ಮೂತ್ರಪಿಂಡ (ಕಿಡ್ನಿ) ಗಳಿಗೆ ಹಾನಿಯುಂಟು ಮಾಡುವ 5 ಅತ್ಯಂತ ಸಾಮಾನ್ಯ ಆಹಾರಗಳು
ಮಂಗಳೂರು, ಸೆಪ್ಟೆಂಬರ್11: ಮೂತ್ರಪಿಂಡಗಳು ಹುರುಳಿಯ ಆಕಾರದಲ್ಲಿರುವ ಆಂತರಿಕ ಅಂಗಗಳಾಗಿವೆ. ಮೂತ್ರದ ರೂಪದಲ್ಲಿ ತ್ಯಾಜ್ಯವನ್ನು ಹೊರಹಾಕುವಲ್ಲಿ ಇದು ಪ್ರಮುಖ ಪಾತ್ರ ವಹಿಸುತ್ತದೆ. ಈ ಅಂಗವು ನಿಮ್ಮ ದೇಹದಿಂದ ಹೆಚ್ಚುವರಿ ಖನಿಜಗಳು, ಕ್ಷಾರೀಯ ಕಲ್ಲುಗಳು ಮತ್ತು ಕಣಗಳಂತಹ ವಸ್ತುಗಳನ್ನು ಬಹಳ ಪರಿಣಾಮಕಾರಿಯಾಗಿ ತೆರವುಗೊಳಿಸುತ್ತದೆ.
ದೇಹದ ಸಾಮಾನ್ಯ ಕಾರ್ಯವನ್ನು ಉತ್ತೇಜಿಸುವ ಆರೋಗ್ಯಕರ ಆಹಾರವನ್ನು ತಿನ್ನುವ ಮೂಲಕ ಮೂತ್ರಪಿಂಡಕ್ಕೆ ಸರಿಯಾದ ಆರೈಕೆಯ ಅಗತ್ಯವಿರುತ್ತದೆ. ಯಾವುದೇ ಕಾಯಿಲೆ ಬರದಂತೆ ತಡೆಯಲು ಮೂತ್ರಪಿಂಡದ ಕಾರ್ಯವನ್ನು ಬೆಂಬಲಿಸುವ ಆಹಾರವನ್ನು ಸೇವಿಸಬೇಕು. ಹಾಗೆಯೇ ಮೂತ್ರಪಿಂಡಕ್ಕೆ ತೊಂದರೆ ಉಂಟುಮಾಡುವ ಆಹಾರವನ್ನು ತಪ್ಪಿಸುವುದು ಕೂಡ ಅವಶ್ಯಕ.
ಮೂತ್ರಪಿಂಡ ಸಂಬಂಧಿತ ಕಾಯಿಲೆಗಳಿಗೆ ಕಾರಣವಾಗುವ ಕೆಲವು ಸಾಮಾನ್ಯ ಆಹಾರಗಳು ಇಲ್ಲಿವೆ.
ಮಾಂಸ – ಮಾಂಸಾಹಾರಿ ಆಹಾರವನ್ನ ಅಧಿಕವಾಗಿ ಸೇವಿಸಿದರೆ ಮೂತ್ರಪಿಂಡಕ್ಕೆ ಸಂಬಂಧಿಸಿದ ಸಮಸ್ಯೆಗಳನ್ನು ತರಬಹುದು. ಸಾಮಾನ್ಯವಾಗಿ, ಪ್ರಾಣಿ ಪ್ರೋಟೀನ್ ಗಳು ಚಯಾಪಚಯಗೊಳ್ಳುವುದು ಕಷ್ಟ ಮತ್ತು ತ್ಯಾಜ್ಯ ಉತ್ಪನ್ನಗಳನ್ನು ನಿರ್ಮೂಲನೆ ಮಾಡುವಲ್ಲಿ ಮೂತ್ರಪಿಂಡಗಳಿಗೆ ಹೊರೆಯಾಗುತ್ತವೆ. ಮಾಂಸವು ಯೂರಿಕ್ ಆಮ್ಲದ ಉತ್ಪಾದನೆಯನ್ನು ಉತ್ತೇಜಿಸುವುದರಿಂದ ನಿಧಾನವಾಗಿ ಪ್ರಾಣಿ ಪ್ರೋಟೀನ್ ಗಳು ಮೂತ್ರಪಿಂಡದಲ್ಲಿ ಕಲ್ಲಿನ ರಚನೆಯನ್ನು ಅಭಿವೃದ್ಧಿಪಡಿಸುತ್ತವೆ. ಮಾಂಸದ ಬದಲಾಗಿ ದೇಹವನ್ನು ಪೋಷಿಸಲು ಇತರ ಪ್ರೋಟೀನ್ ಭರಿತ ತರಕಾರಿಗಳು ಮತ್ತು ಬೀಜಗಳನ್ನು ಆಹಾರದಲ್ಲಿ ಸೇರಿಸಿ.
ಉಪ್ಪು-ಆಹಾರದಲ್ಲಿ ಹೆಚ್ಚು ಉಪ್ಪಿನಂಶವನ್ನು ಸೇವಿಸುವುದು ಯಾವುದೇ ಮೂತ್ರಪಿಂಡದ ಸಮಸ್ಯೆಗೆ ಕಾರಣವಾಗಬಹುದು. ಮೂತ್ರಪಿಂಡಗಳು ಹೆಚ್ಚುವರಿ ಸೋಡಿಯಂ ಅನ್ನು ತ್ಯಜಿಸುವುದು ಕಷ್ಟವಾಗುತ್ತದೆ. ಒಂದು ಟೀ ಚಮಚ ಉಪ್ಪು ಆರೋಗ್ಯಕರ ಆಹಾರಕ್ಕೆ ಸಾಕು. ಮನೆಯಲ್ಲಿ ತಯಾರಿಸಿದ ಆಹಾರವನ್ನು ತಯಾರಿಸುವಾಗ ನಾವು ಜಾಗರೂಕರಾಗಿರಬಹುದು. ಆದರೆ ಸಂಸ್ಕರಿಸಿದ, ಪ್ಯಾಕೇಜ್ ಮಾಡಿದ ಮತ್ತು ಹೆಪ್ಪುಗಟ್ಟಿದ ಆಹಾರದಿಂದ ಸಮಸ್ಯೆ ಹೆಚ್ಚಾಗುತ್ತದೆ. ಯಾವುದೇ ರೆಡಿಮೇಡ್ ಆಹಾರಗಳಿಂದ ದೂರವಿರಲು ಪ್ರಯತ್ನಿಸಿ.
ಬಾಳೆಹಣ್ಣು – ಬಾಳೆ ಹಣ್ಣು ಬಹಳಷ್ಟು ಪೌಷ್ಠಿಕಾಂಶದ ಮೌಲ್ಯಗಳನ್ನು ಹೊಂದಿರುತ್ತದೆ ಮತ್ತು ಶಕ್ತಿ ವರ್ಧಕವಾಗಿ ಕಾರ್ಯನಿರ್ವಹಿಸುತ್ತದೆ. ನೀವು ಮೂತ್ರಪಿಂಡದ ಸಮಸ್ಯೆಯ ಲಕ್ಷಣಗಳನ್ನು ಹೊಂದಿದ್ದರೆ ಬಾಳೆಹಣ್ಣು ತಿನ್ನುವುದನ್ನು ತಪ್ಪಿಸಿ. ಬಾಳೆ ಹಣ್ಣಿನಲ್ಲಿ ಹೆಚ್ಚಿನ ಮಟ್ಟದ ಪೊಟ್ಯಾಸಿಯಮ್ ಇರುವುದರಿಂದ ಮೂತ್ರಪಿಂಡ ಸರಿಯಾಗಿ ಕಾರ್ಯನಿರ್ವಹಿಸುವುದಿಲ್ಲ. ಆದ್ದರಿಂದ ಆರೋಗ್ಯದ ಗಂಭೀರ ಸಮಸ್ಯೆಗಳಿಗೆ ಕಾರಣವಾಗುತ್ತದೆ.
ಡೈರಿ ಉತ್ಪನ್ನಗಳು – ಅತಿಯಾದರೆ ಯಾವುದು ಒಳ್ಳೆಯದಲ್ಲ ಎಂಬ ಮಾತೊಂದಿದೆ. ಚೀಸ್, ಹಾಲು ಮತ್ತು ಮೊಸರಿನಂತಹ ಯಾವುದೇ ಡೈರಿ ಉತ್ಪನ್ನವನ್ನು ಅಧಿಕವಾಗಿ ಸೇವಿಸಿದರೆ ಮೂತ್ರಪಿಂಡದ ಗಂಭೀರ ಸಮಸ್ಯೆಗಳು ಉಂಟಾಗುತ್ತವೆ. ರಂಜಕದ ಅಂಶವು ಅಧಿಕವಾಗಿದ್ದು ಅದು ಮೂತ್ರಪಿಂಡಕ್ಕೆ ಹೊರೆಯಾಗುತ್ತದೆ. ಸರಿಯಾದ ಪ್ರಮಾಣದ ಪೌಷ್ಠಿಕಾಂಶವನ್ನು ಪಡೆಯಲು ಈ ಆಹಾರಗಳನ್ನು ಮಿತವಾಗಿ ಸೇವಿಸಿ.
ಕಿತ್ತಳೆ – ಇದು ಹೆಚ್ಚಿನ ಮಟ್ಟದ ಪೊಟ್ಯಾಸಿಯಮ್ ಮತ್ತು ವಿಟಮಿನ್ ಸಿ ಅನ್ನು ಹೊಂದಿದೆ. ಕಿಡ್ನಿ ಹೆಚ್ಚುವರಿ ಪೊಟ್ಯಾಸಿಯಮ್ ಅನ್ನು ಫಿಲ್ಟರ್ ಮಾಡಲು ಸಾಧ್ಯವಿಲ್ಲ, ಅದು ಮೂತ್ರಪಿಂಡದ ಸಾಮಾನ್ಯ ಕಾರ್ಯವನ್ನು ಅಡ್ಡಿಪಡಿಸುತ್ತದೆ. ನೀವು ಮೂತ್ರಪಿಂಡದ ಸಮಸ್ಯೆಯಿಂದ ಬಳಲುತ್ತಿದ್ದರೆ ಈ ಹಣ್ಣನ್ನು ತಿನ್ನುವುದನ್ನು ತಪ್ಪಿಸಿ.
ಅಷ್ಟೇ ಅಲ್ಲ ನೀವು ಮೂತ್ರಪಿಂಡ ಸಂಬಂಧಿತ ಸಮಸ್ಯೆಯಿಂದ ಬಳಲುತ್ತಿದ್ದರೆ ಯಾವ ಆಹಾರವನ್ನು ಸೇವಿಸಬೇಕು ಎಂಬ ಬಗ್ಗೆ ವೈದ್ಯರ ಸಲಹೆಯನ್ನು ತೆಗೆದುಕೊಳ್ಳಿ.
