Lಬೆಂಗಳೂರು: ಸ್ಯಾಂಡಲ್‌ವುಡ್‌ನ ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ಅವರ ಬಹುನಿರೀಕ್ಷಿತ ರಿಚರ್ಡ್ ಆಂಟನಿ ಸಿನಿಮಾ ಯಾವಾಗ ಸೆಟ್ಟೇರಲಿದೆ ಎಂಬ ಪ್ರಶ್ನೆ ಕೇಳಿದಾಗಲೆಲ್ಲಾ ನಟ ಪ್ರಮೋದ್ ಶೆಟ್ಟಿ ನೀಡುವ ಒಂದೇ ಒಂದು ಸಿದ್ಧ ಉತ್ತರ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಟ್ರೋಲ್ ಹಾಗೂ ವ್ಯಂಗ್ಯಕ್ಕೆ ಗುರಿಯಾಗಿದೆ. ಸ್ಕ್ರಿಪ್ಟ್ ಮುಗಿದಿದೆ, ಇನ್ನೇನು ಪ್ರಿ-ಪ್ರೊಡಕ್ಷನ್ ಸ್ಟಾರ್ಟ್ ಆಗುತ್ತೆ ಎಂಬ ಪ್ರಮೋದ್ ಶೆಟ್ಟಿ ಅವರ ಹೇಳಿಕೆಯನ್ನೇ ಇಟ್ಟುಕೊಂಡು ನೆಟ್ಟಿಗರು ಸಾಲು ಸಾಲು ಮೀಮ್‌ಗಳನ್ನು ಹರಿಬಿಡುತ್ತಿದ್ದು, ಇನ್ನೊಂದು 20 ವರ್ಷ ಬಿಟ್ಟು ಬಂದು ಕೇಳಿದರೂ ಅಥವಾ ಅವರ ಕೊನೆಯ ಉಸಿರು ಹೋಗುವ ಮುನ್ನ ಕೇಳಿದರೂ ಇದೇ ಉತ್ತರ ಕೊಡುತ್ತಾರೆ ಎಂದು ಕಾಲೆಳೆಯುತ್ತಿದ್ದಾರೆ.
ಸಪ್ತ ಸಾಗರದಾಚೆ ಎಲ್ಲೋ ಬಳಿಕ ರಕ್ಷಿತ್ ಶೆಟ್ಟಿ ಕಣ್ಮರೆ; ಪ್ರಮೋದ್ ಶೆಟ್ಟಿ ಕೊಟ್ಟ ಉತ್ತರವೇನು?
Related posts
ಸಪ್ತ ಸಾಗರದಾಚೆ ಎಲ್ಲೋ (ಸೈಡ್ ಎ ಮತ್ತು ಸೈಡ್ ಬಿ) ಸಿನಿಮಾಗಳು ತೆರೆಕಂಡು ಭರ್ಜರಿ ಯಶಸ್ಸು ಗಳಿಸಿದ ಬಳಿಕ ನಟ ಹಾಗೂ ನಿರ್ದೇಶಕ ರಕ್ಷಿತ್ ಶೆಟ್ಟಿ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳದೆ ಕಣ್ಮರೆಯಾಗಿದ್ದಾರೆ. ರಕ್ಷಿತ್ ಶೆಟ್ಟಿ ಈಗ ಎಲ್ಲಿದ್ದಾರೆ? ಅವರ ಕನಸಿನ ರಿಚರ್ಡ್ ಆಂಟನಿ ಸಿನಿಮಾದ ಶೂಟಿಂಗ್ ಕಥೆ ಏನಾಯಿತು? ಅಸಲಿಗೆ ಈ ಸಿನಿಮಾ ತೆರೆಗೆ ಬರುತ್ತದೆಯೇ? ಎಂಬ ನೂರಾರು ಪ್ರಶ್ನೆಗಳು ಅಭಿಮಾನಿಗಳಲ್ಲಿ ತೀವ್ರ ಕುತೂಹಲ ಮೂಡಿಸಿವೆ. ಆದರೆ ರಕ್ಷಿತ್ ಶೆಟ್ಟಿ ಅವರ ಮೌನ ಹಾಗೂ ಚಿತ್ರತಂಡವು ಸಿನಿಮಾದ ಬಗ್ಗೆ ಯಾವುದೇ ಅಧಿಕೃತ ಅಪ್‌ಡೇಟ್ ನೀಡದಿರುವುದು ಅಭಿಮಾನಿಗಳಲ್ಲಿ ತೀವ್ರ ಬೇಸರ ಮೂಡಿಸಿದೆ.
ಹೀಗಾಗಿ ರಕ್ಷಿತ್ ಶೆಟ್ಟಿ ಅವರ ಆಪ್ತ ಗೆಳೆಯರಾದ ಪ್ರಮೋದ್ ಶೆಟ್ಟಿ ಹಾಗೂ ರಿಷಬ್ ಶೆಟ್ಟಿ ಸೇರಿದಂತೆ ಅವರ ತಂಡದವರು ಮಾಧ್ಯಮಗಳ ಮುಂದೆ ಬಂದಾಗಲೆಲ್ಲಾ ಈ ಪ್ರಶ್ನೆ ತಪ್ಪದೇ ಎದುರಾಗುತ್ತದೆ. ಇತ್ತೀಚೆಗಷ್ಟೇ ಖಾಸಗಿ ಮಾಧ್ಯಮವೊಂದರ ನಿರೂಪಕಿ ಪ್ರಮೋದ್ ಶೆಟ್ಟಿ ಅವರನ್ನು ರಕ್ಷಿತ್ ಶೆಟ್ಟಿ ಹಾಗೂ ರಿಚರ್ಡ್ ಆಂಟನಿ ಸಿನಿಮಾದ ಚಿತ್ರೀಕರಣ ಆರಂಭವಾಗುವ ಕುರಿತು ಪ್ರಶ್ನಿಸಿದ್ದರು. ಇದಕ್ಕೆ ಉತ್ತರಿಸಿದ ಪ್ರಮೋದ್ ಶೆಟ್ಟಿ, ಕಥೆ ಬರೆದು ಮುಗಿದಿದೆ, ರಕ್ಷಿತ್ ಶೀಘ್ರದಲ್ಲೇ ಬರುತ್ತಾನೆ. ಪ್ರಿ-ಪ್ರೊಡಕ್ಷನ್ ಕೆಲಸಗಳು ಶುರುವಾಗುತ್ತವೆ ಹಾಗೂ ಶೂಟಿಂಗ್ ಸಹ ಆರಂಭವಾಗುತ್ತದೆ. ನಿಮಗೆ ಗೊತ್ತಲ್ವಾ, ಪ್ರಿ-ಪ್ರೊಡಕ್ಷನ್‌ಗೆ ಹೆಚ್ಚು ಸಮಯ ಹಿಡಿಯುತ್ತದೆ ಎಂದು ಹೇಳಿದ್ದರು.
2024, 2026 ಅಲ್ಲ 2036 ಬಂದರೂ ಇದೇ ಡೈಲಾಗ್: 2047ರ ಸರ್ಕಾರಿ ಯೋಜನೆಗೆ ನೆಟ್ಟಿಗರ ಹೋಲಿಕೆ!
ವರ್ಷಗಳು ಉರುಳುತ್ತಿದ್ದರೂ ಸಿನಿಮಾದ ಚಿತ್ರೀಕರಣ ಮಾತ್ರ ಆರಂಭವಾಗುತ್ತಿಲ್ಲ, ಆದರೆ ಪ್ರಮೋದ್ ಶೆಟ್ಟಿ ನೀಡುವ ಹೇಳಿಕೆ ಮಾತ್ರ ಕಿಂಚಿತ್ತೂ ಬದಲಾಗಿಲ್ಲ ಎಂಬುದನ್ನು ಗುರಿಯಾಗಿಸಿಕೊಂಡಿರುವ ನೆಟ್ಟಿಗರು ಅವರ ವಿಡಿಯೋ ಹಂಚಿಕೊಂಡು ವ್ಯಂಗ್ಯವಾಡುತ್ತಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಮೀಮ್‌ಗಳಲ್ಲಿ ಕಾಲಮಾನದ ಲೆಕ್ಕಾಚಾರ ಹಾಕಿರುವ ನೆಟ್ಟಿಗರು, ಪ್ರಮೋದ್ ಶೆಟ್ಟಿ (2024 ರಲ್ಲಿ): ರಿಚರ್ಡ್ ಆಂಟನಿ ಸ್ಕ್ರಿಪ್ಟ್ ಮುಗಿದಿದೆ, ಇನ್ನೇನು ಪ್ರಿ-ಪ್ರೊಡಕ್ಷನ್ ಸ್ಟಾರ್ಟ್ ಆಗುತ್ತೆ… ಪ್ರಮೋದ್ ಶೆಟ್ಟಿ (2026 ರಲ್ಲಿ): ರಿಚರ್ಡ್ ಆಂಟನಿ ಸ್ಕ್ರಿಪ್ಟ್ ಮುಗಿದಿದೆ, ಇನ್ನೇನು ಪ್ರಿ-ಪ್ರೊಡಕ್ಷನ್ ಸ್ಟಾರ್ಟ್ ಆಗುತ್ತೆ… ಪ್ರಮೋದ್ ಶೆಟ್ಟಿ (2036 ರಲ್ಲಿ): ರಿಚರ್ಡ್ ಆಂಟನಿ ಸ್ಕ್ರಿಪ್ಟ್ ಮುಗಿದಿದೆ, ಇನ್ನೇನು ಪ್ರಿ-ಪ್ರೊಡಕ್ಷನ್ ಸ್ಟಾರ್ಟ್ ಆಗುತ್ತೆ… ಎಂದು ಬರೆದುಕೊಂಡು ಲೇವಡಿ ಮಾಡುತ್ತಿದ್ದಾರೆ.
ಇನ್ನು ಈ ವಿಡಿಯೋಗೆ ಕಾಮೆಂಟ್ ಮಾಡುತ್ತಿರುವ ಸಿನಿಪ್ರಿಯರು, ಬಹುಶಃ ಇವರು 2047ರ ಸರ್ಕಾರದ ಯೋಜನೆಗಳನ್ನು ಫಾಲೋ ಮಾಡುತ್ತಿರಬೇಕು ಎಂದು ಚಟಾಕಿ ಹಾರಿಸಿದ್ದಾರೆ. ಮತ್ತೊಬ್ಬರು ಕಾಮೆಂಟ್ ಮಾಡಿ, ಅವರ ಕೊನೆಯ ಉಸಿರು ಹೋಗುವಾಗ ಇದೇ ಪ್ರಶ್ನೆ ಕೇಳಿದರೂ ಖಂಡಿತವಾಗಿಯೂ ಇದನ್ನೇ ಹೇಳುತ್ತಾರೆ ಎಂದು ಟೀಕಿಸಿದ್ದಾರೆ.
ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣದ ರಿಚರ್ಡ್ ಆಂಟನಿ ಸಿನಿಮಾದ ವಿಶೇಷತೆಯೇನು?
ರಕ್ಷಿತ್ ಶೆಟ್ಟಿ ವೃತ್ತಿಜೀವನಕ್ಕೆ ದೊಡ್ಡ ತಿರುವು ನೀಡಿದ್ದ ಉಳಿದವರು ಕಂಡಂತೆ ಚಿತ್ರದ ಮುಂದುವರಿದ ಭಾಗವಾಗಿ (ಸೀಕ್ವೆಲ್) ಹಾಗೂ ಹಿಂದಿನ ಕಥೆಯಾಗಿ (ಪ್ರೀಕ್ವೆಲ್) ರಿಚರ್ಡ್ ಆಂಟನಿ ಸಿನಿಮಾ ಮೂಡಿಬರಲಿದೆ. ಉಳಿದವರು ಕಂಡಂತೆ ಚಿತ್ರದಲ್ಲಿದ್ದ ಅತ್ಯಂತ ಜನಪ್ರಿಯ ಪಾತ್ರ ರಿಚಿ ಅಲಿಯಾಸ್ ರಿಚರ್ಡ್ ಆಂಟನಿ ಜೀವನದ ಸುತ್ತವೇ ಈ ಸಿನಿಮಾ ಹೆಣೆಯಲಾಗಿದೆ ಎನ್ನಲಾಗುತ್ತಿದೆ.
ಪ್ರತಿಷ್ಠಿತ ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆಯು ಈ ಚಿತ್ರದ ನಿರ್ಮಾಣದ ಹೊಣೆಯನ್ನು ಹೊತ್ತುಕೊಂಡಿದೆ. ಚಿತ್ರದಲ್ಲಿ ರಕ್ಷಿತ್ ಶೆಟ್ಟಿ, ಪ್ರಮೋದ್ ಶೆಟ್ಟಿ, ರಿಷಬ್ ಶೆಟ್ಟಿ, ಅಚ್ಯುತ್ ಕುಮಾರ್, ಕಿಶೋರ್ ಹಾಗೂ ಯಜ್ಞಾ ಶೆಟ್ಟಿ ಸೇರಿದಂತೆ ಪ್ರಮುಖ ಕಲಾವಿದರು ನಟಿಸಲಿದ್ದಾರೆ. ಚಿತ್ರಕ್ಕೆ ಬಿ. ಅಜನೀಶ್ ಲೋಕನಾಥ್ ಅವರ ಸಂಗೀತ ನಿರ್ದೇಶನ ಹಾಗೂ ಕರ್ಮ್ ಚಾವ್ಲಾ ಅವರ ಛಾಯಾಗ್ರಹಣವಿರಲಿದೆ. ಆದರೆ ಬೆಟ್ಟದಷ್ಟು ನಿರೀಕ್ಷೆ ಮೂಡಿಸಿರುವ ಈ ಸಿನಿಮಾ ಯಾವಾಗ ಸೆಟ್ಟೇರಲಿದೆ ಎಂಬುದಕ್ಕೆ ಮಾತ್ರ ಇನ್ನೂ ಕಾಲವೇ ಉತ್ತರಿಸಬೇಕಿದೆ.
