ರಾಜ್ಯದ ಲಕ್ಷಾಂತರ ಸರ್ಕಾರಿ ನೌಕರರಿಗೆ ಸಂತಸದ ಸುದ್ದಿಯೊಂದನ್ನು ಸರ್ಕಾರ ನೀಡಿದ್ದು, ತುಟ್ಟಿಭತ್ಯೆ (Dearness Allowance – DA) ಶೇ.1.50ರಷ್ಟು ಹೆಚ್ಚಿಸಲು ಅಧಿಕೃತ ಆದೇಶ ನೀಡಿದೆ. ಈ ಕುರಿತು ರಾಜ್ಯ ಸರ್ಕಾರಿ ನೌಕರರ ಸಂಘದ ರಾಜ್ಯಾಧ್ಯಕ್ಷ ಸಿ.ಎಸ್. ಷಡಕ್ಷರಿ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ.
ಹೆಚ್ಚಳದ ನಂತರ ನೌಕರರ DA ಶೇ.10.75ರಿಂದ ಶೇ.12.25ಕ್ಕೆ ಏರಿಕೆ ಆಗಿದ್ದು, ಈ ಹೊಸ ದರ 2025ರ ಜನವರಿ 1ರಿಂದ ಅನ್ವಯವಾಗಲಿದೆ. ರಾಜ್ಯ ಸರ್ಕಾರದ ಈ ತೀರ್ಮಾನದಿಂದ ನೌಕರರ ಮಾಸಿಕ ವೇತನದಲ್ಲಿ ಪ್ರಮುಖ ಬದಲಾವಣೆ ಕಂಡುಬರಲಿದೆ. ಇದರಿಂದಾಗಿ ನೌಕರರಿಗೆ ಹೆಚ್ಚುವರಿ ಹಣ ಲಭಿಸುವ ಸಾಧ್ಯತೆ ಇದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಸಿ.ಎಸ್. ಷಡಕ್ಷರಿ, ನಮ್ಮ ನೌಕರರ ಪರವಾಗಿ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಹಾಗೂ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಧನ್ಯವಾದಗಳು. ಈ ನಿರ್ಧಾರ ನೌಕರರ ಆತ್ಮಸ್ಥೈರ್ಯ ಹಾಗೂ ಕಾರ್ಯಪ್ರವೃತ್ತತೆಗೆ ಉತ್ತೇಜನ ನೀಡುತ್ತದೆ ಎಂದು ತಿಳಿಸಿದ್ದಾರೆ.
ಇದೀಗ ನೌಕರರ ನಡುವೆ ಸಂತಸದ ವಾತಾವರಣ ಮನೆಮಾಡಿದ್ದು, DA ಹೆಚ್ಚಳದ ಈ ಘೋಷಣೆ ಅವರಿಗೆ ಹೊಸ ಆಶಾವಾದ ನೀಡಿದಂತಾಗಿದೆ.
