ಭಾರತದ ಕ್ರಿಕೆಟ್ ಸೌರವ್ಯೂಹದಲ್ಲಿ ಸೂರ್ಯಕುಮಾರನೇ ಪ್ರಕಾಶಮಾನ….
ದೇಶ ಬದಲಾಯಿತು, ತಂಡ ಬದಲಾಯಿತು, ಟೂರ್ನಿ ಬದಲಾಯಿತು ಆದರೆ ಒಂದು ವಿಷಯ ಮಾತ್ರ ಬದಲಾಗಲಿಲ್ಲ ಅದು ಸೂರ್ಯ ಕುಮಾರ್ ಯಾದವ್ ಅವರ ಬ್ಯಾಟಿಂಗ್ ಅಬ್ಬರ.. ಚೆಂಡು ಇರುವುದೇ ಭಾರಿಸುವುದಕ್ಕೆ ಎಂಬ ಆತನ ಆಟಿಟ್ಯೂಡ್ ಗೆ ಇಂದು ನ್ಯೂಜಿಲೆಂಡ್ ಬೌಲರ್ ಗಳು ಪತರಗುಟ್ಟಿದ್ದು ನಿಜ.
ವೇ ಓವಲ್ ಮೈದಾನದಲ್ಲಿ ನ್ಯೂಜಿಲೆಂಡ್ ವಿರುದ್ಧ ನಡೆದ ಎರಡನೇ ಟಿ 20 ಪಂದ್ಯದಲ್ಲಿ ಸೂರ್ಯ ಕುಮಾರ್ ಯಾದವ್ ಕೇವಲ 51 ಎಸೆತಗಳಲ್ಲಿ 111 ರನ್ ಗಳಿಸಿ ದಾಖಲೆಯ ಆಟವಾಡಿದ್ದಾರೆ. 217.64 ಸರಾಸರಿ ಸ್ಟ್ರೈಕ್ ರೇಟ್ ನಲ್ಲಿ 11 ಬೌಂಡರಿ ಮತ್ತು 4 ಸಿಕ್ಸರ್ ಗಳನ್ನ ಚಚ್ಚಿದ್ದಾರೆ.
ಇಂದಿನ ಪಂದ್ಯದಲ್ಲಿ ಅತಿ ಹೆಚ್ಚು ರನ್ ಗಳಿಸಿದ್ದ ಭಾರತೀಯ ಬ್ಯಾಟ್ಸಮನ್ ಸೂರ್ಯ ಮಾತ್ರ. ಆತನನ್ನ ಬಿಟ್ಟರೆ ಇಶಾನ್ ಕಿಶನ್ 36 ರನ್ ಗಳಿಸಿದರು.
ಭಾರತದ ಕ್ರಿಕೆಟ್ ಸೌರಮಂಡಲದಲ್ಲಿ ಸೂರ್ಯನೇನೋ ಪ್ರಕಾಶಮಾನವಾಗಿ ಬೆಳಗುತ್ತಿದ್ದಾನೆ, ಆದರೇ ಇತರ ಆಟಗಾರರ ಪರಿಸ್ಥಿತಿ ಯಥಾಸ್ಥಿತಿ ಕ್ಷುದ್ರಗಹಗಳಂತೆ ಮುಂದುವರೆದಿದೆ.
ಬನಾರಸ್ ಮೂಲದ ಮುಂಬೈಕರ್ ಸೂರ್ಯ ಕುಮಾರ್ ಯಾದವ್ ತನ್ನ ಸ್ಪೋಟಕ ಬ್ಯಾಟಿಂಗ್ ನಿಂದ ಈಗಾಗಲೇ ಅಂತರಾಷ್ಟ್ರೀಯ ಟಿ 20 ನಲ್ಲಿ ನಂಬರ್ 1 ರ್ಯಾಂಕಿಂಗ್ ಪಡೆದುಕೊಂಡು T 20 ಗೆ ನಾನೇ ನಯಾ ಸಾಮ್ರಾಟ್ ಎನ್ನುವುದನ್ನ ಸಾಬೀತು ಪಡಿಸಿದ್ದಾರೆ. ಮೊಹಮ್ಮದ್ ರಿಜ್ವಾನ್ ಮತ್ತು ಪಾಕಿಸ್ತಾನದ ಬಾಬರ್ ಅಜಮ್ ಅವರ ಆಳ್ವಿಕೆಗೆ ಫುಲ್ ಸ್ಟಾಪ್ ಇಟ್ಟಿದ್ದಾರೆ.
ಸೂರ್ಯ ಈ ವರ್ಷ ಜುಲೈನಿಂದ 25 ಪಂದ್ಯಗಳನ್ನ ಆಡಿದ್ದು, 96 ಬೌಂಡರಿ ಮತ್ತು 58 ಸಿಕ್ಸರ್ಗಳನ್ನು ಬಾರಿಸಿದ್ದಾರೆ. ದಾಖಲೆ ಹತ್ತಿರ ಯಾವುದೇ ಭಾರತೀಯ ಬ್ಯಾಟ್ಸ್ಮನ್ ಕೂಡ ಹತ್ತಿರ ಬರಲು ಸಾಧ್ಯವಾಗಿಲ್ಲ. ಮೈದಾನ ಮೂಲೆ ಮೂಲೆಗೂ ಚೆಂಡು ಭಾರಿಸುವ ಭಾರತದ 360 ಡಿಗ್ರಿ ಪ್ಲೇಯರ್ ಮತ್ತಷ್ಟು ಪ್ರಕಾಶಮಾನವಾಗಿ ಮಿಂಚಬೇಕೆನ್ನುವುದಷ್ಟೇ ನಮ್ಮ ಆಸೆ….
Surya kumar Yadav: Scored More Than 1000 Runs In 5 Months
