Ind Vs Sa : ಕೊನೆ ಪಂದ್ಯ ಗೆದ್ದ ದಕ್ಷಿಣ ಆಫ್ರಿಕಾ, ಟೀಮ್ ಇಂಡಿಯಾಗೆ ಸರಣಿ
ದಕ್ಷಿಣ ಆಫ್ರಿಕಾ ವಿರುದ್ಧದ ಕೊನೆಯ ಟಿ 20 ಪಂದ್ಯದಲ್ಲಿ ಟೀಂ ಇಂಡಿಯಾ 49 ರನ್ ಗಳಿಂದ ಸೋಲು ಕಂಡಿದೆ. ಆದ್ರೂ ಮೂರು ಪಂದ್ಯಗಳ ಟಿ 20 ಸರಣಿಯನ್ನು ಟೀಂ ಇಂಡಿಯಾ 2 – 1 ರಿಂದ ವಶಕ್ಕೆ ಪಡೆದುಕೊಂಡಿದೆ.
ಮೊದಲು ಬ್ಯಾಟಿಂಗ್ ಮಾಡಿದ ದಕ್ಷಿಣ ಆಫ್ರಿಕಾ ತಂಡ ನಿಗದಿತ 20 ಓವರ್ ಗಳಲ್ಲಿ ಮೂರು ವಿಕೆಟ್ ಗೆ 227 ರನ್ ಗಳಿಸಿತು.
ದಕ್ಷಿಣಾಫ್ರಿಕಾ ನಾಯಕ ಬವುಮಾ 3 ರನ್, ಡಿ ಕಾಕ್ 43 ಎಸೆತಗಳಲ್ಲಿ 68 ರನ್ ಗಳಿಸಿದರು. ಸ್ಟಬ್ಸ್ 18 ಎಸೆತಗಳಲ್ಲಿ 23 ರನ್, ಡೇವಿಡ್ ಮಿಲ್ಲರ್ 5 ಎಸೆತಗಳಲ್ಲಿ 19 ರನ್ ಗಳಿಸಿದರು.
ಮುಖ್ಯವಾಗಿ ರೊಸ್ಸೌ 48 ಎಸೆತಗಳಲ್ಲಿ 7 ಬೌಂಡರಿ, 8 ಸಿಕ್ಸರ್ ಗಳೊಂದಿಗೆ 100 ರನ್ ಗಳಿಸಿದರು. ಆ ಮೂಲಕ ರೊಸ್ಸೌ ತಮ್ಮ ಟಿ 20 ಕ್ರಿಕೆಟ್ ನಲ್ಲಿ ಚೊಚ್ಚಲ ಶತಕ ಸಿಡಿಸಿದರು.
228 ಗುರಿಯನ್ನು ಹಿಂಬಾಲಿಸಿದ ಟೀಮ್ ಇಂಡಿಯಾದ ಆರಂಭ ಕಳಪೆಯಾಗಿತ್ತು. ರೋಹಿತ್ ಶರ್ಮಾ ನಿರಾಸೆ ಅನುಭವಿಸಿದರು.
ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಇಳಿದ ಶ್ರೇಯಸ್ ಅಯ್ಯರ್ ಅವಕಾಶ ಬಳಸಿಕೊಳ್ಳುವಲ್ಲಿ ವಿಫಲರಾದರು. ಕೇವಲ 4 ರನ್ ಆಗುವಷ್ಟರಲ್ಲಿ ಟೀಮ್ ಇಂಡಿಯಾ 2 ವಿಕೆಟ್ ಕಳೆದುಕೊಂಡಿತು.
ಮೂರನೇ ವಿಕೆಟ್ ಗೆ ಆರಂಭಿಕ ರಿಷಭ್ ಪಂತ್ ಅವರನ್ನು ಸೇರಿಕೊಂಡ ಭರವಸೆಯ ಆಟಗಾರ ದಿನೇಶ್ ಕಾರ್ತಿಕ್ ಜೋಡಿ ಸಮಯೋಚಿತ ಬ್ಯಾಟಿಂಗ್ ನಡೆಸಿತು.
ಈ ಜೋಡಿ 41 ರನ್ ಸಿಡಿಸಿತು. ಆರಂಭಿಕರಾಗಿ ಕಣಕ್ಕೆ ಇಳಿದ ರಿಷಭ್ ಪಂತ್ 27 ರನ್ ಗಳಿಸಿ ಔಟ್ ಆದರು.
ನಾಲ್ಕನೇ ವಿಕೆಟ್ ಗೆ ದಿನೇಶ್ ಹಾಗೂ ಸೂರ್ಯಕುಮಾರ್ ಜೋಡಿ ಸಹ 33 ರನ್ ಸೇರಿಸಿತು.
ಸೂರ್ಯ ಕುಮಾರ್ ಯಾದವ್ 8 ರನ್, ದಿನೇಶ್ ಕಾರ್ತಿಕ್ 46 ರನ್, ಹರ್ಷಲ್ ಪಟೇಲ್ 17, ದೀಪಕ್ ಚಹಾರ್ 31, ಉಮೇಶ್ ಯಾದವ್ 20 ರನ್ ಗಳಿಸಿದರು.
ಅಂತಿಮವಾಗಿ ಟೀಮ್ ಇಂಡಿಯಾ 18.3 ಓವರ್ ಗಳಲ್ಲಿ 178 ರನ್ ಗಳಿಗೆ ಸರ್ವಪತನ ಹೊಂದಿತು.
ದಕ್ಷಿಣ ಆಫ್ರಿಕಾ ಪರ ಡ್ವೈನ್ ಪ್ರಿಟೋರಿಯಸ್ 3, ವೇನ್ ಪರ್ನೆಲ್, ಲುಂಗಿ ಎನ್ ಗಿಡಿ, ಕೇಶವ್ ಮಹಾರಾಜ್ ತಲಾ ಎರಡು ವಿಕೆಟ್ ಪಡೆದರು.
