ಧರ್ಮಸ್ಥಳದಲ್ಲಿ ನಡೆದಿರುವ ಅಪರಾಧ ಪ್ರಕರಣಗಳ ಕುರಿತು ರಾಜ್ಯ ಸರ್ಕಾರವು ವಿಶೇಷ ತನಿಖಾ ತಂಡ (SIT) ರಚಿಸಿದೆ. ಇದನ್ನು ವಿರೋಧಿಸಿ ಕೆಲವು ಬಿಜೆಪಿ ನಾಯಕರು ಇದು ರಾಜಕೀಯ ಪ್ರೇರಿತ ತನಿಖೆ ಎಂದು ಆರೋಪಿಸಿದ್ದಾರೆ. ಆದರೆ, ಈ ಆರೋಪಕ್ಕೆ ಉತ್ತರವಾಗಿ ದಕ್ಷಿಣ ಕನ್ನಡ ಜಿಲ್ಲೆಯ ಉಸ್ತುವಾರಿ ಸಚಿವ ದಿನೇಶ್ ಗುಂಡೂರಾವ್ ಸ್ಪಷ್ಟನೆ ನೀಡಿದ್ದಾರೆ.
ಧರ್ಮಸ್ಥಳ ಪ್ರಕರಣದಲ್ಲಿ ಸಾಕಷ್ಟು ಅನುಮಾನಾಸ್ಪದ ಘಟನೆಗಳು ನಡೆದಿವೆ. SIT ತನಿಖೆ ನಡೆಸಿದ್ರೆ ಎಲ್ಲ ಸತ್ಯಾಂಶಗಳು ಬಯಲಾಗುತ್ತವೆ. ಇದು ರಾಜಕೀಯ ಪ್ರೇರಿತ ತನಿಖೆ ಅಲ್ಲ. ಬಿಜೆಪಿ ನಾಯಕರು ಈ ರೀತಿ ಮಾತನಾಡೋದು ಸರಿಯಲ್ಲ. ಅವರ ಮಾತಿಗೆ ಯಾವುದೇ ಆಧಾರವಿಲ್ಲ. ಇದರ ಹಿಂದೆ ಕೆಲವು ಗಂಭೀರ ಆರೋಪಗಳಿವೆ, ಕೆಲವು ವಿಷಯಗಳನ್ನು ಮುಚ್ಚಿ ಹಾಕಲಾಗಿದೆ ಅನ್ನೋ ಶಂಕೆ ಇದೆ, ಎಂದು ಸಚಿವ ದಿನೇಶ್ ಗುಂಡೂರಾವ್ ಹೇಳಿದ್ದಾರೆ.
ಸ್ಥಳೀಯ ನಾಯಕರಿಗೆ ಸವಾಲು:
ಇದು ರಾಜಕೀಯ ಪ್ರೇರಿತ ಅಂತ ಹೇಳೋದು ಬೇಡ. ದಕ್ಷಿಣ ಕನ್ನಡ ಜಿಲ್ಲೆಯ ಸ್ಥಳೀಯ ಮುಖಂಡರು ತಮಗೆ ಏನೇನು ಗೊತ್ತಿದೆಯೋ ಅದನ್ನ ಬಹಿರಂಗಪಡಿಸಲಿ. ಎಲ್ಲಿ ತಪ್ಪಿದೆ, ಯಾರ ತಪ್ಪಿದೆ ಎಂಬುದು ತನಿಖೆಯಿಂದಲೇ ಗೊತ್ತಾಗುತ್ತದೆ ಎಂದು ಗುಂಡೂರಾವ್ ಹೇಳಿದ್ದಾರೆ.
ರಾಜ್ಯ ಸರ್ಕಾರದ ಉದ್ದೇಶ, ಸತ್ಯವನ್ನು ಹೊರತೆಗೆದು, ನ್ಯಾಯ ಒದಗಿಸುವುದು. ಯಾವುದೇ ಪಕ್ಷದ ನಾಯಕನ ಮೇಲೆ ಅಥವಾ ಧರ್ಮಸ್ಥಳದ ಮೇಲೆ ರಾಜಕೀಯ ಸುಳಿವಿಲ್ಲ. ಅಪರಾಧ ನಡೆದಿದೆಯೋ ಇಲ್ಲವೋ ಎಂದು ತನಿಖೆಯಿಂದಲೇ ಪತ್ತೆಯಾಗುತ್ತದೆ. ನ್ಯಾಯಬದ್ಧ ತನಿಖೆಗೆ ಸರ್ಕಾರ ಬದ್ಧವಾಗಿದೆ, ಎಂದು ದಿನೇಶ್ ಗುಂಡೂರಾವ್ ಸ್ಪಷ್ಟಪಡಿಸಿದ್ದಾರೆ.
ಧರ್ಮಸ್ಥಳ ಕೇಸ್ ಹಿನ್ನೆಲೆ:
ಇತ್ತೀಚೆಗೆ ಧರ್ಮಸ್ಥಳದಲ್ಲಿ ಕೆಲವು ಅಪರಾಧ ಪ್ರಕರಣಗಳು ಬೆಳಕಿಗೆ ಬಂದಿದ್ದು, ಇದರಿಂದ ಜಿಲ್ಲೆಯ ಜನರಲ್ಲಿ ಆತಂಕ ಉಂಟಾಗಿದೆ. ಈ ಕುರಿತು ಸರಿಯಾದ ತನಿಖೆ ನಡೆಯಬೇಕು ಎಂಬ ಒತ್ತಡದ ನಡುವೆ ಸರ್ಕಾರ SIT ರಚಿಸಿದ್ದು, ಇದೀಗ ಇದರ ಬಗ್ಗೆ ಸಾಕಷ್ಟು ರಾಜಕೀಯ ಚರ್ಚೆ ನಡೆಯುತ್ತಿದೆ.
