ನವದೆಹಲಿ : ಲಯನ್ ಸೆನ್ಸಸ್ 2020ರ ಪ್ರಕಾರ, ದೇಶದಲ್ಲಿ ಏಷ್ಯಾಟಿಕ್ ಸಿಂಹಗಳ ಸಂಖ್ಯೆಯಲ್ಲಿ ಶೇ.29 ರಷ್ಟು ಏರಿಕೆ ಕಂಡುಬಂದಿದೆ. ಈಗ ಸದ್ಯ ದೇಶದಲ್ಲಿ ಸುಮಾರು 674 ಸಿಂಹಗಳಿವೆ. ಮೇ 2015ರಲ್ಲಿ ದೇಶದಲ್ಲಿ 523 ಸಿಂಹಗಳು ಇದ್ದವು. ಆದರೆ ಈ ಬಾರಿಯ ಸೆನ್ಸಸ್ ನಲ್ಲಿ 151 ಸಿಂಹಗಳ ಏರಿಕೆ ಕಂಡುಬಂದಿದೆ.
ಗುಜರಾತ್ ನಲ್ಲಿ ಸಿಂಹಗಳ ಸಂಖ್ಯೆಯು 2001ರಿಂದ ದ್ವಿಗುಣಗೊಂಡಿದೆ ಮತ್ತು ಸಿಂಹಗಳ ಹೆಜ್ಜೆ ಗುರುತುಗಳು ಶೇ.400ರಷ್ಟು ಜಾಸ್ತಿಯಾಗಿದೆ. ಸಿಂಹಗಳ ವಿತರಣಾ ವ್ಯಾಪ್ತಿಯು 2015ರಲ್ಲಿ 30,000 ಚದರ ಕಿಲೋಮೀಟರ್ ವರೆಗೆ ವಿಸ್ತರಿಸಿತ್ತು. ಈಗ ಇದು ಶೇ.36ರಷ್ಟು ಹೆಚ್ಚಾಗಿದೆ ಎಂದು ಮೂಲಗಳು ತಿಳಿಸಿವೆ.
ಈ ಬಗ್ಗೆ ಅರಣ್ಯ ಮತ್ತು ಪರಿಸರದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ರಾಜೀವ್ ಗುಪ್ತಾ ಮಾತನಾಡಿದ್ದು, ಕೇಂದ್ರ ಸರ್ಕಾರದ ಬೆಂಬಲದೊಂದಿಗೆ ರಾಜ್ಯ ಸರ್ಕಾರದ ಪರಿಣಾಮಕಾರಿ ಸಂರಕ್ಷಣೆ ಮತ್ತು ನಿರ್ವಹಣಾ ಪ್ರಯತ್ನಗಳಿಂದಾಗಿ ನಮ್ಮ ದೇಶದಲ್ಲಿ ಸಿಂಹಗಳ ಸಂಖ್ಯೆಯಲ್ಲಿ ಆರೋಗ್ಯಕರ ಬೆಳವಣಿಗೆಯನ್ನು ದಾಖಲಿಸಿದೆ ಎಂದು ರಾಷ್ಟ್ರೀಯ ಮಾಧ್ಯಮವೊಂದಕ್ಕೆ ಹೇಳಿಕೆ ನೀಡಿದ್ದಾರೆ.
ಅಲ್ಲದೆ ವನ್ಯಜೀವಿ ತಜ್ಞರ ಪ್ರಕಾರ, ಗುಜರಾತ್ ನಲ್ಲಿ ಸಿಂಹಗಳ ಸಮೃದ್ಧ ಜನಸಂಖ್ಯೆ ಇದೆ. ಈ ಭಾಗದಲ್ಲಿ ಮೂಲಗಳ ಪ್ರಕಾರ, 159 ಗಂಡು ಸಿಂಹಗಳು ಮತ್ತು 262 ಹೆಣ್ಣು ಸಿಂಹಗಳು ಇವೆ ಎಂದು ಹೇಳಲಾಗಿದೆ.
