21 ಟೆಸ್ಟ್ ಗಳಲ್ಲಿ ಇದು ಮೂರನೇ ಬಾರಿ.. ಮಯಾಂಕ್-ರಾಹುಲ್ ಚರಿತ್ರೆ
ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಕನ್ನಡಿಗರಾದ ಕೆ.ಎಲ್.ರಾಹುಲ್ ಮತ್ತು ಮಯಾಂಕ್ ಅಗರ್ ವಾಲ್ ದಿಟ್ಟ ಪ್ರದರ್ಶನ ನೀಡಿದ್ದಾರೆ.
ಆಫ್ರಿಕಾ ನೆಲದಲ್ಲಿ ಟೀಂ ಇಂಡಿಯಾದ ಪರ ಆರಂಭಿಕರಾಗಿ ಕ್ರೀಸ್ ಗೆ ಬಂದ ಈ ಜೋಡಿ ಕೆಚ್ಚೆದೆಯ ಆಟವಾಡಿ ಭಾರತೀಯರು ಹೆಮ್ಮೆ ಪಡುವಂತೆ ಮಾಡಿದ್ದಾರೆ.
ಹೌದು..! ಬಾಕ್ಸಿಂಗ್ ಡೇ ದಿನದಂದು ವಿರಾಟ್ ಕೊಹ್ಲಿ ಟಾಸ್ ವಿನ್ ಆಗುತ್ತಿದ್ದಂತೆ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು.
ವಿರಾಟ್ ರ ನಿರ್ಧಾರ ಕೆಲ ಕ್ರೀಡಾ ವಿಶ್ಲೇಷಕರಿಗೆ ಅಚ್ಚರಿಯನ್ನುಂಟು ಮಾಡಿತ್ತು. ಆಫ್ರಿಕಾ ನೆಲದಲ್ಲಿ ಭಾರತೀಯರು ಮೊದಲು ಬ್ಯಾಟ್ ಮಾಡೋದಾ..?
ಒಂದೇ ಸೆಷನ್ ನಲ್ಲಿ ಆಲೌಟ್ ಆದ್ರೆ ಏನು ಪರಿಸ್ಥಿತಿ..? ಅನಾನುಭವಿ ಆರಂಭಿಕರಾದ ಮಯಾಂಕ್ – ರಾಹುಲ್ ಆಫ್ರಿಕಾ ಬೌಲಿಂಗ್ ದಾಳಿ ಮುಂದೆ ನಿಲ್ಲುತ್ತಾರಾ..?
ಎಂಬ ಪ್ರಶ್ನೆಗಳನ್ನ ಹಾಕಿಕೊಂಡಿದ್ದರು. ಆದ್ರೆ ಈ ಎಲ್ಲ ಅನುಮಾನ, ಪ್ರಶ್ನೆಗಳಿಗೆ ಕನ್ನಡಿಗರು ಬ್ಯಾಟ್ ಮೂಲಕವೇ ಉತ್ತರ ಕೊಟ್ಟಿದ್ದಾರೆ.
ಆರಂಭದಿಂದಲೇ ಎಚ್ಚರಿಕೆಯ ಆಟಕ್ಕೆ ಮುಂದಾದ ಮಯಾಂಕ್, ರಾಹುಲ್ ಜೋಡಿ ಒಂದೊಂದೇ ರನ್ ಪೇರಿಸುತ್ತಾ ಶತಕದ ಜೊತೆಯಾಡಿದರು.
ಅಲ್ಲದೇ ಇಬ್ಬರೂ ಅರ್ಧಶತಕ ಪೂರೈಸಿ ಮಿಂಚಿದರು. ಇದರೊಂದಿಗೆ ಕೆಲ ದಾಖಲೆಗಳನ್ನು ಕೂಡ ಮಾಡಿದ್ದಾರೆ.
ಟೀಂ ಇಂಡಿಯಾ ಆರಂಭಿಕರಾದ ಮಯಾಂಕ್ ಅಗರ್ವಾಲ್ ಮತ್ತು ಕೆಎಲ್ ರಾಹುಲ್ ದಕ್ಷಿಣ ಆಫ್ರಿಕಾ ನೆಲದಲ್ಲಿ ಹೊಸ ಇತಿಹಾಸ ನಿರ್ಮಿಸಿದ್ದಾರೆ.
ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಅರ್ಧಶತಕ ಸಿಡಿಸಿ ಮಿಂಚಿದ್ದ ಇವರಿಬ್ಬರು ಮೊದಲ ವಿಕೆಟ್ ಗೆ 117 ರನ್ ಗಳ ದಾಖಲೆಯ ಜೊತೆಯಾಟವಾಡಿದರು.
ಟೀಂ ಇಂಡಿಯಾ ಇದುವರೆಗೆ ಪ್ರೋಟೀಸ್ ನೆಲದಲ್ಲಿ 21 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, ಎರಡು ಬಾರಿ ಮಾತ್ರ ಆರಂಭಿಕರು 100 ರನ್ ಜೊತೆಯಾಟವನ್ನು ದಾಖಲಿಸಿದ್ದರು.
ಆದ್ರೆ ಬಾಕ್ಸಿಂಗ್ ಡೇ ಟೆಸ್ಟ್ ಪಂದ್ಯದಲ್ಲಿ ಕೆಎಲ್ ರಾಹುಲ್-ಮಯಾಂಕ್ ಜೋಡಿ ಮೂರನೇ ಶತಕದ ಜೊತೆಯಾಟದ ಸಾಧನೆ ಮಾಡಿದ್ದಾರೆ.
ಇದಕ್ಕೂ ಮುನ್ನ ವಾಸಿಂ ಜಾಫರ್ ಮತ್ತು ದಿನೇಶ್ ಕಾರ್ತಿಕ್ ಅವರ ಆರಂಭಿಕ ಜೋಡಿ 2006-07ರ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿ ಮೊದಲ ಬಾರಿಗೆ ಶತಕದ ಜೊತೆಯಾಟವನ್ನು ದಾಖಲಿಸಿತ್ತು.
ಇದಾದ ಬಳಿಕ ಸೆಹ್ವಾಗ್-ಗಂಭೀರ್ ಜೋಡಿ 2010-11ರಲ್ಲಿ ಎರಡನೇ ಶತಕದ ಜೊತೆಯಾಟವನ್ನು ದಾಖಲಿಸಿತ್ತು.
