ಇನ್ನೊಂದು ವಿಶ್ವಕಪ್ ಆಡಬೇಕು… ಆದ್ರೆ ಅವಕಾಶ ಸಿಗಲ್ಲ ಅಂತ ಗೊತ್ತು – ಕ್ರಿಸ್ ಗೇಲ್
ಟಿ-20 ಕ್ರಿಕೆಟ್ ನ ಯೂನಿವರ್ಸಲ್ ಬಾಸ್ ಕ್ರಿಸ್ ಗೇಲ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಗೆ ವಿದಾಯ ಹೇಳಿಲ್ಲ.
ಬದಲಾಗಿ ಇನ್ನೊಂದು ಟಿ-20 ವಿಶ್ವಕಪ್ ಆಡುವ ಇರಾದೆಯಲ್ಲಿದ್ದಾರೆ. ಅಷ್ಟೇ ಅಲ್ಲ, ತವರು ನೆಲ ಜಮೈಕಾದಲ್ಲಿ ಕೊನೆಯ ಪಂದ್ಯವನ್ನು ಆಡಬೇಕು ಎಂಬ ಇಚ್ಛೆಯನ್ನು ಕ್ರಿಸ್ ಗೇಲ್ ವ್ಯಕ್ತಪಡಿಸಿದ್ದಾರೆ.
ದುಬೈ ನಲ್ಲಿ ನಡೆದ ಐಸಿಸಿ ಟಿ-20 ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ನೀರಸ ಪ್ರದರ್ಶನವನ್ನು ನೀಡಿತ್ತು. ಎರಡು ಬಾರಿ ಚಾಂಪಿಯನ್ ಆಗಿದ್ದ ಕೆರೆಬಿಯನ್ನರು ಈ ವಿಶ್ವಕಪ್ ನಲ್ಲಿ ತಮ್ಮ ಘನತೆ ಮತ್ತು ನಿರೀಕ್ಷೆಗೆ ತಕ್ಕಂತೆ ಆಡಲಿಲ್ಲ. ಇದು ಕೆರೆಬಿಯನ್ ಕ್ರಿಕೆಟ್ ಅಭಿಮಾನಿಗಳಿಗೆ ನಿರಾಸೆಯನ್ನುಂಟು ಮಾಡಿದ್ರೆ, ಕ್ರಿಕೆಟ್ ಜಗತ್ತಿಗೆ ಅಚ್ಚರಿಯನ್ನುಂಟು ಮಾಡಿದೆ. ಯಾಕಂದ್ರೆ ವೆಸ್ಟ್ ಇಂಡೀಸ್ ತಂಡದಲ್ಲಿ ಟಿ-20 ಸ್ಪೆಷಲಿಸ್ಟ್ ಆಟಗಾರರಾಗಿದ್ದಾರೆ. ಆದ್ರೆ ಒಂದು ತಂಡವಾಗಿ ಆಡಲು ಮಾತ್ರ ವೆಸ್ಟ್ ಇಂಡೀಸ್ ವಿಫಲವಾಗುತ್ತಿದೆ.
ಇದೀಗ ವೆಸ್ಟ್ ಇಂಡೀಸ್ ಕ್ರಿಕೆಟ್ ನ ದಿಗ್ಗಜ ಕ್ರಿಸ್ ಗೇಲ್ ಟ್ವಿಟ್ ಮಾಡಿದ್ದಾರೆ. ನಾನು ಹೋಗುವುದಿಲ್ಲ ಎಂದು ತನ್ನ ಸಾಮಾಜಿಕ ಜಾಲ ತಾಣದ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಅಂದ್ರೆ ಕ್ರಿಸ್ ಗೇಲ್ ಕ್ರಿಕೆಟ್ ಬದುಕಿಗೆ ವಿದಾಯ ಸದ್ಯಕ್ಕಂತೂ ಹೇಳುವುದಿಲ್ಲ ಎಂದಾಯ್ತು. ನನಗೆ ಇನ್ನೊಂದು ವಿಶ್ವಕಪ್ ಆಡುವ ಮನಸ್ಸು ಇದೆ. ಆದ್ರೆ ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿ ನನಗೆ ಅವಕಾಶ ನೀಡುವುದಿಲ್ಲ ಎಂಬುದು ಗೊತ್ತು. ಆದ್ರೂ ನನ್ನ ವಿದಾಯದ ಪಂದ್ಯಕ್ಕೆ ಅವಕಾಶ ಮಾಡಿಕೊಡಬೇಕು. ಅದು ಕೂಡ ನನ್ನ ತವರು ನೆಲ ಜಮೈಕಾದಲ್ಲೇ ಆಗಬೇಕು. ಆಗ ನಾನು ಹೇಳಬಹುದು. ಧನ್ಯವಾದಗಳು.. ಮತ್ತೆ ನೋಡೋಣ ಅಂತ ಎಂದು ಕ್ರಿಸ್ ಗೇಲ್ ಹೇಳಿದ್ದಾರೆ.
ಕಳೆದ 22 ವರ್ಷಗಳಿಂದ ಕ್ರಿಸ್ ಗೇಲ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳನ್ನು ಆಡುತ್ತಿದ್ದಾರೆ. 79 ಟಿ-20 ಪಂದ್ಯ, 103 ಟೆಸ್ಟ್ ಪಂದ್ಯ ಮತ್ತು 301 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ. 2012 ಮತ್ತು 2012ರಲ್ಲಿ ಟಿ-20 ವಿಶ್ವಕಪ್ ಗೆದ್ದಾಗ ವೆಸ್ಟ್ ಇಂಡೀಸ್ ತಂಡದ ಪ್ರಮುಖ ಆಟಗಾರನಾಗಿದ್ದ ಕ್ರಿಸ್ ಗೇಲ್, ಟಿ-20 ವಿಶ್ವಕಪ್ ನಲ್ಲಿ ಶತಕ ಸಿಡಿಸಿದ್ದ ಮೊದಲ ಆಟಗಾರ ಎಂಬ ಗೌರವಕ್ಕೂ ಪಾತ್ರರಾಗಿದ್ದಾರೆ.
ಇನ್ನೊಂದೆಡೆ, ಕ್ರಿಸ್ ಗೇಲ್ ಅವರು ಐಪಿಎಲ್, ಬಿಗ್ ಬ್ಯಾಷ್, ಬಿಬಿಎಲ್, ಪಾಕಿಸ್ತಾನ ಕ್ರಿಕೆಟ್ ಲೀಗ್, ಶ್ರೀಲಂಕಾ ಕ್ರಿಕೆಟ್ ಲೀಗ್ ಸೇರಿದಂತೆ ಹಲವು ಟೂರ್ನಿಗಳಲ್ಲಿ ಭಾಗವಹಿಸಿದ್ದಾರೆ.
