ಝೊಮ್ಯಾಟೋದಲ್ಲಿ ಚೀನಾ ಹೂಡಿಕೆ – ಸಿಬ್ಬಂದಿಗಳಿಂದ ಯೂನಿಫಾರ್ಮ್ ಸುಟ್ಟು ಪ್ರತಿಭಟನೆ
ಕೊಲ್ಕತ್ತಾ, ಜೂನ್ 29: ಲಡಾಖ್ ಗಡಿಯಲ್ಲಿ ಚೀನಾದೊಂದಿಗಿನ ಘರ್ಷಣೆಯಿಂದ 20 ಭಾರತೀಯ ಯೋಧರು ಹುತಾತ್ಮರಾದ ಹಿನ್ನೆಲೆಯಲ್ಲಿ ಫುಡ್ ಡೆಲಿವರಿ ಕಂಪನಿ ಝೊಮ್ಯಾಟೋದ ಸಿಬ್ಬಂದಿಗಳು ಯೂನಿಫಾರ್ಮ್ ಸುಟ್ಟು ಹಾಕಿ ತಮ್ಮ ಆಕ್ರೋಶವನ್ನು ಹೊರಹಾಕಿದ ಘಟನೆ ಬೆಹಲಾದಲ್ಲಿ ವರದಿಯಾಗಿದೆ.
ಕೊಲ್ಕತ್ತಾದ ಫುಡ್ ಡೆಲಿವರಿ ಕಂಪನಿ ಝೊಮ್ಯಾಟೋದ ಕೆಲವು ಡೆಲಿವರಿ ಬಾಯ್ಸ್, ತಮ್ಮ ಯೂನಿಫಾರ್ಮ್ ಟಿ-ಶರ್ಟ್ ಅನ್ನು ಹರಿದು, ಸುಟ್ಟುಹಾಕಿದ್ದಾರೆ. ಚೀನಾದ ಸಂಸ್ಥೆ ಯೊಂದು ಝೊಮ್ಯಾಟೋದಲ್ಲಿ ಕೆಲ ಪ್ರಮಾಣದ ಹೂಡಿಕೆ ಮಾಡಿರುವ ಹಿನ್ನಲೆಯಲ್ಲಿ ಅವರು ತಮ್ಮ ಯೂನಿಫಾರ್ಮ್ ಅನ್ನು ಸುಟ್ಟು ಹಾಕಿ ಪ್ರತಿಭಟಿಸಿರುವುದಾಗಿ ಹೇಳಿದ್ದು, ತಾವು ಕೆಲಸಕ್ಕೂ ರಾಜೀನಾಮೆ ನೀಡಿರುವುದಾಗಿ ತಿಳಿಸಿದ್ದಾರೆ. ಅಷ್ಟೇ ಅಲ್ಲ ಜನತೆಯಲ್ಲಿ ಕೂಡ ಝೊಮ್ಯಾಟೋದಿಂದ ಯಾವುದೇ ಆಹಾರ ಪದಾರ್ಥಗಳನ್ನು ಆರ್ಡರ್ ಮಾಡದಂತೆ ಕೋರಿದ್ದಾರೆ.
2018ರಲ್ಲಿ ಚೀನಾ ಮೂಲದ ಆಯಂಟ್ ಫೈನಾನ್ಶಿಯಲ್, ಝೊಮ್ಯಾಟೋದಲ್ಲಿ 14.7 ಪರ್ಸೆಂಟ್ ಶೇರ್ ಗಾಗಿ 210 ಮಿಲಿಯನ್ ಡಾಲರ್(ಅಂದಾಜು ₹1,588 ಕೋಟಿ) ಹೂಡಿಕೆ ಮಾಡಿದೆ. ಚೀನಾದ ದೈತ್ಯ ಇ ಕಾಮರ್ಸ್ ಕಂಪನಿ ಅಲಿಬಾಬಾದ ಒಂದು ಭಾಗವಾಗಿರುವ ಆಯಂಟ್ ಫೈನಾನ್ಶಿಯಲ್, ಭಾರತದಿಂದ ಲಾಭ ಪಡೆದು ಕೊಳ್ಳುತ್ತಿದ್ದಾರೆ. ಅಷ್ಟೇ ಅಲ್ಲ ನಮ್ಮ ದೇಶದ ಸೇನೆಯ ಮೇಲೆ ಆಕ್ರಮಣ ಮಾಡಿ, ನಮ್ಮ ಭೂಭಾಗವನ್ನು ಕಬಳಿಸಲು ಪ್ರಯತ್ನಿಸುತ್ತಿದ್ದಾರೆ. ನಾವು ಇದನ್ನೆಲ್ಲಾ ಸಹಿಸಿಕೊಳ್ಳಲು ತಯಾರಿಲ್ಲ ಎಂದು ಒಬ್ಬ ಸಿಬ್ಬಂದಿ ಹೇಳಿದರೆ, ಇನ್ನೊಬ್ಬರು ನಾವು ಬೇಕಾದರೆ ಹಸಿವೆಯಿಂದ ನರಳಲು ತಯಾರಿದ್ದೇವೆ, ಆದರೆ ಚೀನಾ ಹೂಡಿಕೆ ಮಾಡಿರುವ ಸಂಸ್ಥೆಗಳಲ್ಲಿ ಕೆಲಸ ಮಾಡಲು ತಯಾರಿಲ್ಲ ಎಂದು ಹೇಳಿದ್ದಾರೆ.
ಝೊಮ್ಯಾಟೋ ಸಂಸ್ಥೆ ಸಿಬ್ಬಂದಿಗಳ ಪ್ರತಿಭಟನೆ ಕುರಿತು ಯಾವುದೇ ಹೇಳಿಕೆ ನೀಡಿಲ್ಲ. ಕಳೆದ ಮೇ ತಿಂಗಳಲ್ಲಿ ಕೊರೊನಾ ಸೋಂಕಿನ ಹಿನ್ನೆಲೆಯಲ್ಲಿ ಝೊಮ್ಯಾಟೋ ಸುಮಾರು 520 ನೌಕರರನ್ನು ಕೆಲಸದಿಂದ ವಜಾ ಮಾಡಿತ್ತು. ಹಾಗಾಗಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದ ಸಿಬ್ಬಂದಿಗಳು ಕೆಲಸದಿಂದ ವಜಾಗೊಂಡವರೇ ಎಂದು ಕೂಡ ತಿಳಿದುಬಂದಿಲ್ಲ.
