ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾ ಸೃಷ್ಟಿಸಿರುವ ಹವಾ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಇದರ ನಡುವೆಯೇ, ನಟಿ ರಿಷಿಕಾ ಸಿಂಗ್ ‘ಟಾಕ್ಸಿಕ್’ ಸಿನಿಮಾದ ಟೀಸರ್ ಹಾಗೂ ಯಶ್ ವಿರುದ್ಧ ಮಾಡಿದ್ದ ತೀವ್ರ ಟೀಕೆಗೆ ಅವರ ತಂದೆ, ಕನ್ನಡ ಚಿತ್ರರಂಗದ ದಿಗ್ಗಜ ನಿರ್ದೇಶಕ ಎಸ್ವಿ ರಾಜೇಂದ್ರ ಸಿಂಗ್ ಬಾಬು ಅವರೇ ನೇರವಾಗಿ ತಿರುಗೇಟು ನೀಡಿದ್ದಾರೆ. ಮಗಳ ಹೇಳಿಕೆಯನ್ನು ಪಕ್ಕಕ್ಕಿಟ್ಟು ಯಶ್ ಅವರನ್ನು ‘ಕನ್ನಡ ಇಂಡಸ್ಟ್ರಿಯ ಕೊಹಿನೂರ್ ವಜ್ರ’ ಎಂದು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.
ಮಗಳ ಅಭಿಪ್ರಾಯ ವೈಯಕ್ತಿಕ: ರಾಜೇಂದ್ರ ಸಿಂಗ್ ಬಾಬು ಸ್ಪಷ್ಟನೆ
ಟಾಕ್ಸಿಕ್ ಕುರಿತು ಮಗಳು ರಿಷಿಕಾ ಸಿಂಗ್ ನೀಡಿರುವ ಹೇಳಿಕೆ ಭಾರತೀಯ ಚಿತ್ರರಂಗದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿತ್ತು. ಈ ಕುರಿತು ಸಂದರ್ಶನವೊಂದರಲ್ಲಿ ಪ್ರತಿಕ್ರಿಯಿಸಿದ ರಾಜೇಂದ್ರ ಸಿಂಗ್ ಬಾಬು, ರಿಷಿಕಾ ಹೇಳಿರುವುದು ಆಕೆಯ ವೈಯಕ್ತಿಕ ಅಭಿಪ್ರಾಯ. ಪ್ರಜಾಪ್ರಭುತ್ವದಲ್ಲಿ ಪ್ರತಿಯೊಬ್ಬರಿಗೂ ತಮ್ಮ ಅನಿಸಿಕೆ ವ್ಯಕ್ತಪಡಿಸುವ ಹಕ್ಕಿದೆ. ಸಿನಿಮಾ ಬಿಡುಗಡೆಯಾದ ಬಳಿಕ ವಿಮರ್ಶೆ ಮಾಡುವುದು ಸಾಮಾನ್ಯ ಎಂದು ಅತ್ಯಂತ ಮುಕ್ತವಾಗಿ ಹೇಳಿದರು. ಆದರೆ, ಯಶ್ ಅವರ ಸಾಧನೆ ಮತ್ತು ಸಾಮರ್ಥ್ಯದ ವಿಷಯ ಬಂದಾಗ ರಾಜೇಂದ್ರ ಸಿಂಗ್ ಬಾಬು ಸಂಪೂರ್ಣವಾಗಿ ಯಶ್ ಪರವಾಗಿ ನಿಂತರು.
ಯಶ್ ಕನ್ನಡ ಚಿತ್ರರಂಗಕ್ಕೆ ತಂದಿಟ್ಟ ಹೆಮ್ಮೆ ಸಣ್ಣದಲ್ಲ
ಯಶ್ ಇಂದು ಬೆಳೆದು ನಿಂತಿರುವ ಎತ್ತರ ಹಾಗೂ ಅವರು ಕನ್ನಡ ಸಿನಿಮಾರಂಗವನ್ನು ಜಾಗತಿಕ ಮಟ್ಟದಲ್ಲಿ ಪ್ರತಿನಿಧಿಸುತ್ತಿರುವ ರೀತಿಯನ್ನು ಹಿರಿಯ ನಿರ್ದೇಶಕ ರಾಜೇಂದ್ರ ಸಿಂಗ್ ಬಾಬು ತೀವ್ರವಾಗಿ ಮೆಚ್ಚಿಕೊಂಡಿದ್ದಾರೆ. ಕನ್ನಡಿಗರಾದ ನಾವೆಲ್ಲರೂ ಯಶ್ ಅವರ ಬೆಳವಣಿಗೆಯನ್ನು ನೋಡಿ ಹೆಮ್ಮೆಪಡಬೇಕು. ಟಾಕ್ಸಿಕ್ ನಂತಹ ಬೃಹತ್ ಬಜೆಟ್ ಮತ್ತು ದೊಡ್ಡ ಮಟ್ಟದ ಸಿನಿಮಾದ ಮೂಲಕ ಅವರು ಕನ್ನಡ ಚಿತ್ರರಂಗದ ವ್ಯಾಪ್ತಿಯನ್ನು ಮತ್ತಷ್ಟು ವಿಸ್ತರಿಸಿದ್ದಾರೆ. ಇಂದು ಇಡೀ ದೇಶವೇ ಯಶ್ ಸಿನಿಮಾಗಾಗಿ ಕಾತರದಿಂದ ಕಾಯುತ್ತಿದೆ. ಇದು ನಮ್ಮ ಇಂಡಸ್ಟ್ರಿಗೆ ಸಂದ ದೊಡ್ಡ ಗೌರವ ಎಂದು ಅವರು ಬಣ್ಣಿಸಿದರು.
ಯಶ್ ಕನ್ನಡದ ಕೊಹಿನೂರ್ ವಜ್ರ!
ಯಶ್ ಅವರನ್ನು ಅತ್ಯಂತ ಎತ್ತರದ ಸ್ಥಾನದಲ್ಲಿಟ್ಟು ಮಾತನಾಡಿದ ರಾಜೇಂದ್ರ ಸಿಂಗ್ ಬಾಬು, ರಾಕಿಂಗ್ ಸ್ಟಾರ್ ಯಶ್ ಬೇರೆ ಯಾರೂ ಅಲ್ಲ, ಅವರು ನಮ್ಮ ಕನ್ನಡ ಚಿತ್ರರಂಗದ ಅತ್ಯಂತ ಅಪರೂಪದ ‘ಕೊಹಿನೂರ್ ವಜ್ರ’ ಇದ್ದಂತೆ. ಅವರ ಸಿನಿಮಾ ಪಯಣ ಮತ್ತು ನಿರ್ಧಾರಗಳು ಕನ್ನಡ ಸ್ಯಾಂಡಲ್ವುಡ್ನ ಸಾಮರ್ಥ್ಯವನ್ನು ಜಗತ್ತಿಗೆ ಸಾರುತ್ತಿವೆ ಎಂದು ಹೆಮ್ಮೆಯಿಂದ ಹೇಳಿದರು. ತಂದೆಯಾಗಿ ಮಗಳ ಟೀಕೆಯನ್ನು ಸಾರ್ವಜನಿಕವಾಗಿ ಬೆಂಬಲಿಸದೆ, ಒಬ್ಬ ಹಿರಿಯ ನಿರ್ದೇಶಕನಾಗಿ ಯಶ್ ಅವರ ನೈಜ ಸಾಧನೆಗೆ ಬಾಬು ಗೌರವ ಸಲ್ಲಿಸಿರುವುದು ಗಾಂಧಿನಗರದಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ.
ರಿಷಿಕಾ ಸಿಂಗ್ ಮಾಡಿದ ಆರೋಪವೇನು?
ಇದಕ್ಕೂ ಮೊದಲು ವಿಡಿಯೋ ಒಂದನ್ನು ಹಂಚಿಕೊಂಡಿದ್ದ ನಟಿ ರಿಷಿಕಾ ಸಿಂಗ್, ಟಾಕ್ಸಿಕ್ ಸಿನಿಮಾದ ಗ್ಲಿಂಪ್ಸ್ನಲ್ಲಿ ಮಹಿಳೆಯರನ್ನು ಕೆಟ್ಟದಾಗಿ ಅಥವಾ ಗೌರವವಿಲ್ಲದಂತೆ ಬಿಂಬಿಸಲಾಗಿದೆ ಎಂದು ಆಕ್ಷೇಪ ವ್ಯಕ್ತಪಡಿಸಿದ್ದರು. ಯಶ್ ರಿಯಲ್ ಲೈಫ್ನಲ್ಲಿ ಉತ್ತಮ ಪತಿ ಮತ್ತು ಜವಾಬ್ದಾರಿಯುತ ತಂದೆಯಾಗಿದ್ದು, ಇಂತಹ ದೃಶ್ಯಗಳಲ್ಲಿ ಹೇಗೆ ಅಭಿನಯಿಸಿದರು ಎಂದು ಪ್ರಶ್ನಿಸಿದ್ದರು. ಈ ವೀಡಿಯೊ ವೈರಲ್ ಆಗಿ ಯಶ್ ಅಭಿಮಾನಿಗಳ ತೀವ್ರ ಆಕ್ರೋಶಕ್ಕೂ ಕಾರಣವಾಗಿತ್ತು.
ಇದೀಗ ಸ್ವತಃ ರಿಷಿಕಾ ಅವರ ತಂದೆ ರಾಜೇಂದ್ರ ಸಿಂಗ್ ಬಾಬು ಅವರೇ ಯಶ್ ಪರವಾಗಿ ಧ್ವನಿ ಎತ್ತಿ ‘ಕೊಹಿನೂರ್ ವಜ್ರ’ ಎಂದು ಕರೆದಿರುವುದು, ಮಗಳ ಟೀಕೆಗೆ ನೀಡಿದ ಅತ್ಯಂತ ಸುಸಂಸ್ಕೃತ ಹಾಗೂ ಕಟ್ಟುನಿಟ್ಟಿನ ಉತ್ತರ ಎಂದೇ ವಿಶ್ಲೇಷಿಸಲಾಗುತ್ತಿದೆ. ಟಾಕ್ಸಿಕ್ ಸಿನಿಮಾ ಬಿಡುಗಡೆಯಾದ ಮೇಲೆ ಈ ಎಲ್ಲಾ ವಿವಾದಗಳಿಗೆ ಉತ್ತರ ಸಿಗಲಿದೆ.
