ಸಿಪಿಎಲ್ 2020- ಸಿಮೋನ್ಸ್ ಭರ್ಜರಿ ಆಟ… ಟ್ರಿಂಬಾಗೋ ನೈಟ್ ರೈಡರ್ಸ್ ತಂಡಕ್ಕೆ ಸತತ ಎಂಟನೇ ಜಯ
2020ರ ಕೆರೆಬಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಟ್ರಿಂಬಾಗೋ ನೈಟ್ ರೈಡರ್ಸ್ ತಂಡ ಸೋಲಿಲ್ಲದ ಸರದಾರನಂತೆ ಮರೆದಾಡುತ್ತಿದೆ. ಟೂರ್ನಿಯ 23ನೇ ಪಂದ್ಯದಲ್ಲಿ ನೈಟ್ ರೈಡರ್ಸ್ ತಂಡ 59 ರನ್ ಗಳಿಂದ ಸೇಂಟ್ ಕಿಟ್ಸ್ ಮತ್ತು ನೆವಿಸ್ ಪೆಟ್ರಿಯೋಟ್ಸ್ ತಂಡವನ್ನು ಪರಾಭವಗೊಳಿಸಿದೆ. ಈ ಗೆಲುವಿನೊಂದಿಗೆ ಟ್ರಿಂಬಾಗೋ ನೈಟ್ ರೈಡರ್ಸ್ ತಂಡ ಸತತ ಎಂಟು ಪಂದ್ಯಗಳನ್ನು ಗೆದ್ದು ಅಗ್ರ ಸ್ಥಾನ ಕಾಯ್ದುಕೊಂಡಿದೆ. ಸೇಂಟ್ ಕಿಟ್ಸ್ ತಂಡ ಎಂಟು ಪಂದ್ಯಗಳಲ್ಲಿ ಏಳನೇ ಸೋಲು ಅನುಭವಿಸಿ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ.
ಟ್ರಿನಿಡಾಡ್ ನ ಬ್ರಿಯಾನ್ ಲಾರಾ ಮೈದಾನದಲ್ಲಿ ಟಾಸ್ ಸೋತ ಟ್ರಿಂಬಾಗೋ ನೈಟ್ ರೈಡರ್ಸ್ ತಂಡಕ್ಕೆ ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ಸಿಕ್ಕಿತ್ತು. ಆರಂಭಿಕ ಲೆಂಡ್ಲ್ ಸಿಮೋನ್ಸ್ ಅವರ ಮನಮೋಹಕ 96 ರನ್ ಗಳ ಸಹಾಯದಿಂದ ನೈಟ್ ರೈಡರ್ಸ್ ತಂಡ ನಿಗದಿತ 20 ಓವರ್ ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 174 ರನ್ ದಾಖಲಿಸಿತ್ತು. ಸಿಮೋನ್ಸ್ ಅವರಿಗೆ ಡರೇನ್ ಬ್ರೇವೋ ಅವರು ಅತ್ಯುತ್ತಮ ಸಾಥ್ ನೀಡಿದ್ರು. ಅಲ್ಲದೆ ಆಕರ್ಷಕ 36 ರನ್ ಗಳಿಸಿದ್ರು. ಎರಡನೇ ವಿಕೆಟ್ಗೆ 130 ರನ್ ಗಳ ಜೊತೆಯಾಟವನ್ನು ಆಡಿದ್ದರು. ಈ ನಡುವೆ ಕಾಲಿನ್ ಮುನ್ರೋ ಅವರು 9 ರನ್ ಗಳಿಸಿ ರಿಟೈರ್ಟ್ ಹರ್ಟ್ ಆದ್ರು.
ಕಠಿಣ ಸವಾಲನ್ನು ಬೆನ್ನಟ್ಟಿದ್ದ ಸೇಂಟ್ ಕಿಟ್ಸ್ & ನೆವಿಸ್ ಪೆಟ್ರಿಯೋಟ್ಸ್ ತಂಡ ರನ್ ಗಳಿಸಲು ಒದ್ದಾಟ ನಡೆಸಿತ್ತು. ನೈಟ್ ರೈಡರ್ಸ್ ತಂಡದ ಶಿಸ್ತು ಬದ್ಧ ದಾಳಿಗೆ ಮಣಿದ ಸೇಂಟ್ ಕಿಟ್ಸ್ ತಂಡ 20 ಓವರ್ ಗಳಲ್ಲಿ ಏಳು ವಿಕೆಟ್ ಕಳೆದುಕೊಂಡು 115 ರನ್ ಗಳಿಸಷ್ಟೇ ಶಕ್ತವಾಯ್ತು. ಸೇಂಟ್ ಕಿಟ್ಸ್ ತಂಡದ ಪರ ಕ್ರಿಸ್ ಲಿಯಾನ್ 34 ರನ್ ಹಾಗೂ ಜೊಶುವಾ ಡಿಸಿಲ್ವಾ 29 ರನ್ ಗಳಿಸಿ ಕೊಂಚ ಮಟ್ಟಿನ ಪ್ರತಿರೋಧ ಒಡ್ಡಿದರು. ಅಂತಿಮವಾಗಿ ಸೇಂಟ್ ಕಿಟ್ಸ್ ತಂಡ 59 ರನ್ ಗಳಿಂದ ಸೋಲು ಒಪ್ಪಿಕೊಂಡಿತ್ತು. ಶತಕ ವಂಚಿತ ಸಿಮೋನ್ಸ್ ಅವರು ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದುಕೊಂಡ್ರು.
