ದಾಖಲೆಯ 470 ವಿಮಾನಗಳ ಖರೀದಿಗೆ ಒಪ್ಪಂದ ಮಾಡಿಕೊಂಡ ಏರ್ ಇಂಡಿಯಾ…
ಟಾಟಾ ಗ್ರೂಪ ಒಡೆತನದ ಏರ್ ಇಂಡಿಯಾ ಕಂಪನಿ ವಿಶ್ವ ವಿಮಾನಯಾನದಲ್ಲೇ ಬೃಹತ್ ವಿಮಾನಗಳ ಖರೀದಿಗೆ ಮುಂದಾಗಿದೆ. 11 ಲಕ್ಷ ಕೋಟಿ ರೂ ಮೊತ್ತದಲ್ಲಿ 250 ಏರ್ಬಸ್ ವಿಮಾನ ಹಾಗೂ 220 ಬೋಯಿಂಗ್ ವಿಮಾನಗಳ ಖರೀದಿ ಒಪ್ಪಂದವನ್ನ ಏರ್ ಇಂಡಿಯಾ ಘೋಷಿಸಿದೆ. ಈ ಪೈಕಿ ಫ್ರಾನ್ಸ್ನ ಏರ್ಬಸ್ಗೆ 8.2 ಲಕ್ಷ ಕೋಟಿ ರು. ಹಾಗೂ ಅಮೆರಿಕದ ಬೋಯಿಂಗ್ಗೆ 2.7 ಲಕ್ಷ ಕೋಟಿ ರು.ಗಳನ್ನು ಏರ್ ಇಂಡಿಯಾ ಪಾವತಿಸಲಿದೆ.
ಫ್ರಾನ್ಸ್ ಮೂಲದ ಏರ್ಬಸ್ ಜೊತೆಗೆ ಒಪ್ಪಂದಕ್ಕೆ ಸಹಿ ಹಾಕಿದ ಏರ್ ಇಂಡಿಯಾದ ಮುಖ್ಯಸ್ಥ ಎನ್.ಚಂದ್ರಶೇಖರನ್ ‘40 ವೈಡ್ ಬಾಡಿ ಎ350 ವಿಮಾನಗಳು ಮತ್ತು 210 ನ್ಯಾರೋ ಬಾಡಿ ಎ320 ವಿಮಾನಗಳು ಸೇರಿದಂತೆ 250 ವಿಮಾನಗಳ ಖರೀದಿಗೆ ಏರ್ಬಸ್ ಜೊತೆಗೆ ಒಪ್ಪಂದ ಮಾಡಿಕೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.
ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಅವರು ಭಾರತದ ಏರ್ ಇಂಡಿಯಾ ತಮ್ಮ ದೇಶದ ಬೋಯಿಂಗ್ನಿಂದ 220 ವಿಮಾನಗಳನ್ನು ಏರ್ ಇಂಡಿಯಾ ಖರೀದಿಸಲಿದೆ ಎಂದು ವಾಷಿಂಗ್ಟನ್ನಲ್ಲಿ ಘೋಷಿಸಿದ್ದಾರೆ. ಇದೊಂದು ಐತಿಹಾಸಿಕ ಒಪ್ಪಂದವಾಗಿದೆ ಅಮೆರಿಕದಲ್ಲಿ ಇದರಿಂದ 10 ಲಕ್ಷ ಉದ್ಯೋಗ ಸೃಷ್ಟಿಆಗಲಿವೆ ಎಂದು ಬಣ್ಣಿಸಿದ್ದಾರೆ. ಬಳಿಕ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರ ಜತೆ ಫೋನ್ನಲ್ಲಿ ಮಾತನಾಡಿ, ‘ವ್ಯಾಪಾರ ಅಭಿವೃದ್ಧಿಯಲ್ಲಿ ಒಟ್ಟಾಗಿ ಸಾಗೋಣ’ ಎಂದರು.
“ಈ ಒಪ್ಪಂದವು ಭಾರತ ಮತ್ತು ಫ್ರಾನ್ಸ್ ನಡುವಿನ ಸೌಹಾರ್ದ ಸಂಬಂಧದಲ್ಲಿ ಒಂದು ಮೈಲಿಗಲ್ಲು” ಎಂದು ಫ್ರಾನ್ಸ್ ಇಮ್ಯಾನುಯೆಲ್ ಮ್ಯಾಕ್ರನ್ ಬಣ್ಣಿಸಿದ್ದಾರೆ. 17 ವರ್ಷಗಳಿಂದ ಏರ್ ಇಂಡಿಯಾ ಹೊಸ ವಿಮಾನಗಳನ್ನ ಖರೀದಿಸಿರಲಿಲ್ಲ. ಸರ್ಕಾರಿ ಒಡೆತನದಲ್ಲಿದ್ದ ಏರ್ ಇಂಡಿಯಾವನ್ನ ಟಾಟಾ ಗ್ರೂಪ್ ತನ್ನ ತೆಕ್ಕೆಗೆ ತೆಗೆದುಕೊಂಡ ನಂತರ ನಡೆಯುತ್ತಿರುವ ಅತಿದೊಡ್ಡ ವಿಮಾನಯಾನ ಖರೀದಿ ಒಪ್ಪಂದ ಇದಾಗಿದೆ.
Air India to buy record 470 passenger jets from Boeing and Airbus
