ಬೌಲರ್‌ಗಳ ಆಕ್ರಮಣಕಾರಿ ದಾಳಿ ಹಾಗೂ ಹಿಟ್‌ ಮ್ಯಾನ್‌ ರೋಹಿತ್‌ ಶರ್ಮಾ ಅವರ ಅಬ್ಬರದ ಬ್ಯಾಟಿಂಗ್‌ ನೆರವಿನಿಂದ ಏಕದಿನ ವಿಶ್ವಕಪ್‌ನ ಪಾಕಿಸ್ತಾನ ವಿರುದ್ಧದ ಹೈವೋಲ್ಟೇಜ್‌ ಪಂದ್ಯದಲ್ಲಿ ಟೀಂ ಇಂಡಿಯಾ 7 ವಿಕೆಟ್‌ಗಳ ಭರ್ಜರಿ ಗೆಲುವು ಸಾಧಿಸಿದೆ.
ಅಹ್ಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ಮಾಡುವ ಅವಕಾಶ ಪಡೆದ ಪಾಕಿಸ್ತಾನ ಬ್ಯಾಟಿಂಗ್‌ ವೈಫಲ್ಯಕ್ಕೆ ಸಿಲುಕಿತು. ಪರಿಣಾಮ 42.5 ಓವರ್‌ಗಳಲ್ಲಿ 191 ರನ್‌ಗಳಿಗೆ ಸರ್ವಪತನ ಕಂಡಿತು. ಈ ಟಾರ್ಗೆಟ್‌ ಚೇಸ್‌ ಮಾಡಿದ ಭಾರತ 30.3 ಓವರ್‌ಗಳಲ್ಲಿ ಕೇವಲ 3 ವಿಕೆಟ್‌ಗೆ 192 ರನ್‌ಗಳಿಸಿ ಗೆಲುವಿನ ನಗೆಬೀರಿತು. ಈ ಗೆಲುವಿನೊಂದಿಗೆ ಏಕದಿನ ವಿಶ್ವಕಪ್‌ನಲ್ಲಿ ಟೀಂ ಇಂಡಿಯಾ ತನ್ನ ಮೂರನೇ ಗೆಲುವು ದಾಖಲಿಸಿತು.
ಬಾಬರ್‌-ರಿಜ್ವಾನ್‌ ಆಸರೆ:
ಟಾಸ್‌ ಗೆದ್ದು ಫೀಲ್ಡಿಂಗ್‌ ಆಯ್ಕೆ ಮಾಡಿಕೊಂಡ ಭಾರತಕ್ಕೆ ಬೌಲರ್‌ಗಳು ಆಸರೆಯಾದರು. ಮೊದಲು ಬ್ಯಾಟಿಂಗ್‌ ಆರಂಭಿಸಿದ ಪಾಕಿಸ್ತಾನ ತಂಡಕ್ಕೆ ಆರಂಭಿಕರಾದ ಶಫೀಕ್‌(20) ಹಾಗೂ ಇಮಾಮ್‌(36) ಮೊದಲ ವಿಕೆಟ್‌ಗೆ 41 ರನ್‌ಗಳ ಸಾಧಾರಣ ಆರಂಭ ನೀಡಿದರು. ಬಳಿಕ 3ನೇ ವಿಕೆಟ್‌ಗೆ ನಾಯಕ ಬಾಬರ್‌ ಆಜ಼ಂ(50) ಹಾಗೂ ವಿಕೆಟ್‌-ಕೀಪರ್‌ ಮೊಹಮ್ಮದ್‌ ರಿಜ್ವಾನ್‌(49) 82 ರನ್‌ಗಳ ಜೊತೆಯಾಟದಿಂದ ತಂಡಕ್ಕೆ ಆಸರೆಯಾದರು.
ಭಾರತದ ಮಿಂಚಿನ ದಾಳಿ:
ಒಂದು ಹಂತದಲ್ಲಿ ಕೇವಲ 2 ವಿಕೆಟ್‌ಗೆ 155 ರನ್‌ಗಳಿಸಿದ್ದ ಪಾಕಿಸ್ತಾನ ಬೃಹತ್‌ ಮೊತ್ತ ಕಲೆಹಾಕುವ ನಿರೀಕ್ಷೆ ಹೊಂದಿತ್ತು. ಆದರೆ ಇನ್ನಿಂಗ್ಸ್‌ನ 30ನೇ ಓವರ್‌ನಲ್ಲಿ ಬಾಬರ್‌ ಆಜ಼ಂ(50) ಅವರಿಗೆ ಪೆವಿಲಿಯನ್‌ ದಾರಿ ತೋರಿಸಿದ ಮೊಹಮ್ಮದ್‌ ಸಿರಾಜ್‌, ಪಾಕಿಸ್ತಾನದ ಬ್ಯಾಟಿಂಗ್‌ ವೈಫಲ್ಯಕ್ಕೆ ಮುನ್ನುಡಿ ಬರೆದರು. ಪರಿಣಾಮ ಬಾಬರ್‌ ಆಜ಼ಂ ನಂತರ ಕಣಕ್ಕಿಳಿದ ಯಾವುದೇ ಬ್ಯಾಟರ್‌ಗಳು ಜವಾಬ್ದಾರಿಯ ಆಟವಾಡಲಿಲ್ಲ. ಹೀಗಾಗಿ 42.5 ಓವರ್‌ಗಳಲ್ಲಿ 191 ರನ್‌ಗಳಿಗೆ ಪಾಕಿಸ್ತಾನ ಆಲೌಟ್‌ ಆಯಿತು. ಭಾರತದ ಪರ ಬುಮ್ರಾ, ಸಿರಾಜ್‌, ಹಾರ್ದಿಕ್‌, ಜಡೇಜಾ ಹಾಗೂ ಕುಲ್ದೀಪ್‌ ತಲಾ 2 ವಿಕೆಟ್‌ಗಳನ್ನ ಪಡೆದು ಪಾಕಿಸ್ತಾನದ ಬ್ಯಾಟಿಂಗ್‌ ಬೆನ್ನೆಲುಬು ಮುರಿದರು.
ರೋಹಿತ್‌ ಅಬ್ಬರದ ಆಟ:
ಪಾಕಿಸ್ತಾನ ನೀಡಿದ 192 ರನ್‌ಗಳ ಸಾಧಾರಣ ಟಾರ್ಗೆಟ್‌ ಬೆನ್ನತ್ತಿದ ಭಾರತಕ್ಕೆ ನಿರೀಕ್ಷಿತ ಆರಂಭ ಸಿಗಲಿಲ್ಲ. ಆರಂಭಿಕನಾಗಿ ಕಣಕ್ಕಿಳಿದ ಶುಭ್ಮನ್‌ ಗಿಲ್‌(16) ಬಹುಬೇಗನೆ ಔಟಾಗಿ ನಿರಾಸೆ ಮೂಡಿಸಿದರು. ಬಳಿಕ ವಿರಾಟ್‌ ಕೊಹ್ಲಿ(16) ಸಹ ದೊಡ್ಡ ಇನ್ನಿಂಗ್ಸ್‌ ಆಡುವಲ್ಲಿ ಎಡವಿದರು. ಆದರೆ ಇನ್ನಿಂಗ್ಸ್‌ನ ಆರಂಭದಿಂದಲೇ ಬಿರುಸಿನ ಆಟವಾಡಿದ ನಾಯಕ ರೋಹಿತ್‌ ಶರ್ಮಾ(86 ರನ್‌, 63 ಬಾಲ್‌, 6 ಬೌಂಡರಿ, 6 ಸಿಕ್ಸ್‌) ಬಿರುಸಿನ ಆಟದಿಂದ ಪಾಕ್‌ ಬೌಲರ್‌ಗಳನ್ನ ಧೂಳಿಪಟ ಮಾಡಿದರು. ವೈಯಕ್ತಿಕ 86 ರನ್‌ಗಳಿಸಿ ಶತಕದತ್ತ ಮುಖ ಮಾಡಿದ್ದ ಹಿಟ್‌ಮ್ಯಾನ್‌ ಶಹೀನ್‌ ಅಫ್ರಿದಿ ಬೌಲಿಂಗ್‌ನಲ್ಲಿ ಔಟಾಗಿ ನಿರಾಸೆ ಅನುಭವಿಸಿದರು. ಆದರೆ ಜವಾಬ್ದಾರಿಯ ಆಟವಾಡಿದ ಶ್ರೇಯಸ್‌ ಅಯ್ಯರ್‌(53*) ಹಾಗೂ ಕೆಎಲ್‌ ರಾಹುಲ್‌(19*) ತಂಡವನ್ನ ಗೆಲುವಿನ ದಡಮುಟ್ಟಿಸಿದರು. ಪಾಕ್‌ ಪರ ಶಹೀನ್‌ ಅಫ್ರಿದಿ 2 ಹಾಗೂ ಹಸನ್‌ ಅಲಿ 1 ವಿಕೆಟ್‌ ಪಡೆದರು.
ನಂ.1 ಸ್ಥಾನಕ್ಕೇರಿದ ಭಾರತ:
ಪಾಕಿಸ್ತಾನ ವಿರುದ್ಧದ 7 ವಿಕೆಟ್‌ಗಳ ಗೆಲುವಿನೊಂದಿಗೆ ಭಾರತ ತಂಡ ಏಕದಿನ ವಿಶ್ವಕಪ್ ಅಂಕಪಟ್ಟಿಯಲ್ಲಿ ನಂ.1 ಸ್ಥಾನಕ್ಕೇರಿದೆ. ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಗೆದ್ದಿದ್ದ ರೋಹಿತ್‌ ಪಡೆ, ನಂತರ ಅಫ್ಘಾನಿಸ್ತಾನದ ವಿರುದ್ಧ ಜಯಭೇರಿ ಬಾರಿಸಿತ್ತು. ಇದೀಗ 3ನೇ ಪಂದ್ಯದಲ್ಲಿ ಪಾಕಿಸ್ತಾನದ ವಿರುದ್ಧ ಗೆದ್ದುಬೀಗಿದ ಭಾರತ, ಹ್ಯಾಟ್ರಿಕ್‌ ಗೆಲುವಿನ ಮೂಲಕ +1.821 ರನ್‌ರೇಟ್‌ನಿಂದ ಮೊದಲ ಸ್ಥಾನಕ್ಕೇರಿದೆ.
IND v PAK, Team India, Pakistan, ODI Cricket, World Cup
