿ ಜಮೈಕಾ 9 ವಿಕೆಟ್ ಗಳಿಂದ ಸೇಂಟ್ ಕಿಟ್ಸ್ ನೇವಿಸ್ ಪೆಟ್ರಿಯೋಟ್ಸ್ ತಂಡವನ್ನು ಸೋಲಿಸಿತ್ತು.
ಇನ್ನು 2017 ಮತ್ತು 2018ರ ಸಿಪಿಎಲ್ ನಲ್ಲಿ ಟ್ರಿನ್‍ಬಾಗೊ ನೈಟ್ ರೈಡರ್ಸ್ ತಂಡ ಸತತ ಎರಡು ಬಾರಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿತ್ತು. 2017ರ ಫೈನಲ್ ನಲ್ಲಿ ನೈಟ್ ರೈಡರ್ಸ್ ತಂಡ ಮೂರು ವಿಕೆಟ್ ಗಳಿಂದ ಗಯಾನ ಅಮೇಜಾನ್ ವಾರಿಯರ್ಸ್ ತಂಡವನ್ನು ಮಣಿಸಿದ್ರೆ, 2018ರ ಫೈನಲ್ ನಲ್ಲಿ ನೈಟ್ ರೈಡರ್ಸ್ ತಂಡ ಗಯಾನ ಅಮೇಜಾನ್ ವಾರಿಯರ್ಸ್ ತಂಡವನ್ನು ಎಂಟು ವಿಕೆಟ್‍ಗಳಿಂದ ಸೋಲಿಸಿ ಪ್ರಶಸ್ತಿ ಗೆದ್ದುಕೊಂಡಿತ್ತು.
2019ರ ಸಿಪಿಎಲ್ ಫೈನಲ್ ನಲ್ಲಿ ಬಾರ್ಬಡೋಸ್ ಟ್ರಿಡೆಂಟ್ಸ್ ತಂಡ ಎರಡನೇ ಬಾರಿ ಪ್ರಶಸ್ತಿ ತನ್ನದಾಗಿಸಿಕೊಂಡಿತ್ತು. ಫೈನಲ್ ನಲ್ಲಿ ಗಯಾನ ಅಮೇಜಾನ್ ವಾರಿಯರ್ಸ್ ತಂಡವನ್ನು 27 ರನ್‍ಗಳಿಂದ ಮಣಿಸಿತು.
ಒಟ್ಟಾರೆ, ಬಾರ್ಬಡೋಸ್ ಟ್ರಿಡೆಂಟ್ಸ್ ತಂಡ ಎರಡು ಬಾರಿ, ಟ್ರಿನ್ ಬಾಗೋ ನೈಟ್ ರೈಡರ್ಸ್ ಎರಡು ಬಾರಿ ಹಾಗೂ ಜಮೈಕಾ ತಲ್ಲಾವಾಹ್ಸ್ ತಂಡ ಎರಡು ಬಾರಿ ಪ್ರಶಸ್ತಿ ಗೆದ್ರೆ, ಟ್ರಿನಿಡಾಡ್ ಟೊಬಾಗೊ ರೆಡ್ ಸ್ಟೀಲ್ ತಂಡ ಒಂದು ಬಾರಿ ಪ್ರಶಸ್ತಿ ಗೆದ್ದಿದೆ.
ಇನ್ನು ಟೂರ್ನಿಯಲ್ಲಿ ಐದು ಬಾರಿ ಫೈನಲ್ ಪ್ರವೇಶ ಮಾಡಿರುವ ಗಯಾನ ಅಮೇಜಾನ್ ವಾರಿಯರ್ಸ್ ತಂಡಕ್ಕೆ ಇಲ್ಲಿಯವರೆಗೆ ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗಿಲ್ಲ. ಐದು ಬಾರಿ ರನ್ನರ್ ಅಪ್‍ಗೆ ಸಮಾಧಾನಪಟ್ಟುಕೊಂಡಿರುವ ಗಯಾನ ಅಮೇಜಾನ್ ವಾರಿಯರ್ಸ್ ಸಿಪಿಎಲ್‍ನ ನತದೃಷ್ಟ ತಂಡವಾಗಿದೆ.
