BAN v IND : ಬಾಂಗ್ಲಾ ವಿರುದ್ಧ ಭಾರತಕ್ಕೆ 5 ರನ್ ಸೋಲು
ಗಾಯದ ಸಮಸ್ಯೆ ನಡುವೆಯೂ ತಂಡಕ್ಕಾಗಿ ಬ್ಯಾಟಿಂಗ್ ಮಾಡಿದ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮ(51*) ಅವರ ಕೆಚ್ಚೆದೆಯ ಆಟ ಹಾಗೂ ಶ್ರೇಯಸ್ ಅಯ್ಯರ್(82) ಅವರ ಜವಾಬ್ದಾರಿಯುತ ಬ್ಯಾಟಿಂಗ್ ನಡುವೆಯೂ ಬಾಂಗ್ಲಾದೇಶ ವಿರುದ್ಧದ 2ನೇ ಏಕದಿನ ಪಂದ್ಯದಲ್ಲಿ ಭಾರತ 5 ರನ್ಗಳ ಸೋಲನುಭವಿಸಿದೆ.
ಢಾಕಾದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಬಾಂಗ್ಲಾದೇಶ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಮೊದಲ ಪಂದ್ಯದಲ್ಲಿ ತಂಡಕ್ಕೆ ರೋಚಕ ಗೆಲುವು ತಂದುಕೊಟ್ಟಿದ್ದ ಮೆಹಿದಿ ಹಸನ್(100*) ಎರಡನೇ ಪಂದ್ಯದಲ್ಲೂ ತಂಡಕ್ಕೆ ಆಸರೆಯಾದರು.
ಪರಿಣಾಮ ಬಾಂಗ್ಲಾ ತಂಡ 50 ಓವರ್ಗಳಲ್ಲಿ 7 ವಿಕೆಟ್ಗೆ 271 ರನ್ಗಳ ಉತ್ತಮ ಮೊತ್ತ ಕಲೆಹಾಕಿತು. ಈ ಟಾರ್ಗೆಟ್ ಚೇಸ್ ಮಾಡಿದ ಟೀಂ ಇಂಡಿಯಾ 50 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 266 ರನ್ಗಳಿಸಲಷ್ಟೇ ಶಕ್ತವಾಯಿತು. ಆ ಮೂಲಕ 5 ರನ್ಗಳ ಸೋಲನುಭವಿಸಿದ ಭಾರತ, ಮೂರು ಪಂದ್ಯಗಳ ಸರಣಿಯಲ್ಲಿ 2-0 ಅಂತರದಲ್ಲಿ ಸರಣಿ ಸೋಲನುಭವಿಸಿತು.
ಮೆಹಿದಿ ಶತಕದ ಅಬ್ಬರ : ಮೊದಲು ಬ್ಯಾಟ್ ಮಾಡಿದ ಬಾಂಗ್ಲಾದೇಶ ತಂಡಕ್ಕೆ ಅಗ್ರ ಕ್ರಮಾಂಕದ ಬ್ಯಾಟ್ಸ್ಮನ್ಗಳಿಂದ ನಿರೀಕ್ಷಿತ ಪ್ರದರ್ಶನ ಸಿಗಲಿಲ್ಲ. ಆರಂಭಿಕರಾದ ಅನ್ಮುಲ್(11) ಹಾಗೂ ನಾಯಕ ಲಿಟನ್ ದಾಸ್(7) ಬಹುಬೇಗನೆ ವಿಕೆಟ್ ಒಪ್ಪಿಸಿದರೆ. ನಂತರ ಬಂದ ಶ್ಯಾಂಟೊ(21), ಶಕೀಬ್(8), ಮುಶ್ಫಿಕರ್(12) ಹಾಗೂ ಅಫೀಫ್(0) ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. ಪರಿಣಾಮ ಅತಿಥೇಯ ತಂಡ 69 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು.
ಆದರೆ ಈ ಹಂತದಲ್ಲಿ ಜೊತೆಯಾದ ಮಹಮದುಲ್ಲಾ(77) ಹಾಗೂ ಮೆಹಿದಿ ಹಸನ್(100*) ತಂಡಕ್ಕೆ ಆಸರೆಯಾದರು. ಭಾರತದ ಬೌಲಿಂಗ್ ದಾಳಿಯನ್ನ ಸಮರ್ಥವಾಗಿ ಎದುರಿಸಿದ ಈ ಜೋಡಿ 7ನೇ ವಿಕೆಟ್ಗೆ 148 ರನ್ಗಳ ಅತ್ಯುತ್ತಮ ಜೊತೆಯಾಟವಾಡಿ ಮಿಂಚಿದರು.
ಮೊದಲ ODI ಪಂದ್ಯದಲ್ಲಿ ಭಾರತದಿಂದ ಗೆಲುವನ್ನ ಕಸಿದುಕೊಂಡ ಮೆಹಿದಿ ಹಸನ್, 83 ಬಾಲ್ಗಳಲ್ಲಿ 8 ಬೌಂಡರಿ, 4 ಸಿಕ್ಸರ್ ಮೂಲಕ ಅಜೇಯ 100* ಸಿಡಿಸಿ ಅಬ್ಬರಿಸಿದರೆ. ಇವರಿಗೆ ಉತ್ತಮ ಸಾಥ್ ನೀಡಿದ ಮಹಮದುಲ್ಲಾ(77) ರನ್ಗಳ ಉಪಯುಕ್ತ ಕಾಣಿಕೆ ನೀಡಿದರು. ಪರಿಣಾಮ ಬಾಂಗ್ಲಾದೇಶ 7 ವಿಕೆಟ್ಗೆ 271 ರನ್ಗಳಿಸಿತು. ಭಾರತದ ಪರ ವಾಷಿಂಗ್ಟನ್ ಸುಂದರ್ 3, ಸಿರಾಜ್ ಹಾಗೂ ಉಮ್ರಾನ್ ಮಲ್ಲಿಕ್ ತಲಾ 2 ವಿಕೆಟ್ ಪಡೆದರು.
ಶ್ರೇಯಸ್, ರೋಹಿತ್ ವ್ಯರ್ಥ ಆಟ:
ಬಾಂಗ್ಲಾ ತಂಡ ನೀಡಿದ 272 ರನ್ಗಳ ಟಾರ್ಗೆಟ್ ಬೆನ್ನತ್ತಿದ ಭಾರತ ಆರಂಭಿಕ ಆಘಾತ ಕಂಡಿತು. ಗಾಯದ ಸಮಸ್ಯೆಗೆ ಸಿಲುಕಿದ ರೋಹಿತ್ ಶರ್ಮ ಬದಲಿಗೆ ಆರಂಭಿಕನಾಗಿ ಕಣಕ್ಕಿಳಿದ ವಿರಾಟ್ ಕೊಹ್ಲಿ(5) ಹಾಗೂ ಶಿಖರ್ ಧವನ್(8) ರನ್ಗಳಿಸಿ ಹೊರನಡೆದರು. ನಂತರ ಬಂದ ವಾಷಿಂಗ್ಟನ್ ಸುಂದರ್(11), ಕೆಎಲ್ ರಾಹುಲ್(14) ಸಹ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. ಆದರೆ ಈ ಹಂತದಲ್ಲಿ ಜೊತೆಯಾದ ಶ್ರೇಯಸ್ ಅಯ್ಯರ್(82) ಹಾಗೂ ಅಕ್ಸರ್ ಪಟೇಲ್(56) ಅರ್ಧಶತಕ ಸಿಡಿಸಿ ತಂಡಕ್ಕೆ ಚೇತರಿಕೆ ನೀಡಿದರು.
ಆದರೆ ಮಧ್ಯಮ ಕ್ರಮಾಂಕದಲ್ಲಿ ಶಾರ್ದೂಲ್ ಥಾಕೂರ್(7), ದೀಪಕ್ ಚಹರ್(11) ಸಹ ಬಹುಬೇಗನೆ ಪೆವಿಲಿಯನ್ ಸೇರಿದರು. ಈ ವೇಳೆ ಗಾಯದ ಸಮಸ್ಯೆ ನಡುವೆಯೂ ತಂಡಕ್ಕಾಗಿ ಬ್ಯಾಟಿಂಗ್ ಮಾಡಿದ ನಾಯಕ ರೋಹಿತ್ ಶರ್ಮ, ಕೇವಲ 28 ಬಾಲ್ಗಳಲ್ಲಿ 3 ಬೌಂಡರಿ, 5 ಸಿಕ್ಸ್ ಮೂಲಕ 51* ರನ್ಗಳಿಸಿದರು ತಂಡಕ್ಕೆ ಗೆಲುವು ತಂದುಕೊಡಲು ಸಾಧ್ಯವಾಗಲಿಲ್ಲ. ಹೀಗಾಗಿ 9 ವಿಕೆಟ್ಗೆ 266 ರನ್ಗಳಿಸಿದ ಭಾರತ 5 ರನ್ಗಳ ಸೋಲೊಪ್ಪಿಕೊಂಡಿತು. ಬಾಂಗ್ಲಾ ಪರ ಹೊಸೈನ್ 3, ಮೆಹಿದಿ ಹಾಗೂ ಶಕೀಬ್ ತಲಾ 2 ವಿಕೆಟ್ ಪಡೆದರು.
