ಐಸಿಸಿ ಆಯ್ಕೆ ಮಾಡಿರೋದು ಐಪಿಎಲ್ ತಂಡ.. ಟಿ-20 ವಿಶ್ವ ತಂಡವನ್ನಲ್ಲ- ಶೋಯಿಬ್ ಅಖ್ತರ್ ಆಕ್ರೋಶ
ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿಯು ಐಸಿಸಿ ದಶಕದ ಟಿ-20, ಏಕದಿನ ಮತ್ತು ಟೆಸ್ಟ್ ತಂಡಗಳನ್ನು ಆಯ್ಕೆ ಮಾಡಿದೆ.
ಈ ತಂಡಗಳಲ್ಲಿ ಪಾಕಿಸ್ತಾನ ಆಟಗಾರರಿಗೆ ಅವಕಾಶವೇ ಸಿಕ್ಕಿಲ್ಲ. ಮೂರು ಮಾದರಿಯ ತಂಡಗಳಲ್ಲೂ ಪಾಕ್ ಆಟಗಾರರು ಇಲ್ಲ. ಬಹುತೇಕ ಆಟಗಾರರು ಟೀಮ್ ಇಂಡಿಯಾ ಮತ್ತು ಇಂಗ್ಲೆಂಡ್ ಆಟಗಾರರಿದ್ದಾರೆ. ಅಲ್ಲದೆ ಟೆಸ್ಟ್ ತಂಡಕ್ಕೆ ವಿರಾಟ್ ಕೊಹ್ಲಿ ಮತ್ತು ಏಕದಿನ ಮತ್ತು ಟಿ-ಟ್ವೆಂಟಿ ತಂಡಗಳಿಗೆ ಮಹೇಂದ್ರ ಸಿಂಗ್ ಧೋನಿಯವರನ್ನು ಆಯ್ಕೆ ಮಾಡಿದೆ.
ಇದೀಗ ಪಾಕಿಸ್ತಾನದ ಮಾಜಿ ವೇಗದ ಬೌಲರ್ ಶೋಯಿಬ್ ಅಖ್ತರ್ ಐಸಿಸಿ ವಿರುದ್ಧ ಕಿಡಿ ಕಾರಿದ್ದಾರೆ.
ಐಸಿಸಿ ಆಯ್ಕೆ ಮಾಡಿರೋದು ಐಪಿಎಲ್ ತಂಡವನ್ನು. ಟಿ-ಟ್ವೆಂಟಿ ತಂಡವನ್ನಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಮುಖ್ಯವಾಗಿ ಪಾಕಿಸ್ತಾನ ತಂಡದ ನಾಯನ ಬಾಬರ್ ಅಝಾಮ್ ಅವರನ್ನು ಐಸಿಸಿ ದಶಕದ ಟಿ- 20 ತಂಡದಲ್ಲಿ ಸೇರಿಸಿಕೊಳ್ಳದಿರುವ ಬಗ್ಗೆ ಅಖ್ತರ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿಯು ಪಾಕಿಸ್ತಾನ ಐಸಿಸಿ ಸದಸ್ಯತ್ವವನ್ನು ಪಡೆದುಕೊಂಡಿದೆ ಎಂಬುದನ್ನು ಮರೆತಂತಿದೆ. ಬಾಬರ್ ಅಝಮ್ ಅವರು ಸದ್ಯ ಐಸಿಸಿ ಟಿ-ಟ್ವೆಂಟಿಯ ನಂಬರ್ ವನ್ ಬ್ಯಾಟ್ಸ್ ಮೆನ್. ಅಲ್ಲದೆ ಪಾಕಿಸ್ತಾನದ ಪುರುಷ ಮತ್ತು ಮಹಿಳಾ ಆಟಗಾರರನ್ನು ಈ ತಂಡಗಳಲ್ಲಿ ಪರಿಗಣಿಸಿಲ್ಲ. ನಿಮ್ಮ ಐಸಿಸಿ ದಶಕದ ಟಿ-ಟ್ವೆಂಟಿ ತಂಡ ನಮಗೆ ಬೇಕಿಲ್ಲ. ನೀವು ಆಯ್ಕೆ ಮಾಡಿರೋದು ಐಪಿಎಲ್ ತಂಡವನ್ನು. ವಿಶ್ವ ತಂಡವನ್ನಲ್ಲ ಅಂತ ಅಖ್ತರ್ ಖಾರವಾಗಿಯೇ ಪ್ರತಿಕ್ರಿಯೆ ನೀಡಿದ್ದಾರೆ.
ಇನ್ನು ಐಸಿಸಿ ಧೋರಣೆಯ ಬಗ್ಗೆಯೂ ಕಿಡಿ ಕಾರಿರುವ ಶೋಯಿಬ್ ಅಖ್ತರ್, ಐಸಿಸಿಗೆ ಬೇಕಾಗಿರೋದು ದುಡ್ಡು ಮಾತ್ರ. ಮೂರು ವರ್ಷಗಳ ಅಂತರದಲ್ಲಿ ಎರಡು ವಿಶ್ವ ಕಪ್ ಟೂರ್ನಿಗಳನ್ನು ಆಡಿಸ್ತಾರೆ. ಏಕದಿನ ಕ್ರಿಕೆಟ್ ನಲ್ಲಿ ಎರಡು ಹೊಸ ಚೆಂಡುಗಳು, ಮೂರು ಪವರ್ ಪ್ಲೇ ನಿಯಮಗಳನ್ನು ಜಾರಿಗೆ ತಂದಿದ್ದಾರೆ. 70ರ ದಶಕದ ಕ್ರಿಕೆಟ್ ಎಲ್ಲಿ, ಈಗಿನ ಕ್ರಿಕೆಟ್ ಎಲ್ಲಿ ಎಂದು ಅಖ್ತರ್ ಪ್ರಶ್ನೆ ಮಾಡಿದ್ದಾರೆ. ದುಡ್ಡಿನ ಹಿಂದೆ ಬಿದ್ದಿರುವ ಐಸಿಸಿಗೆ ನೇರ ಪ್ರಸಾರದ ಹಕ್ಕು, ಜಾಹಿರಾತು ಬಂದ್ರೆ ಸಾಕು. ನಿಜವಾದ ಕ್ರಿಕೆಟ್ ಬೇಕಾಗಿಲ್ಲ ಎಂದು ಹೇಳಿದ್ದಾರೆ.
ಒಟ್ಟಿನಲ್ಲಿ ಸದಾ ಸುದ್ದಿಯಲ್ಲಿರುವ ಹಾಗೂ ವಿವಾದಾತ್ಮಕ ಹೇಳಿಕೆ ನೀಡುತ್ತಿರುವ ಶೋಯಿಬ್ ಅಖ್ತರ್ ಇದೀಗ ಐಸಿಸಿ ವಿರುದ್ಧವೇ ಕೆಂಡ ಕಾರಿದ್ದಾರೆ.
