ಬೆಂಗಳೂರು: ಕರ್ನಾಟಕದ ರಾಜಕೀಯ ಅಖಾಡದಲ್ಲಿ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಹಾಗೂ ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ಅವರ ನಡುವಿನ ಮಾತಿನ ಸಮರ ದಿನದಿಂದ ದಿನಕ್ಕೆ ಮತ್ತಷ್ಟು ಕಾವೇರುತ್ತಿದೆ. ಕುಮಾರಸ್ವಾಮಿ ಅವರ ಹೇಳಿಕೆಗಳನ್ನು ಗುರಿಯಾಗಿಸಿಕೊಂಡು ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ಅವರು ಇಂದು ಅತ್ಯಂತ ತೀವ್ರ ಹಾಗೂ ವ್ಯಂಗ್ಯಾತ್ಮಕವಾಗಿ ತಿರುಗೇಟು ನೀಡಿದ್ದಾರೆ. ಇವರು ಮಣ್ಣಿನ ಮಕ್ಕಳು ಅಂತಾ ಹೇಳಿಕೊಂಡು ನೇಗಿಲಿಂದ ಭೂಮಿ ಉಳುಮೆ ಮಾಡಿದವರಲ್ಲ, ಬದಲಾಗಿ ಇವರು ಬರೀ ಜಾಗ ಹೊಡೆದವರು ಎಂದು ಕುಮಾರಸ್ವಾಮಿ ಅವರನ್ನು ಕುಟುಕುವ ಮೂಲಕ ರಾಜ್ಯ ರಾಜಕಾರಣದಲ್ಲಿ ಹೊಸ ಚರ್ಚೆಯ ಕಿಡಿ ಹೊತ್ತಿಸಿದ್ದಾರೆ.
ನೀನು, ನಿಮ್ಮಪ್ಪ ಅಂತ ಮಾತಾಡಿದ್ದು ಯಾರು? ನಮಗೂ ಸ್ವಾಭಿಮಾನವಿದೆ!
Related posts
ದಲಿತ ಪದ ಬಳಕೆಯ ವಿವಾದದ ಕುರಿತು ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ ಪ್ರಿಯಾಂಕ್ ಖರ್ಗೆ, ನಾನು ದಲಿತರ ಬಗ್ಗೆ ಎಲ್ಲಿಯೂ ಏನೂ ಹೇಳಿಲ್ಲ, ಆ ಮಾತನ್ನು ಅವರೇ ಹೇಳಿದ್ದು. ಅವರು ಆಡಿದ ಮಾತಿಗೂ ನಾನೇ ಉತ್ತರ ಕೊಡಬೇಕು ಎಂದರೆ ಅದು ಹೇಗೆ ಸಾಧ್ಯ ಎಂದು ಪ್ರಶ್ನಿಸಿದರು. ಕುಮಾರಸ್ವಾಮಿ ಅವರು ತಾವು ಹೊಂದಿರುವ ಉನ್ನತ ಸ್ಥಾನಮಾನಕ್ಕೆ ತಕ್ಕಂತೆ ಗೌರವ ನೀಡುತ್ತಿಲ್ಲ ಎಂದು ಆರೋಪಿಸಿದ ಅವರು, ಅವರ ನಾಲಿಗೆಗೆ ಲಗಾಮೇ ಇಲ್ಲ ಎಂದು ಕಿಡಿಕಾರಿದರು. ನಾನು ಅವರಿಗೆ ಎಂದಾದರೂ ಅವಾಚ್ಯವಾಗಿ ಮಾತನಾಡಿದ್ದೇನೆಯೇ? ನೀನು, ನಿಮ್ಮಪ್ಪ ಎಂದು ಏಕವಚನದಲ್ಲಿ ಮಾತನಾಡಿದ್ದು ಅವರು ತಾನೇ ಹೊರತು ನಾನಲ್ಲ. ಅವರು ತಮ್ಮದೇ ದಾಟಿಯಲ್ಲಿ ಮಾತನಾಡಿದ್ದನ್ನು ನಾನು ಮೌನವಾಗಿ ಒಪ್ಪಿಕೊಳ್ಳಬೇಕೇ ಎಂದು ಪ್ರಶ್ನಿಸಿದ ಸಚಿವರು, ನನಗೂ ಸ್ವಾಭಿಮಾನವಿದೆ, ಪ್ರತಿಯೊಬ್ಬರಿಗೂ ಅವರದ್ದೇ ಆದ ಸ್ವಾಭಿಮಾನ ಇರುತ್ತದೆ ಎಂಬುದನ್ನು ಅವರು ಮೊದಲು ತಿಳಿದುಕೊಳ್ಳಬೇಕು ಎಂದು ಎಚ್ಚರಿಸಿದರು. ಒಂದು ಕಡೆ ಎಲ್ಲರನ್ನೂ ಸೇರಿಸಿ ಚರ್ಚೆ ಮಾಡೋಣ ಎನ್ನುತ್ತಾ, ಮತ್ತೊಂದು ಕಡೆ ನಮ್ಮನ್ನು ಟೀಕಿಸುವುದು ಸರಿಯಲ್ಲ ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದರು.
ಅಧಿಕಾರದಲ್ಲಿದ್ದಾಗ ಕತ್ತೆ ಕಾಯುತ್ತಿದ್ದರಾ? ದಾಖಲೆ ಸಮೇತ ಚರ್ಚೆಗೆ ಆಹ್ವಾನ!
ತಮ್ಮ ಕುಟುಂಬದ ವಿರುದ್ಧದ ಆಸ್ತಿ ಆರೋಪಗಳಿಗೆ ತಿರುಗೇಟು ನೀಡಿದ ಪ್ರಿಯಾಂಕ್ ಖರ್ಗೆ, ಕುಮಾರಸ್ವಾಮಿ ಅವರು ಈ ಹಿಂದೆ ಅಧಿಕಾರದಲ್ಲಿದ್ದಾಗ ಏನು ಮಾಡುತ್ತಿದ್ದರು? ಆಗೇನು ಕತ್ತೆ ಕಾಯುತ್ತಿದ್ದರಾ ಎಂದು ಅತ್ಯಂತ ಖಾರವಾಗಿ ವ್ಯಂಗ್ಯವಾಡಿದರು. ನಾವು ಜನರಿಗಾಗಿ ಬುದ್ಧ ಮಂದಿರ ಕಟ್ಟಿದ್ದೇವೆ, ಖರ್ಗೆ ಸಾಹೇಬರು ಅದನ್ನು ಕಟ್ಟಿಸಿದ್ದು ಎಂದು ತಮ್ಮ ಕುಟುಂಬದ ಸಾಮಾಜಿಕ ಕೆಲಸಗಳನ್ನು ನೆನಪಿಸಿದರು. ಇದೇ ವೇಳೆ ಬಿಜೆಪಿ ಮತ್ತು ಜೆಡಿಎಸ್ ನಾಯಕರಿಗೆ ಬಹಿರಂಗ ಸವಾಲು ಹಾಕಿದ ಅವರು, ಬಿಜೆಪಿ ಮತ್ತು ಜೆಡಿಎಸ್ ನಾಯಕರು ಒಟ್ಟಾಗಿ ಬರಲಿ, ನನ್ನ ದಾಖಲೆಗಳನ್ನು ನಾನು ಕೊಡುತ್ತೇನೆ. ದಾಖಲೆಗಳ ಸಮೇತ ಬಹಿರಂಗ ಚರ್ಚೆ ಮಾಡುವುದಕ್ಕೆ ನಾನು ಸಿದ್ಧವಾಗಿದ್ದೇನೆ ಎಂದು ಘೋಷಿಸಿದರು.
ಸಿದ್ದರಾಮಯ್ಯ, ಡಿಕೆಶಿ ಎದುರಿಸಲಾಗದೆ ಐಟಿ-ಇಡಿ ಅಸ್ತ್ರ ಪ್ರಯೋಗಕ್ಕೆ ಸಿದ್ಧತೆ!
ಕೇಂದ್ರ ಸರ್ಕಾರದ ತನಿಖಾ ಸಂಸ್ಥೆಗಳ ರಾಜಕೀಯ ದುರ್ಬಳಕೆಯ ಕುರಿತು ಗಂಭೀರ ಆರೋಪ ಮಾಡಿದ ಗೃಹ ಸಚಿವರು, ಈ ಹಿಂದೆ ಯಂಗ್ ಇಂಡಿಯಾ ಪ್ರಕರಣದಲ್ಲಿ ನಮ್ಮ ನಾಯಕರನ್ನು ಸಿಲುಕಿಸಲಾಯಿತು, ಇದೀಗ ಮತ್ತೆ ದಾಳಿಗೆ ಐಟಿ ಮತ್ತು ಇಡಿ ಸಂಸ್ಥೆಗಳು ಸಜ್ಜಾಗುತ್ತಿವೆ ಎಂದು ಸ್ಫೋಟಕ ಮಾಹಿತಿ ನೀಡಿದರು. ರಾಜಕೀಯವಾಗಿ ಸಿದ್ದರಾಮಯ್ಯ ಮತ್ತು ಡಿ.ಕೆ. ಶಿವಕುಮಾರ್ ಅವರಿಗೆ ನೇರ ಎದುರಾಳಿಯಾಗಿ ನಿಲ್ಲಲು ಸಾಧ್ಯವಾಗುತ್ತಿಲ್ಲ ಎಂದು ಭಾವಿಸಿರುವ ವಿಪಕ್ಷಗಳು, ವಾಮಮಾರ್ಗದ ಮೂಲಕ ಐಟಿ-ಇಡಿ ದಾಳಿ ಮಾಡಿಸಲು ಮುಂದಾಗಿವೆ. ಈಗಾಗಲೇ ಈ ಆಟ ಶುರುವಾಗುತ್ತದೆ ನೋಡಿ ಎಂದು ಅವರು ಮುನ್ಸೂಚನೆ ನೀಡಿದರು. ಪ್ರಕರಣಗಳಲ್ಲಿ ಪ್ರಿಯಾಂಕ್ ಖರ್ಗೆ ಮತ್ತು ಡಿ.ಕೆ. ಶಿವಕುಮಾರ್ ಅವರ ಹೆಸರು ಹೇಳುವಂತೆ ಒತ್ತಡ ಹೇರಿ ಅಪಪ್ರಚಾರ ಮಾಡುತ್ತಿದ್ದಾರೆ ಎಂದು ದೂರಿದ ಅವರು, ನಾವೂ ರಾಜಕೀಯದಲ್ಲಿಯೇ ಇದ್ದೇವೆ, ಇವರ ಈ ತಂತ್ರಗಳೆಲ್ಲ ನಮಗೆ ಗೊತ್ತಾಗುತ್ತಿಲ್ಲವೇ ಎಂದು ಪ್ರಶ್ನಿಸುವ ಮೂಲಕ ವಿರೋಧಿಗಳಿಗೆ ಖಡಕ್ ತಿರುಗೇಟು ನೀಡಿದರು.
