* ಈ ಹಿಂದಿನ ಐಪಿಒ ಬಿಡ್ಡಿಂಗ್ ದಾಖಲೆಯನ್ನು ₹47,000 ಕೋಟಿಗಳಿಂದ ಹಿಂದಿಕ್ಕಿದ ಜಿಯೋ ಐಪಿಒ
* ದೊಡ್ಡ ಸಾಂಸ್ಥಿಕ ಹೂಡಿಕೆದಾರರಿಂದ ಸುಮಾರು ₹3.87 ಲಕ್ಷ ಕೋಟಿ ಮೌಲ್ಯದ ಬಿಡ್‌ಗಳು; ಕೇವಲ 10 ನಿಮಿಷಗಳಲ್ಲಿ ಭರ್ತಿಯಾದ ಕ್ಯೂ ಐಬಿ ವಿಭಾಗ
* ಜಾಗತಿಕವಾಗಿ ಮೊದಲ ಬಾರಿಗೆ ಐಪಿಒ ಒಂದಕ್ಕೆ 1 ಕೋಟಿಗೂ ಅಧಿಕ ಅರ್ಜಿಗಳು ಸಲ್ಲಿಕೆ; ಒಟ್ಟು 1.38+ ಕೋಟಿ ಅರ್ಜಿಗಳನ್ನು ದಾಟಿದ ಜಿಯೋ
ಮುಂಬಯಿ, : ಜಿಯೋ ಐಪಿಒಗೆ ಹೂಡಿಕೆದಾರರಿಂದ ಬಂದಿರುವ ಸುಮಾರು 7.40 ಲಕ್ಷ ಕೋಟಿ ರುಪಾಯಿ ಮೌಲ್ಯದ ದಾಖಲೆಯ ಬೇಡಿಕೆಯು ಮಾರುಕಟ್ಟೆಯನ್ನು ಅಚ್ಚರಿಗೊಳಿಸಿದೆ. ದೊಡ್ಡ ಸಾಂಸ್ಥಿಕ ಹೂಡಿಕೆದಾರರ ಅಪಾರ ವಿಶ್ವಾಸ, ಚಿಲ್ಲರೆ ಹೂಡಿಕೆದಾರರ ಉತ್ಸಾಹ ಮತ್ತು ಷೇರುದಾರರು ಹಾಗೂ ನೌಕರರ ಭಾಗವಹಿಸುವಿಕೆಯು ಜಿಯೋ ಪ್ಲಾಟ್‌ಫಾರ್ಮ್ಸ್‌ನ ಐಪಿಒವನ್ನು ಹಲವಾರು ಐತಿಹಾಸಿಕ ಮೈಲಿಗಲ್ಲುಗಳತ್ತ ಕೊಂಡೊಯ್ದಿದೆ. ದೇಶದ ಇದುವರೆಗಿನ ಅತಿ ದೊಡ್ಡ ₹30,213 ಕೋಟಿ ಮೌಲ್ಯದ ಐಪಿಒದಲ್ಲಿ 1.38 ಕೋಟಿಗೂ ಹೆಚ್ಚು ಅರ್ಜಿಗಳು ಸ್ವೀಕರಿಸಲ್ಪಟ್ಟಿದ್ದು, ಅಂತಿಮ ಚಂದಾದಾರಿಕೆಯು 22 ಪಟ್ಟು ಹೆಚ್ಚಳವಾಗಿದೆ.
ಷೇರು ಮಾರುಕಟ್ಟೆಯು ಒತ್ತಡದಲ್ಲಿದ್ದ ಸಮಯದಲ್ಲಿ ಜಿಯೋ ಐಪಿಒ ಮಾರುಕಟ್ಟೆಯಲ್ಲಿ ಈ ಸಾಧನೆ ಮಾಡಿದೆ. ವಿದೇಶಿ ಹೂಡಿಕೆದಾರರಿಂದ ಮಾರಾಟ, ದುಬಾರಿ ಕಚ್ಚಾ ತೈಲ ಮತ್ತು ಜಾಗತಿಕ ಅನಿಶ್ಚಿತತೆಯು ಮಾರುಕಟ್ಟೆಯ ಭಾವನೆಯನ್ನು ಕುಂದಿಸಿತ್ತು. ಈ ಪರಿಸ್ಥಿತಿಯಲ್ಲಿ, ಜಿಯೋ ಐಪಿಒಗೆ ಬಂದ ಬೇಡಿಕೆಯು ಮಾರುಕಟ್ಟೆ ತಜ್ಞರ ನಿರೀಕ್ಷೆಗಳನ್ನು ಮೀರಿಸಿದೆ. ಇದು ಸಾರ್ವಜನಿಕ ಬಿಡ್ಡಿಂಗ್ ಮೊತ್ತದ ದೃಷ್ಟಿಯಿಂದ ಹಿಂದಿನ ದಾಖಲೆಯನ್ನು ಸಹ ಮುರಿದಿದೆ.
ಅಕ್ಟೋಬರ್ 2025 ರಲ್ಲಿ, ಎಲ್‌ಜಿ ಎಲೆಕ್ಟ್ರಾನಿಕ್ಸ್ ಇಂಡಿಯಾ ಐಪಿಒ ಸಂದರ್ಭ ಸುಮಾರು ₹4.43 ಲಕ್ಷ ಕೋಟಿ ಮೌಲ್ಯದ ಬಿಡ್‌ಗಳನ್ನು ಪಡೆದಿತ್ತು. ಜಿಯೋ ವಿಷಯದಲ್ಲಿ, ಆಂಕರ್-ಅಲ್ಲದ ಬಿಡ್ಡಿಂಗ್‌ನಲ್ಲಿ (non-anchor bidding) ಈ ಅಂಕಿ ಅಂಶವು ಸರಿಸುಮಾರು ₹4.90 ಲಕ್ಷ ಕೋಟಿಗಳಷ್ಟಿತ್ತು – ಇದು ಹಿಂದಿನ ಮಾನದಂಡಕ್ಕಿಂತ ಸುಮಾರು ₹47,000 ಕೋಟಿ ಅಥವಾ ಶೇಕಡಾ 11 ರಷ್ಟು ಹೆಚ್ಚಾಗಿದೆ. ಇದರ ಜೊತೆಗೆ, ಆಂಕರ್ ಹೂಡಿಕೆದಾರರಿಂದ ಬೇಡಿಕೆಯು ಸುಮಾರು ₹2.50 ಲಕ್ಷ ಕೋಟಿ ತಲುಪಿದೆ.
ನಿರ್ದಿಷ್ಟವಾಗಿ ಹೇಳುವುದಾದರೆ, ದೊಡ್ಡ ಸಾಂಸ್ಥಿಕ ಹೂಡಿಕೆದಾರರ ಬೇಡಿಕೆಯು ನಿರೀಕ್ಷೆಗಳನ್ನು ಮೀರಿದೆ. ಕ್ಯೂಐಬಿ ( ಅರ್ಹ ಸಾಂಸ್ಥಿಕ ಖರೀದಿದಾರರು) ವಿಭಾಗವು ಸುಮಾರು ₹3.87 ಲಕ್ಷ ಕೋಟಿ ಮೌಲ್ಯದ ಬಿಡ್‌ಗಳನ್ನು ಸ್ವೀಕರಿಸಿತು ಮತ್ತು 70.55 ಪಟ್ಟು ಚಂದಾದಾರಿಕೆ ಪಡೆಯಿತು. ಈ ವಿಭಾಗದ ಕೋಟಾವು ಮೊದಲ 10 ನಿಮಿಷಗಳಲ್ಲಿಯೇ ಭರ್ತಿಯಾಯಿತು. ಏತನ್ಮಧ್ಯೆ, ಸಂಪೂರ್ಣ ಐಪಿಒ ಕೇವಲ 100 ನಿಮಿಷಗಳಲ್ಲಿ ಚಂದಾದಾರಿಕೆಗೊಂಡಿತು. ಜಾಗತಿಕ ನಿಧಿಗಳು, ವಿಮಾ ಕಂಪನಿಗಳು ಮತ್ತು ದೇಶೀಯ ಮ್ಯೂಚುವಲ್ ಫಂಡ್‌ಗಳು ಸೇರಿದಂತೆ ಆಂಕರ್ ಹೂಡಿಕೆದಾರರು ಅಪಾರ ಆಸಕ್ತಿಯನ್ನು ತೋರಿಸಿದರು. ಈ ಆರಂಭಿಕ ವೇಗವು ಅಂತಿಮ ದಿನದವರೆಗೆ ಮುಂದುವರೆಯಿತು ಮತ್ತು ಸಾಂಸ್ಥಿಕ ಬೇಡಿಕೆಯಲ್ಲಿ ಭಾರಿ ಜಿಗಿತ ಕಂಡುಬಂದಿತು.
ಪ್ರಮುಖ ಸಂಸ್ಥೆಗಳ ಜೊತೆಗೆ, ಚಿಲ್ಲರೆ ಹೂಡಿಕೆದಾರರು ಕೂಡ ಜಿಯೋ ಐಪಿಒದಲ್ಲಿ ದಾಖಲೆಯ ಸಂಖ್ಯೆಯಲ್ಲಿ ಭಾಗವಹಿಸಿದ್ದಾರೆ. ಚಿಲ್ಲರೆ ವಿಭಾಗದಲ್ಲಿ 1 ಕೋಟಿಗೂ ಹೆಚ್ಚು ಅರ್ಜಿಗಳು ಸಲ್ಲಿಕೆಯಾಗಿವೆ. ರಿಲಯನ್ಸ್‌ನ ಅಸ್ತಿತ್ವದಲ್ಲಿರುವ ಷೇರುದಾರರ ವಿಭಾಗದಲ್ಲಿ 21 ಲಕ್ಷಕ್ಕೂ ಹೆಚ್ಚು ಅರ್ಜಿಗಳು ಕಂಡುಬಂದಿದ್ದರೆ, ನೌಕರರ ವಿಭಾಗದಲ್ಲಿ 2 ಲಕ್ಷಕ್ಕೂ ಅಧಿಕ ಅರ್ಜಿಗಳು ಸ್ವೀಕರಿಸಲ್ಪಟ್ಟಿವೆ. ಚಿಲ್ಲರೆ ಪಾಲಿಗೆ 2.72 ಪಟ್ಟು, ಷೇರುದಾರರ ಕೋಟಾಗೆ 7.60 ಪಟ್ಟು ಮತ್ತು ನೌಕರರ ಕೋಟಾಗೆ 2.93 ಪಟ್ಟು ಚಂದಾದಾರಿಕೆ ಲಭಿಸಿದೆ. ಜಾಗತಿಕವಾಗಿ ಮೊಟ್ಟಮೊದಲ ಬಾರಿಗೆ, ಒಟ್ಟು 1 ಕೋಟಿಗೂ ಹೆಚ್ಚು ಅರ್ಜಿಗಳನ್ನು ಸ್ವೀಕರಿಸಿದ ಸಾರ್ವಕಾಲಿಕ ಮೊದಲ ಐಪಿಒ ಆಗಿ ಜಿಯೋ ಹೊರಹೊಮ್ಮಿದೆ.
ಭಾರತದ ಅತಿ ದೊಡ್ಡ ಐಪಿಒದ ಮತ್ತೊಂದು ಗಮನಾರ್ಹ ವೈಶಿಷ್ಟ್ಯವೆಂದರೆ ಇದು ಸಂಪೂರ್ಣವಾಗಿ ಹೊಸ ಷೇರುಗಳ ಬಿಡುಗಡೆಯಾಗಿದೆ. (fresh issue), ಅಂದರೆ ಅಸ್ತಿತ್ವದಲ್ಲಿರುವ ಷೇರುದಾರರು ಇದರ ಮೂಲಕ ತಮ್ಮ ಪಾಲನ್ನು ಮಾರಾಟ ಮಾಡಿಲ್ಲ. ಚಂದಾದಾರಿಕೆಯ ವೇಗವೂ ಸಹ ಅಸಾಧಾರಣವಾಗಿತ್ತು: ಇದು ಮೊದಲ ದಿನದಂದು 3.16 ಪಟ್ಟು, ಎರಡನೇ ದಿನದಂದು 5.57 ಪಟ್ಟು ಮತ್ತು ಮೂರನೇ ದಿನದಂದು 22.19 ಪಟ್ಟು ತಲುಪಿತು.
ಒಂದರ ನಂತರ ಒಂದರಂತೆ ದಾಖಲೆಗಳನ್ನು ಸೃಷ್ಟಿಸಿದ ನಂತರ, ಹೂಡಿಕೆದಾರರು ಈಗ ಷೇರು ಹಂಚಿಕೆ (allotment) ಮತ್ತು ಲಿಸ್ಟ್ ಮಾಡುವಿಕೆಯತ್ತ ಕಣ್ಣಿಟ್ಟಿದ್ದಾರೆ. ನಿಗದಿತ ವೇಳಾಪಟ್ಟಿಯ ಪ್ರಕಾರ, ಷೇರುಗಳ ಹಂಚಿಕೆಯು ಅಕ್ಟೋಬರ್ 26 ರಂದು ನಡೆಯಲಿದೆ ಮತ್ತು ಷೇರು ವಿನಿಮಯ ಕೇಂದ್ರಗಳಲ್ಲಿ ಜಿಯೋ ಪ್ಲಾಟ್‌ಫಾರ್ಮ್ಸ್‌ನ ಸ್ಟಾಕ್ ಅಕ್ಟೋಬರ್ 28 ರಂದು ನೋಂದಣಿ ಅಥವಾ ಲಿಸ್ಟ್ ಆಗಲಿದೆ.
