ಹೊಸದಿಲ್ಲಿ, ಮೇ 22 : ಕೊರೋನಾ ವೈರಸ್ ಎಂಬ ವೈರಾಣು ಬಡವ ಬಲ್ಲಿದನೆಂಬ ಭೇದವಿಲ್ಲದೆ ಹೇಗೆ ಒಬ್ಬರಿಂದೊಬ್ಬರಿಗೆ ಹರಡಬಲ್ಲದೋ ಅದೇ ರೀತಿ ಪ್ರತಿಯೊಬ್ಬರ ಬದುಕಲ್ಲೂ ತನ್ನ ಕರಾಳ ರೂಪವನ್ನು ತೋರಿಸಿದೆ. ಡ್ರೀಮ್ ಗರ್ಲ್ ಎಂಬ ಬಾಲಿವುಡ್ ಸಿನಿಮಾದಲ್ಲಿ ಆಯುಷ್ಮಾನ್ ಖುರಾನಾ ಜೊತೆ ನಟಿಸಿದ್ದ ಸೋಲಂಕಿ ದಿವಾಕರ್ ಎಂಬ ನಟ ಹಣ್ಣುಗಳನ್ನು ಮಾರಾಟ ಮಾಡಿ ಮನೆಯ ಖರ್ಚು ವೆಚ್ಚಗಳನ್ನು ನಿಭಾಯಿಸುತ್ತಿದ್ದಾರೆ. ನೂರಾರು ಕನಸುಗಳನ್ನು ಕಟ್ಟಿಕೊಂಡು ಬಾಲಿವುಡ್ ಚಿತ್ರರಂಗದಲ್ಲಿ ಅವಕಾಶಕ್ಕಾಗಿ ಕಾಯುತ್ತಿದ್ದ ಈ ನಟನ ಬದುಕನ್ನು ಕೊರೋನಾ ಎಂಬ ಮಹಾಮಾರಿ ಸಂಕಷ್ಟಕ್ಕೆ ತಳ್ಳಿದೆ. ಡ್ರೀಮ್ ಗರ್ಲ್ ಎಂಬ ಬಾಲಿವುಡ್ ಸಿನಿಮಾದಲ್ಲಿ ಆಯುಷ್ಮಾನ್ ಖುರಾನಾ ಜೊತೆ ನಟಿಸಿದ್ದ 35 ವರ್ಷದ ಸೋಲಂಕಿ ದಿವಾಕರ್ ಬದುಕಿನ ಬಂಡಿ ಸಾಗಿಸಲು ದೆಹಲಿಯ ಬೀದಿಗಳಲ್ಲಿ ಹಣ್ಣಿನ ವ್ಯಾಪಾರ ಮಾಡುತ್ತಿದ್ದಾರೆ.
ಕೊರೋನಾ ಭೀತಿಯ ಹಿನ್ನೆಲೆಯಲ್ಲಿ ಲಾಕ್ ಡೌನ್ ಜಾರಿಯಾಗುತ್ತಿದ್ದಂತೆ ಬಾಲಿವುಡ್ ಚಿತ್ರಗಳು ಶೂಟಿಂಗ್ ನಿಲ್ಲಿಸಿದ್ದು, ಚಲನಚಿತ್ರಗಳಲ್ಲಿ ಸಣ್ಣ ಪಾತ್ರಗಳನ್ನು ನಿರ್ವಹಿಸುತ್ತಿದ್ದ ನಟರ ಮೇಲೆ ಇದು ಪರಿಣಾಮ ಬೀರಿದೆ. ತನ್ನ ಕುಟುಂಬದ ಖರ್ಚು ವೆಚ್ಚ ನಿಭಾಯಿಸಲು ಮತ್ತು ಮನೆ ಬಾಡಿಗೆ ಕಟ್ಟುವ ಅನಿವಾರ್ಯತೆಯಿಂದ ಅವರು ಹಣ್ಣು ಮಾರಾಟ ಮಾಡುತ್ತಿದ್ದಾರೆ.
ಈ ಪರಿಸ್ಥಿತಿಯಲ್ಲಿ ಮನೆಯಲ್ಲಿ ಕುಳಿತು ಕೊಳ್ಳಲು ಸಾಧ್ಯವಿಲ್ಲ. ಮನೆಯ ಬಾಡಿಗೆ ನಾನು ಪಾವತಿಸಬೇಕು. ಅದರ ಜೊತೆ ನನ್ನ ಕುಟುಂಬವನ್ನು ಪೋಷಿಸಬೇಕು. ಆದ್ದರಿಂದ, ನಾನು ಹಣ್ಣುಗಳನ್ನು ಮಾರಾಟ ಮಾಡಲು ಪ್ರಾರಂಭಿಸಿದ್ದೇನೆ. ಯಾವುದೇ ಕೆಲಸ ಮೇಲು ಕೀಳು ಎಂದು ಇಲ್ಲ. ಕೊರೋನಾ ಭೀತಿ ಇಲ್ಲದಿದ್ದರೆ ಮತ್ತು ಲಾಕ್ ಡೌನ್ ಜಾರಿಯಾಗದೇ ಇರುತ್ತಿದ್ದರೆ, ನಾನು ಚಲನಚಿತ್ರಗಳಲ್ಲಿ ಕೆಲವು ಸಣ್ಣ ಪಾತ್ರಗಳನ್ನು ಮಾಡುತ್ತಿದ್ದೆ . ನಟ ರಿಷಿ ಕಪೂರ್ ಅಭಿನಯಿಸಬೇಕಿದ್ದ ಚಿತ್ರಕ್ಕೆ ಕೂಡ ಕಾಲ್ಶೀಟ್ ನೀಡಿದ್ದೆ, ಲಾಕ್ ಡೌನ್ ಸಮಯದಲ್ಲಿ ಅವರು ಕೂಡ ನಮ್ಮನ್ನು ಅಗಲಿದ್ದಾರೆ. ಇನ್ನು ಆ ಚಿತ್ರ ಕೂಡ ಸೆಟ್ಟೇರಲಿದೆಯೇ ಎಂಬುದು ಡೌಟ್. ಆದರೂ ಆದಷ್ಟು ಬೇಗನೆ ಕೊರೊನಾ ಪರಿಸ್ಥಿತಿ ಕೊನೆಗೊಳ್ಳುತ್ತದೆ ಮತ್ತು ಮೊದಲಿನಂತೆ ನಾವು ಬದುಕನ್ನು ಆನಂದಿಸಲು ಸಾಧ್ಯವಾಗುತ್ತದೆ ಎಂದು ಭಾವಿಸಿದ್ದೇನೆ ಎಂದು ಸೋಲಂಕಿ ದಿವಾಕರ್ ಹೇಳಿದ್ದಾರೆ.
ಇದು ಸೋಲಂಕಿ ದಿವಾಕರ್ ಒಬ್ಬರ ಕತೆಯಲ್ಲ. ಅದೆಷ್ಟೋ ಜನರ ಬದುಕು ಕೊರೊನಾ ಎಂಬ ಮಹಾಮಾರಿ ಬೀದಿಗೆ ತಂದಿದೆ. ಅದೆಷ್ಟೋ ಕನಸುಗಳನ್ನು ನಿರ್ದಾಕ್ಷಿಣ್ಯವಾಗಿ ಹಿಸುಕಿ ಹಾಕಿದೆ. ಬದುಕು ಕಟ್ಟಿಕೊಳ್ಳಲು ದೂರದೂರಿಗೆ ಸಾಲಸೋಲ ಮಾಡಿ ಹೊರಟವರನ್ನು, ಕೈ ಖಾಲಿ ಮಾಡಿ ಊರಿಗೆ ವಾಪಸು ಕಳುಹಿಸಿದೆ.
