ಆವೆ ಮಣ್ಣಿನ ಅಂಗಣದಲ್ಲಿ ಸುರಿಯಿತ್ತು ಕಣ್ಣೀರಧಾರೆ.. ಪ್ಯಾರಿಸ್ನಲ್ಲಿ ಸ್ಪೇನ್ ಗೂಳಿಯ ಪ್ರೀತಿ-ಪ್ರೇಮ-ಪ್ರಣಯ..!
ರಫೆಲ್ ನಡಾಲ್..
ಅದೇನೋ ಗೊತ್ತಿಲ್ಲ.. ಈ ಸ್ಪೇನ್ ಗೂಳಿಗೆ ಪ್ಯಾರಿಸ್ನ ರೋಲ್ಯಾಂಡ್ ಗ್ಯಾರೋಸ್ನ ಆವೆ ಮಣ್ಣಿನ ಅಂಗಣದಲ್ಲಿ ಧೂಳು ಎಬ್ಬಿಸುವುದು ಅಂದ್ರೆ ಏನೋ ಒಂಥರಾ ಖುಷಿ. ಅಷ್ಟೇ ಅಲ್ಲ, ತಾನೂ ಭಾವುಕನಾಗಿ, ತನ್ನ ಅಭಿಮಾನಿಗಳನ್ನು ಭಾವುಕರನ್ನಾಗಿಸುವುದು ಸರಿ ಸುಮಾರು 20 ವರ್ಷಗಳಿಂದ ಮಮೂಲಿಯಾಗಿಬಿಟ್ಟಿದೆ.
ಕಳೆದ ಎರಡು ದಶಕಗಳಲ್ಲಿ 14 ಫ್ರೆಂಚ್ ಓಪನ್ ಗ್ರ್ಯಾಂಡ್ ಸ್ಲ್ಯಾಂ ಪ್ರಶಸ್ತಿ ಗೆದ್ದು, ಕಿಂಗ್ ಆಫ್ ಕ್ಲೇ ಕೋಟ್ರ್À ಎಂದು ಬಿರುದು ಪಡೆದುಕೊಂಡಿರುವುದು ಸಹ ಈಗ ಇತಿಹಾಸ. ಒಟ್ಟು 22 ಗ್ರ್ಯಾಂಡ್ ಸ್ಲ್ಯಾಂ ಪ್ರಶಸ್ತಿ ಗೆದ್ದಿರುವ ರಫೆಲ್ ನಡಾಲ್, ಕಳೆದ ವರ್ಷ ತನ್ನ ವರ್ಣರಂಜಿತ ಟೆನಿಸ್ ಬದುಕಿಗೆ ವಿದಾಯ ಹೇಳಿದ್ದರು. ರಫೆಲ್ ನಡಾಲ್ ವಿದಾಯ ಹೇಳಿದಾಗ ಅವರ ಅಭಿಮಾನಿಗಳು ಕಣ್ಣೀರು ಸುರಿಸಿ ಭಾವುಕರಾಗಿದ್ದರು. ಇದೀಗ ರಫಾ, ಅಭಿಮಾನಿಗಳನ್ನು ಮತ್ತೊಮ್ಮೆ ಭಾವುಕರನ್ನಾಗಿಸಿದ್ದಾರೆ. ಆದ್ರೆ ಈ ಬಾರಿ ತನ್ನ ಆಟದಿಂದ ಅಲ್ಲ. ತನ್ನ ಉಪಸ್ಥಿತಿಯಿಂದ ಎಂಬುದು ವಿಶೇಷ.
ಹೌದು, ಈ ವರ್ಷದ ಪ್ರತಿಷ್ಠಿತ ಫ್ರೆಂಚ್ ಓಪನ್ ಟೂರ್ನಿ ಆರಂಭವಾಗಿದೆ. ಪ್ರತಿ ವರ್ಷವೂ ಟೆನಿಸ್ ಅಭಿಮಾನಿಗಳು ಪ್ಯಾರಿಸ್ನ ರೋಲ್ಯಂಡ್ ಗ್ಯಾರೋಸ್ ಅಂಗಣದಲ್ಲಿ ರಫೆಲ್ ಆಟವನ್ನು ಕಣ್ತುಂಬಿಕೊಳ್ಳಲು ಟಿಕೆಟ್ ಬುಕ್ ಮಾಡುತ್ತಿದ್ದರು. ಆದ್ರೆ ಈ ವರ್ಷದಿಂದ ರಫಾ ಆಟವನ್ನು ಅಭಿಮಾನಿಗಳು ಮಿಸ್ ಮಾಡಿಕೊಳ್ಳುತ್ತಿದ್ದಾರೆ. ಯಾಕಂದ್ರೆ ರಾಫಾ ವೃತ್ತಿಪರ ಟೆನಿಸ್ ಆಡಲ್ಲ. ಕೈಯಲ್ಲಿ ಟೆನಿಸ್ ರ್ಯಾಕೆಟ್ ಹಿಡಿಯಲ್ಲ. ಹೀಗಾಗಿ ಅಭಿಮಾನಿಗಳಿಗೆ ನಿರಾಸೆಯಾಗಿದೆ. ಕಾರಣ ಆವೆ ಮಣ್ಣಿನ ಅಂಗಣದಲ್ಲಿ ರಫೆಲ್ ಆಟವನ್ನು ನೋಡುವುದು ಕಣ್ಣಿಗೆ ಹಬ್ಬವಾದ್ರೆ, ಮೈಮನಕ್ಕೆ ಪ್ರತಿ ಕ್ಷಣವೂ ರೋಮಾಂಚನವನ್ನುಂಟು ಮಾಡುತ್ತಿತ್ತು.
ಅಂದ ಹಾಗೇ, ಈ ವರ್ಷವೂ ರಫೆಲ್ ನಡಾಲ್ ತನ್ನ ಪ್ರೀತಿಯ ರೋಲ್ಯಾಂಡ್ ಗ್ಯಾರೋಸ್ ಅಂಗಣದಲ್ಲಿ ಕಾಣಿಸಿಕೊಂಡಿದ್ದರು. ಆದ್ರೆ ಟೆನಿಸ್ ಕಿಟ್ನೊಂದಿಗೆ ಅಲ್ಲ. ಬದಲಾಗಿ ಕಪ್ಪು ಸೂಟ್ -ಬೂಟ್ ಹಾಕೊಂಡು ಫಿಲಿಪ್ ಚಾಟ್ರಿಯಾರ್ ಕೋಟ್Àರ್À ಸೆಂಟರ್ನಲ್ಲಿ ಜಂಟಲ್ಮ್ಯಾನ್ನಂತೆ ಕಂಗೊಳಿಸುತ್ತಿದ್ದರು. ಸಹಜವಾಗಿ ಟೆನಿಸ್ ಕ್ರೀಡಾಂಗಣ ಅಂದ್ರೆ ಅಭಿಮಾನಿಗಳ ಭರಾಟೆ, ಕಿರುಚಾಟ, ಸದ್ದುಗದ್ದಲಗಳಿರುವುದಿಲ್ಲ. ಹೆಚ್ಚು ಅಂದ್ರೆ ಚಪ್ಪಾಳೆ ತಟ್ಟಿ ಪ್ರೋತ್ಸಾಹ ನೀಡ್ತಾರೆ ಅಷ್ಟೇ. ಆಗೊಮ್ಮೆ ಹೀಗೊಮ್ಮೆ ಅಲ್ಲಲ್ಲಿ ಕಿರುಚಾಟಗಳು ಕೇಳಿಬರುವುದುಂಟು. ಆಟಗಾರರ ನಡುವಿನ ಜಿದ್ದಾಜಿದ್ದಿನ ಸ್ಪರ್ಧೆಯನ್ನು ಸೈಲೆಂಟಾಗಿ ಪ್ರೇಕ್ಷಕರು ನೋಡುತ್ತಿರುತ್ತಾರೆ.
ಆದ್ರೆ ಈ ಬಾರಿ ಟೆನಿಸ್ ಕ್ರೀಡಾಂಗಣದ ಶಿಸ್ತು ಸಾಂಪ್ರದಾಯ ಸ್ವಲ್ಪ ಸಮಯ ಮುರಿಬೀಳುವಂತೆ ಮಾಡಿದ್ದು ರಫೆಲ್ ನಡಾಲ್ ಅವರ ಎಂಟ್ರಿ. ಭರ್ತಿಯಾಗಿದ್ದ ಕ್ರೀಡಾಂಗಣದಲ್ಲಿ ರಾಫಾ.. ರಾಫಾ..ಎಂಬ ಘೋಷಣೆಗಳು ಮುಗಿಲು ಮುಟ್ಟುವಂತಿದ್ದವು. ಮರ್ಸಿ ರಾಫಾ (ಧನ್ಯವಾದ ರಾಫಾ) ಎಂದು ಕೆಂಪು ಮತ್ತು ಬಿಳಿ ಬಣ್ಣದ ಟಿ-ಶಟ್ರ್Àಗಳನ್ನು ಹಾಕೊಂಡಿದ್ದ ಅಭಿಮಾನಿಗಳ ಅಭಿಮಾನಕ್ಕೆ ಬೆಲೆ ಕಟ್ಟಲು ಸಾಧ್ಯವಿರಲಿಲ್ಲ. ವಿಶ್ವ ಟೆನಿಸ್ನ ಎವರ್ಗ್ರೀನ್ ಆಟಗಾರನಿಗೆ ಫ್ರೆಂಚ್ ಓಪನ್ ಆಯೋಜಕರು ಕೂಡ ವಿಶೇಷವಾಗಿ ಸನ್ಮಾನ ಮಾಡಿದ್ದರು. ಫಿಲಿಪ್ ಚಾಟ್ರಿಯಾರ್ ಕೋಟ್Àರ್Àನಲ್ಲಿ ನಡಾಲ್ ಹೆಸರು, ನಡಾಲ್ ಅವರ ಹೆಜ್ಜೆ ಗುರುತುಗಳ ನಾಮ ಫಲಕವನ್ನು ಕೂಡ ಇದೇ ವೇಳೆ ಅನಾವರಣಗೊಳಿಸಲಾಯ್ತು. ಬಳಿಕ ಆವೆ ಮಣ್ಣಿನ ಸಾಧನೆಯ ಮೂರು ನಿಮಿಷಗಳ ಕಿರುಚಿತ್ರವನ್ನು ನೋಡಿದಾಗ ನಡಾಲ್ ಚಿಕ್ಕ ಮಗುವಿನಂತೆ ಅಳುತ್ತಿದ್ದರು.
ಮರ್ಸಿ ಬ್ಯೂಕಪ್ (ಧನ್ಯವಾದಗಳು) ಎಂದು ಮಾತು ಶುರು ಮಾಡಿದ ರಫೆಲ್, ತನ್ನ ಟೆನಿಸ್ ಬದುಕಿನ ಏಳುಬೀಳುಗಳು, ಸಾಧನೆ, ಪ್ರಶಸ್ತಿ, ಗಾಯ, ಸೋಲು, ಗೆಲುವು, ಹೋರಾಟ ಹೀಗೆ ಪ್ರತಿಯೊಂದು ವಿಷ್ಯಗಳನ್ನು ಅಭಿಮಾನಿಗಳ ಜೊತೆ ಹಂಚಿಕೊಂಡ್ರು. ಇದೇ ವೇಳೆ ಪತ್ನಿ, ಮಗ ಹಾಗೂ 90 ವಯಸ್ಸು ದಾಟಿದ ರಫೆಲ್ ಅವರ ಅಜ್ಜಿಯಂದಿರು ಕೂಡ ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾದ್ರು. ಇದೇ ವೇಳೆ, ತನ್ನ ಟೆನಿಸ್ ಬದುಕನ್ನು ರೂಪಿಸಿದ್ದ ಚಿಕ್ಕಪ್ಪ ಟೋನಿ ಅವರನ್ನು ನಡಾಲ್ ಮನದುಂಬಿ ನೆನಪಿಸಿಕೊಂಡ್ರು.
ಇಷ್ಟು ವರ್ಷ ರಫೆಲ್ ನಡಲಾ ಅವರ ಸೋಲು ಗೆಲುವುಗಳನ್ನು ಕಂಡು ಭಾವುಕರಾಗುತ್ತಿದ್ದ ಅಭಿಮಾನಿಗಳು ಈ ಕಾರ್ಯಕ್ರಮದಲ್ಲಿ ರಫೆಲ್ ನಡಾಲ್ ಅವರ ಪ್ರತಿ ಮಾತುಗಳನ್ನು ಕೇಳಿಕೊಂಡು ಕಣ್ಣೀರು ಸುರಿಸುತ್ತಿದ್ದರು. ಇದೇ ವೇಳೆ ಅಲ್ಲಿ ಸಮಾಗಮವಾಗಿದ್ದು ಬಿಗ್-4 ಟೆನಿಸ್ ದಿಗ್ಗಜರು. ಭಾರತ ಕ್ರಿಕೆಟ್ನಲ್ಲಿ ಸಚಿನ್, ಗಂಗೂಲಿ, ದ್ರಾವಿಡ್, ಲಕ್ಷ್ಮಣ್ ಅವರನ್ನು ಬಿಗ್-4 ಎಂದು ಕರೆಯುತ್ತಿದ್ದರು. ಹಾಗೇ ಟೆನಿಸ್ ಜಗತ್ತಿನಲ್ಲಿ ಫೆಡರರ್, ಜಾಕೊವಿಕ್, ಆಂಡಿ ಮುರ್ರೆ ಮತ್ತು ನಡಾಲ್ ಎಂಬ ಬಿಗ್-4 ಜೊತೆಯಾಗಿ ಅಂಗಣದಲ್ಲಿ ಕಾಣಿಸಿಕೊಂಡಾಗ ಅಭಿಮಾನಿಗಳ ಖುಷಿ ಹೇಗಿರಬಹುದು ಎಂದು ಊಹಿಸಿಕೊಳ್ಳಲು ಸಾಧ್ಯವಿಲ್ಲ. ಯಾಕಂದ್ರೆ ಕಳೆದ 25 ವರ್ಷಗಳಲ್ಲಿ ಟೆನಿಸ್ ಜಗತ್ತನ್ನು ಆಳುತ್ತಿದ್ದದ್ದೇ ಈ ತ್ರಿಮೂರ್ತಿಗಳು. ಇವರಿಗೆ ಮುರ್ರೆ ಕೂಡ ಪೈಪೋಟಿ ನೀಡುತ್ತಿದ್ದರು.
ಕೊನೆಯದಾಗಿ ರಫೆಲ್ ನಡಾಲ್, ಫ್ರಾನ್ಸ್ ಮತ್ತು ಪ್ಯಾರಿಸ್ಗೂ ಧನ್ಯವಾದ ಹೇಳಿದ್ರು. ಈ ಪ್ರೀತಿಗೆ ಏನು ಹೇಳಬೇಕು ಎಂದು ಗೊತ್ತಾಗುತ್ತಿಲ್ಲ. ನಿಮ್ಮ ಪ್ರೀತಿ, ಅಭಿಮಾನದಿಂದ ನಾನು ನಿಮ್ಮವನೇ ಅಂದಾಗ ಇಡೀ ಕ್ರೀಡಾಂಗಣ ಎದ್ದು ನಿಂತು ಚಪ್ಪಾಳೆ ತಟ್ಟುತ್ತಾ ಅಪ್ರತಿಮ ಆಟಗಾರರನಿಗೆ ಗೌರವ ಸಲ್ಲಿಸಿರುವುದು ಸ್ಮರಣೀಯವಾಗಿತ್ತು.
ಇಷ್ಟು ದಿನ ಆಟವಾಡುತ್ತಿದ್ದ ನಡಾಲ್ ಅವರ ಬೆವರಿನ ಹನಿಗಳು ರೋಲ್ಯಾಂಡ್ ಗ್ಯಾರೋನ ಆವೆ ಮಣ್ಣಿನ ಅಂಗಣಕ್ಕೆ ಬೀಳುತ್ತಿದ್ದವು. ಆದ್ರೆ ಈ ಭಾರಿ ಅಭಿಮಾನಿಗಳ ಅಭಿಮಾನಕ್ಕೆ ರಫೆಲ್ ನಡಾಲ್ನ ಕಣ್ಣೀರು ಹನಿ ಹನಿಯಾಗಿ ಬೀಳುತ್ತಿದ್ದಾಗ, ತಮಗೆ ಗೊತ್ತಿಲ್ಲದಂತೆ ಅಭಿಮಾನಿಗಳ ಕಣ್ಣುಗಳು ಕೂಡ ಒದ್ದೆಯಾಗಿದ್ದವು. ಮರ್ಸಿ ಬ್ಯೂಕಪ್ ರಾಫಾ.. ಥ್ಯಾಂಕ್ಯೂ ರಫೆಲ್ ನಡಾಲ್…!
ಸನತ್ ರೈ
