ಟೀಮ್ ಇಂಡಿಯಾ ಮತ್ತು ಐಪಿಎಲ್ ನಲ್ಲಿ ನಾಯಕನಾಗಿ ಧೋನಿ ಮಾಡಿರುವ ಸಾಧನೆ ಅದ್ಭುತ..!
ಟಿಕೆಟ್ ಕಲೆಕ್ಟರ್ ಆಗಿದ್ದ ಧೋನಿ ಟೀಮ್ ಇಂಡಿಯಾದ ನಾಯಕನಾಗಿ ಮೆರೆದಾಡಿದ್ದು ಈಗ ಇತಿಹಾಸ. ಹಾಗೇ ನೋಡಿದ್ರೆ ಧೋನಿ ಕ್ರಿಕೆಟರ್ ಆಗಿದ್ದು, ಟೀಮ್ ಇಂಡಿಯಾ ಪರ ಆಡಿದ್ದು, ಟೀಮ್ ಇಂಡಿಯಾದ ನಾಯನಾಗಿದ್ದು ಎಲ್ಲವೂ ಕೂಡ ಬಯಸದೇ ಬಂದ ಭಾಗ್ಯ.
ರಾಂಚಿಯ ಮಧ್ಯಮ ಕುಟುಂಬದಿಂದ ಬಂದಿರುವ ಧೋನಿ ಫುಟ್ ಬಾಲ್ ಆಟಗಾರ. ಗೋಲ್ ಕೀಪರ್ ಆಗಿದ್ದ ಧೋನಿಗೆ ಶಾಲಾ ಕ್ರಿಕೆಟ್ ತಂಡದಲ್ಲಿ ವಿಕೆಟ್ ಕೀಪರ್ ಆಗುವ ಅವಕಾಶ ಸಿಕ್ಕಿತ್ತು. ಆ ನಂತರ ಹಿಂತಿರುಗಿ ನೋಡಲೇ ಇಲ್ಲ. ವಿಕೆಟ್ ಕೀಪಿಂಗ್ ಜೊತೆ ಹೊಡಿಬಡಿ ಆಟದ ಮೂಲಕವೂ ಮಿಂಚು ಹರಿಸಿದ್ರು. ರಣಜಿ ಪಂದ್ಯವೊಂದರಲ್ಲಿ ವಿಕೆಟ್ ಕೀಪಿಂಗ್ ಬದಲು ಫಿಲ್ಡಿಂಗ್ ಕೂಡ ಮಾಡುತ್ತಿದ್ದ ಧೋನಿ ಅಬ್ಬರದ ಬ್ಯಾಟಿಂಗ್ ನಡೆಸುತ್ತಿದ್ದ ಪರಿಯನ್ನು ಗಮನಿಸಿದ್ದ ಅಂದಿನ ಆಯ್ಕೆ ಸಮಿತಿ ಮುಖ್ಯಸ್ಥ ಸಯ್ಯದ್ ಕೀರ್ಮಾನಿಯವರು ಧೋನಿಗೆ ಟೀಮ್ ಇಂಡಿಯಾದ ಬಾಗಿಲು ಬಡಿಯುವಂತೆ ಮಾಡಿದ್ದರು. ಅದೇ ಸಮಯದಲ್ಲಿ ಯುವ ಆಟಗಾರರ ಹುಡುಕಾಟದಲ್ಲಿದ್ದ ಸೌರವ್ ಗಂಗೂಲಿ ಧೋನಿಗೆ ಅವಕಾಶ ನೀಡಿದ್ರು.
ಆದ್ರೆ ಮೊದಲ ಪಂದ್ಯದಲ್ಲಿ ಧೋನಿ ಶೂನ್ಯ ಸುತ್ತಿದ್ರು. ಹಾಗಂತ ಗಂಗೂಲಿ ತಲೆಕೆಡಿಸಿಕೊಳ್ಳಲಿಲ್ಲ. ಮತ್ತೆ ಅವಕಾಶ ಕೊಟ್ರು. ಬ್ಯಾಟಿಂಗ್ ನಲ್ಲಿ ಬಡ್ತಿ ನೀಡಿದ್ರು. ಪರಿಣಾಮ ಪಾಕ್ ವಿರುದ್ಧ ಸ್ಪೋಟಕ ಬ್ಯಾಟಿಂಗ್ ನಡೆಸಿ ಟೀಮ್ ಇಂಡಿಯಾದ ಖಾಯಂ ವಿಕೆಟ್ ಕೀಪರ್ ಬ್ಯಾಟ್ಸ್ ಮೆನ್ ಆಗಿ ರೂಪುಗೊಂಡ್ರು. ಗಂಗೂಲಿ ನಂತರ ರಾಹುಲ್ ದ್ರಾವಿಡ್ ನಾಯಕತ್ವದಲ್ಲೂ ಧೋನಿ ಅದ್ಭುತ ಸಾಧನೆ ಮಾಡಿದ್ದರು.
2007ರ ವಿಶ್ವಕಪ್ ಸೋಲಿನ ನಂತರ ಟೀಮ್ ಇಂಡಿಯಾದಲ್ಲಿ ಸಾಕಷ್ಟು ಬದಲಾವಣೆಗಳಾದವು. ಅದೇ ಸಮಯದಲ್ಲಿ 2007ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ಚೊಚ್ಚಲ ಟಿ-ಟ್ವೆಂಟಿ ವಿಶ್ವಕಪ್ ಟೂರ್ನಿ ನಡೆಯುತ್ತಿತ್ತು. ಯುವ ತಂಡವನ್ನು ಕಟ್ಟುವ ಯೋಚನೆಯಲ್ಲಿದ್ದ ಬಿಸಿಸಿಐಗೆ ನಾಯಕನ ಆಯ್ಕೆಯೇ ಮುಖ್ಯ ಪ್ರಶ್ನೆಯಾಗಿತ್ತು. ಗಂಗೂಲಿ, ಸಚಿನ್ ಅವರನ್ನು ಆಡುವುದು ಬೇಡ ಎಂದು ರಾಹುಲ್ ಮನವೋಲಿಸಿದ್ರು. ಆಗ ಸಚಿನ್ ಮತ್ತು ರಾಹುಲ್ ದ್ರಾವಿಡ್ ಧೋನಿಗೆ ನಾಯಕತ್ವ ನೀಡುವಂತೆ ಸಲಹೆ ನೀಡಿದ್ದರು.
ಅಲ್ಲಿಯ ತನಕ ಧೋನಿಯ ಸಾಮಥ್ರ್ಯ ಏನಿದ್ರೂ ಹೊಡಿಬಡಿ ಆಟವೇ ಹೊರತು ಅವರಲ್ಲಿ ನಾಯಕತ್ವ ಗುಣಗಳು ಇವೆ ಎಂಬುದು ಯಾರಿಗೂ ಅರಿವು ಇರಲಿಲ್ಲ. ಹೊಸ ಮಾದರಿಯ ಆಟದ ಕಲೆಯನ್ನು ತ್ವರಿತವಾಗಿ ಕಲಿತುಕೊಂಡ ಧೋನಿ ಯಾರು ನಿರೀಕ್ಷೆ ಮಾಡದ ರೀತಿಯಲ್ಲಿ ಟೀಮ್ ಇಂಡಿಯಾವನ್ನು ಪ್ರಶಸ್ತಿ ಗೆಲ್ಲುವಂತೆ ಮಾಡಿದ್ರು. ಅದ್ರಲ್ಲೂ ಫೈನಲ್ ಪಂದ್ಯದಲ್ಲಿ ಜೋಗಿದಂರ್ ಶರ್ಮಾ ಕೈಗೆ ಚೆಂಡನ್ನು ನೀಡಿದಾಗ ಧೋನಿಗೆ ಬೈದವರೇ ಹೆಚ್ಚು. ಆದ್ರೆ ಧೋನಿಯ ನಂಬಿಕೆಯನ್ನು ಹುಸಿಗೊಳಿಸಲಿಲ್ಲ.
ನಂತರ ಧೋನಿ ಏಕದಿನ ಮತ್ತು ಟೆಸ್ಟ್ ತಂಡಕ್ಕೂ ಸಾರಥಿಯಾದ್ರು. ಧೋನಿಯ ನಾಯಕತ್ವದಲ್ಲಿ ಟೀಮ್ ಇಂಡಿಯಾ ಮತ್ತಷ್ಟು ಬಲಿಷ್ಠ ತಂಡವಾಗಿ ಹೊರಹೊಮ್ಮಿತ್ತು. ಪ್ರಮುಖ ಪ್ರಶಸ್ತಿಗಳನ್ನು ಗೆದ್ದುಕೊಂಡಿತ್ತು. ಅದರಲ್ಲಿ ಪ್ರಮುಖವಾದದ್ದು 2011 ಏಕದಿನ ವಿಶ್ವಕಪ್ ಮತ್ತು 2013ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಹಾಗೂ ಐಸಿಸಿ ಟೆಸ್ಟ್ ಶ್ರೇಯಾಂಕ ಪಟ್ಟಿಯಲ್ಲಿ ನಂಬರ್ ವನ್ ಸ್ಥಾನವನ್ನು ಪಡೆದುಕೊಂಡಿತ್ತು.
ಧೋನಿ ನಾಯಕತ್ವದಲ್ಲಿ ಟೀಮ್ ಇಂಡಿಯಾ ಗೆದ್ದಿರುವ ಪ್ರಮುಖ ಪ್ರಶಸ್ತಿಗಳು
2007ರ ಚೊಚ್ಚಲ ಐಸಿಸಿ ಟಿ-ಟ್ವೆಂಟಿ ವಿಶ್ವಕಪ್
2008ರ ಸಿಬಿ ತ್ರಿಕೊನ ಏಕದಿನ ಸರಣಿ
2009ರ ಕಾಂಪ್ಯಾಕ್ ಕಪ್
2010ರ ಏಷ್ಯಾಕಪ್ ಪ್ರಶಸ್ತಿ
2011ರ ಐಸಿಸಿ ಏಕದಿನ ವಿಶ್ವಕಪ್ ಕಿರೀಟ
2013ರ ಐಸಿಸಿ ಚಾಂಪಿಯನ್ ಟ್ರೋಫಿ ಪ್ರಶಸ್ತಿ
2013ರಲ್ಲಿ ವೆಸ್ಟ್ ಇಂಡೀಸ್ ತ್ರಿಕೋನ ಏಕದಿನ ಸರಣಿ
2016ರ ಏಷ್ಯಾಕಪ್ ಕ್ರಿಕೆಟ್ ಟೂರ್ನಿ
ಮೂರು ಬಾರಿ ಐಪಿಎಲ್ ಪ್ರಶಸ್ತಿ
2010ರ ಐಪಿಎಲ್ ಪ್ರಶಸ್ತಿ
2011ರ ಐಪಿಎಲ್ ಪ್ರಶಸ್ತಿ
2018ರ ಐಪಿಎಲ್ ಪ್ರಶಸ್ತಿ
ಒಟ್ಟಾರೆ ನಾಲ್ಕು ವಿಶ್ವಕಪ್ ಟೂರ್ನಿಗಳಲ್ಲಿ ಆಡಿರುವ ಧೋನಿ ಎರಡು ವಿಶ್ವಕಪ್ ಟೂರ್ನಿಗೆ ನಾಯಕನಾಗಿದ್ದರು. 2011ರ ವಿಶ್ವಕಪ್ ಪ್ರಶಸ್ತಿ ಗೆದ್ರೆ, 2015ರಲ್ಲಿ ಸೆಮಿಫೈನಲ್ ನಲ್ಲಿ ಸೋಲು ಅನುಭವಿಸಿದ್ರು. ಇನ್ನು 2019ರ ವಿಶ್ವಕಪ್ ಟೂರ್ನಿಯಲ್ಲಿ ತನ್ನ ಕೊನೆಯ ಅಂತಾರಾಷ್ಟ್ರೀಯ ಪಂದ್ಯವನ್ನು ಆಡಿದ್ದರು. ಸೆಮಿಫೈನಲ್ ನಲ್ಲಿ ರನೌಟ್ ಆಗಿದ್ದ ಧೋನಿ ಬಳಿಕ ಯಾವುದೇ ಕ್ರಿಕೆಟ್ ಪಂದ್ಯಗಳನ್ನು ಆಡಿಲ್ಲ.
ಹಾಗೇ ಧೋನಿ ಐಪಿಎಲ್ ಟೂರ್ನಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಖಾಯಂ ನಾಯಕ. 12 ಆವೃತ್ತಿಗಳಲ್ಲಿ ಧೋನಿ 11 ಬಾರಿ ಸಿಎಸ್ಕೆ ತಂಡವನ್ನು ಮನ್ನಡೆಸಿದ್ದಾರೆ. 2016 ಮತ್ತು 2017ರಲ್ಲಿ ಸಿಎಸ್ಕೆ ತಂಡಕ್ಕೆ ನಿಷೇಧ ಹೇರಲಾಗಿತ್ತು. ಹೀಗಾಗಿ ಧೋನಿ ಪುಣೆ ತಂಡವನ್ನು ಪ್ರತಿನಿಧಿಸಿದ್ದರು. ಸಿಎಸ್ಕೆ ತಂಡದ ನಾಯಕನಾಗಿ ಧೋನಿ 2010, 2011 ಮತ್ತು 2018ರಲ್ಲಿ ಪ್ರಶಸ್ತಿ ಗೆದ್ದುಕೊಂಡಿದ್ದರು. ಐದು ಬಾರಿ ರನ್ನರ್ ಅಪ್ ಗೆದ್ದುಕೊಂಡಿದ್ದಾರೆ. ಒಂದು ಬಾರಿ ಮೂರನೇ ಸ್ಥಾನ ಮತ್ತು ಒಂದು ಬಾರಿ ಸೆಮಿಫೈನಲ್ ತಲುಪಿತ್ತು. ಇದೀಗ 13ನೇ ಆವೃತ್ತಿಯ ಟೂರ್ನಿಯನ್ನು ಎದುರು ನೋಡುತ್ತಿದ್ದಾರೆ.
