ಭಾರತದಲ್ಲಿ ಕ್ರಿಕೆಟ್ ಹೇಗೆ ಧರ್ಮವಾಗಿದೆಯೋ ಹಾಗೇ ಆ ರಾಷ್ಟ್ರದಲ್ಲೂ ಫುಟ್ಬಾಲ್ ಆಟ ಧರ್ಮವಾಗಿದೆ. ಭಾರತದ ಗಲ್ಲಿ ಗಲ್ಲಿಗಳಲ್ಲಿ ಕ್ರಿಕೆಟ್ ಆಡುವ ರೀತಿಯಲ್ಲೇ ಆ ದೇಶದ ಗಲ್ಲಿ ಗಲ್ಲಿಗಳಲ್ಲೂ ಕಾಲ್ಚೆಂಡಿನೊಂದಿಗೆ ಡಾನ್ಸ್ ಮಾಡುತ್ತಿರುತ್ತಾರೆ. ಭಾರತದಲ್ಲಿ ಕ್ರಿಕೆಟ್ ಆಟವನ್ನು ಹೇಗೆ ಆರಾಧಿಸ್ತಾರೋ, ಅದೇ ರೀತಿ ಆ ದೇಶದಲ್ಲೂ ಫುಟ್ಬಾಲ್ ಆಟವನ್ನು ಜೀವಕ್ಕಿಂತ ಹೆಚ್ಚು ಪ್ರೀತಿಸ್ತಾರೆ. ಆ ದೇಶವೇ ಪ್ರಾಚೀನ ನಾಗರಿಕತೆಗಳ ತವರೂರು ಆಗಿರುವ ಮೆಕ್ಸಿಕೊ.
ಸದ್ಯ ಅಮೆರಿಕಾ, ಕೆನಡಾದ ಜೊತೆ ಸೇರಿಕೊಂಡು 2026ರ ಫಿಫಾ ವಿಶ್ವಕಪ್ ಟೂರ್ನಿಯನ್ನು ಜಂಟಿಯಾಗಿ ಆಯೋಜಿಸುತ್ತಿದೆ. ಅಲ್ಲದೆ ಫಿಫಾ ವಿಶ್ವಕಪ್ ಹಾಗೂ ವಿಶ್ವ ಫುಟ್ಬಾಲ್ನ ಬಲಿಷ್ಠ ತಂಡವೂ ಹೌದು. 1970, 1986 ಮತ್ತು 2026ರಲ್ಲಿ ಫಿಫಾ ವಿಶ್ವಕಪ್ ಅನ್ನು ಮೂರು ಬಾರಿ ಆಯೋಜಿಸಿದ ಜಗತ್ತಿನ ಏಕೈಕ ರಾಷ್ಟ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಅಲ್ಲದೆ, ಫುಟ್ಬಾಲ್ ದಂತಕಥೆಗಳಾದ ಪೀಲೆ, ಡಿಯಾಗೊ ಮರಡೋನಾರಂತಹ ಆಟಗಾರರು ವಿಶ್ವಕಪ್ ಟ್ರೋಫಿ ಗೆದ್ದು ಸಂಭ್ರಮಿಸಿದ್ದು ಕೂಡ ಇದೇ ಮೆಕ್ಸಿಕೊ ಅಂಗಣದಲ್ಲಿ ಎಂಬುದು ವಿಶೇಷ.
ಫುಟ್ಬಾಲ್ ಜೊತೆ ಬೇಸ್ಬಾಲ್, ಕುಸ್ತಿ ಈ ದೇಶದ ಪ್ರಮುಖ ಕ್ರೀಡೆಯಾಗಿದೆ. ಆದ್ರೆ ಇತ್ತೀಚಿನ ದಿನಗಳಲ್ಲಿ ಮೆಕ್ಸಿಕೊದಲ್ಲಿ ಬ್ಯಾಟ್ – ಚೆಂಡಿನ ಕ್ರಿಕೆಟ್ ಆಟದ ಸದ್ದು ಕೇಳಿಸುತ್ತಿದೆ. 2026ರ ಫಿಫಾ ವಿಶ್ವಕಪ್ ಜಾತ್ರೆಯ ನಡುವೆಯೇ ಮೆಕ್ಸಿಕೊದ ಮೈದಾನದ ಜೊತೆಗೆ ಜೈಲಿನ ಕೋಟೆಯಲ್ಲೂ ಕ್ರಿಕೆಟ್ ಆಟ ಹೊಸ ವಿಳಾಸವನ್ನು ಪಡೆದುಕೊಂಡಿದೆ. ಹೌದು, ಸದ್ಯ ನಾಲ್ಕೈದು ಜೈಲಿನಲ್ಲಿರುವ ಕೈದಿಗಳಿಗೆ ಕ್ರಿಕೆಟ್ ಆಟದ ಗ್ರಾಮರ್ಗಳನ್ನು ಕಲಿಸಲಾಗುತ್ತಿದೆ. ಕಾರಾಗೃಹದಲ್ಲಿರುವ ಹಳೆಯ ಬ್ಯಾಸ್ಕೆಟ್ಬಾಲ್ ಅಂಗಣಗಳೇ ಈ ಕೈದಿಗಳ ಕ್ರಿಕೆಟ್ ಅಂಗಣವಾಗಿದೆ.
ಮೆಕ್ಸಿಕೊದ ರಾಷ್ಟ್ರೀಯ ದೈಹಿಕ ಶಿಕ್ಷಣ ಮತ್ತು ಕ್ರೀಡಾ ಆಯೋಗವು ಜೈಲಿನಲ್ಲಿರುವ ಕೈದಿಗಳಿಗೆ ಶಿಸ್ತು ಮತ್ತು ತಾಳ್ಮೆಯನ್ನು ಮೈಗೂಡಿಸಿಕೊಳ್ಳಲು ಜಂಟಲ್ ಮ್ಯಾನ್ ಆಟವನ್ನು ಪರಿಚಯಿಸಿದೆ. ಕ್ರಿಕೆಟ್ನಲ್ಲಿ ಅಂಪೈರ್ ತೀರ್ಪೇ ಅಂತಿಮ. ಹೀಗಾಗಿ ಕೈದಿಗಳ ಕ್ರಿಕೆಟ್ ಆಟಕ್ಕೆ ಜೈಲರ್ ಅಂಪೈರ್ ಆಗಿದ್ದಾರೆ. ಇನ್ನು ಕ್ರಿಕೆಟ್ ಆಡಲು ಬ್ಯಾಟ್, ವಿಕೆಟ್, ಚೆಂಡುಗಳನ್ನು ತಯಾರು ಮಾಡುವುದು ಸಹ ಕೈದಿಗಳೇ. ದ್ವೇಷ ಮತ್ತು ಹಿಂಸೆಗೆ ಪ್ರಚೋದಿಸುವ ಇತರೆ ಕ್ರೀಡೆಗಳಿಗಿಂತ ಕ್ರಿಕೆಟ್ ಆಟ ಭಿನ್ನವಾಗಿದೆ. ಪರಸ್ಪರ ಸ್ನೇಹ ಮತ್ತು ಗೌರವದಿಂದ ಬಾಳುವುದರ ಜೊತೆಗೆ ಸ್ವಾವಲಂಬನೆಯ ಪಾಠದ ಮೂಲಕ ಸ್ವಂತ ಬದುಕು ಕಟ್ಟಿಕೊಳ್ಳಲು ನೆರವಾಗುತ್ತದೆ ಎಂಬುದು ರಾಷ್ಟ್ರೀಯ ದೈಹಿಕ ಶಿಕ್ಷಣ ಮತ್ತು ಕ್ರೀಡಾ ಆಯೋಗದ ಉದ್ದೇಶವಾಗಿದೆ.
ಹಾಗೇ ಮಹಿಳಾ ಕೈದಿಗಳು ಸಕ್ರಿಯವಾಗಿ ಕ್ರಿಕೆಟ್ ಆಡುತ್ತಿದ್ದಾರೆ. ಅಷ್ಟೇ ಅಲ್ಲ, ಮುಂದಿನ ದಿನಗಳಲ್ಲಿ ಹೈಸೆಕ್ಯುರಿಟಿ ಜೈಲುಗಳಲ್ಲೂ ಕ್ರಿಕೆಟ್ ತರಬೇತಿಯನ್ನು ನೀಡಲಾಗುತ್ತಿದೆ. ಇದಕ್ಕೆ ಮುಖ್ಯ ಪ್ರೇರಣೆ 2021ರಲ್ಲಿ ನಡೆದ ಐಸಿಸಿ ಅಮೆರಿಕನ್ ವುಮೆನ್ಸ್ ಟಿ-20 ಕ್ರಿಕೆಟ್. ಈ ಪಂದ್ಯವನ್ನು ವೀಕ್ಷಿಸಿದ ರಾಷ್ಟ್ರೀಯ ದೈಹಿಕ ಶಿಕ್ಷಣ ಮತ್ತು ಕ್ರೀಡಾ ಆಯೋಗವು ಮೆಕ್ಸಿಕೊ ಕ್ರಿಕೆಟ್ ಸಂಸ್ಥೆಯ ಜೊತೆಗೂಡಿ ಈ ಯೋಜನೆಯನ್ನು ಸಿದ್ದಪಡಿಸಿದೆ. ಈ ಮೂಲಕ ಮೆಕ್ಸಿಕೊದ ಮೂಲ ಆಟವಾಗಿರುವ ಕ್ರಿಕೆಟ್ಗೆ ಮರುಜನ್ಮ ನೀಡಲು ಮೆಕ್ಸಿಕೊ ಕ್ರಿಕೆಟ್ ಸಂಸ್ಥೆಯೂ ದಿಟ್ಟ ಹೆಜ್ಜೆಯನ್ನಿಡುತ್ತಿದೆ.
ಹಾಗೇ ನೋಡಿದ್ರೆ ಮೆಕ್ಸಿಕೊದಲ್ಲಿ 1827ರಲ್ಲೇ ಕ್ರಿಕೆಟ್ ಆಟವನ್ನು ಆಡಲಾಗುತ್ತಿತ್ತು ಎಂಬುದಕ್ಕೆ ಐತಿಹಾಸಿಕ ದಾಖಲೆಗಳಿವೆ. ಬ್ರಿಟಿಷರ ಅಧೀನದಲ್ಲಿದ್ದ ಮೆಕ್ಸಿಕೊದಲ್ಲಿ ಫುಟ್ಬಾಲ್ ಮತ್ತು ಕ್ರಿಕೆಟ್ ಏಕಕಾಲದಲ್ಲೇ ಪರಿಚಯಿಸಿದವರು ಸ್ಕಾಟ್ಲೆಂಡ್ನ ಗಣಿ ಕಾರ್ಮಿಕರು. ಕ್ರಿಕೆಟ್ ಬ್ರಿಟಿಷರ ಪ್ರತಿಷ್ಠೆಯ ಸಂಕೇತವಾದ್ರೆ, ಫುಟ್ಬಾಲ್ ಜನಸಾಮಾನ್ಯರ ಕ್ರೀಡೆಯಾಗಿ ಬೆಳೆಯಿತ್ತು. 1896ರಲ್ಲಿ ಮೆಕ್ಸಿಕೊ ಕ್ರಿಕೆಟ್ ಕ್ಲಬ್ ಆರಂಭಿಸಿದ ನಂತರ ಮೆಕ್ಸಿಕೊದಲ್ಲಿ ಕ್ರಿಕೆಟ್ ಜನಪ್ರಿಯ ಕ್ರೀಡೆಯಾಗಿ ಬೆಳೆದಿತ್ತು. ಆದ್ರೆ ಮೆಕ್ಸಿಕೊ ಕ್ರಾಂತಿ ಮತ್ತು ಮೊದಲ ಮಹಾಯುದ್ಧದ ನಂತರ ಬ್ರಿಟಿಷರು ದೇಶ ಬಿಟ್ಟು ಹೋದ್ರು. ಅಲ್ಲಿನ ಜನಸಾಮಾನ್ಯರ ಕ್ರೀಡೆಯಾಗಿದ್ದ ಫುಟ್ಬಾಲ್ ಆಟ ಹೆಮ್ಮರವಾಗಿ ಬೆಳೆದ್ರೆ ಕ್ರಿಕೆಟ್ ಸಂಪೂರ್ಣವಾಗಿ ಅಳಿಸಿ ಹೋಯ್ತು. ಹೀಗಾಗಿ ಇಂದಿಗೂ ಮೆಕ್ಸಿಕೊದಲ್ಲಿ ಕ್ರಿಕೆಟ್ನ ಪರಿಕರಗಳು ಸಿಗುತ್ತಿಲ್ಲ. ಕ್ರಿಕೆಟ್ ಕಿಟ್ಗಳನ್ನು ವಿದೇಶದಿಂದಲೇ ಆಮದು ಮಾಡಿಕೊಳ್ಳಲಾಗುತ್ತಿದೆ. ಸದ್ಯ ಒಂದು ಕ್ರೀಡಾಂಗಣವಿದ್ದು, ಎರಡು ನೆಟ್ಸ್ಗಳು ಮಾತ್ರ ಇವೆ.
ಗತಕಾಲದಲ್ಲಿ ಬ್ರಿಟಿಷ್ ಅಧಿಕಾರಿಗಳು, ಅಲ್ಲಿನ ರಾಜರುಗಳು ಆಡುತ್ತಿದ್ದ ಚಿತ್ರಗಳು ಇನ್ನೂ ಕೂಡ ಅಲ್ಲಿನ ಲೈಬ್ರೆರಿಯಲ್ಲಿವೆ. ಮೆಕ್ಸಿಕೊದಲ್ಲಿ ನೆಲೆಸಿರುವ ಇಂಗ್ಲೆಂಡ್, ಪಾಕಿಸ್ತಾನ, ಭಾರತ ಸೇರಿದಂತೆ ವಿದೇಶಿ ಆಟಗಾರರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. 2004ರಿಂದ ಮೆಕ್ಸಿಕೊ ಐಸಿಸಿ ಮಾನ್ಯತೆಯನ್ನು ಪಡೆದುಕೊಂಡಿದೆ. ಈಗಾಗಲೇ ಸಹ ಸದಸ್ಯ ರಾಷ್ಟ್ರಗಳ ನಡುವಿನ ಆಡುತ್ತಿದೆ. 2018ರಲ್ಲಿ ಚೊಚ್ಚಲ ಅಂತಾರಾಷ್ಟ್ರೀಯ ಟಿ-20 ಪಂದ್ಯಗಳನ್ನ ಆಡಿರುವ ಮೆಕ್ಸಿಕೊ ರಾಷ್ಟ್ರೀಯ ಕ್ರಿಕೆಟ್ ತಂಡ ಇಲ್ಲಿಯವರೆಗೆ 41 ಪಂದ್ಯಗಳನ್ನು ಆಡಿದೆ.
ಪ್ರಸ್ತುತ ಎಂಸಿಎ ಕ್ಲಬ್ನ ಕಾರ್ಯದರ್ಶಿಯಾಗಿರುವ ಇಂಗ್ಲೆಂಡ್ ಮೂಲದ ಕ್ರೇಗ್ ವೇಟ್ ಸ್ಥಳೀಯ ಪ್ರತಿಭೆಗಳನ್ನು ಗುರುತಿಸುತ್ತಿದ್ದಾರೆ. ಅದರಲ್ಲೂ ಸ್ಥಳಿಯ ಒಬ್ಬ ಪ್ರತಿಭೆಯ ಹೆಸರು ಹೇಳದಿದ್ರೂ ಮುಂದೊಂದು ಈತನೇ ಮೆಕ್ಸಿಕೊ ಕ್ರಿಕೆಟ್ನ ಸೂಪರ್ಸ್ಟಾರ್ ಆಗಲಿದ್ದಾನೆ ಅಂತ ಹೆಮ್ಮೆಯಿಂದ ಹೇಳಿಕೊಳ್ಳುತ್ತಿದ್ದಾರೆ. ತನ್ನ ಪೂರ್ವಜರು ಬಿಟ್ಟು ಹೋಗಿದ್ದ ಕ್ರಿಕೆಟ್ ಆಟಕ್ಕೆ ಮರುಜನ್ಮ ನೀಡಲು ಕ್ರೇಗ್ ವೇಟ್ ಮುಂದಾಗಿದ್ದಾರೆ. ವಿದೇಶಿ ಆಟಗಾರರ ಜೊತೆ ಸ್ಥಳಿಯ ಜನರು ಕೂಡ ಆಡಬೇಕು ಎಂಬ ಉದ್ದೇಶದಿಂದ ಮೆಕ್ಸಿಕೊದಲ್ಲಿ ಕ್ರಿಕೆಟ್ ಆಟಕ್ಕೆ ಬೇಕಾದ ಮಾಸ್ಟರ್ ಪ್ಲ್ಯಾನ್ಗಳನ್ನು ಮಾಡುತ್ತಿದ್ದಾರೆ.
ಎರಡು ಶತಮಾನಗಳ ಹಿಂದೆ ಆಂಗ್ಲರ ಜೊತೆ ಮೆಕ್ಸಿಕೊಗೆ ಬಂದು, ನಂತರ ದೇಶ ತೊರೆದು ಹಳೆಯ ನೆನಪಾಗಿ ಉಳಿದಿದ್ದ ಕ್ರಿಕೆಟ್ ಆಟ ಇಂದು ಕೈದಿಗಳ ಮನಪರಿವರ್ತನೆಯ ಕ್ರೀಡೆಯಾಗುತ್ತಿದೆ ಅಂದ್ರೆ ವಿಸ್ಮಯವಾಗುತ್ತದೆ. ಒಂದು ಕಾಲದಲ್ಲಿ ಸಾಮ್ರಾಜ್ಯಶಾಹಿಯ ಅಹಂಕಾರದ ಸಂಕೇತವಾಗಿದ್ದ ಕ್ರಿಕೆಟ್ ಇಂದು ಅಪರಾಧಿಗಳ ಮನಸು ಗೆದ್ದು ಮಾನೀಯತೆಯ ಮೌಲ್ಯಗಳನ್ನು ಮೈಗೂಡಿಸಿಕೊಳ್ಳಲು ದಾರಿ ತೋರಿಸುತ್ತಿರುವುದು ಕ್ರೀಡಾ ಜಗತ್ತಿನ ಸುಂದರ ಅಧ್ಯಾಯವಾಗಿದೆ.
ಸನತ್ ರೈ
