ಜೆಎನ್ಯು ವಿದ್ಯಾರ್ಥಿ ಶಾರ್ಜೀಲ್ ಇಮಾಮ್ ಬಂಧನ
ನವದೆಹಲಿ, ಆಗಸ್ಟ್ 26: ದೆಹಲಿ ಗಲಭೆಗೆ ಸಂಬಂಧಿಸಿದಂತೆ ಜೆಎನ್ಯು ವಿದ್ಯಾರ್ಥಿ ಶಾರ್ಜೀಲ್ ಇಮಾಮ್ರನ್ನು ಕಾನೂನುಬಾಹಿರ ಚಟುವಟಿಕೆ ತಡೆ ಕಾಯ್ದೆಯಡಿ ದೆಹಲಿ ಪೊಲೀಸರು ಮಂಗಳವಾರ ಬಂಧಿಸಿದ್ದಾರೆ.
ಡಿಸೆಂಬರ್ 13 ರಂದು ಮಾಡಿದ ಭಾಷಣದೊಂದಿಗೆ ಗಲಭೆಗಳನ್ನು ಪ್ರಚೋದಿಸಿದ ಆರೋಪದ ಮೇಲೆ ಇಮಾಮ್ ನನ್ನು ಬಂಧಿಸಲಾಯಿತು. ದೇಶದ್ರೋಹ, ವಿವಿಧ ಸಮುದಾಯಗಳ ನಡುವೆ ದ್ವೇಷವನ್ನು ಉತ್ತೇಜಿಸುವುದು, ವದಂತಿಗಳನ್ನು ಹರಡುವುದಕ್ಕೆ ಸಂಬಂಧಿಸಿದಂತೆ ಆತನನ್ನು 124-ಎ, 153 (ಎ) , 153-ಎ, 153-ಬಿ, ಭಾರತ ದಂಡ ಸಂಹಿತೆಯ 505 ಮತ್ತು ಕಠಿಣ ಯುಎಪಿಎ ವಿಭಾಗ 13 ರ ಅಡಿಯಲ್ಲಿ ಬಂಧಿಸಲಾಗಿದೆ.
ಶಾರ್ಜೀಲ್ ಇಮಾಮ್ ಐಐಟಿ ಮುಂಬೈಯಿಂದ ಪದವಿ ಪಡೆದಿದ್ದಾನೆ ಮತ್ತು ನಂತರ ಜೆಎನ್ಯು ಸೆಂಟರ್ ಫಾರ್ ಹಿಸ್ಟಾರಿಕಲ್ ಸ್ಟಡೀಸ್ನಲ್ಲಿ ಸಂಶೋಧನೆ ನಡೆಸಲು ದೆಹಲಿಗೆ ತೆರಳಿದ್ದನು.
ಶಹೀನ್ ಬಾಗ್ನಲ್ಲಿನ ಪ್ರತಿಭಟನೆಗಳನ್ನು ಆಯೋಜಿಸುವಲ್ಲಿ ಆತ ಭಾಗಿಯಾಗಿರುವುದು ವೈರಲ್ ಆದ ವೀಡಿಯೊ ಕ್ಲಿಪ್ ನಿಂದ ಬೆಳಕಿಗೆ ಬಂದಿದೆ.
ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ಕ್ಯಾಂಪಸ್ನಲ್ಲಿ ಈ ಹಿಂದೆ ಅವನು ದ್ವೇಷದ ಭಾಷಣ ನೀಡಿದ್ದ ಮತ್ತು ರಾಷ್ಟ್ರ ರಾಜಧಾನಿಯಲ್ಲಿ ಆತನ ವಿರುದ್ಧ ಎಫ್ಐಆರ್ ದಾಖಲಾಗಿದೆ ಎಂದು ದೆಹಲಿ ಪೊಲೀಸರು ಹೇಳಿದ್ದಾರೆ. ಮಣಿಪುರ ಮತ್ತು ಅರುಣಾಚಲ ಪ್ರದೇಶದ ಪೊಲೀಸರು ಜೆಎನ್ಯು ವಿದ್ಯಾರ್ಥಿ ವಿರುದ್ಧ ಎಫ್ಐಆರ್ ದಾಖಲಿಸಿದ್ದಾರೆ. ಕಳೆದ ವರ್ಷ ಸಿಎಎ ವಿರೋಧಿ ಪ್ರತಿಭಟನೆಯ ಸಂದರ್ಭದಲ್ಲಿ ದ್ವೇಷ ಭಾಷಣ ಮಾಡಿದ ಆರೋಪದ ಮೇಲೆ ಶಾರ್ಜೀಲ್ ಇಮಾಮ್ ನನ್ನು ಗುವಾಹಟಿ ಕೇಂದ್ರ ಕಾರಾಗೃಹದಲ್ಲಿ ಬಂಧಿಸಲಾಗಿತ್ತು.
