* ಒಬ್ಬ ಮಾಜಿ ಮುಖ್ಯಮಂತ್ರಿ
* ಮತ್ತೋರ್ವ ಮಾಜಿ ಮುಖ್ಯಮಂತ್ರಿಯ ಮಗ
* ಕರಾವಳಿಯ ಪ್ರಭಾವಿ ನಾಯಕ
* ಪ್ರಶಾಂತ್ ಸಂಬರಗಿ ಹೇಳಿದ್ರು `ಶುಗರ್ ಡ್ಯಾಡಿ’
ಮಂಗಳೂರು: ನಟಿ ಹಾಗೂ ನಿರೂಪಕಿ ಅನುಶ್ರೀ ಡ್ರಗ್ಸ್ ಕೇಸ್ಗೆ ಸಂಬಂಧಿಸಿದಂತೆ ಸ್ಫೋಟಕ ಸಂಗತಿ ಹೊರಬಿದ್ದಿದೆ. ಮೂರು ಪಕ್ಷಗಳ ಪೈಕಿ ಒಬ್ಬ ಮಾಜಿ ಮುಖ್ಯಮಂತ್ರಿ, ಮತ್ತೋರ್ವ ಮಾಜಿ ಮುಖ್ಯಮಂತ್ರಿಯ ಮಗ ಹಾಗೂ ಕರಾವಳಿಯ ಪ್ರಭಾವಿ ನಾಯಕ ಅನುಶ್ರೀ ರಕ್ಷಣೆಗೆ ನಿಂತಿದ್ದಾರೆ ಎಂಬ ಅನುಮಾನ ವ್ಯಕ್ತವಾಗಿದೆ.
ಡ್ರಗ್ಸ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಳೆದ ವಾರ ಮಂಗಳೂರು ಸಿಸಿಬಿ ಪೊಲೀಸರ ವಿಚಾರಣೆಗೆ ಅನುಶ್ರೀ ಹಾಜರಾಗಿದ್ದರು. ಆದರೆ, ಅನುಶ್ರೀ ವಿಚಾರಣೆಯನ್ನಷ್ಟೇ ನಡೆಸಿದ್ದ ಮಂಗಳೂರು ಸಿಸಿಬಿ ಪೊಲೀಸರು ಡೋಪಿಂಗ್ ಟೆಸ್ಟ್ ಯಾಕೆ ಮಾಡಿಸಿಲ್ಲ ಎಂಬ ಪ್ರಶ್ನೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿತ್ತು. ಪ್ರಭಾವಿಗಳ ಒತ್ತಡದಿಂದಲೇ ಡೋಪಿಂಗ್ ಟೆಸ್ಟ್ ಮಾಡಿಲ್ಲವೇ ಎಂಬ ಊಹಾಪೋಹಗಳು ಹರಿದಾಡುತ್ತಿವೆ.
ಕಾರಣ ಡ್ರಗ್ಸ್ ಪೆಡ್ಲರ್ ಹಾಗೂ ಅನುಶ್ರೀ ಡ್ಯಾನ್ಸ್ ಮಾಸ್ಟರ್ ಕಿಶೋರ್ ಶೆಟ್ಟಿ ಸೇರಿದಂತೆ ಬಂಧಿತ ಎಲ್ಲಾ ಆರೋಪಿಗಳ ಡೋಪಿಂಗ್ ಟೆಸ್ಟ್ ಮಾಡಿಸಿರುವ ಮಂಗಳೂರು ಸಿಸಿಬಿ ಪೊಲೀಸರು, ಅನುಶ್ರೀಯನ್ನೇಕೆ ಡೋಪಿಂಗ್ ಟೆಸ್ಟ್ಗೆ ಒಳಪಡಿಸಲಿಲ್ಲ ಎಂಬ ಅನುಮಾನ ವ್ಯಕ್ತವಾಗಿತ್ತು.
ಅನುಶ್ರೀ ಫೋನ್ಗೆ ಪ್ರಭಾವಿಗಳು ನಿರಂತರ ಕಾಲ್ ಮಾಡಿರುವ ಸಂಗತಿ ಮಂಗಳೂರು ಸಿಸಿಬಿ ಪೊಲೀಸರ ವಿಚಾರಣೆ ವೇಳೆ ಗೊತ್ತಾಗಿದೆ. ಅದರಲ್ಲೂ ಎರಡು ಬಾರಿ ಮುಖ್ಯಮಂತಿಯಾಗಿದ್ದ ಮಾಜಿ ಮುಖ್ಯಮಂತ್ರಿ, ಕರಾವಳಿ ಮೂಲದ ಮತ್ತೊಬ್ಬ ಮಾಜಿ ಮುಖ್ಯಮಂತ್ರಿಯ ಮಗ ಹಾಗೂ ಕರಾವಳಿಯ ಪ್ರಭಾವಿ ನಾಯಕನಿಂದ ಅನುಶ್ರೀಗೆ ಕರೆ ಮಾಡಿರುವುದು ಪೊಲೀಸರಿಗೇ ಶಾಕ್ ಆಗುವಂತೆ ಮಾಡಿದೆ.
ಅನುಶ್ರೀ ಫೋನ್ನ ಕಾಲ್ ಲಿಸ್ಟ್ನಲ್ಲಿ ಈ ಮೂವರ ಫೋನ್ ನಂಬರ್ ದಾಖಲಾಗಿದೆ. ಹೀಗಾಗಿ ಅನುಶ್ರೀ ರಕ್ಷಣೆಗೆ ಪ್ರಭಾವಿಗಳು ನಿಂತಿದ್ದಾರೆಯೇ ಎಂಬ ಅನುಮಾನ ದಟ್ಟವಾಗತೊಡಗಿದೆ.
ಈ ಹಿನ್ನೆಲೆಯಲ್ಲಿ ಅನುಶ್ರೀ ಫೋನ್ ಪರಿಶೀಲನೆ ನಡೆಸಿದ ಸಿಸಿಬಿ ಪೊಲೀಸರು, ಆಕೆ ಬಳಿ ಇದ್ದ ಹಲವು ಸಿಮ್ ಕಾರ್ಡ್ಗಳನ್ನು ವಶಕ್ಕೆ ಪಡೆದು ಕಳಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಹೀಗಾಗಿ ಆಂಕರ್ ಅನುಶ್ರೀಗೆ ಡ್ರಗ್ಸ್ ಪ್ರಕರಣ ಉರುಳಾಗುತ್ತಾ ಎಂಬ ಶಂಕೆ ವ್ಯಕ್ತವಾಗಿದೆ.
ನಿನ್ನೆಯಷ್ಟೇ ಕಿಶೋರ್ ಶೆಟ್ಟಿ ರಕ್ಷಣೆಗೆ ಕರಾವಳಿಯ ಪ್ರಭಾವಿ ಶಾಸಕರೊಬ್ಬರು ಸಿಸಿಬಿ ಪೊಲೀಸರ ಮೇಲೆ ಒತ್ತಡ ಹೇರುತ್ತಿರುವ ಸಂಗತಿ ಬೆಳಕಿಗೆ ಬಂದಿತ್ತು. ಇದರ ಬೆನ್ನಲ್ಲೇ, ಅನುಶ್ರೀ ರಕ್ಷಣೆಗೂ ಪ್ರಭಾವಿಗಳು ನಿಂತಿರುವುದು ಪ್ರಕರಣಕ್ಕೆ ಸ್ಫೋಟಕ ತಿರುವು ಸಿಕ್ಕಿದೆ.
`ಶುಗರ್ ಡ್ಯಾಡಿ’ಯಿಂದ ಅನುಶ್ರೀ ರಕ್ಷಣೆ: ಪ್ರಶಾಂತ್ ಸಂಬರಗಿ
ಡ್ರಗ್ಸ್ ಪ್ರಕರಣದಲ್ಲಿ ರಿಯಾಲಿಟಿ ಶೋಗಳ ಖ್ಯಾತ ನಿರೂಪಕಿ ಅನುಶ್ರೀಯ ಬಂಧನವಾಗದಂತೆ `ಶುಗರ್ ಡ್ಯಾಡಿ’ಯಿಂದ ನೋಡಿಕೊಂಡಿದ್ದಾರೆ.
ಅನುಶ್ರೀಗೆ ಏನ್ ಆಗಬೇಕೋ ಅದು ಆಗುತ್ತೆ. ಅನುಶ್ರೀಗೆ ಈಗ ಒಳ್ಳೆಯ ಟೈಮ್ ಇದೆ ಅಷ್ಟೇ. ಆದರೆ, ಇದು ಬಹಳ ದಿನ ಉಳಿಯುವುದಿಲ್ಲ. ಒಂದಲ್ಲಾ ಒಂದು ದಿನ ಸತ್ಯಾಂಶ ಹೊರ ಬರಲಿದೆ ಎಂದು ಸಾಮಾಜಿಕ ಕಾರ್ಯಕರ್ತ ಪ್ರಶಾಂತ್ ಸಂಬರಗಿ ಟ್ವಿಟರ್ನಲ್ಲಿ ಮತ್ತೊಂದು ಬಾಂಬ್ ಸಿಡಿಸಿದ್ದಾರೆ.
ಹಾಗಾದರೆ ಈ `ಶುಗರ್ ಡ್ಯಾಡಿ’ ಯಾರು ಎಂಬ ಚರ್ಚೆ ಶುರುವಾಗಿದೆ. ಈ ಶುಗರ್ ಡ್ಯಾಡಿಗೂ, ಅನುಶ್ರೀಗೂ ಸಂಬಂಧ ಏನು, ರಿಂಗ್ ಮಾಸ್ಟರ್ ಚಿತ್ರದಂತೆ ಅನುಶ್ರೀಗೂ ಕಂಟಕವಾಗುವ ಸಾಧ್ಯತೆ ಇದೆ ಎಂದು ಮತ್ತೊಂದು ಟ್ವೀಟ್ನಲ್ಲಿ ಸಂಬರಗಿ ಬರೆದುಕೊಂಡಿದ್ದಾರೆ.
ಅನುಶ್ರೀ ಆರೋಗ್ಯದಲ್ಲಿ ಕೊಂಚ ಏರುಪೇರು
ಆಂಕರ್ ಅನುಶ್ರೀ ಆರೋಗ್ಯದಲ್ಲಿ ಕೊಂಚ ಏರುಪೇರಾಗಿದೆ ಎನ್ನಲಾಗಿದೆ. ಬೆಳಿಗ್ಗೆಯಷ್ಟೇ ಕಣ್ಣೀರಿಟ್ಟ ವಿಡಿಯೋವನ್ನು ಫೇಸ್ಬುಕ್ನಲ್ಲಿ ಅನುಶ್ರೀ ಹಂಚಿಕೊಂಡಿದ್ದರು. ಆದರೆ, ಅನುಶ್ರೀಗೆ ಆಯಾಸ ಹೆಚ್ಚಾಗಿರುವುದರಿಂದ ವಿಶ್ರಾಂತಿ ಪಡೆಯುವಂತೆ ವೈದ್ಯರು ಸೂಚಿಸಿದ್ದಾರೆ ಎನ್ನಲಾಗಿದೆ.
